“Mei Teia Ra, te Irinaki nei Au e e Atua Tetai”

TE OKI ra tetai vaine Ukarania ki te kainga mei te angaanga, ko Alexandra tona ingoa, e noo ana aia i Prague, i te Tieki Repapuriki. I ko i tetai ngai tiaki anga pati, kua kite aia i tetai kiri i runga i te one, e tue aereia ra e te aronga e aere ra na reira. I te mou mai anga aia e i te akara anga ki roto, kua poitirere tikai aia i tana i kite. Te vai ra tetai ruru moni pepa e 5,000 koruna i te mea okotai! I te akaraanga kare e tangata i reira e kimi aere ra i te kiri. Ei manuiri e noo ra i te Tieki Repapuriki, e ngata tikai te oraanga no Alexandra. Eaa ra tana ka rave?

I te oki atu anga ki te kainga, kua akaari a Alexandra i te kiri ki tana tamaine, ko Victoria. Kua kimi raua i roto i te kiri i te ingoa e te ngai nooanga o te ona kare ra i kiteaia. Inara, e vaanga pepa tetai i roto i te kiri e au numero aere tei tataia ki runga. I tetai tua o te pepa kua tataia tetai numero pangika, e i tetai tua mai, e au numero akaou tetai. E au akakiteanga katoa to roto i te kiri ki te pangika e tetai tuatua i te akakite e e “330,000 koruny” (mei te $15,500, N.Z.). Ko te maata tikai tera o te moni i roto i te kiri.

I te taangaanga anga i tetai numero terepaoni, kua puapinga kore ua ta Alexandra au tautaanga i te ringi i te pangika. I reira kua aere atu raua ko tana tamaine ki ko i te pangika e kua akamarama atu eaa tei tupu. Kua ui atu raua no runga i te numero pangika tei kitea mai e raua i roto i te kiri. Inara, kare a te pangika rekoti no taua numero ra. I terao mai ra, kua oki akaou atu a Alexandra ma tetai numero ke mai i roto i te kiri. I teianei, kua kitea mai e te pangika tetai tangata, e vaine, nana tera numero pangika. Kua ringi atu a Alexandra raua ko Victoria i taua vaine ra, e kua akapapu mai aia e nana te kiri i ngaro. I te aravei anga ratou pouroa, kua akameitaki mai te vaine ia raua ma te pumaana e kua ui mai e, “Eaa te tutaki no te akaoki anga mai i te moni?”

Kua pau atu a Victoria e: “Kare e tutaki. Naringa maua i inangaro i te moni, kua rave maua i te reira.” Na roto i te manga tuatua Tieki ua tana i kite, kua akamarama atu aia e: “Te akaoki atu nei maua i te moni kia koe no te mea ko maua tetai o te Au Kite o Iehova. Kare e tika i to maua akava ngakau tei tereniia e te Pipiria kia apai i tetai apinga kare na maua.” (Ebera 13:18) Kua tuatua maira taua vaine ra ma te rekareka e, “Mei teia ra, te irinaki nei au e e Atua tetai.”