‘E Atoro Mairai i Taua Vine Nei’!

E 12 aronga mata tutaka tei aaere i te tiroa e te tipoto o te Enua Taputouia. Kua akakite a Mose kia ratou e kia akara aereia atu ana i te aronga te noo ra i reira e kia apai mai i te au mea tanutanu a te enua. Eaa tikai te mea ta ratou i reka ana? Kare i mamao roa ana mei ia Heberona, kua kiteaia mai e ratou tetai kainga vine e maatamaata tikai te vine e e rua nga tangata mata tutaka tei apai atu i te reira e tai ua kaviri. E mea umere tikai te mea tanutanuia i tapa ai te aronga mata tutaka i taua ngai te uaua ra e ko te “peka vai ko Esekola.”​—Numero 13:21-24.

I te 19 anere mataiti, kua ripoti mai tetai tangata turoto ki Paretaina e: “Te tapokiia nei rai a Esekola, me kore te o Vine, . . . e te au vine, e meitaki tikai e e mamaata tikai te au vine i Paretaina.” Noatu e e meitaki tikai te au vine a Esekola, e maata te au vine memeitaki ta Paretaina i akatupu i te tuatau o te Pipiria. Te akakite maira te au rekoti a Aiphiti e no Kanaana mai te ngai i okoia mai ei e te au Pharao te uaina.

“Ko te au tua tokatoka o te maunga [o Paretaina], ma tona oneone kirikiri e te au ngai vera ra, te reva maana, e te topa viviki mai anga te au ua anuanu ra, kapiti taokotai pouroaia mai te reira kua riro mai ko tetai enua no te au vine,” i akataka mai ei te puka The Natural History of the Bible. Te akakite maira a Isaia e i tetai au ngai tei ikiia ra okotai tauatini te vine i roto i reira.​—Isaia 7:23.

‘Te Enua Vine’

Kua akakite a Mose ki te iti tangata o Iseraela e ka noo ratou i roto i tetai enua “vine, e te suke, e te remuna.” (Deuteronomi 8:8) E tau ei ki ta Baker Encyclopedia of Bible Plants, “e maata tikai te au vine i Paretaina taito e kua kiteaia mai te ngai i keruia te maata anga o  te au ua o te vine.” Uua meitaki tikai te au vine i te Enua Taputouia e i te mataiti 607 M.T.N. te ninaia anga a Iuda e te vaeau a Nebukanesa, “kua akaputuputu iora [te au tangata tei toe mai i te enua ra] i te wina e te au kai mou ra e manganui.”​—Ieremia 40:12; 52:16.

E mamaata maira te uaina, ka akono meitaki te aronga tanu kai ngati Iseraela i ta ratou au vine. Te akataka maira te puka a Isaia e akapeea tetai tangata ngati Iseraela akono vine i te ko aere anga i tetai ngai i runga i tetai maunga e ka akaatea i tetai au toka mamaata i mua ake ka tanu ei i tana “vine meitaki.” Penei ka akatu aia i tetai patu toka, tana i tama ana mei te one. Na teia patu nei e paruru i tona kainga vine kia kore e takatakaiia e te puakatoro pera katoa ei paruru anga mei te au tuori, te au puaka taetaevao, e te au keia. Penei ka pao katoa aia i tetai taomi anga uaina e ka akatu i tetai manga are tiaki ei ngai marumaru no te nooanga marumaru i te tuatau kokoti anga me te anoano maataia ra tetai atu paruru anga. I muri ake i teia angaanga maata, ka tapapa aia i tetai kokoti anga meitaki no te au vine.​—Isaia 5:1, 2. *

E akapapu ei i tetai kokoti anga meitaki, ka tipupu putuputu aere te tangata tanu kai i te vine kia akamaata mai i te ua e ka ko aere aia i te one kore ei te ngangaere, te au taratara, e te au tarataramoa e tupu mai. Penei ka pipi aere aia i te kainga vine ki te vai i te tuatau maana me kare oki e maata roa ana te ua i te tuatau akatupu anga.​—Isaia 5:6; 18:5; 27:2-4.

E tuatau mataora tikai te tuatau kotikoti anga vine i te ope roa o te tuatau maana. (Isaia 16:10) E toru taramo tei roto te tata anga i runga ake te kapiti maira i te tuatua e “na runga i te koê no Gata mai.” (Salamo 8, 81, e te Sal 84) Te taiku ra teia tuatua papu kore i te akatangi anga imene i te “wina no te taomi anga” i roto i te urianga Septuagint e penei te akakite ra e i imene ana te au ngati Iseraela i teia au taramo nei i te tuatau kokotianga vine. Noatu e kua riro te au vine e ei maani anga i te uaina, kua kai katoa te ngati Iseraela i te au vine i para me kare ka tamaro ratou i te reira ei ariki vine, penei ka maani ratou i te reira ei varaoa.​—2 Samuela 6:19; 1 Paraleipomeno 16:3.

Te Vine o Iseraela

E maata te au taime te akataka maira te Pipiria i te au tangata o te Atua ei vine​—e tuatua akaaiteanga tau i te akamanako anga i te puapinga maata o te vine ki te ngati Iseraela. I roto ia Salamo 80, kua akaaite a Asapha i te iti tangata o Iseraela ki tetai vine ta Iehova i  tanumia i Kanaana. Kua vaere aereia te enua kia aka te vine a Iseraela e kia tupu meitaki mai. I te au mataiti e topa atura, kua pueu tona au paruru. Kare te iti tangata e irinaki akaou ana kia Iehova, e kua akaateaia mai e ia tana paruru anga. Mei tetai puaka taetaevao te uritumu ra i tetai kainga vine, kua noniia e te au enemi o te pa enua ra te au apinga a Iseraela. Kua pure a Asapha e kia tauturu mai a Iehova i te iti tangata kia akaoki akaouia mai tona kaka mei muatangana ra. “E atoro mairai koe i taua vine nei,” tana ia i pati atu.​—Salamo 80:8-15.

Kua akaaite a Isaia i te ‘ngutuare o Iseraela’ ki tetai kainga vine te akatupu marie maira i te “vine kava,” me kare i te au vine pirau. (Isaia 5:2, 7) E meangiti ake te au vine kava i te au vine tei tanutanuia e kare e kiko roa ana, kapi tikaiia a roto i te vine e te ua. Puapinga kore ua te au vine kava no te maani anga i te uaina e no te kai anga​—e akatutu anga tau no te iti tangata apoteiti e ua kino tona kare i te tuatua tika. Kare ko te Tanu Kai tei apa no runga i teia ua puapinga kore ua. Kua rave a Iehova i te au mea pouroa tei rauka iaia kia puapingaia te iti tangata. “Eaa ua atu te ravenga toe i taua kainga vine noku ra, mari ra i taku i rave ra?” i ui ei aia.​—Isaia 5:4.

No te mea e kare te vine o Iseraela i uua mai ana, kua akamatakite atura a Iehova kia ratou e ka vavai aia i te patu tana i patu tei koropini i tona au tangata. Kare aia e tipupu akaou i tana vine akatutu me kore e keru i tona one. Kare te ua e topa mai ki raro ta te ua e inangaro ra, e ka tapokiia te kainga vine ra e te au rakau taratara e te tarataramoa.​—Isaia 5:5, 6.

Kua totou a Mose e no to Iseraela tu apoteiti ka mae to ratou au kainga vine. “Ka tanu koe i te kainga vine, e ka tope oki, kare ra koe e inu i te wina, kare oki e akiaki; na te anue ïa e kai.” (Deuteronomi 28:39) Ka mae tetai vine i nga mea ra ua me ka totoro atu te anue ki roto i te tumu tikai o te rakau e te kai anga ia roto roa.​—Isaia 24:7.

“Te Vine Mou”

Mei ta Iehova akaaite anga ia Iseraela ki tetai vine, kua tuatua a Iesu i taua tuatua akaaite. Ko ta te katoatoa e kite ra e ko te Kaingamanga Openga, kua akakite a Iesu ki tana au pipi e: “Ko au te vine mou, e ko taku Metua te tanu-kai.” (Ioane 15:1) Kua akaaite a Iesu i tana au pipi ki te au rara o te vine. I raro roa tikai i te tumu i rauka mai ei te maroiroi o te vine, kia kapiti taokotai katoa rai te au pipi a Karaiti kiaia. “I taka ke kotou iaku ra, kare rava e mea e tika ia kotou,” i karanga ai a Iesu. (Ioane 15:5) No te ua i tanutanu ei te aronga tanu kai i tetai vine, e te kite ra a Iehova e ka akatupu mai tona au tangata i te ua i te pae vaerua. Te oronga maira teia i te akamerengo anga e te kaka ki te Atua, te Tanu Kai o te vine.​—Ioane 15:8.

No runga i tetai vine tikai, tei runga i te tipu anga e te tama anga e uua mai ei, e te taiku ra a Iesu ki taua nga angaanga. E rua paa taime i te mataiti ka tipupu  aere te tangata akono i te vine kia maata mai te ua. I te au marama paroro, penei ka tipu takiriia tetai au rara o te vine. Te maata anga o te au rara o tera ake mataiti i topa akenei ka akaateaia e te tangata tanu kai. Penei ka akaruke aia e toru me kare e a rara ki runga i te tumu, e tai me kare e rua nionio i runga i te au rara tataki tai. Aiteite ua ki te au nionio o tera atu mataiti, ka tupu mai teia au nionio ou nei ei au rara uua i tera mai tuatau maana. Me oti iaia te tipupu aere anga, ka tutungi i reira te tangata akono vine i te au rara tei tipuia.

Kua akataka mai a Iesu i teia tipu anga pakari e: “Ko te tangata kare e topiri mai iaku ra, e akarukeia ïa mei te rara ra, marō atura ïa; ko te akaputuia ra, tiria atura ïa ki roto i te ai, pou atura ïa i te ka.” (Ioane 15:6) Noatu e kare te au rara i tupu ake i runga i te vine i teia tuatau, ka rave akaouia tetai tipuanga i te tuatau tupu anga rau.

“E te au rara ua kore katoa i roto iaku nei, nana ïa e tipu ke atu,” i karanga ai a Iesu. (Ioane 15:2) Penei te taiku ra teia ki te tipu anga ka raveia i muri ake, i muri ake te ua maata mai anga te vine ra i tetai nionio ou e kite meitakiia atu ei te kaui o te vine. Ka akarakara meitaki aere te tangata akono vine i te au rara ou kia iki oki e ko teea te ua maira e ko teea kare e ua mai ana. Me akaruke ua ia ki runga i te vine, ka ngoteia e te ua kare e ua ana te kai e te vai no raro roa mai i te tumu. No reira, ka tipu te tanu kai i teia au rara ua kore kia tae te rito o te vine ki te au rara te ua maira.

Te taiku maira i reira a Iesu ki te ravenga tama anga. “E te au rara ua katoa, nana ïa e tope, kia maata ua atu te ua,” i akataka mai ei aia. (Ioane 15:2) Me ka topeia te au rara ua kore, ka akara meitaki katoa te tangata akono vine i te au rara te uua maira. I raro roa i te tumu o te rara e ua maira, me kiteaia mai e ia te au nionio rikiriki ou ua ka tipu katoaia te reira. Me akaruke ua ia kia tupu mai, ka ngoteia e te au nionio rikiriki ou ua ra te tapou mei te vine penei te oronga ra i te tamauu anga puapinga maata no te au vine. Penei ka tope katoaia etai au rau mamaata kia ata mai te ra ki runga i te au vine ou. E au takainga meitaki teia no te au rara uua kia maata te au ua.

“Kia Maata to Kotou Ua Anga”

Te akatutu maira te au rara akatutu o “te vine mou” i te au Kerititiano akatainuia. Inara, kia akapapu katoa te “mamoe ke atu” ia ratou uaorai ei au pipi uua na Karaiti. (Ioane 10:16) Ka rauka katoa ia ratou i te ua ‘maata mai i te ua’ e te oronga anga i te kaka ki to ratou Metua i te rangi. (Ioane 15:5, 8) Ta Iesu akatutuanga no te vine mou te akamaaraara maira kia tatou e tei runga te ora i to tatou kapiti taokotai anga kia Karaiti e te akatupu anga i te au ua memeitaki i te pae vaerua. Kua karanga a Iesu e: “I akono kotou i taku au akauenga, e vai akaperepereia atu kotou e au; mei iaku i akono i te au akauenga a taku Metua ra, e e vai akaperepereia mai au e ia.”​—Ioane 15:10.

I to Zekaria tuatau, kua taputou te Atua ki tetai toenga akarongo mou o te ngati Iseraela e ka rekareka akaou te enua e ‘tupu mai oki te ua o te au, e ua mai te vine i tona ua, e tuku mai te enua i tana kai.’ (Zekaria 8:12; NW) Kua taangaanga katoaia te vine i te akataka anga mai i te ponuiaau ta te au tangata o te Atua ka rekareka i te tuatau o to Karaiti Tutaraanga Tauatini Mataiti. Kua totou a Mika e: “E noo ra ratou ravarai ki raro ake i tana uaorai vine, e ki raro ake i tana uaorai suke, e kare tetai e akamataku mai; ko te vaa oki o Iehova Sabaota ra, tei tuatua mai.”​—Mika 4:4.

[Tataanga Rikiriki i Raro]

[Tutu i te kapi 18]

Koi mae ua akenei tetai vine

[Tutu i te kapi 18]

Tipupu anga i te tuatau paroro

[Tutu i te kapi 18]

Tutungi anga i te au rara kare e inangaroia