“Ko te Atua Ta Matou e Akarongo e Tikaʼi Auraka te Tangata”

‘E Tika i to Matou Atua i te Akaora ia Matou’

E TUPUANGA umere tikai teia! Kua akatuia tetai tiki auro maatamaata i runga i te ngai mataataa i Dura, tei te pae ua mai i te oire o Babulonia. Kua akatapuia te tiki i te tuatau o tetai akaepaepaanga takake, kua aere mai te aronga taoonga mamaata te inangaroia ra kia tipapa ki raro i mua i te tiki, i te tangi anga mai o te au apinga akatangi tukeke. Kua akaue te ariki o Babulonia ko Nebukanesa e ko te aronga kare i akamori ana i te tiki ka tamateia i roto i tetai umu ai kaka. Kare e tangata e inangaro i te akarongo kore i te akauenga.

Kua poitirere te aronga tei tae mai, no te mea e toru puke tangata te akamori ra ia Iehova​—ko Sadaraka, Meseka, e Abedenego​—kare i tipapa atu ana ki raro. Kua kite ratou e me rave ratou i te reira te aati ra ratou i ta ratou akamori anga ki te Atua ko Iehova. (Deuteronomi 5:8-10) Kua maroia ratou kia akataka mai i to ratou turanga tiratiratu, kua akakite mataku kore atura ratou kia Nebukanesa: “I na, e tika i to matou Atua, ta matou e akamori nei, i te akaora ia matou i te umu ai kakā ra: e nana rai matou e akaora i to rima, e te ariki. Kore oti ra, kare rai matou e araara i toou ra au atua, kia kite mai koe, e te ariki, kare oki e akamori i te tiki auro i akatuia e koe ra.”​—Daniela 3:17, 18.

Te titiriia anga te puke tangata Epera toko toru ki roto i te umu ai kaka, kua akaora temeioia mai ratou. Kua tono mai te Atua i tetai angera kia paruru i Tona au tavini akarongo mou. Kua iki takere ana ratou i te akarongo kia Iehova noatu e ka tamateia ratou. * Aiteite ua to ratou turanga ki to te au apotetoro a Iesu Karaiti, tei akakite ana ki mua i te akavaanga teitei ngati Iuda i te ono anere mataiti i muri mai: “Ko te Atua ta matou e akarongo e tikaʼi auraka te tangata.”​—Angaanga 5:29.

Au Apiianga Puapinga no Tatou

E au akaraanga meitaki to Sadaraka, Meseka, e Abedenego no te akarongo, kauraro, e te tiratiratu. Kua akono te puke tangata Epera toko toru i te akarongo kia Iehova. Kare to ratou akava ngakau tei tereniia i roto i te Tuatua Tapu, i akatika ana ia ratou kia piri atu ki roto i tetai angaanga no te akamori anga pikikaa e te akapaapaa anga enua. Kua irinaki pu tikai rai te au Kerititiano i teia tuatau i te Atua mou. Te aratakiia nei ratou e to ratou akava ngakau tei tereniia i roto i te Pipiria. Kua patoi ratou e auraka e piri atu ki roto i te au angaanga akamori anga pikikaa e te au angaanga akaepaepaanga, te aati ra i te ture e te au kaveinga a te Atua.

Kua irinaki te puke tangata Epera toko toru ia Iehova, kua patoi ratou i te akaruke i ta ratou kauraro anga kiaia no tetai ua atu apinga ta te Patireia o Babulonia ka oronga mai, no tetai turanga kia kitea mai, te taoonga, e te kaka. Kua ariki puareinga ua taua au mapu i te mamae e te mate kia kore to ratou pirianga ki te Atua e akakinoia. Mei ia Mose rai i mua ake ia ratou, “maroiroi rava atura [ratou] i te akara anga atu iaia, i tei kore e kitea kia akara ra.” (Ebera 11:27) Me kua iki a Iehova i te akaora mai ia ratou, kua tauta teia toko toru i te akono tamou i te tiratiratu, kare ra ratou i tuku ua i te akaora ia ratou. I te taikuanga ki to ratou akaraanga,  te tuatua ra te apotetoro ko Paulo no runga i te aronga akarongo mou tei “tamate i te ririnui i o te ai.” (Ebera 11:34) Te akakite maira te au tavini o Iehova i taua akarongo e te kauraro to ratou aravei atu anga i te au timataanga tiratiratu i to tatou tuatau.

Mei tei tupu ana kia Sadaraka, Meseka, e Abedenego, kite katoa tatou e ka tutaki te Atua i te aronga tei tiratiratu kiaia. Kua imene te tata taramo e: “Kare oki [a Iehova] e akaruke i tona aronga tapu ra.” (Salamo 37:28) I teia tuatau, kare oki tatou e kite e ka akaora temeio mai te Atua ia tatou, mei tana rai i rave ana ki te puke tangata Epera toko toru ra. Te irinaki nei ra tatou e noatu e eaa te tu o te kino ka tupu mai kia tatou, ka tauturu mai to tatou Metua i te rangi ia tatou. Penei ka akaatea te Atua i te manamanata, ka oronga mai aia i te maroiroi kia tatou kia akakoromaki ua atu tatou, me kare ka akatuakaou mai aia ia tatou, me akono tamou tatou i te tiratiratu e e mate ua atu. (Salamo 37:10, 11, 29; Ioane 5:28, 29) I te au taime ravarai e autu ua ana te akarongo, te kauraro, e te tiratiratu me timataia mai to tatou tiratiratu, me iki tatou i te akarongo ki te Atua auraka te tangata.

[Tataanga Rikiriki i Raro]

[Pia/Tutu i te kapi 9]

KUA KITE AINEI KOE?

• 20 tu ma mataiti o te puke tangata Epera toko toru to ratou aravei atu anga i teia timataanga tiratiratu.

• Kua akamaataia te vera o te umu ai.​—Daniela 3:19.