Iobu​—E Tangata Akakoromaki e te Tiratiratu

“Kua akamaara ainei koe i toku tavini ia Iobu, kare oki ona e aite i runga i te enua nei, e tangata apa kore e te tiratiratu, i te mataku anga i te Atua, e te akaruke anga i te kino?”​—IOBU 1:8.

1, 2. (a) Eaa te au tumatetenga poitirere tei tupu kia Iobu? (e) E akataka mai i to Iobu oraanga i mua ake i tupu mai ei te au tumatetenga.

E TANGATA tetai, e i te akaraanga kua tu aia i te au apinga katoatoa​—te moni, te turanga teitei, te oraanga meitaki i te pae kopapa, e tetai oraanga pamiri mataora. Inara, kua tupu te tumatetenga kiaia e toru taime i te aere viviki mai anga. Ma te tu poitirere, kua ruti aia i tana au apinga nui. Aru mai, kua matemate pouroa tana au tamariki i roto i tetai uriia tuke ua ake rai. Kare i roa i muri mai, kua rokoia aia e tetai maki kino, e tei tupu kua ki tona kopapa katoa i te au ee mamae. Penei kua kite mai koe e ko Iobu taua tangata ra, tetai tangata puapinga maata i roto i te puka Pipiria te akairo ra i tona ingoa.​—Iobu, pene 1 e te 2.

² “Naringa au i teianei mei tei nga marama i topa akenei e,” i aue ei aia. (Iobu 3:3; 29:2) Me tupu ana tetai tumatetenga, koai ia tangata e kare aia e inangaro ana i tona oraanga meitaki i te tuatau mua? No runga ia Iobu, kua akono aia i tetai oraanga meitaki, i te akaraanga kua paruruia mei te au tupuanga kino. Kua akangateitei te au tangata maata iaia e kua kimi atu i tana akoanga. (Iobu 29:5-11) E tangata moni aia, inara kua akono meitaki aia i te moni i tona ngai tau. (Iobu 31:24, 25, 28) Me aravei ana aia i te au takaua me kore te au matiroeroe te inangaro tauturu ra, kua tauturu aia ia ratou. (Iobu 29:12-16) E kua vai tiratiratu aia ki tana vaine.​—Iobu 31:1, 9, 11.

3. Eaa to Iehova manako ia Iobu?

³ Kua akono a Iobu i tetai oraanga apa kore no te mea te akamori ra aia i te Atua. “Kare oki ona e aite i runga i te enua nei,” i karanga ai a Iehova, “e tangata apa kore e te tiratiratu, i te mataku anga i te Atua, e te akaruke anga i te kino.” (Iobu 1:1, 8) Inara noatu to Iobu tu akono apa kore, kua takore te au tumatetenga i tona tu oraanga meitaki. Pouroa tana au apinga i angaanga pakari ei kua ngaro ke ua, e kua timataia tona tu tikai e te mamae, te manamanata, e te riri.

4. Eaa i meitaki ei kia akamanako atu i to Iobu timataanga?

⁴ E tikai, kare e ko Iobu te tavini anake ua o te Atua tei kite tikai mai i tetai tumatetenga. Kua marama ua te au Kerititiano e manganui i teia tuatau i tei tupu kiaia. No teia tumu, ka tau tatou kia akamanako meitaki e rua nga uianga: Akapeea te akamaaraanga i to Iobu timataanga i te tauturu ia tatou me te aro atura tatou i tetai tumatetenga?  E akapeea te reira i te apiianga ia tatou kia tangi aroa maata atu i tetai ke tei kite mai i te mamae?

Tetai Maroanga no te Tu Tiratiratu e te Timataanga no te Tu Apa Kore

5. Mei ta Satani rai i karanga, eaa te tumu i tavini ei a Iobu i te Atua?

⁵ E tuke ua ake rai to Iobu turanga. No to Iobu tu marama kore, kua akaekoko te Tiaporo i to Iobu au akakoroanga i te tavinianga i te Atua. I tetai akaputuputuanga i te rangi ra, kua arataki a Iehova i te manakoanga ki to Iobu au tu meitaki, e kua pau atu a Satani: “Kare ainei tei koropiniia aia e koe, e tona ra are, e tana katoa ra au mea ravarai e pini ua ake?” Kua karanga oki a Satani e kua akakeuia a Iobu e te tu noinoi​—e i te karanga anga e mei tera rai te au tavini pouroa o te Atua. “Ka akatika ua atura koe i to rima i tenana, ka rave atu ei i tana e kia ope rava, kare aia e kore i te akakino ia koe ki mua i to mata,” i karanga ai a Satani kia Iehova.​—Iobu 1:8-11.

6. Eaa te maroanga puapinga maata ta Satani i akatupu?

⁶ E puapinga maata te reira maroanga. Kua akaao a Satani i te tu e taangaanga ana a Iehova i tona turanga ngateitei. Ka rauka ainei i te Atua i te tutara ma te aroa i te ao katoa e pini ua ake? Me kore, mei ta Satani i karanga ei, ka autu ua ainei te tu noinoi i te openga iora? Kua akatika a Iehova i te Tiaporo kia aka o mai ia Iobu ei akaraanga no tetai oroanga, ma te papu tikai i roto i te tu tiratiratu e te tu apa kore o Tona tavini. E no reira, na Satani tikai i apai mai ki runga ia Iobu i te au tumatetenga tei tupu viviki i te aere anga mai. I te puapinga kore anga ta Satani au tautaanga i te akamataanga, kua akatupu aia i tetai maki mamae ki runga ia Iobu. “Ei kiri no te kiri, e riro oki ta te tangata katoa ra ei oko i tona ora,” i akaapa ei te Tiaporo.​—Iobu 2:4.

7. Na roto i teea au tu e kite maira te au tavini o te Atua i teia tuatau nei i te au timataanga tei aite ki to Iobu?

⁷ I te mea e kare te maataanga o te au Kerititiano i teia tuatau e kino ana mei ia Iobu rai, e tupu ana tetai au tu tumatetenga ke mai kia ratou. E manganui te aro atura i te takinga kino anga me kore te au manamanata o te pamiri. Ka riro te akaaoanga i te pae o te moni me kore te oraanga makimaki ei kino pakari tikai. Kua akaatinga tetai pae i to ratou au oraanga no to ratou akarongo. E tikai, auraka tatou e manako ua e na Satani tikai e akatupu ana i te au tumatetenga tataki tai te ka tupu mai kia tatou. Ko te tika, penei tetai au manamanata e akatupuia ana na roto i ta tatou uaorai au tarevake me kore na tetai maki kiteaia i roto i te pamiri. (Galatia 6:7) E pouroa tatou ka kite mai i te au tupuanga kino no te pakari anga e te au tumatetenga natura. Te akamarama meitaki maira te Pipiria e i teia tuatau nei, kare a Iehova e paruru temeio i tona au tavini mei teia au tupuanga kino.​—Koheleta 9:11.

8. Akapeea a Satani i te taangaanga anga i te au tumatetenga e tupu nei kia tatou?

⁸ Noatu rai, penei te taangaanga ra a Satani i te au tumatetenga tei tupu kia tatou kia akangaueue i to tatou akarongo. Kua taiku mai te apotetoro ko Paulo e kua tupu tetai “tara i roto i [tona] kopapa nei, e karere na Satani,” tei “pāpā” ua atu rai iaia. (2 Korinetia 12:7) Me e manamanata teia i te pae kopapa, mei tera e kare e meitaki roa ana te mata, me kore e apinga ke ua te reira, kua marama a Paulo e ka rauka ia Satani i te taangaanga i teia manamanata e te riri te ka tupu a muri ake kia akaparuparu ia Paulo i tona tu rekareka e te tu apa kore. (Maseli 24:10) I teia tuatau, penei na tetai ravenga ka akakeu a Satani i te au mema pamiri, te au taeake apii, me kore te au kavamani kino pakari i te takinga kino i te au tavini o te Atua.

9. Eaa tatou kare e poitirere roa ana i te manamanata me kore te takinga kinoanga?

⁹ Akapeea tatou i te aro atu anga i teia au manamanata ma te autu? Na te akamanakoanga i te reira ei atianga kia akaari e kare to tatou inangaro no Iehova e to tatou kauraroanga ki tona turanga ngateitei e papakitai ana. (Iakobo 1:2-4) Noatu eaa te akatupu ra i to tatou tu taitaia, te maramaanga i te puapinga no te tu tiratiratu ki te Atua ka tauturu ia tatou i te akono tamou i to tatou turanga pae vaerua. Kua tata te apotetoro ko Petero ki te au Kerititiano: “E aku au akaperepere e, auraka e poitirere i te takinga-kino maata i roto ia kotou ei timata anga ia kotou, mei te mea e kua rokoia kotou i tetai mea ke.” (1 Petero 4:12) E kua akamarama mai a Paulo: “E te aronga katoa e maara tikai e akono i te Atua, ei roto rai i te Mesia ra ia Iesu, e takinga-kino katoaia ïa.”  (2 Timoteo 3:12) Te akaao nei rai a Satani i te tu tiratiratu o te Au Kite o Iehova, mei tana rai i rave kia Iobu. Ko te tikaanga, te akakite maira te Pipiria e te akamaata nei a Satani i tana au tamakianga ki runga i te iti tangata o te Atua i teia au tuatau openga.​—Apokalupo 12:9, 17.

Tetai Marama Kore Anga e Tetai Au Ako Tarevake

10. Eaa te tupuanga kino i marama kore ei a Iobu?

¹⁰ Eaa te tupuanga kino i marama kore ei a Iobu, tetai tupuanga kino kare tatou e inangaroia kia taii atu. Kare aia i kite ana e eaa teia au tumatetenga i tupu ei kiaia. Kua tarevake a Iobu i te manako anga e na roto i tetai mataara “na Iehova i oronga mai, e na Iehova i rave mai.” (Iobu 1:21) Penei, kua akakoro tikai a Satani kia maani ia Iobu i te manako e ko te Atua te akatupu nei i tona manamanata.

11. E akamarama mai i to Iobu manako ki tona au tumatetenga.

¹¹ Kua taitaia tikaiia a Iobu, noatu e kua patoi aia i te akakino i te Atua, mei tana vaine i aruaru iaia kia rave. (Iobu 2:9, 10) Kua karanga aia ‘E meitaki atu te oraanga o te tangata kino i toku.’ (Iobu 21:7-9) Kua kimikimi manako aia ‘Eaa te Atua e takinokino mai nei iaku?’ E au taime rai tetai e kua inangaro ua aia i te mate. “Naringa koe e akapipini iaku ki te vaarua e, angairi koe e uuna iaku, e kia riro ke toou riri!” i karanga ai aia.​—Iobu 14:13.

12, 13. Akapeea te au tuatua a tona nga taeake e toru i te akakeuanga iaia?

¹² E toru o Iobu nga taeake tei atoro mai iaia, ma te akakoroanga kia “tangi iaia, e akapumaana oki iaia.” (Iobu 2:11) Inara, kua riro ratou ei “aronga akapumaana manamanata.” (Iobu 16:2) Penei ka puapingaia a Iobu mei te au taeake e ka rauka ua iaia i te akakite atu i tona au manamanata kia ratou, inara kua akamaata atu teia nga taeake e toru i to Iobu tu oripu anga e kua akamaata atu i tona au manako taitaia.​—Iobu 19:2; 26:2.

¹³ Te tano ua ra i te akamanako, e penei kua ui a Iobu kiaia uaorai: ‘Eaa ko au ei? Eaa taku i rave ana kia tau teia au tumatetenga katoatoa kiaku?’ Kua tarevake tikai te au akamaramaanga ta tona au taeake i oronga. Kua manako oki ratou e no te mea kua rave a Iobu i tetai apa kino nana rai i apai mai i tona au mamae anga ki runga iaia. “Koai ïa tangata ara kore i mate?” i ui ei a Eliphaza. “Mei taku rai oki i kite, ko tei arote i te kino, e tei ruru i te ara, ko ta ratou rai ïa e kokoti.”​—Iobu 4:7, 8.

14. Eaa i tau ei e auraka tatou e viviki i te taopenga e kua tupu te mamaeanga no tetai tu akono tau kore?

¹⁴ E tika, penei ka tupu mai te au manamanata me ruru tatou i ta te kopapa e kare i ta te vaerua. (Galatia 6:7, 8) I na, i roto i teia akatereanga i teia tuatau nei, ka tupu mai te au manamanata noatu eaa to tatou tu. Pera katoa, kare e rauka kia karangaia e ka paruruia te tangata ara kore mei te au tumatetenga katoatoa. Ko Iesu Karaiti, tei “viivii kore, e te taka ke oki i te aronga rave ara ra,” kua mate aia i tetai mate mamae kino i runga i tetai rakau tamamae, e te apotetoro ko Iakobo kua mate aia no tona akarongo. (Ebera 7:26; Angaanga 12:1, 2) Te akamanakoanga tarevake a Eliphaza e tona nga taeake e rua kua akakeu ia Iobu kia paruru i tona ingoa meitaki i te maroanga i tona tu apa kore. Noatu rai, ta ratou au akaapaanga neneva e kua tau rai a Iobu kia takinokinoia, penei kua akakeu i tona akaraanga i to te Atua tu tika.​—Iobu 34:5; 35:2.

Kimi Anga i te Tauturu me te Aro Atura i te Taomianga

15. Eaa te akamanakoanga te ka tauturu ia tatou i te aro atu anga i te mamaeanga?

¹⁵ E apiianga ainei tetai i konei no tatou? Te au tumatetenga, te maki, me kore te takinga kino anga penei i te akaraanga kare e tau roa ana te reira. Tetai au tangata i te akaraanga kare roa ratou e taii ana ki teia au manamanata e manganui. (Salamo 73:3-12) I tetai au taime, penei ka tau tatou kia ui kia tatou uaorai i teia au uianga puapinga maata: ‘Te akakeu ra toku inangaro no te Atua i te tavini atu iaia noatu eaa te ka tupu mai? Te inangaro ra ainei au i te oronga kia Iehova “kia tika iaku kia patoi atu i tei akakino mai iaku nei?” (Maseli 27:11; Mataio 22:37) Auraka rava tatou e tuku i te au tuatua manako kore a tetai ke i te akaekoko ia tatou i to tatou Metua i te rangi. I karanga mai ana tetai Kerititiano tiratiratu tei rokoia e tetai maki kino no te au mataiti e manganui: “Kua kite au e noatu eaa ta Iehova ka akatika, ka meitaki ua au. Kua kite oki au e ka oronga mai aia kiaku i te maroiroi e inangaroia nei. Kua akapera ua ana aia kiaku.”

16. Akapeea te Tuatua a te Atua i te oronga anga i te tauturu ki te aronga te aro atura i te au akaaoanga?

 ¹⁶ No runga i te au angaanga a Satani, e meitaki atu to tatou maramaanga i to Iobu. “Kare oki tatou i te kite kore i tana au ravenga,” me kore au angaanga kino. (2 Korinetia 2:11) Pera katoa, tei ia tatou te au putunga kite no te pakari tau te ka rauka ia tatou i te akara atu. I roto i te Pipiria, ka kite mai tatou i te au tua o te au tane e te au vaine tiratiratu tei akakoromaki i te au tu akaaoanga ravarai. Kua tata te apotetoro ko Paulo, tei kite maata atu i te mamae i te maataanga o te au Kerititiano: “Te au tuatua ravarai oki i tataia i muatangana, i tataia ïa kia kite tatou; kia rauka to tatou tatari anga, i te akakoromaki e te pumaana o te tuatua i tataia ra.” (Roma 15:4) Tetai Kite no Europa tei akamouauriia no tona akarongo i te tuatau o te tamaki rua o te ao, kua tupau aia i tana tuanga kai e toru ra no tetai Pipiria. “Kua riro taua tupauanga ei akameitakianga tikai!” i karanga ai aia. “Noatu toku pongi i te pae kopapa, kua rauka iaku i te kai pae vaerua tei akaora iaku e pera katoa i tetai aronga ke mai i roto i to matou au timataanga i taua au tuatau manamanata ra. E tae mai ki teia ra te vai nei rai teia Pipiria kiaku.”

17. Eaa te au tauturu mei te Atua te ka tauturu ia tatou i te akakoromaki?

¹⁷ I te pae mai i te pumaana mei te au Tuatua Tapu, e maata ta tatou au tauturu i te apiianga i te Pipiria te oronga maira i te aratakianga tau no te akonoanga i te au manamanata. Me akara koe ki roto i te Watch Tower Publications Index, penei ka kite mai koe i tetai tupuanga o tetai taeake Kerititiano e kua aite tona timataanga ki toou uaorai. (1 Petero 5:9) Penei ka tauturu katoa me uriuri koe i toou au turanga ki te aronga pakari marama meitaki me kore ki tetai au Kerititiano kite pakari. Tei runga ravao, na roto i te pure, ka rauka ia koe i te irinaki ki runga i te tauturu mei ia Iehova e tona vaerua tapu. Akapeea a Paulo i te  patoi anga i te ‘papa’ a Satani? Na te kite mai anga i te irinaki ki runga i te mana o te Atua. (2 Korinetia 12:9, 10) “E tika iaku te au mea ravarai nei i te Mesia, ko tei akamaroiroi mai iaku nei,” i tata ei aia.​—Philipi 4:13.

18. Akapeea te au taeake Kerititinao i te oronga anga i te akamaroiroianga puapinga tikai?

¹⁸ No reira te vai ua ra te tauturu, e auraka rava koe e emi i te kimi atu i te reira. “Kia potopoto to aʼo i te rā i eke ei ra, kua iti roa toou maroiroi,” te karanga ra te materi. (Maseli 24:10) Mei te au manumanu kai rakau ka rauka i te akainga i tetai are rakau ki raro, ka rauka te tu akamaroiroi kore i te akaturori i te tu tiratiratu o tetai Kerititiano. I te akakoreanga i teia kino, te oronga maira a Iehova kia tatou i te tauturu na roto i to tatou au taeake tavini o te Atua. Kua mama mai tetai angera kia Iesu e kua akamaroiroi atu iaia i te po i opuia ai aia. (Luka 22:43) Iaia e teretere ra ki Roma ei tangata mouauri, kua “akameitaki atura [Paulo] i te Atua, e maroiroi atura” i tona araveianga i te au taeake i Apio Foro e te Are Tapae e Toru ra. (Angaanga 28:15) Te maaraara ra rai i tetai Kite no Tiamani mai i te tauturu tei rauka iaia i tona tae atu anga ma te mataku i te ngai tamamaeanga i tona mapu anga. “Kua kite viviki mai tetai taeake Kerititiano iaku e kua turou pumaana mai iaku,” i karanga ai aia. “Tetai tuaine tiratiratu akaou mai, kua akonokono aia iaku, e kua riro mai aia mei tetai metua vaine pae vaerua kiaku.”

“Kia Mou Marie ra Koe”

19. Eaa tei tauturu ia Iobu i te patoi i te au tautaanga a Satani?

¹⁹ Kua akataka mai a Iehova ia Iobu ei tangata tei “tāpu ua nei rai aia i tana akonoanga.” (Iobu 2:3) Noatu te manako taitaia e te marama kore anga e eaa aia i rokoia ai e te kino, kare roa a Iobu i ngaueue ana no runga i te maroanga puapinga maata no te tu tiratiratu. Kare a Iobu i patoi i te au mea ravarai tei tupu i roto i tona oraanga. Kua maro aia: “E mate ua atu au, kare rai au e pa i te tuatua-tika naku ra!”​—Iobu 27:5.

20. Eaa i puapinga ai te akakoromaki?

²⁰ Ka tauturu taua tu tautaanga ia tatou kia akono tamou i to tatou tu tiratiratu noatu e eaa te au turanga​—i te aro atu anga i te au timataanga, te patoianga, me kore te tumatetenga. “Auraka koe e mataku i te au mea ravarai e rokoia mai ei koe,” i karanga ai a Iesu ki te putuputuanga o Semurina. “I na, e uri te diabolo i tetai pae o kotou ki roto i te are tapekaanga, ei timata anga [manamanata, taitaia, me kore taomianga] ia kotou; po ngauru kotou i te mate anga; kia mou marie ra koe e tae ua atu ki te matenga, e naku e oronga atu i te korona ora noou.”​—Apokalupo 2:10.

21, 22. Me te akakoromaki ra i te timataanga, ka akapumaania tatou i teea kiteanga?

²¹ I roto i teia akatereanga tei tutaraia e Satani, ka timataia to tatou akakoromaki e te tiratiratu. Noatu rai, te akapapu maira a Iesu kia tatou, e ia tatou e akara atura ki te tuatau ki mua, kare o tatou tumuanga kia mataku. Te apinga puapinga maata koia oki kia akapapu i to tatou uaorai tu tiratiratu. “E mate mea ngiti poto,” i karanga ai a Paulo, inara te “kakā,” me kore e akameitakianga ta Iehova e taputou maira kia tatou, “te akatupu nei ïa i te kakā maata rava teimaa mutu kore.” (2 Korinetia 4:17, 18) E poto ua te tuatau o to Iobu timataanga me akaaiteia ki te au mataiti mataora e manganui i rekareka ana aia i mua ake e i muri ake i tona au tumatetenga.​—Iobu 42:16.

²² E tikai, penei i te akaraanga e au tuatau tetai i roto i to tatou oraanga e kare takiri to tatou au timataanga e ope ana me kore i te akaraanga vaitata rai kare e rauka ia tatou i te akakoromaki i te kino. I roto i te atikara te ka aru mai, e akamanako ana e akapeea te tupuanga o Iobu e apii maira ia tatou i tetai au apiianga ke mai no runga i te akakoromaki anga. Ka akara katoa tatou i te au mataara ka rauka ia tatou i te akamaroiroi atu i tetai ke te aro atura i te tumatetenga.

Akapeea Koe me Pau?

• Eaa te maroanga puapinga maata ta Satani i akatupu no runga i to Iobu tu tiratiratu?

• Eaa tatou e kore ei e poitirere roa ana i te tumatetenga?

• Akapeea a Iehova i te tauturuanga ia tatou kia akakoromaki?

[Au Uianga Apii]

[Au Tutu i te kapi 23]

Te raveanga i te kimikimianga, te tuatua anga ki te au Kerititiano pakari, e te akakiteanga i toou manako na roto i te pure ka tauturu ia tatou i te akakoromaki