Tetai Apiianga no te Ngakau Parau e te Akaaka

TETAI tupuanga i roto i te oraanga o te Ariki ko Davida te akakite maira i te tuke i rotopu i te tu akaaka tikai e te ngakau parau kino tikai. Kua tupu te reira i muri ake i autu atu ei a Davida ia Ierusalema e kua akariro i te reira ei oire maata nona. Kua akara atu a Davida kia Iehova e ko te Ariki tikai no Iseraela, e no reira kua akanoo aia i te Aruna, tei akatutu maira e te reira te Atua, kia apainaia mai ki roto i te oire. E puapinga tikai teia tupuanga kia Davida e kua akaari aia i tona rekareka no te katoatoa kia kite mai iaia e aru ra i te au taunga te apai ra i te Aruna. Te kite atura te au tangata o Ierusalema i to ratou ariki i te rere aere anga e te ‘ura anga . . . ma te maroiroi katoa.’​—1 Paraleipomeno 15:15, 16, 29; 2 Samuela 6:11-16.

Inara, kare te vaine a Davida ko Mikala, i piri atu ana ki taua akaupokotu rekareka. Kua akarakara atu aia na roto i tetai maramarama, e kare oki i rekareka ana i te tu i arataki ei a Davida i te akapaapaaanga ia Iehova “kua akavaavaa atura aia iaia i roto i tona ngakau.” (2 Samuela 6:16) Eaa ra a Mikala i manako akapenei ei? I te akaraanga, kua manako maata roa aia i tona turanga ei tamaine na te ariki mua o Iseraela, ko Saula, e i teianei te vaine o te rua o te ariki o Iseraela. Penei kua manako oki aia e kare e tau ana i tana tane, te ariki, i te taakaaka iaia uaorai ki te turanga o te au tangata ua nei e kia piri atu ki roto i ta ratou tu tamataoraanga. Kua akaariia mai taua au manako ngakau parau i te tu i turou atu ei aia ia Davida i tona oki mai anga ki te kainga. Ma te aviri kua karanga aia: “Aue te ngateitei o te ariki o Iseraela i nakonei, ko tei taratara i tona kakau i nakonei, ki mua tikai i te mata o te au tavini vaine nona e, mei tetai o te aronga tarevakaua e mātau i te taratara i tona kakau e!”​—2 Samuela 6:20.

Akapeea a Davida i te ariuanga ki teia akaapaanga? Kua ako atu a Davida ia Mikala na te karanga anga e kua kopae a Iehova i tona papa, ko Saula, e kua iki oki iaia. Kua karanga katoa a Davida: “E ka maata atu rai toku kino e te akaaka i toku uaorai akara anga i teia: kare te au tavini vaine taau i tuatua maira, e akangateiteiia au e ratou.”​—2 Samuela 6:21, 22.

Ae, kua akakoro a Davida i te tavini ua atu rai ia Iehova ma te tu akaaka. No teia tu i tauturu ei ia tatou i te marama eaa oki a Iehova i kapiki ei ia Davida “e tangata e tau i toku ngakau.” (Angaanga 13:22; 1 Samuela 13:14) Ko te tika, te aru ra a Davida i te akaraanga meitaki rava atu no te tu akaaka​—ko te Atua uaorai ko Iehova. Ma te umere, te tuatua taangaangaia e Davida i tona tuatuaanga kia Mikala: ‘ka maata atu rai toku akaaka’ no roto mai i te verepa tumu Epera te taangaanga katoaia ra i te akataka i to te Atua uaorai manako no te au tangata ravarai. Noatu e ko Iehova te Peretana maata rava atu i roto i te ao e pini ua ake, te akataka maira a Salamo 113:6, 7 iaia e ko “te tuku akaaka nei ra [te aere mai anga ki raro mei to tetai turanga teitei i te akonoanga i tetai tangata i raro mai] aia iaia uaorai i te akara anga mai ki raro, ki runga i te au rangi, e ki runga i te enua. Te akateitei nei aia i te akaaka ra no raro mai i te one ra, kua akateitei i tei putaua no raro i te tiringa teita.”

I te mea e e akaaka a Iehova, kare i te mea umere e e rikarika ana aia i te “mata teitei” o te au tangata ngakau parau. (Maseli 6:16, 17) No te akaarianga i teia tu kino e te akangateitei kore anga i te tangata ta te Atua i iki ei ariki, kua ngere a Mikala i te atianga kia anau mai i tetai tamaiti kia Davida. Kua mate aia kare rava ana tamariki. Mei teaa ra tetai apiianga puapinga maata no tatou! Pouroa te aronga te inangaro ra ta te Atua akaperepereanga kia aru i teia au tuatua: “E kia kakauia kotou i te akaaka; ‘e patoi te Atua i tei nengonengo, e oronga mai i te meitaki no tei akaaka.’”​—1 Petero 5:5.