Akamou ki Runga i te Meitaki o ta Iehova Akaaerenga
Akamou ki Runga i te Meitaki o ta Iehova Akaaerenga
“Ka mataora ïa matou i te meitaki no toou ra are, no toou ra nao tapu.”—SALAMO 65:4.
1, 2. (a) Eaa ta te au akanoonooanga no te iero i akatupu ki runga i te iti tangata o te Atua? (e) Eaa te au tauturu ta Davida i akono no te akatuanga i te iero?
KO DAVIDA o Iseraela taito tetai tangata meitaki rava tei tuatuaia i roto i te au Tuatua Tapu Epera. Kua tuku teia tiaki mamoe, tangata akatangi imene, peroveta, e te ariki i tona irinaki pu tikai ki roto i te Atua ko Iehova. To Davida pirianga vaitata tikai kia Iehova kua akakeu i roto iaia i tetai inangaro kia patu i tetai are no te Atua. Ka riro mai taua are, me kore iero, e ko te ngai maataia no te akamori mou i Iseraela. Kua kite a Davida e ka apai mai te au akanoonooanga te piri atura ki te iero i te rekareka e te au akameitakianga ki te iti tangata o te Atua. No reira a Davida i imene ei: “E ao to te tangata i ikiia e koe, e kua akavaitataia mai e koe kia noo i roto i toou ra au paepae: ka mataora ïa matou i te meitaki no toou ra are, no toou ra nao tapu.”—Salamo 65:4.
2 Kare a Davida i akatikaia i te akaaere i te akatuanga o te are o Iehova. Mari ra, kua orongaia taua angaanga takake ki tana tamaiti ko Solomona. Kare a Davida i urutoe ana no te mea, kua peke tera akameitakianga ki tetai ke, noatu e ko tana tikai tera e inangaro ra. Te apinga puapinga maata rava atu kiaia koia oki kia akatuia te iero. Kua turuturu ngakau katoa aia i te angaanga na te oronga anga kia Solomona i te au parani no te are ta Iehova i tuku mai kiaia. Tei runga ravao, kua akapapa a Davida i te au tauatini o te ngati Levi i roto i te au pupu angaanga e kua oronga maata i te auro e te ario ei tauturu no te akatuanga i te iero.—1 Paraleipomeno 17:1, 4, 11, 12; 23:3-6; 28:11, 12; 29:1-5.
3. Eaa te tu o te au tavini o te Atua ki te au akanoonooanga no te akamori mou?
3 Kua turuturu te au Iseraela tiratiratu i te au akanoonooanga tei raveia no te akamori mou i te are o te Atua. Ei au tavini no Iehova i teia tuatau, te turu katoa nei tatou i te au akanoonooanga no te akamori i roto tikai i te tuanga i te enua nei o ta Iehova akaaerenga. Te akaari ra tatou i reira e te aite ra to tatou manako ki to Davida. Kare to tatou i te tu koumuumu. Mari ra, te akamou ra tatou ki runga i te meitaki o ta te Atua akaaerenga. Kua manako ana ainei koe i te au apinga meitaki e manganui ka tau tatou kia mareka tikai? E akamanako ana tatou i tetai o te reira.
Tu Marekaanga no te Aronga Arataki
4, 5. (a) Akapeea “te tavini akono meitaki e te pakari” e akatupu ana i ta te reira akaueanga? (e) Eaa te manako o tetai Au Kite no runga i te kai pae vaerua tei rauka ia ratou?
4 E au tumu tau to tatou i te rekareka i te “tavini akono meitaki e te pakari” tei akataoongaia e Iesu Karaiti i rungao i tana au apinga ravarai i te enua nei. E akatere ana te pupu tavini o te au Kerititiano akatainuia e te vaerua i te tutuanga i te tuatua meitaki, e akanoo ana i te au uipaanga no te akamori, e e nenei ana i te au puka akatumuia ki runga i te Pipiria e tere atu i te 400 reo. Te mataora nei te au mirioni ua atu tangata takapini i te ao nei i te piri atu anga ki roto i teia ‘kai [pae vaerua] i te ora mou ra.’ (Mataio 24:45-47) Kare rava e tumu i te urutoe atu i te reira.
5 E manganui te au mataiti, kua kite mai tetai Kite pakarikari no Iehova ko Elfi tona ingoa i te pumaana e te tauturu na te akonoanga i te ako a te Tuatua Tapu tei kiteaia i roto i te au puka a te pupu tavini. Akakeuia e te arikianga oonu kua tata a Elfi: “Naringa kare te akaaerenga a Iehova kare au e kite e ka akapeea au?” Kua roa te mataiti ia Petero raua ko Irmgard i te tavini katoaanga i te Atua. Te akakite maira a Irmgard i te mataora no te au puka katoatoa tei neneiia e ta “Iehova akaaerenga aroa e te akono meitaki.” Te kapiti maira i roto i teia au puka i taua puka ra tei tata tikaiia no te au tangata e au umuumuanga takake to ratou, mei te aronga matapoiri e te aronga turi.
6, 7. (a) Akapeea te au angaanga a te au putuputuanga i te ao katoa e akaaereia ana? (e) Eaa tei tuatuaia no runga i te tuanga o ta Iehova akaaerenga i te enua nei?
6 Te akatutuia maira te “tavini akono meitaki” e te Pupu Akaaere no te Au Kite o Iehova, e pupu tangata meangiti ua tei akatainuia e te vaerua tapu e te tavini ra i te opati maata o te Au Kite o Iehova i Brooklyn, New York. Na te Pupu Akaaere e akataoonga i te au tavini tu katau no Iehova kia tavini i ko i te au opati manga te akaaere ra i te au angaanga o te 98,000 putuputuanga e tere atu takapini i te ao katoa. Te au tane tei tau ki te au umuumuanga a te Pipiria e akataoongaia ana ei aronga pakari e ei au tavini orometua i roto i teia au putuputuanga. (1 Timoteo 3:1-9, 12, 13) E akono ana te aronga pakari i te arataki e e tiaki aroa ana i te anana a te Atua tei raro ake i ta ratou akonoanga. E akameitakianga tikai te reira kia riro mai ei tuanga no taua anana ra e kia kite mai i te aroa e te taokotaianga te kiteaia ra i rotopu “i te au taeake”!—1 Petero 2:17; 5:2, 3.
7 Kare oki ratou e kopekope ana, e putuputu ana te au tangata i te akakite i to ratou ariki rekareka no te aratakianga aroa tei rauka ia ratou mei te aronga pakari. Ei akaraanga, e akamanako ana ia Birgit, e vaine Kerititiano akaipoipo i roto i tona 30 mataiti. I tona mapuanga, kua piri atu aia ki tetai pupu aronga kino e mei vaitata rai aia i te rave i tetai angaanga tarevake. Inara, na te ako taka meitaki a te Pipiria mei te aronga pakari e te turuturuanga a te au taeake irinaki i akaora mai iaia mei tetai turanga te taki atura ki te kino. Eaa to Birgit manako i teianei? Kua karanga aia: “Te mareka tikai nei au e tei roto nei rai au i ta Iehova akaaerenga meitaki tikai.” Kua karanga mai tetai tamaine e 17 mataiti ko Andreas tona ingoa e: “Ko teia tikai ta Iehova akaaerenga, te akaaerenga meitaki rava atu i te ao katoa.” Kare ainei tatou e mareka i te meitaki i te tuanga o ta Iehova akaaerenga i te enua nei?
E Aronga Apa ua te Au Arataki
8, 9. Eaa ta tetai au taeake o Davida i rave, e akapeea a Davida i te akonoanga i to ratou tu?
8 E tikai, e aronga apa ua te aronga akataoongaia kia arataki i te akamori mou. E rave pouroa ana ratou i te tarevake, e tetai au pae e au tu paruparu to ratou e e ngata ana ia ratou i te akatere inara te tauta pakari ra ratou i te akakore i te reira. Ka riri ainei tatou i te reira? Kare. Te aronga tei orongaia te apainga maata i Iseraela taito kua apa kino katoa ratou. Ei akatauanga, e te mapu ra rai a Davida, kua patiia atu aia kia tavini ei tangata akatangi imene kia akamaru i te tu taitaia o te Ariki ko Saula. I muri akera, kua tauta a Saula i te ta ia Davida, e i te openga iora kua oro atu aia kia ora mai aia.—1 Samuela 16:14-23; 18:10-12; 19:18; 20:32, 33; 22:1-5.
9 Tetai au Iseraela e tu akono pikikaa ua to ratou. Ei akatauanga, kua ta te rangatira vaeau o Davida ko Ioaba i tetai mema pamiri o Saula ko Abenera. Kua orureau a Abasaloma i tona metua tane, ko Davida, no tona taoonga ariki. E te tangata tauturu irinakiia o Davida ko Ahitophela, kua pikikaa aia ia Davida. (2 Samuela 3:22-30; 15:1-17, 31; 16:15, 21) I na, kare a Davida i kopekope ana e kare aia i ririri ana, e kare katoa aia i kopae ana i te akamori mou. Ko te tikaanga, kua tuke rava tona tu. Kua akakeu te tumatetenga ia Davida kia akapiri atu kia Iehova e kia akono tamou i te tu manako meitaki tikai tei rauka iaia i tona oro atu anga mei ia Saula. I taua taime ra, kua imene a Davida: “E aroa mai iaku, e te Atua e, e aroa mai; te irinaki nei oki toku vaerua ia koe: ei roto i to maru peau toku akapuanga, e kia taka ke teianei au mea tumatetenga.”—Salamo 57:1.
10, 11. Eaa ta tetai Kerititiano ko Gertrud tona ingoa i kite mai i tona mapu anga, e eaa tana i tuatua no runga i te au tarevake o te au taeake irinaki?
10 Kare a tatou kotoeanga i te kopekope i tetai angaanga pikikaa te raveia ra i roto tikai i ta te Atua akaaerenga i teia tuatau. Kare a Iehova e kare rai tana au angera e kare katoa tana au tiaki i te pae vaerua e ariki ana i te aronga kino, e te pikikaa i roto i te putuputuanga Kerititiano. Noatu rai, pouroa tatou te aro atura i te tu apa ua o te tangata nei—to tatou uaorai e tera o tetai au tavini ke atu o te Atua.
11 Tetai vaine ko Gertrud tona ingoa, e kua roa te tuatau iaia i te akamorianga ia Iehova, i tona mapu anga, kua akaapa pikikaaia aia ei tangata pikikaa e kare aia i te tangata tamou i te tutu aere i te Patireia. I akapeea aia? Kua urutoe ainei a Gertrud i taua tu akonoanga? Kare. I mua poto ua ake i tona mateanga i te 2003 e 91 ona mataiti, kua oki aia i te akamanako i tona oraanga e kua akataka mai aia: “I roto i toku oraanga kua apii mai teia au tupuanga iaku e noatu te au tarevake i raveia e tetai au tangata, te arataki ra a Iehova i tana angaanga puapinga maata, e e taangaanga ana aia ia tatou aronga apa ua.” I te akonoanga i te au tu apa ua o tetai au tavini o te Atua, kua pure akatenga a Gertrud kia Iehova.
12. (a) Eaa te akaraanga tau kore ta tetai au Kerititiano i te anere mataiti mua i akanoo? (e) Eaa te apinga ka tau tatou kia akamou i to tatou manako ki runga?
12 Mei te mea e apa katoa ana te au Kerititiano tiratiratu roa atu e te akono meitaki, me rave tetai tavini akataoongaia i tetai tarevake, kia tamou ua atu rai tatou i te “rave i te au mea ravarai ma te urutoe kore.” (Philipi 2:14) E mea tangi tikai me ka aru tatou i te akaraanga tau kore o tetai pae i roto i te putuputuanga Kerititiano i te anere mataiti mua! Kia tau ki ta te pipi ko Iuda, te au puapii pikikaa i taua tuatau ra te “akavaavaa nei i te au tutara, e te akakino nei i te aronga taoonga.” Tei runga ravao, taua aronga rave kino ra “e aronga urutoe ratou, e mareka kore” ra i ta ratou tuanga i roto i te oraanga. (Iuda 8, 16) Kia patoi tatou i te mataara aruia e taua aronga akaapa urutoe ra e kia akamou i to tatou manako ki runga i te au mea meitaki te aere maira kia tatou na roto i te “tavini akono meitaki.” Kia akaperepere tatou i te meitaki o ta Iehova akaaerenga e kia “rave i te au mea ravarai ma te urutoe kore.”
“E Tuatua Rikarika Teia”
13. Akapeea tetai pae i te ariu anga ki te au apiianga a Iesu Karaiti?
13 Mei te mea e kua urutoe tetai pae i te anere mataiti mua i te au tavini akataoongaia, kua urutoe tetai atu i te au apiianga a Iesu. Mei tei rekotiia ia Ioane 6:48-69, kua karanga a Iesu: “Ko te kai i toku kopapa, e te inu i toku nei toto, e ora mutu kore tona.” I te rongo anga i teia au tuatua, “e manganui tana aronga pipi . . . i na ko e, E tuatua rikarika teia, ka kitea ra iaai?” Kua kite meitaki a Iesu e “te koumuumu ra tana au pipi i taua tuatua ra.” Tei runga ravao, “akaruke maira tetai papaki [ia ratou] i reira ra e manganui, kare maira i aru akaou iaia ra.” Inara kare e ko te au pipi katoatoa tei urutoe. E akara ana eaa tei tupu i te ui anga a Iesu ki tana 12 apotetoro: “Ka aere katoa ainei kotou?” Kua pau atu te apotetoro ko Petero: “E te Atu, ka aere tika matou kiaai ra? tei ia koe te tuatua o te ora mutu kore ra; e kua irinaki matou e kua kitea mai e ko koe Tei Tapu a te Atua ra.”
14, 15. (a) No teaa ra tetai e mareka kore ana i tetai tuanga o te au apiianga Kerititiano? (e) Eaa ta tatou ka tamou mai mei te tua o tetai tangata ko Emanuel tona ingoa?
14 I teia tuatau, te vai ra tetai pupu meangiti ua i rotopu i te au tangata o te Atua tei mareka kore i tetai tuanga o te apiianga Kerititiano e kua urutoe i te tuanga o ta Iehova akaaerenga i te enua nei. Eaa ra teia i tupu ei? E tupu putuputu ana taua urutoeanga no te marama kore anga i te mataara e rave ana te Atua i te au apinga. Te akakite marie ua mai nei Tei Anga i te tuatua mou ki tona iti tangata. No reira, tetai taime ka anoanoia to tatou maramaanga o te au Tuatua Tapu kia akatanotanoia. Te maataanga o te au tangata o Iehova e rekareka ana ratou i taua au akatanotanoanga. Tetai pae kua “maata ua i te ketaketa kia tika” e kua riri i taua au tauianga. (Koheleta 7:16) Penei te o maira te tu ngakau parau i roto i te reira, kua topa atu tetai pae i roto i te ereere i te aruanga i tona uaorai manako. Noatu eaa te tumu, e kino tikai taua urutoe anga, mei te mea rai e ka kika atu te reira ia tatou ki roto i teianei ao e ki ta te reira au akaaerenga.
15 Ei akatauanga, ko Emanuel, koia tetai Kite tei akaapa i tetai au apinga aere i tatau mai ana aia i roto i te au puka a te “tavini akono meitaki e te pakari.” (Mataio 24:45) Kua akamutu mai aia i te tatau i ta tatou au puka Kerititiano e taopenga mai kua akakite aia ki te aronga pakari i te putuputuanga i tona ngai e kare aia e inangaro akaou kia riro mai ei Kite no Iehova. Inara, i roto i tetai tuatau poto ua, kua kite mai a Emanuel e te tika ua ra te au apiianga a te akaaerenga a Iehova. Kua aravei atu aia i te Au Kite, e kua akakite i tona tarevake, e kua akaoki akaouia mai aia ei Kite no Iehova. Tei tupu, kua mataora akaou mai aia.
16. Eaa te ka tauturu ia tatou kia autu i te au manako ekoko no runga i tetai au apiianga Kerititiano tikai?
16 Akapeea me te timataia ra tatou i te urutoe no te mea te ekoko ra tatou i tetai au apiianga tikai ta te iti tangata o Iehova e irinaki ana? Kia akakoromaki tatou. Penei ka tata mai te “tavini akono meitaki” i tetai apinga te pau ra i ta tatou au uianga e ka akatikatika i to tatou manako ekoko. E mea pakari kia kimi i te tauturu a te aronga pakari Kerititiano. (Iude 22, 23) Ka rauka katoa te pure, te apiianga uaorai, e te pirianga ma te au taeake irinaki i te pae vaerua i te akakore i te au ekokoanga e i te akaoonu i to tatou tu arikianga no te au tuatua mou Pipiria te akaketaketa ra i te akarongo, ta tatou i kite mai ana na roto i ta Iehova ravenga no te komunikeitianga.
Tamou Marie i te Manako Papu
17, 18. I to te urutoe atu anga, ka akapeea tatou i te reira, e no teaa ra?
17 E tika, e ngoie ua te au tangata apa ua i te ara, e i tetai pae tangata e pakari to ratou akakeuanga i te rave i te au akaapaanga manako kore ua. (Genese 8:21; Roma 5:12) Inara me riro mai tatou ei aronga urutoe ua, te akakino ra tatou i to tatou pirianga ki te Atua ko Iehova. No reira, te inangaroia ra tatou kia akatere meitaki i tetai ua atu akakeuanga kia urutoe.
18 I to te urutoe atu anga no runga i te au apinga i roto i te putuputuanga, e tauta tatou i te akono tamou i te manako papu e kia aru i tetai akanoonooanga matauia no tatou kia angaanga ua rai, kia rekareka, kia meitaki, kia parani, e kia maroiroi i roto i te akarongo. (1 Korinetia 15:58; Tito 2:1-5) Ko Iehova te akatere nei i te au apinga katoatoa i roto tikai i tana akaaerenga, e kua kite meitaki a Iesu i te au tupuanga i roto i te putuputuanga tataki tai, mei tana rai i kite mai i te anere mataiti mua. (Apokalupo 1:10, 11) Kia tiaki marie ua tatou ki runga i te Atua raua ko Karaiti, te Upoko o te putuputuanga. Penei ka taangaangaia te au tiaki akaaere kia akatikatika i te au manamanata te anoanoia ra paa i te akatanotanoia.—Salamo 43:5; Kolosa 1:18; Tito 1:5.
19. I mua ake ka akatere katoatoa te Patireia i te au angaanga a te tangata ravarai, eaa ta tatou apinga ka akamou tatou i to tatou manako ki runga?
19 Kare e roaia atu ana ka ope te akatereanga kino o te au mea nei, e ka akatere katoatoa te Patireia o te Mesia i te au angaanga a te au tangata ravarai. I mua ake ka tae mai ei tera taime, e mea puapinga maata kia akono tamou tatou tatakitai i te manako papu! Ka tauturu teia ia tatou kia kite mai i te au tu meitaki o to tatou au taeake irinaki, auraka oki e akamou ua ki runga i to ratou au tarevake. Me akamou tatou ki runga i to ratou au tu meitaki, ka mataora tatou. Kare oki tatou e akaroiroiia e te urutoeanga, ka akamaroiroiia tatou i reira e ka akaketaketaia i te pae vaerua.
20. Ka akariro tetai manako papu ia tatou kia rekareka i teea au akameitakianga?
20 Ka akariro katoa te manako papu ia tatou kia akamaara i te au akameitakianga ta tatou e rekareka nei no te piri atu anga ki te tuanga o ta Iehova akaaerenga i te enua nei. Ko te akaaerenga anake ua teia i roto i te ao katoa tei tiratiratu ki te Ngateitei o te ao katoa e pini ua ake. Eaa toou manako no runga i te reira tikaanga e te tu ngateitei i te piri atu anga ki roto i te akamorianga o te Atua mou anake ra, ko Iehova? Kia aite to tatou tu mei to Davida rai, tei imene e: “E tei akarongo i te pure ra e, ka tae te tangata ravarai kia koe na. E ao to te tangata i ikiia e koe, e kua akavaitataia mai e koe kia noo i roto i toou ra au paepae: ka mataora ïa matou i te meitaki no toou ra are.”—Salamo 65:2, 4.
Maara Ainei ia Koe?
• Eaa tatou ka mareka ei i te aronga e arataki ra i roto i te putuputuanga?
• Ka akapeea tatou me rave tetai taeake akaaere i te au tarevake?
• Akapeea tatou i te akamanakoanga i te au akatanotanoanga i te maramaanga o te au Tuatua Tapu?
• Eaa te ka tauturu i tetai Kerititiano kia autu i te au manako ekoko?
[Au Uianga Apii]
[Tutu i te kapi 20]
Kua oronga a Davida i te au parani no te iero kia Solomona e kua turuturu ngakau tae i te akamori mou
[Tutu i te kapi 23]
E rekareka ana te aronga pakari Kerititiano i te oronga i te tauturu pae vaerua