Mataora Ainei Koe?

AE, PENEI ka ui koe kia koe uaorai, ‘Mataora ainei au?’ Te tauta pakari nei te au tangata taineti i te kimi e ka akapeea koe e e tetai papaki i te pau mai anga, inara kare ta ratou angaanga i te mea mama ua. Penei ka akaaiteia te akara anga i te mataora o tetai tangata ki te tauta anga i te vaito anga i te aroa o tetai tangata no tana vaine me kare te maata o te mii tei akatupuia no te mate i roto i te ngutuare. Kare te au manako ngakau e rauka i te vaito tikaiia. Inara, te kite ra te au taineti i tetai tikaanga puapinga: Ka rauka i te au tangata ravarai te mataora.

Noatu ka rauka te mataora, e maata te au manamanata no te mataora kore tei tupu mai. E akamanako ana i teia akaraanga: I roto i etai au oire kua ki te au ngai tanumanga i te aronga tei mate no te maki AIDS. Te eeu akaou nei te au mana taoonga i te au vaarua taito no te tanu atu i te aronga tei mate ua akenei. I tetai au tuanga o Aperika, monimoniia ra te angaanga maani anga i te pia mate. E noatu teea te ngai e noo ra koe, kua kite ana koe e e iti ua te aronga mata katakata i roto i te aronga te mamae ra no te kino pakari te maki e i rotopu i te aronga kua mate tetai kopu tangata e te au oa.

Akapeea ra te au ngai puapinga roa atu? Ka akakore viviki poitirereia te tu tinamou i te pae moni mei te aronga kare i papa ake. I Marike, e maata te au tangata tei ritaea mai kua oki akaou atu ki te angaanga no te mea kare ta ratou moni ruaine i tutakiia mai ana. E maata te taime na te au pira rapakauanga maki i akapou i te au moni ta te ngutuare tangata i akaputu pouroaia mai. “Ka kite atu koe i teia au tangata nei te aere maira ma te aka tutakianga e te au manamanata i te pae kopapa e ka tangi atu koe ia ratou,” i karanga ai tetai tangata akakitekite ture. “E maata te taime ka akakite koe kia ratou e, ‘Ka raveia toou are.’” Inara akapeea te aronga kare o ratou manamanata i te pae moni? Ka akakeu katoa ainei te mataora kore ia ratou?

Kua aite etai aronga tataki tai ki te tangata akapapa imene rongonui ko Richard Rodgers. Kua tuatuaia nona e: “Tokoiti ua te au tane tei oronga maata ana i te mareka anga ki te au tangata e manganui.” Noatu e te oronga maira tana au imene i te mareka anga ki tetai ke, kua rokoia aia e te taitaia kino tikai. Kua taeria e ia nga akakoroanga e rua ta te manganui e inangaro ra​—te moni e te rongonui​—inara akapeea ra te mataora? Kua akakite mai tetai tangata tata tua oraanga e: “Puapinga maata tikai [a Rodgers] i roto tana angaanga, kua rekareka i tetai oraanga akameitakiia, e kua akatuangaia e rua nga Pepa na Pulitzer. Kare aia i mataora katoa ana e te maata anga o te taime kua taitaia.”

Mei taau i kite ana te akara anga ki te apinganui no te tu mataora te maata anga o te taime e akavareangaia. Kua akataka mai tetai tangata ripoti no runga i te iniveti na The Globe and Mail o Toronto, i Kanata, i te “tu takakeanga e te puapinga kore ua” ta te au tangata apinganui e manganui e akakoromaki ra. Kia tau ki tetai tangata akoanga no te moni, me oronga nga metua apinganui i te moni ki ta ratou tamariki e te au apinga ta te reira ka rauka i te oko, “e maata te taime kua tanu takereia te au ua  no te tu maromaroa i muri akera.”

E Tumu Anga Ketaketa Ainei Tetai no te Mataora?

Kia ruperupe ei ra, te anoano ra tetai rakau pueraera i te one, te vai, e tetai reva meitaki. Pera katoa, te kite ra te aronga kimikimi e te oronga maira tetai au turanga i te mataora. Te kapiti maira teia i te oraanga meitaki i te pae kopapa; angaanga meitaki; rava te kai, ngai noo anga, e te kakau; akamerengo anga i te au anoano o te kite; e te au oa tika tikai.

Penei ka ariki koe e e au tupuanga meitaki ta teia au turanga e akatupu maira ki runga i to tetai au manakonako anga kia mataora. Inara e tumu anga puapinga maata atu tetai. Kia kite oki i “te Atua mataora,” ko Iehova tona ra ingoa. (1 Timoteo 1:11, NW) Akapeea taua kite anga ra i te tauturu mai anga? Ko Iehova Tei Anga mai ia tatou, e nana i oronga mai kia tatou te kite kia mataora. Tei tau, kua kite aia e eaa te ka tamataora tikai ia tatou. Te akaari maira te atikara te aru maira i tana mataara no te aratakianga i te au tangata na tetai ngai me kare na tetai turanga ki tetai oraanga mataora ope kore.

[Tutu i te kapi 4]

Mei tetai rakau pueraera, te anoano ra te mataora i te au turanga tau kia tupu mai oki

[Akameitakianga no te Tutu i te kapi 3]

© Gideon Mendel/CORBIS