Te Maara ra Ainei ia Koe?

Kua ariki ainei koe i te tatau anga i te au itiu i ou ake nei o Te Punanga Tiaki? Ka akara ana me ka rauka ia koe i te pau i te au uianga te ka aru mai:

• Akapeea ra a Iesu me ‘akaora i tei putaua ra,’ tei akakiteia mai e Salamo 72:12?

I te tuatau o tona tutaraanga, ka vai te tu tika no te katoatoa, kare te kino. E akatupu putuputu ana te tamaki i te tu ngere, inara ka apai mai a Karaiti i te au tikai. Te akaperepere ra aia i te au tangata e ka taokotaiia te katoatoa, e ka akapapu katoa aia e kia maata rai te kai na te au tangata ravarai. (Salamo 72:4-16)​—5/1, kapi 7.

• Akapeea tatou ei au Kerititiano i te akaari anga e te tuatua ra tatou ma te tapupu kore e te mataku kore? (1 Timoteo 3:13, NW; Philemona 8; Ebera 4:16)

Ka rauka ia tatou i te rave i te reira na te tutu maroiroi anga ki tetai ke ma te mataku kore, na te apiianga e te oronga viviki anga ma te tau i te akoanga, e na te tuatua anga no roto mai i to tatou ngakau i te pure ki te Atua, i te irinaki anga e ka akarongo e ka ariu mai aia.​—5/15, kapi 14-16.

• I raro ake i te Ture, eaa ra tetai au angaanga natura tikai no te ainga i manakoia e te ‘akaviivii’ ra i tetai tangata?

Te au ture akatakaia no runga i te viivii te akakiteia ra no te opi tae ua, te maki vaine, e te anauanga tamariki te akamaroiroi ra kia ma i te pae kopapa e i roto i tetai tu oraanga meitaki, te akaketaketa ra i te tu tapu no te toto, e te akaari maira te inangaro no te tapokiangaara no te au ara.​—6/1, kapi 31.

• Me ka inangaro tetai tangata kia mataora aia, eaa i meitaki ei nona kia akamanako i te puka o Salamo?

Kua kite te aronga tei atu ia Salamo e ka tupu mai te mataora no te rauka anga tetai pirianga meitaki ki te Atua. (Salamo 112:1) Kua akakite mai ratou e kare e rauka i tetai pirianga tangata, tetai apinga i te pae kopapa e tetai akatupuanga i te oronga mai i te mataora te aere maira no te pirianga ki “te aronga, ko Iehova to ratou Atua.” (Salamo 144:15)​—6/15, kapi 12.

• Eaa te pirianga takake ma Iehova tei rauka i te au Iseraela taito?

I te mataiti 1513 M.T.N., kua apai mai a Iehova i te au Iseraela ki roto i tetai pirianga ou kiaia, ki roto i tetai koreromotu. (Exodo 19:5, 6; 24:7) Mei reira mai, kua anauia mai te au Iseraela ei au mema no te iti tangata ikiia no te Atua tei akatapuia kiaia. Noatu rai, te anoanoia ra te au tangata tataki tai kia rave i tetai ikianga nana uaorai kia tavini i te Atua.​—7/1, kapi 21-2.

• Eaa ra tatou ka rave ei i te au mea ravarai e auraka e “urutoe”? (Philipi 2:14)

E manganui te au akaraanga Tuatua Tapu te akaari maira e e akatupu ana te urutoeanga i te kino maata i rotopu i to te Atua iti tangata. Kia akamanako pakari tatou no runga i te akakeuanga akakino ta te reira ka akatupu i teia tuatau nei. E tu ngoie ua to te au tangata apa i te kopekope, e kia matakite tatou i te kite mai i tetai ua atu tupuanga no runga i teia e kia kopae ke i te reira.​—7/15, kapi 16-17.

• Akapeea tatou i kite ei e ko te pakari tei akatakaia mai ia Maseli 8:22-31 kare i te pakari tangata?

Kua ‘akamataia’ taua pakari ra, me kore e mea angaia, ei akamataanga i ta Iehova angaanga. I vai ua ana rai te Atua e i vai ua ana rai tona pakari; tona pakari ra kare i te mea angaia. Te vaitata ua ra te pakari o Maseli 8:22-31 “mei te tamaiti angai ra” ki te Atua, te tau tikai ra ki taua mea ora vaerua tei riro maira ko Iesu e te angaanga piri tikai ra ki te Atua i roto i te au mea i angaia. (Kolosa 1:17; Apokalupo 3:14)​—8/1, kapi 31.