Kua Ruaine e Kare ra i Araiia

NO TE au tu apikepike o te ruaineanga, e manganui te rokoia ana e te makimaki, e te akatakakeia mai mei te katoatoa. Kare ra i akapera a Fernand Rivarol, tei mate i te 95 mataiti i Geneva, Tuiterani. E noo ana aia koia anake rai, kua mate tana vaine, e te noo ra tana tamaine akaipoipo i tona uaorai kainga. Noatu e noo ua ana aia i tona kainga i te maataanga o te taime, kare ra aia e maromaroa ana. Maata te taime ka noo aia i ko i te kaingakai i roto i tona pia noonoo, e te terepaoni i roto i tona rima, e kua ringi aere aia i te tangata i te pukapuka kia ratou no runga i te au mea pae vaerua.

Tetai tuatau i roto i tona oraanga, kua tapeka tikaia ana a Fernand. No teaa ra? Te riro anga tikai a Fernand e tana vaine ei nga Kite maroiroi no Iehova i te 1939, i akamata ai te Tamaki II o te Ao i Europa. Kua tamou marie rai a Fernand ki tana ikianga tei akanooia ki runga i te Pipiria e auraka kia takino i tetai ua atu tangata. No te reira, kua ngere aia i tana ngai angaanga e kua akautungaia no tetai au taime i roto i te are tapekaanga​—e rima e te apa mataiti te katoatoaanga​—tona takake anga mei tana vaine e tana manga tamaine.

I te akamanako akaou anga, kua akakite a Fernand: “Ki te manganui o te tangata, i te akara anga kua akaruke au i tetai ngai angaanga meitaki e kua akaruke taaka ua au i toku pamiri. Kua akavaavaaia au e te tangata e kua akariroia mei te tangata rave kino rai. Noatu rai, me akamanako au i taua au mataiti ngata ra, taku mea maata roa atu e maara ana ko ta Iehova turuturuanga e te tauturuanga ia matou. Manganui te au mataiti i topa mei reira mai, inara te ngaueue kore nei rai toku irinakianga i roto ia Iehova mei taua taime ra.”

Na teia akarongo i akakeu ia Fernand kia akakitekite i tona manakonakoanga Tuatua Tapu ki etai ke na roto i te terepaoni. Me ariki mai tetai tangata iaia, kua tuku aia i te puka apii Pipiria na roto i te mere ki taua tangata ra. Muri ake, kua ringi akaou aia i tera tangata i te akara e me kua reka rai aia i te puka. Tetai au taime ka ariu mai te tangata na roto i te reta akameitakianga, tei riro ei mataora maata kiaia.

Penei ka ringi atu tetai tangata mei ia Fernand rai ia koe i te ngai e noo ra koe. Kore koe e akarongo atu ki tana ka tuatua mai kia kite koe eaa tona irinakianga? Ka rekareka maata roa te Au Kite o Iehova i te akakite atu i to ratou irinakianga kia koe.