Te Tivi​—E Apinga Meitaki Ainei i te Tiaki Tamariki?

I TETAI au taime, te tavarenga anga i taau tamariki na te tukuanga ia ratou kia akarakara tivi ia koe e akono ra i tetai au angaanga ke mai i te akaraanga e mea meitaki tikai. Inara akapeea teia i te akakeuanga i taau tamariki?

“E akakeu katoaia ana te au pepe ou e te au akakiteanga i te pae manako tei orongaia mai na runga i te tivi,” i ripoti ei The New York Times. I roto i tetai kimikimianga raveia ua akenei, kua akaariia atu ki te au pepe e tai o ratou mataiti i tetai au potonga teata poto ua i runga i te tivi e tukeke te au tu e ariu ra tetai vaine akatutu teata ki tetai apinga kangakanga. “Me ariu mataku atu te vaine akatutu teata ki tetai apinga kangakanga,” i karanga ai te Times, “kua kopae te au pepe i te kangakanga anga ki te reira e kua akaraanga manamanata ratou, kua akatuma, kua riri me kore kua aue. Me mataora te vaine akatutu teata i te apinga kangakanga, kua akakeu roa atuia te au pepe i te kangakanga i te reira.”

I te akara anga, e akakeu ana te tivi i te au pepe. Akapeea to te reira akakeuanga ki runga i te au tamariki no te tuatau roa? Ko te Taote ko Naoki Kataoka, e poropeta no runga i te au tamariki i te Kaoreti Kawasaki i te Pae Vairakau i Kurashiki, Tiapani, kua kite ana i te au tamariki e manganui e e muteki tikai ratou e kare roa e akaariarianga i runga i to ratou mata. Kua akarakara pouroa ana ratou i te Tivi me kore te au vitio no tetai tuatau roa. Tetai tamaiti e rua mataiti kare i kite e akapeea i te pukapuka e e iti ua tana au tuatua. E akarakara vitio ua ana aia mei te popongi ki te aiai i te au ra ravarai mei tona tai mataiti anga mai. I muri ua ake i te aruanga, tona mama i te ako a te taote, i tapu ei aia i te tamaiti i te akarakara vitio e kua akamata i te piri atu kiaia na te kangakanga anga. Aere rai kua maata marie mai te au tuatua a te tamaiti. Ae, kia kapiti atu te au metua ki ta ratou tamariki.

Ko te Atua ko Iehova, tei Akatumu i te akanoonooanga no te pamiri, kua akaketaketa i te puapinga no te kapitianga meitaki rava atu. I taito roa kua akakite aia ki tona au tangata: “Ka apii tamou tikai koe [te au tuatua a te Atua] ki taau au tamariki, ko taau ïa e tuatua kia noo ua koe i roto i to are, e kia aere ua koe na te arataa ra, e kia akāvai koe ra, e kia tu koe ki runga ra.” (Deuteronomi 6:7) Ko te au metua te ravenga meitaki rava atu, kare ko te tivi, i te apii i te tamariki na roto i te tuatua e te akaraanga, “i te arataa e tikaʼi [no ratou] kia aere.”​—Maseli 22:6.