“Ko Taau Au Tuatua-Akakite, ko Taku ïa e Mataora”
“Ko Taau Au Tuatua-Akakite, ko Taku ïa e Mataora”
“Te au tuatua ravarai oki i tataia i muatangana, i tataia ïa kia kite tatou.”—ROMA 15:4.
1. Akapeea a Iehova i te oronga mai anga i te au tuatua akakite kia tatou, e eaa tatou ka inangaro ei i te reira?
KUA ORONGA a Iehova ki tona au tangata i te au tuatua akakite e rauka ai i te tauturu atu ia ratou i te akono i te au taomianga o teia au tuatau ngata. Te aere maira teia au tuatua akakite me raveia te tatauanga uaorai i te Pipiria, e tetai atura te aere maira na roto i te akakitekiteanga me kore te au paupauanga orongaia mai i te au uipaanga Kerititiano. Te maataanga i ta tatou e tatau ra me kore e akarongo ra i teia au atianga kare i te apinga ou kia tatou. Penei kua akamanako ana tatou i te au akakiteanga mei te reira rai i mua atu. Inara, i te mea e e ngaropoina ana ia tatou, ka inangaroia tatou kia akaoraora akaou i to tatou au manako no runga i te au akakoroanga, au ture, e te au ikuikuanga a Iehova. Kia ariki rekareka tatou i te au tuatua akakite a te Atua. E akaou ana te reira i to tatou maroiroi na te tauturu anga ia tatou kia akamanako i te au tumu tei akakeu ia tatou kia akono i tetai tu oraanga tau i te Atua. I reira, te tata taramo i imene ei kia Iehova: “Ko taau au tuatua-akakite, ko taku ïa e mataora.”—Salamo 119:24.
2, 3. (a) Eaa ra a Iehova i maani ei kia vai ua te au tua oraanga o te aronga i roto i Pipiria tae mai ki to tatou tuatau? (e) Teea au tua mei te au Tuatua Tapu te ka akamanakoia i roto i teia atikara?
2 Noatu e kua tataia i te au anere mataiti e manganui i topa, e ririnui te Tuatua a te Atua. (Ebera 4:12) Te oronga maira te reira kia tatou i te au tua tika no te au oraanga o te aronga i roto i te Pipiria. Noatu kua taui maata te au peu akonoanga e te au akaraanga manako mei te au tuatau Pipiria, ko te au akaaoanga e aro atura tatou e aite putuputu ana rai ki tei aroia ana i taua tuatau ra. Te au tua e manganui tei tataia i roto i te Pipiria ei puapinga no tatou te oronga maira i te au akaraanga pumaana o te au tangata tei inangaro ia Iehova e tei tavini tiratiratu iaia noatu te au turanga kino pakari. Tetai atu au tua te akamanako ra i te tu akono tau e rikarika ana te Atua. Kua kapiti mai a Iehova i teia au tuatua enua katoatoa no runga i te au tangata, te meitaki e te kino, i roto i te Pipiria ei tuatua akakite. Mei ta te apotetoro ko Paulo rai i tata: “Te au tuatua ravarai oki i tataia i muatangana, i tataia ïa kia kite tatou; kia rauka to tatou tatari anga, i te akakoromaki e te pumaana o te tuatua i tataia ra.”—Roma 15:4.
3 E akara ana tatou e toru tua mei te Tuatua Tapu: te tua i te au akonoanga a Davida kia Saula, to Anania e Saphira, e taua tua ra o to Iosepha tu ki te vaine a Potiphara. Te apii maira teia au tua tataki tai ia tatou i te au apiianga puapinga.
Tu Tiratiratu ki te Akanoonooanga a te Atua
4, 5. (a) Eaa te turanga tei tupu i rotopu i te Ariki ko Saula e Davida? (e) Akapeea atu a Davida i te ririanga a Saula?
4 Kua tiratiratu kore te Ariki ko Saula kia Iehova e kare e tau ana kia tutara ki rungao i Tona iti tangata. No reira kua kopae te Atua iaia e kua arataki i te peroveta ko Samuela kia akatainu ia Davida ei ariki no Iseraela no te tuatau ki mua. I te akaari mai anga a Davida i te tu karape ei toa e kua rauka i te akapaapaaanga mei te tangata, kua akamata a Saula i te akara atu ia Davida ei enemi. Kua tauta putuputu a Saula i te tamate atu iaia. Kua ora mai a Davida i taua atianga tataki tai no te mea tei iaia a Iehova.—1 Samuela 18:6-12, 25; 19:10, 11.
5 No te au mataiti, kua maroia a Davida kia noo ua ei tuitarere. I te tupu mai anga te atianga kia ta ia Saula, kua aruaru te au taeake o Davida iaia kia ta ia Saula, i te na ko anga e te oronga maira Iehova i te enemi o Davida ki roto i tona rima. Inara, kua patoi a Davida. Tona tiratiratu kia Iehova e tona akangateitei no te turanga o Saula ei ariki akatainuia no te au tangata o te Atua kua akakeu iaia kia rave akapenei. Kare ainei, e kua iki a Iehova ia Saula ei ariki no Iseraela? Ka akaatea katoa rai a Iehova ia Saula me tau iaia i te rave i te reira. Kua akamanako a Davida e kare ona tikaanga kia tauru atu iaia ki roto. I muri ake i te rave pouroa anga i te ka rauka iaia i raro i te au turanga kia akamaru i to Saula riri iaia, kua taopenga a Davida: “Na Iehova aia e ta; e kare ra, te vai rai tona rā ka mate atu ei; e kare ra, e aere aia ki te tamaki, mate atu ei. Kia tāpu mai oki a Iehova iaku, kia kore au e tāki i toku rima ki runga e rave i te tangata o Iehova i akatainuia ra.”—1 Samuela 24:3-15; 26:7-20.
6. Eaa ra te tua o Davida raua ko Saula i puapinga ai kia tatou?
6 Te vai ra tetai apiianga puapinga i roto i teia tataanga. Kua ui ana ainei koe kia koe uaorai e eaa ra tetai au manamanata e tupu ei i roto i te putuputuanga Kerititiano? Penei te rave ra tetai tangata i tetai apinga i roto i tetai tu e kare e tau ana. Penei kare tona tu e taki atu ki te tarevake kino, inara te tamanamanata ra te reira ia koe. Akapeea koe i te ariu atu anga? No te inangaro Kerititiano i roto i taua tangata e no te tu tiratiratu kia Iehova, penei ka iki koe i te tuatua atu kiaia na roto i te tu takinga meitaki, ma te akakoroanga kia akatikatika i te manamanata. Akapeea ra, me kua aere ua atu rai te manamanata? I muri ake i te rave pouroa anga i te ka rauka meitaki ia koe, penei ka inangaroia koe kia tuku ua atu i te manamanata ki roto i te rima o Iehova. Ko tera ta Davida i rave.
7. I te aru anga ia Davida, akapeea tatou i te ariu anga me kite tatou i te tu tau kore me kore i te tu papakitai?
7 Me kore penei te aro atura koe i te au manamanata no te tu tau kore o te au tangata me kore te tu papakitai i te pae akonoanga. Penei ake e meangiti ua me kore kare takiri aau apinga ka rauka i te rave no runga i te reira i teia taime nei. Ka riro taua turanga ei mea ngata tikai i te akakoromaki, inara te apii maira to Davida ariuanga ki te tu tau kore i tetai apiianga kia tatou. Te au taramo ta Davida i tata e au rekoti pumaana kare ua no tana au pure ngakau tae ki te Atua e auraka aia e rokonaia mai e Saula mari katoa no tona tiratiratu kia Iehova e tona manakoanga no te akakakaanga i te ingoa o te Atua. (Salamo 18:1-6, 25-27, 30-32, 48-50; 57:1-11) Kua vai tiratiratu ua atu rai a Davida kia Iehova noatu e kua angaanga tau kore ua atu rai a Saulo no te au mataiti e manganui. Kia vai tiratiratu katoa tatou kia Iehova e ki tana akaaerenga noatu te au tu tau kore ka kite mai tatou e noatu eaa ta tetai ke ka rave. Papu ia tatou e te kite pu tikai maira Iehova i te turanga.—Salamo 86:2.
8. Akapeea te Au Kite o Iehova i Motamapiki i te ariu anga atu i te timataia anga to ratou tu tiratiratu kia Iehova?
8 Te oronga maira te au Kerititiano i Motamapiki i tetai akaraanga no teia tuatau nei o tetai pae tei noo tiratiratu kia Iehova i roto i tetai tuatau timataanga. I te 1984 e tomo putuputuia ana to ratou au oire e te au mema no te akapupuanga patoitoi, tei keia, tei tutungi i te au kainga, e tei ta katoa. I te akaraanga e meangiti ua ta teia au Kerititiano mou ka rauka i te rave kia paruru ia ratou uaorai. Te aronga e noo ra ki te reira ngai kua maroia ratou kia piri ki roto i te akapupuanga vaeau me kore kua maroia ratou kia turuturu i te reira na roto i tetai au mataara ke atu. Kua manako te Au Kite o Iehova i te rave anga i te reira e kare e tau ana ki to ratou turanga neutara ei Kerititiano. Kua aro atu ta ratou patoianga i te riri. Mei tetai 30 Kite te maata tei taiaia i roto i taua tuatau kikino, inara kare roa te tamatakuanga o te mate i aati ana i te tu tiratiratu o te au tangata o te Atua. * Mei ia Davida rai, kua akakoromaki ratou i te au tu tau kore, inara taopenga rai kua autu mai ratou.
Tetai Tuatua Akakite Akamatakite
9, 10. (a) Akapeea tatou i te puapinga angaia mei tetai au akaraanga tikai o te Tuatua Tapu? (e) Eaa te ngai tarevake i te au angaanga a Anania raua ko Saphira?
9 Tetai au tangata i taikuia i roto i te au Tuatua Tapu te oronga maira i te au tuatua akakite akamatakite no runga i te tu kia kopaeia. E tikai, te vai ra te au tua e manganui i roto i te Pipiria o te au tangata, i rotopu katoa i te au tavini o te Atua, tei rave i te tarevake e kua kite mai i te au tupuanga kino. (1 Korinetia 10:11) Ko tetai o taua tua ra no Anania e Saphira, e tokorua akaipoipo e mema raua no te putuputuanga Kerititiano i te anere mataiti mua i Ierusalema.
10 I muri mai i te Penetekote 33 T.N., kua tupu mai te inangaro kia oronga i te tauturu i te pae materia no te aronga irinaki ou tei noo mai ki Ierusalema kia puapingaia mei te kapiti anga ma te au apotetoro. Tetai au mema o te putuputuanga kua oko i te kainga kia akaputu moni kia kore e tangata e ngere. (Angaanga 2:41-45) Kua oko a Anania raua ko Saphira i tetai one kai e kua apai mai tetai tuanga ua o te moni tei rauka mai ki te au apotetoro, te karanga anga e ko ta raua apinga aroa ko te au moni katoatoa rai ia tei rauka mai mei te okooko. E tika, tei ia Anania raua ko Saphira te tikaanga i te oronga maata me kore meangiti ua i te ka rauka ia raua, inara e kino to raua akakoroanga, e e pikikaa ta raua angaanga. Kua inangaro raua kia manako meitakiia mai e kia akara anga e maata atu te raveia ra i ta raua tikai e rave ra. Kua akakite te apotetoro ko Petero, i raro i te akauruanga a te vaerua tapu, i ta raua tarevake e te pikikaa, e kua tamate atu a Iehova ia raua.—Angaanga 5:1-10.
11, 12. (a) Eaa tetai au tuatua akakite no runga i te tu tika? (e) Eaa te au akameitakianga te ka rauka mai mei te tu tika?
11 Me ka timata uaia ake tatou kia takaviri i te tuatua tika i te tauta anga kia manako meitaki mai te au tangata ia tatou, kia riro te tua o Anania raua ko Saphira ei tuatua akakite pakari kia tatou. Penei ka rauka ia tatou i te pikikaa i te au taeake tangata, inara kare e rauka ia tatou i te pikikaa ia Iehova. (Ebera 4:13) E putuputu te taime e raurau mai ana te au Tuatua Tapu ia tatou kia tuatua tika atu ki tetai e tetai, no te mea kare o te aronga pikikaa ngai i runga i tetai enua ka takoreia te tuatua tika kore. (Maseli 14:2; Apokalupo 21:8; 22:15) Te taka meitaki ua ra te tumu no te reira. Tei akamaroiroi ra i te tuatua tika kore katoatoa kare atu mari ra ko Satani te Tiaporo.—Ioane 8:44.
12 Te akariroanga i te tu tuatua tika ei tu oraanga no tatou ka apai mai i te au puapinga e manganui. I roto i te reira ko te akava ngakau meitaki e te merengo anga e te irinaki maira tetai i roto ia koe. I roto i te au turanga e manganui, no to ratou tu tika, kua rauka mai te angaanga a te au Kerititiano, me kore kua noo ua ratou i roto i ta ratou angaanga. Inara, te akameitakianga puapinga rava atu, koia oki te apai maira te tu tika i te akataeakeanga o te Atua Mana Katoatoa.—Salamo 15:1, 2.
Tamou Marie Anga i te Tu Viivii Kore
13. Eaa te turanga i kite mai ei a Iosepha iaia uaorai, e akapeea aia i te ariu anga atu?
13 Ko Iosepha, e tamaiti na te pateriareka ko Iakobo, kua okonaia ki roto i te tuikaa i te 17 mataiti. Kua taopenga atu aia ki roto i te ngutuare o Potiphara, tetai opita maata no te akavaanga Aiphiti, e kua kite atu te vaine o tona pu iaia. Kua inangaro aia i te pirianga ainga kia Iosepha, e tangata mapu manea tikai, e i te au ra ravarai kua raurau atu aia iaia: “E moe ana taua.” E mamao oki a Iosepha mei tona pamiri i roto i tetai enua kare e tangata i kite iaia. Penei ka rauka ua iaia i te moe kapiti atu ki teia vaine e kare roa e tangata e kite mai i te reira. I na, i te opu anga te vaine a Potiphara iaia i te openga iora, kua oro a Iosepha.—Genese 37:2, 18-28; 39:1-12.
14, 15. (a) Eaa ra te tua o Iosepha i puapinga ai kia tatou? (e) Eaa ra tetai vaine Kerititiano i rekareka ei e kua akarongo aia i te au tuatua akakite a te Atua?
14 Kua utuutuia a Iosepha i roto i tetai pamiri mataku i te Atua, e kua marama oki aia e te pirianga ainga i rotopu i te au tangata kare raua i te tane akaipoipo e te vaine akaipoipo e tarevake ia. “Eaa oki au e tikaʼi kia rave i tenana kino maata, e te ara i te Atua?” i ui ei aia. I te akaraanga kua aratakiia tana taopenga anga e te kite no te turanga a te Atua no te au tangata mei tei akakiteia i Edene, koia oki e tai rai tokorua. (Genese 2:24) Ka puapingaia te au tangata o te Atua i teia tuatau nei mei te akamanako anga i te tu i ariu atu ei a Iosepha ki taua turanga. I tetai au ngai, te au tu manako ki te au pirianga ainga e apinga rave aere uaia i na ko te aronga mapu tei patoi i te piri atu ki roto i te tu tau kore kua aviriia e to ratou au taeake. Te au pirianga i vao ake i te akaipoipo i rotopu i te aronga mamaata e peu matauia. No reira, ko te tua no Iosepha e tuatua akakite tau meitaki tikai no tatou. Te vai nei rai te turanga a te Atua koia oki e au ara te poneia e te akaturi. (Ebera 13:4) Te manganui tei topa atu ki te taomianga kia piri atu ki roto i te pirianga ainga kua akatika e e tumuanga tau tikai tetai e auraka e rave i te reira. I roto i te au tupuanga reka koreia penei ko te tu akama, e akava ngakau kino, e vareae, e nui, e te tuiaanga e te maki viivii no te pirianga ainga. Mei ta te Tuatua Tapu rai i akamaara mai ia tatou, ko tetai tangata te rave ra i te poneia te “takinga-kino ïa i tona uaorai kopapa.”—1 Korinetia 5:9-12; 6:18; Maseli 6:23-29, 32.
15 Ko Jenny, * tetai Kite takaua no Iehova, e tumu tona no te ariki rekarekaanga i te au tuatua akakite a te Atua. I te angaanga, kua akameamea mai tetai taeake angaanga manea tikai iaia. I te mea e kare oki a Jenny i akaari atu i te inangaro, kua akamaata atu aia i tana akameamea. “Kua kite au iaku uaorai e putoto ra kia vai viivii kore ua,” kua akatika aia, “no te mea e mea reka rai me te akainangaro maira tetai tangata ia koe.” I na, kua kite aia e te titau ua ra tera tangata i te kapiti atu iaia ki te au putunga vaine tana i moe kapiti atu ei. I te kite anga aia iaia uaorai e paruparu atura i roto i tona akakoroanga kia patoi, kua pure aia kia Iehova kia tauturu mai iaia kia vai tiratiratu Kiaia. Kua kite mai a Jenny e te au apinga tana i kite mai iaia e rave ra i tana kimikimianga i roto i te Pipiria e te au puka Kerititiano mei te au akamaaraanga rai te reira tei riro mai ei patia ki runga i te rima kia vai matakite ua atu rai aia. Ko tetai o taua au akamaaraanga ko te tua o Iosepha e te vaine a Potiphara. “Me akamaara ua rai au iaku uaorai i te maata o toku inangaro ia Iehova,” kua taopenga aia, “kare roa au e mataku e ka rave au i teia kino maata e ka ara iaia.”
Akarongo i te Au Tuatua Akakite a te Atua!
16. Akapeea tatou e puapingaia ai mei te akara akaou anga e te akamanako oonu anga no runga i te au oraanga o te au tangata i taikuia mai i roto i te Pipiria?
16 Ka rauka pouroa ia tatou i te akamaata i to tatou arikianga no te au turanga a Iehova na te aruaru anga kia marama i te tumu i vaoo ei aia i tetai au tua i roto i te au Tuatua Tapu no tatou. Eaa ta te reira e apii maira? Eaa te au tu me kore te au akakeuanga akatutuia mai e te au tangata o te Pipiria ka tau tatou kia aru me kore kia kopae? E au anere ua atu tangata tikai tei rekotiia i roto i te au kapi o te Tuatua a te Atua. Pouroa te inangaro ra i te ikuikuanga tu-Atua ka tau meitaki kia tatanu i te inangaro no te pakari tei orongaia mai no te oraanga, kapiti mai te au apiianga ka kite mai tatou mei te au akaraanga ta Iehova i akono meitaki. Teia makatini e akaari putuputu mai ana i te au atikara no runga i taua au tangata ra e e apinga tetai i roto i to ratou au tua te apii maira ia tatou. Kore koe e tuku taime i te akara akaou anga i teia?
17. Eaa toou manako no runga i te au tuatua akakite a Iehova, e no teaa ra?
17 Mei teaa atura to tatou rekareka no te manakoanga aroa ta Iehova i akaari no te aronga te aruaru ra i te rave i tona anoano! Kare tatou i te aronga apa kore, mei te au tane e te au vaine rai tei taikuia i roto i te Pipiria kare i te aronga apa kore. No reira, ko te rekoti i tataia no ta ratou au angaanga e tumuanga puapinga maata te reira no tatou. Na te akarongo anga ki te au tuatua akakite a Iehova, ka kopae tatou i te rave anga i te au tarevake kino tikai, e ka rauka ia tatou i te aru i te au akaraanga meitaki o te aronga tei aaere ana na roto i te tu tuatua tika. Me rave tatou i te reira, ka rauka ia tatou i te imene kapiti atu ma te tata taramo: “E ao to tei akono i tana au tuatua-akakite, ko tei kimi iaia ma te ngakau katoa. Te akono nei toku vaerua i taau au tuatua-akakite: inangaro maata toku i te reira.”—Salamo 119:2, 167.
[Au Tataanga Rikiriki i Raro]
^ para. 8 Akara i te 1996 Yearbook of Jehovah’s Witnesses, kapi 160-2.
^ para. 15 Kua tauiia te ingoa.
Akapeea Koe me Pau?
• Eaa ta tatou ka tamou mai mei te tu o Davida kia Saula?
• Eaa te tua no Anania raua ko Saphira e apii maira ia tatou?
• Eaa ra te tua o te oraanga o Iosepha i riro ei ei mea puapinga tikai i teia tuatau nei?
[Au Uianga Apii]
[Tutu i te kapi 26]
Eaa a Davida i patoi ei i te tuku ia Saula kia tamateia?
[Tutu i te kapi 27]
Eaa ta tatou ka tamou mai mei te tua o Anania raua ko Saphira?
[Tutu i te kapi 28]
Eaa tei akakeu ia Iosepha kia kopae i te au akameameaanga tau kore?