Akaora a Iehova i Tei Mamae Ra

“Manganui to te tangata tuatua-tika ra mate; e akaoraia ra aia e Iehova i taua au mea katoa ra.”​—SALAMO 34:19.

1, 2. Eaa te manamanata ta tetai Kerititiano tiratiratu i aro atu, e eaa tatou ka taii katoa ei ki taua tu manakoanga?

TETAI vaine mapu ko Keiko tona ingoa  * e 20 mataiti e tere atu iaia i te tavinianga ei Kite no Iehova. No tetai tuatau, kua tavini ana aia ei painia tamou, me kore ei tangata tamou i te tutu aere i te Patireia. Kua akaperepere tikai aia i taua angaanga takake. Inara, kare i roa rava akenei, kua rokonaia a Keiko e te au manako no te akatakakeanga e te au manako puapinga kore. “E aue ua taku angaanga,” i karanga ai aia. Kia kopae i tona manakoanga taitaia, kua akapou maata a Keiko i tona taime ki te apiianga uaorai. “I na, kare rai i rauka ana iaku i te taui i toku aerenga manako,” i karanga ai aia. “Aere rai kua inangaro au i te mate.”

² Kua taii ana ainei koe ki teia au tu manako taitaia? Ei Kite no Iehova, e maata te au tumu ka rekareka koe, no te mea te akamorianga tau i te Atua “e meitaki tei akakiteia mai to te reira i teianei ao, e te ao a muri atu.” (1 Timoteo 4:8) I teia taime nei, tei roto koe i tetai parataito pae vaerua! Inara, ko te aiteanga ainei e ka paruruia koe mei te kino katoatoa? Kare rava! Te karanga maira te Pipiria: “Manganui to te tangata tuatua-tika ra mate.” (Salamo 34:19) Kare teia i te mea poitirere, mei te mea e “te vai ua nei rai to te ao ravarai i raro ake i taua vaerua kino ra,” ko Satani te Tiaporo. (1 Ioane 5:19) Na roto i tetai au tu, te kite pouroa nei tatou i te au tupuanga o taua tikaanga.​—Ephesia 6:12.

Te Au Tupuanga no te Kino

3. E oronga mai i te au akaraanga Pipiria o te au tavini o te Atua tei kite mai i te taitaia tikai.

³ Ka rauka te taitaia no te tuatau roa i te akapoiri i to tatou akamanakoanga katoatoa. (Maseli 15:15) E akamanako ana i te tangata tuatua tika ko Iobu. I rotopu tikai i tetai manamanata kino pakari, kua karanga a Iobu: “Ko te tangata ta te vaine e anau nei, e iti ua ona puke rā, e te ki oki i te pekapeka.” (Iobu 14:1) Kua kore rava te rekareka o Iobu. No tetai taime, kua manako rai oki aia e kua akaruke a Iehova iaia. (Iobu 29:1-5) Kare e ko Iobu anake ua te tavini o te Atua tei kite mai i te vinivini o te mamae. Te akakite maira te Pipiria kia tatou ia Hana e kua “tumatetenga rava tona ngakau” no tona turanga tamariki kore. (1 Samuela 1:9-11) Taitaia tikaiia e tetai turanga i roto i te pamiri, kua karanga a Rebeka e: “Kua potopoto rava toku aʼo.” (Genese 27:46) I te akamanakoanga i tona au tarevake, kua karanga a Davida e: “Te aere ua nei au ma te aue e pou ua atu te rā.” (Salamo 38:6) Te akataka meitaki maira teia au akaraanga e, te au tane e  te au vaine mataku i te Atua i mua ake i te tuatau Kerititiano, kua akakoromaki i te au tuatau taitaia tikai.

4. Eaa ra e kare i te mea poitirere e e aronga “ngakau taitaia” tetai i rotopu i te au Kerititiano i teia tuatau?

⁴ Akapeea te au Kerititiano? Kua kite mai te apotetoro ko Paulo i te puapinga kia akakite ki te au Tesalonia kia “akapumaana atu i te ngakau taitaia.” (1 Tesalonia 5:14) Te akakite maira tetai tataanga e, te tuatua Ereni tei uriia e “ngakau taitaia” te taiku katoaia ra ki te aronga “tei rokonaia e te taitaia i roto i te oraanga no tetai tuatau poto ua.” Te akakite maira te au tuatua a Paulo e kua taitaia tetai aronga akatainuia i roto i taua putuputuanga i Tesalonia. E aronga ngakau taitaia katoa tetai i rotopu i te au Kerititiano i teia tuatau nei. Inara eaa ratou i taitaia ei? E akamanako ana tatou e toru tumu maata.

Ka Akataitaia to Tatou Tu Ara ia Tatou

5, 6. Eaa te pumaana te ka rauka mai mei ia Roma 7:22-25?

⁵ Kare mei te au tangata kino tei “kite kore i te akama,” e mamae ana te au Kerititiano mou i to ratou turanga ara. (Ephesia 4:19) Penei ka manako mai ratou mei ia Paulo rai, tei tata e: “Te rekareka nei oki au i te ture a te Atua i te akonoanga i te tangata i roto ra; Te kite nei ra au i tetai ture i roto i toku kopapa nei, i te māro mai anga i te ture i roto i toku ngakau, e te akariro anga iaku ei tuikaa na te ture kino i roto i toku nei kopapa.” E oti kua karanga a Paulo e: “Aue oki au ko te tangata mate maata e!”​—Roma 7:22-24.

⁶ Kua manako ana ainei koe mei ia Paulo rai? Kare i te mea tarevake kia matakite koe i toou au tu apa, mei te mea e ka akaketaketa teia i runga ia koe i te kino maata o taau ara e ka akamaroiroi te reira i toou inangaro kia kopae i te kino. Inara kare koe e inangaroia kia noo taitaia ua no toou au tu paruparu. Ki tana au tuatua no te taitaia tei taiku uaia akenei, kua karanga a Paulo: “E akameitaki au i te Atua i te mea e ora i to tatou Atu ra ia Iesu Mesia.” (Roma 7:25) Ae, kua irinaki a Paulo e ka rauka i to Iesu toto akamaringiia i te akaora iaia mei te ara a Adamu.​—Roma 5:18.

7. Eaa te ka tauturu i tetai tangata kia kore aia e taitaia no tona au tu apikepike kia rave i te ara?

⁷ Me te manako akateiaa ia ra koe e toou turanga apa, kia akapumaana ia koe e te au tuatua a te apotetoro ko Ioane, tei tata e: “Kia rokoia atura tetai tangata i te ara, e Tika to tatou tei ko i te Metua ra, ko Iesu Mesia tuatua-tika ra: Koia oki te tarangaara i ta tatou nei ara; kare oki i ta tatou anake ra, i ta to te ao katoa nei ra.” (1 Ioane 2:1, 2) Me taitaiaia koe e toou au tu apikepike kia rave i te ara, e akamaara ua rai e kua mate a Iesu no te aronga ara, kare no te au tangata apa kore. E tikai, “Kua rave katoatoa oki i te ara, e kua ngere i te akameitaki a te Atua.”​—Roma 3:23.

8, 9. Eaa tatou ka kopae ei i te au manako i te akaapaanga ia tatou uaorai?

⁸ Inara, penei, kua rave koe i tetai ara kino i te tuatau i topa. Kare ekokoanga, e kua taiku koe i te reira i roto i taau pure kia Iehova, penei e putuputu te taime i te taikuanga. Kua rauka ia koe i te tauturu pae vaerua mei te aronga pakari Kerititiano. (Iakobo 5:14, 15) Kua tataraapa tikai koe e no reira tei roto nei rai koe i te putuputuanga. Me kore penei no tetai tuatau kua akaruke koe i te akaaerenga a te Atua, inara i muri mai kua tataraapa koe e kua rauka akaou i tetai turanga meitaki. Noatu i teiea turanga, penei ka maaraara ua rai ia koe i taau ara i rave i te tuatau i topa e kua akataitaia te reira ia koe. Me ka tupu te reira, e kia akamaara e e akakore ana a Iehova i te ara a te aronga tei tataraara tikai “na roto i tetai mataara maata roa atu.” (Isaia 55:7, NW) Pera katoa, kare aia e inangaro kia manako akaapa puapinga kore ua koe ia koe. Ka akatupu tera i to Satani inangaro. (2 Korinetia 2:7, 10, 11) Ka takoreia te Tiaporo no te mea kua tano rai aia kia takoreia, inara te inangaro ra aia kia manako rai koe e kua tano katoa koe kia takoreia. (Apokalupo 20:10) Auraka e tuku ia Satani kia autu i roto i teia parani kia takore i toou akarongo. (Ephesia 6:11) Mari ra, kia “patoi atu” iaia i roto i teia turanga, mei taau rai e rave ana i roto i tetai au mataara ke atu.​—1 Petero 5:9.

⁹ Ia Apokalupo 12:10, kua kapikiia a Satani e ko tei “akaapa i to tatou au taeake”​—te au Kerititiano akatainuia. Kua ‘akaapa [aia] ia ratou i te po e te ao’ i mua i te aroaro o te Atua. Penei te akamanakoanga i runga i taua irava ka tauturu ia koe i te kite mai e ka rekareka a Satani, te akaapa pikikaa, me akaapa koe me kore me ka akakino koe ia koe uaorai, noatu e kare a Iehova e manako akapera  mai ana ia koe. (1 Ioane 3:19-22) Eaa koe ka akamanako mamae ua ai i runga i toou au tu tarevake e tae rava ki te inangaro i te tuku i te au? Auraka e akatika ia Satani kia takore i toou pirianga ki te Atua. Auraka rava e akatika i te Tiaporo kia maani ia koe kia akangaropoina i te tikaanga no runga i to Iehova tu “takinga-meitaki, e te aroa ua, e te akakoromaki maata, e te meitaki maata, e te tuatua-mou.”​—Exodo 34:6.

Ka Akaapikepike to Tatou Au Tu Paruparu ia Tatou

10. Na roto i teea au tu e akataitaia ana to tatou au tu paruparu ia tatou?

¹⁰ E taitaia ana tetai au Kerititiano i te tu e akakeu ana to ratou au tu paruparu i ta ratou tavinianga i te Atua. Te tika ra te reira ia koe? Penei te tapu ra tetai maki kino, me kore te ruaineanga, me kore tetai atu au turanga ke mai, ia koe mei te akapou maata anga i te tuatau ki te angaanga orometua mei taau rai i rave ana i te tuatau i topa. E tika, te akamaroiroiia ra te au Kerititiano kia taporoporo i te tuatau no te angaanga a te Atua. (Ephesia 5:15, 16) Inara akapeea me te tapu ra te au tu paruparu tikai ia koe mei te angaanga maata atu anga i roto i te angaanga orometua e e tumuanga taitaia teia kia koe?

11. Akapeea te ako a Paulo tei rekotiia ia Galatia 6:4 i te puapinga anga ia tatou?

¹¹ Te raurau maira te Pipiria e auraka tatou e akatau mari ra e “aru ra i te aronga i rauka tei tuatuaia maira i te akarongo e te akakoromaki.” (Ebera 6:12) Ka rauka ia tatou i te rave ua i teia me akara matatio tatou i to ratou akaraanga meitaki e e kimi i te aru i to ratou akarongo. Inara, kare tatou e puapingaia me akaaite tau kore atu tatou ia tatou uaorai ki tetai ke i te taopenga anga e noatu eaa ta tatou ka rave kare rai e meitaki rava ana. No reira, e mea meitaki kia akono tatou i te ako a Paulo: “Ka timata te tangata ravarai i tana uaorai angaanga, ei reira aia e rekarekaʼi iaia uaorai, eiaa i tetai ke.”​—Galatia 6:4.

12. Eaa tatou ka rekareka ei i roto i ta tatou tavinianga e oronga nei kia Iehova?

¹² E tumu meitaki to te au Kerititiano kia rekareka maata, noatu e kua kotingaia ratou e te au manamanata kino pakari i te pae kopapa. Te akapapu maira te Pipiria ia tatou: “Kare te Atua i te Atua tuatua-tika kore, ka akangaro atu ei aia i ta kotou angaanga i rave, e to kotou anoano, i tona ingoa i akakite puia e kotou na, ko kotou i matuapuru i te aronga tapu, e te matuapuru ua ra oki kotou.” (Ebera 6:10) Penei e au turanga tetai e kare e rauka ia koe i te akatere tei akangata ia koe kia akono tamou i tetai tuanga angaanga taau i mataora ana i mua atu ana. Inara, ma te tauturu a Iehova, penei ka rauka ia koe i te piri maata atu ki roto i tetai au angaanga tikai o te angaanga orometua Kerititiano, mei te tutu anga na runga i te tereponi e te tata reta. Ka papu ia koe e ka akameitaki te Atua ko Iehova ia koe no taau tavinianga ngakau tae e toou aroa nona e no te au tangata.​—Mataio 22:36-40.

Akataitaia te “Au Tuatau Kino Maata” ia Tatou

13, 14. (a) Na roto i teea au tu e akatupu mai ana teia au “tuatau kino” i te mamae kia tatou? (e) Eaa te akapapuanga e te ngere ra te aroa i teia tuatau?

¹³ Noatu e te akara atura tatou ki te oraanga i roto i to te Atua ao ou tuatua tika, i teianei te noo nei tatou i roto i te “au tuatau kikino tei ngata roa no te akono atu.” (2 Timoteo 3:1, NW) Kua akapumaanaia tatou i te kite e te tou maira te au tupuanga taitaia ki te vaitata anga maira to tatou akaoraanga. I na, te tupu nei te kino kia tatou e te au turanga e koropini nei ia tatou. Ei akaraanga, akapeea me kare koe e angaanga ana? Penei kare e rava ana te angaanga, e i te pouanga i te au marama, ka manako mai koe me te kite maira a Iehova i toou turanga me kore me te akarongo maira aia ki taau au pure. Me kore penei ko koe tetai tei o atu ki roto i tetai turanga takinokinoanga me kore tetai atu turanga kino. Penei te tatau ua anga i te au nuti maata i roto i te nuti pepa ka akakeu ia koe kia manako mai mei te tangata tuatua tika ra ko Lota, “tei mamae” (“taitaia tikai,” Young’s Literal Translation of the Holy Bible) i te tu akono tau kore o te aronga takapini iaia.​—2 Petero 2:7.

¹⁴ Te vai ra tetai tuanga okotai tikai o te au tuatau openga kare e rauka ia tatou i te akangaropoina. Kua totou mai te Pipiria e e manganui te au tangata ka “aroa kore.” (2 Timoteo 3:3) I roto i te au ngutuare e manganui te ngere maata nei te aroa i roto i te pamiri. E tikai, “te akakite maira te  akapapuanga e i tetai taime e taiaia ana te au tangata kia mate, me kore e taia uaia ana, me kore e takinokinoia ana i te pae manako me kore e kangaia ana ratou. E raveia ana teia au angaanga e tetai i roto i te pamiri e kare na tetai ke atu,” i karanga ai te puka Family Violence. “Ki tetai aronga mamaata e te au tamariki, te ngai tikai e akaariia ana te aroa e ka akono meitakiia ratou, ko te ngai kino roa atuia.” Te aronga tei kite mai ana i teia tu oraanga tau kore i roto i te kainga, penei i te au mataiti i muri roa mai ka tupu te au tuatau apiapi e te taitaia kia ratou. Akapeea me kua tupu teia kia koe?

15. Akapeea to Iehova aroa i teitei rava atu i to tetai ua atu tangata?

¹⁵ Kua imene te tata taramo ko Davida e: “Akaruke ua toku metua tane e toku metua vaine iaku, ei reirā Iehova e rave mai ei iaku.” (Salamo 27:10) E pumaana tikai i te kiteanga e e maata rava atu to Iehova aroa i to tetai ua atu metua! Noatu te mamae i te kopaeia anga, te takinokinoia anga, me kore te akarukenaia anga e tetai metua, kare o te reira akakeuanga ki te maata o to Iehova manako mai anga ia koe. (Roma 8:38, 39) E akamaara ana e te akavaitata maira te Atua i tana aronga e inangaro ana. (Ioane 3:16; 6:44) Noatu eaa te tu i ta te tangata i rave mai kia koe, te inangaroia maira koe e toou Metua i te rangi!

Au Takainga Tau ka Akamaru i te Taitaia

16, 17. Me te aro atura i te tu taitaia, eaa ta tetai tangata ka rave kia tamou marie i tona maroiroi i te pae vaerua?

¹⁶ Ka rauka ia koe i te akono i te au takainga tau kia autu i te tu taitaia. Ei akatauanga, e aru i tetai porokaramu akamaroiroi no te angaanga Kerititiano. E akamanako oonu ki runga i te Tuatua a te Atua, koia oki me pakari roa te taitaia. Kua imene te tata taramo e: “Iaku i karanga ra, Te paeke nei toku vaevae, kua turu mai to takinga-meitaki iaku, e Iehova. I rotopu i toku nei manako mirimiri-ngata i roto iaku nei, na to akapumaana e akarekareka mai i toku vaerua.” (Salamo 94:18, 19) Ka tauturu te tatau putuputu anga i te Pipiria i te akaki i toou manako ma te au tuatua pumaana e te au manako akamaroiroi.

¹⁷ E puapinga katoa te pure. Noatu me kare e rauka ia koe i te akakite tikai i te oonu o toou au manako na roto i te au tuatua, te kite ua maira a Iehova e eaa taau e tauta ra i te tuatua. (Roma 8:26, 27) Te oronga maira te tata taramo i teia akapapuanga: “E tuku koe i taau apainga kia Iehova ra, e nana koe e tauturu mai; kare rava aia e vaoo ua atu i te tangata tuatua-tika kia akangaueueia ra.”​—Salamo 55:22.

18. Eaa te au takainga tau ka rauka i tetai tangata taitaia i te rave?

¹⁸ E kite mai ana tetai pae i te taitaia no te mea kua tuia e te maki i te pae manako. * Me ko toou tu rai teia, kia tauta i te akamou i toou manako ki runga i to te Atua ao ou e te tuatau e “Kare oki to  reira e karanga e, Kua maki au.” (Isaia 33:24) Me i te akaraanga e kare toou au manako taitaia no tetai tuatau poto ua, penei e mea pakari kia kimi atu i te tauturu a te aronga kite karape. (Mataio 9:12) E mea puapinga katoa kia akono meitaki ia koe uaorai i te pae kopapa. Penei ka rauka tetai tauturuanga na te kaikaianga meitaki e te au angaanga akamatutuanga i te kopapa. E akapapu meitaki e te akangaroi meitaki ra koe. Auraka e noo roa i te akarakara tivi, e kopae i te au tu tarekarekaanga te ka akaroiroi ia koe i te pae kopapa e te pae manako. Tei runga ravao, e akapiri ua atu rai ki roto i te au angaanga te akarekareka ra i te Atua! Noatu e kare rai i tae ake te tuatau e ka “orei [a Iehova] i te roi-mata katoatoa,” ka tauturu ra aia ia koe kia akakoromaki.​—Apokalupo 21:4; 1 Korinetia 10:13.

Nooanga “i Raro ake i te Rima Mana o te Atua”

19. Eaa ta Iehova e taputou maira ki te aronga tei tamamaeia?

¹⁹ Te akapapu maira te Pipiria ia tatou e noatu e manganui te au tumatetenga o te tangata tuatua tika, “e akaoraia ra aia e Iehova i taua au mea katoa ra.” (Salamo 34:19) Akapeea te Atua i te raveanga i teia? I te pure putuputuanga te apotetoro ko Paulo kia akaoraia mai aia mei tona “tara i roto i taku kopapa nei,” kua akakite a Iehova kiaia: “E teianei, e mea rekareka ïa iaku kia akatietie i toku nei paruparu.” (2 Korinetia 12:7-9) Eaa ta Iehova i taputou kia Paulo, e eaa tana e taputou maira kia koe? Kare e ko tetai rapakauanga i teia taime nei, mari ra te mana kia akakoromaki.

20. Noatu to tatou au timataanga, eaa te akapapuia maira kia tatou ia 1 Petero 5:6, 7?

²⁰ Kua tata te apotetoro ko Petero: “Ka akamoraro ia kotou uaorai i raro ake i te rima mana o te Atua, kia akateitei aia ia kotou i te tuatau tikai. E uri i to kotou tumatetenga katoa ki runga iaia; koia oki te tiaki mai ia kotou.” (1 Petero 5:6, 7) No te mea e te inangaro maira Iehova ia koe, kare aia e akaruke ia koe. Ka turuturu aia ia koe noatu te au timataanga te ka tupu kia koe. E akamanako ua koe e tei “raro ake [te au Kerititiano tiratiratu] i te rima mana o te Atua.” Ia tatou e tavini ra ia Iehova, te oronga maira aia kia tatou i te maroiroi kia akakoromaki. Me tiratiratu tatou kiaia, kare e apinga e akakino tamou ia tatou i te pae vaerua. No reira, kia akono tamou tatou i te tiratiratu kia Iehova e kia rekareka tatou i te oraanga mutu kore i roto i tona ao ou e kia kite tatou i te tuatau me akaora tikai mai ei aia i tei mamae ra!

[Au Tataanga Rikiriki i Raro]

Maara Ainei ia Koe?

• Eaa te kino e tupu katoa ana ki te au tavini o Iehova?

• Eaa tetai au apinga te ka akatupu i tetai au tangata o te Atua kia manako taitaia mai?

• Akapeea a Iehova i te tauturuanga ia tatou kia autu i to tatou au apiapi?

• Na roto i teea tu e tei ‘raro ake tatou i te rima mana o te Atua’?

[Au Uianga Apii]

[Au Tutu i te kapi 25]

Noatu te au timataanga, e tumu to te iti tangata o Iehova kia rekareka

[Tutu i te kapi 28]

Te akakitekiteanga na runga i te tereponi ko tetai mataaraia kia oronga i to tatou maroiroi katoa kia Iehova