Au Uianga a te Aronga Tatau

I muri ake i te timataanga openga i te openga o te Mareniamu, ka rauka ainei i te au tangata kia ara e kia mate?

E rua nga irava tei kiteaia i roto ia Apokalupo te pau maira i teia: “Uriia atura te mate e ko ade ki roto i te roto ai. Ko te rua teia o te mate.” (Apokalupo 20:14) “Nana e orei i te roi-mata katoatoa; e e kore rava te mate, e te aue, e te mii; e te mamae oki, e kore katoa ïa; no te mea kua kore te au mea taito.”​—Apokalupo 21:4.

E akamanako ana i te taime e tupu ra i konei. Te uriia anga te ‘mate e ade’ ki roto i te roto ai ka raveia i muri ake i te akava angaia te aronga tei ora mai mei ia Aramakito mei te “au tuatua i tataia ki roto i taua nga buka ra,” te akatu angaia mai te aronga i mate, e tetai ua atu au tangata tei anauia i muri ake ia Aramakito, me kore i muri ake i te akataka angaia mai te au umuumuanga a Iehova no te au tangata ravarai i te tuatau o te tauatini mataiti. (Apokalupo 20:12, 13) E orama ke atu ta te apotetoro ko Ioane i tata, tei kiteaia i roto ia Apokalupo pene 21, te ka akatupuia i te tuatau o to Iesu Karaiti Tutaraanga Tauatini Mataiti. Inara, i te openga roa o te Ra Akavaanga o te tauatini mataiti e akatupu takiriia ai taua orama ra. Ei reira a Iehova e noo ei i rotopu i te au tangata ravarai na te manako ki katoa anga e kare e rotopu, kua orongaia atu oki e Iesu te Patireia ki tona Metua. Ei akatutuanga ka noo a Iehova ki rotopu ia ratou e e riro mai ratou “ei tangata nona” na roto i tetai mataara tinamou e te tika tikai. Ka akatupuia te taputou e ka “kore rava te mate” i te rauka anga i te au tangata ravarai te tu apa kore no tei taangaanga pu tikaiia te atinga oko o Karaiti.​—Apokalupo 21:3, 4.

No reira, ko te mate tei akakiteia mai i roto i nga irava i taikuia mai i runga akenei ko te mate a Adamu, te ka akakoreia e te oko o Karaiti. (Roma 5:12-21) Me akakoreia te mate tei akatuangaia mai ki te au tangata ravarai e te tangata mua, ka aite te au tangata mei ia Adamu rai i tona angaia mai anga. E tangata apa kore a Adamu, inara kare te aite anga o te reira e kare aia e mate. Kua akakite a Iehova kia Adamu e auraka e kai i te “rakau e kite ei i te meitaki e te kino” e kua karanga atu e: “I te rā e kai ei koe i to reira, ka mate ïa koe.” (Genese 2:17) Kua tupu mai te mate no te ara akakoroia. I muri ake i te timataanga openga i te openga o te Tutaraanga Tauatini Mataiti, ka vai ua rai te au tangata ei au tangata akarangatiraia. (Apokalupo 20:7-10) Ka rauka ua rai ia ratou i te iki i te tika anga e me ka tavini ua atu rai ratou ia Iehova me kare. Kare e papu e me ka anga ke atu tetai tangata mei te Atua, mei ia Adamu rai.

Eaa te ka tupu ki tetai tangata tei iki meameaau i muri ake i te timataanga openga me kare oki e mate e kare oki a Ate? I taua tuatau, ka akakoreia te mate a Adamu. E ko Ate, te vaarua tanumanga no te au tangata ravarai ma te manakonakoanga no te tuakaouanga, kare e vai akaou. Inara, ko tetai ua atu tangata meameaau ka uriia e Iehova ki roto i te roto ai, te arai anga i te manakonakoanga nona no tetai tuakaouanga. Ka aite taua mate ra ki te mate tei tupu kia Adamu raua ko Eva, kare ko te mate tei akatuangaia mai e Adamu ki te au tangata.

Inara, kare e tumu anga no tatou e ka tupu mai rai teia. Ko te aronga tei pati i te timataanga openga e tuke ake rai ratou mei ia Adamu i roto i tetai manako puapinga maata. Kua timata pu tikaiia ratou. Papu tikai ia tatou e ka rave meitakiia te timataanga openga no te mea kua kite a Iehova e akapeea i te akara matatio anga ia roto e ia vao i te au tangata. Te irinaki nei tatou e na te timataanga openga e takore atu i tetai au tangata kare e taangaanga meitaki i ta ratou ikianga rangatira. No reira, noatu e ka patoi meameaau taua au tangata tei pati i te timataanga openga i te Atua e ka takoreia atu i reira, te irinakiia nei e kare taua mea e tupu mai.

[Tutu i te kapi 31]

I muri ake i te timataanga openga, na roto i teea tu e akaaiteia ai te au tangata ravarai kia Adamu?