Tupuanga Oraora i Runga i Tetai Enua Ruperupe

KARE ekoko kua umere te aronga turoto i Taiuana i te au rakau matie o te toropika e takapini ra i te enua. I te tuatau kokotianga e taui ana te matie ruperupe o te rau raiti ki te auro. Piripiri ua te au vao rakau ruperupe e takapini ra i te au pae maunga. Me akaaiteia atu ki te au oire kononinoni ua, e oraora atu te au rakau matie ruperupe e tupu ra i te au ngai atea ua, e i te au maunga. I na, ko te reira tikai oki tei akakeu i te tangata mua o te tua Opunga tei kite i te enua, kia iki i te ingoa Ilha Formosa me kore “Enua Ruperupe.”

Ae, e enua ruperupe a Taiuana noatu e meangiti ua​—e 390 rai kiro mita te roroa e mei te 160 kiro mita te atea mei tona ngai atea roa atu. Takapiniia te maataanga o te enua e te au maunga teitei. Ko Yü Shan (Maunga Morrison) e teitei atu i te Maunga Fuji o Tiapani me kore i te Maunga Cook o Nu Tireni. Takapini i te au maunga i rotopu e tae atu ki te tai, koia oki e au ngai kokota ua i te pae tai, kua ki i te au tangata Taiuana e oripu ua ra, e tei tere atu i te 22 mirioni i teianei.

Tupuanga Ou ke Mai

Inara, e tupuanga ke mai tetai, e kitea maataia maira i Taiuana​—koia oki e tupuanga pae vaerua. Te akaataia maira teia na roto i te maroiroi e akaariia maira e te au tangata, mapu e te pakari, i te rauka anga mai to ratou kite i te Atua mou, ko Iehova. E mea umere tikai te tupuanga maata o te aronga e angaanga maroiroi ra i te tauturu i etai ke kia kite no runga ia Iehova e tona akakoroanga.

No te maata o te tupuanga kua anoanoia i reira kia akamaata atu. I roto ia Titema 1990, kua okoia mai tetai ngai no te akamaata atu i te opati manga o te Au Kite o Iehova. Te ngai mua, i Taipei, e meangiti rava no te akono anga i te au angaanga a te 1,777 papuritia Patireia i Taiuana i taua taime ra. I te au mataiti i muri ake i te angaanga maroiroi anga te aronga tauturu o te au uki ravarai i te pa enua i reira, kua papa i reira te au ngai ou i Hsinwu no te taangaanga i roto ia Aukute 1994. Tae ki taua taime ra e 2,515 e piri ra ki te akatotoa anga i te  tuatua meitaki mei te Tuatua a te Atua, koia te Pipiria. Teianei, tere atu i te ngauru mataiti i muri mai, kua tataki rua atu te maata o teia numero, pati mai te 5,500 papuritia. I te au marama ravarai mei te kota o taua numero ra e piri ana ki te angaanga tutu evangeria tamou. Akara meitaki katoa i te au mapu tane e te au mapu vaine tei aite mei te “au” oraora o te popongi.​—Salamo 110:3.

Tupuanga Pae Vaerua i Rotopu i te Mapu

Manganui te au papuritia maroiroi o te tuatua meitaki e mapu ua. Tetai papaki e tamariki no te pupu apii rikiriki. Ei akaraanga, i roto i tetai oire i te tua tokerau o Taiuana, kua patiia mai tetai tokorua akaipoipo no te taime mua kia tae atu ki te Apii Orometua Teokaratiki, te ngai e apiiia ana te Au Kite o Iehova i te apii i te tuatua mou o te Pipiria ki etai ke. Kua poitirere tikai te tokorua i te kite anga i tetai tamaiti meangiti, ko Weijun, e tatau maira i te Pipiria mei te paata ma te tu karape maata atu i to tetai aronga mamaata. E oti i terao mai au uipaanga i aere ei raua, kua umere katoa raua i te au tamariki kare i aere ake ki te apii i te kite i te paupau. Kua tuatua teia nga tokorua no runga i te tu mako o te tamariki i ko i te Are Uipaanga Patireia.

Eaa ra teia au tamariki mapu i mou piri ei ki te apiianga Pipiria i roto i teia enua e akonoanga Buda ua e te Tao te maataanga? No te mea kua taangaanga to ratou au metua Kerititiano i te au kaveinga Pipiria e kua akatupu i tetai oraanga pamiri mataora tei akatumuia ki runga i tetai pirianga kia Iehova. No te tauta a te nga metua o Weijun i te akariro i te apii Pipiria a te pamiri e te angaanga orometua ei mea mataora, i riro takere mai ei tona tuakana e te tuaine ei nga Kite papetitoia. Kare i roa akenei, i te pati anga a Weijun kia piri ki te angaanga tutu aere i te ngai tangata, kua karanga tona mama e e maata atu ta te tamaiti makatini i tua i taua marama ra i ta te pamiri katoa. Taka meitaki ua e e reka ana aia i te tuatua no runga i te tuatua mou, te paupau i ko i te au uipaanga, e te akakite ki etai ke i tana i kite.

Ia Ratou e Tupu Akera

Mei teaa ra te tu o teia au mapu ia ratou e tupu akera? Kua akaari ua atu rai te maataanga i te inangaro no Iehova e no te angaanga orometua. Ei akaraanga, ko Huiping e apii neti ana aia. Tetai ra kua taiku mai tona puapii e kare te au mema o tetai akonoanga e ariki ana i te toto inara kare aia i kite e koai ratou. Te oti anga te apii i muri mai, kua akamarama teia Kerititiano mapu ki tona puapii e e Au Kite ratou no Iehova e no teaa ratou i apai ei i taua turanga ra.

Ko tetai puapii ke mai kua akaari mai i tetai vitio no runga i te au maki piri o te ainga. Kua taiku mai te vitio ia 1 Korinetia 6:9, inara kua karanga aia e kare te Pipiria e akaapa ana i te angaanga totoma. I na kua rauka akaou ia Huiping i te oronga atu i to te Atua manako no runga i taua mea ra.

I tona oa apii ko Shuxia e akapapa ra i tetai ripoti no runga i te takinokino i roto i te ngutuare, kua oake a Huiping kiaia i te Awake! o Noema 8, 2001 ma te tumu manako “Help for Battered Women,” i te kapi i mua, e kua akamarama atu e e maata te au manako o te Pipria i roto, no runga i taua tumu manako ra. I na i te openga, kua riro mai a Shuxia ei papuritia kare i papetitoia. Teianei te akakite aere nei raua ko Huiping i te tuatua meitaki ki etai ke.

Maata te au Kerititiano i te apii tei kite e e ngata tikai kia kiteia mai e, e iti tangata akono i te au kaveinga Pipiria. I roto tikai i te au oire rikiriki i vao mai i te taoni. Kua aro atu ana a Zhihao i te taomianga a te au oa no tona akarongo e te angaanga tutu aere. Kua karanga aia: “Manamanata tikai au e te mataku, ko te aravei au i toku au oa apii i roto i te angaanga orometua. Tetai au taime, e tae ana te ngauru ia ratou e tatiaeae mai ana iaku!” Tetai ra, kua tuku te puapii ia Zhihao kia tuatua mai ki te pupu no runga i tana akonoanga. “Kua manako au kia akamata i taku tuatua kia Genese pene 1 e oti ka uriuri ei i te au uianga mei te: Naai i anga i te enua e te au mea ravarai i  reira? E akapeea te tangata i te riro mai anga? I te akamata anga au i te tatau i te Pipiria, kua akamata rai tetai papaki i te kata iaku, te karanga anga e pikikaa ua naku. Inara, kua tatau rai au e tae ua atu ki te openga o taku tuatua. Muri ake, kua rauka iaku tetai tuatau i te tuatua atu ki tetai papaki o toku au oa apii no runga i ta tatou angaanga e to tatou au irinakianga akonoanga. Teianei me kite mai ratou iaku i roto i te angaanga orometua, kare ratou e kata akaou ana iaku!”

Kua akakite a Zhihao e: “No te mea e nga Kite toku nga metua, e uriuri ana matou i te tia i te au popongi katoatoa. E apii katoa ana matou i te Pipiria e te aere putuputu ki te au uipaanga. No reira i rauka ai iaku i te aro atu i tetai ua atu e inangaro ra i te tatiaeae mai iaku, iaku e tauta nei i te akakite i te tuatua mou oraora o te Pipiria ki etai ke.”

Ko Tingmei e tamaine apii aia i ko i tetai apii apinga matini a te tamariki tamaine. Tetai taime kua patiia mai aia kia aere ki te pikiniki ma etai o tona au oa apii, kapiti mai te au tamariki tamaroa no te apii a te tamariki tamaroa. Te kite ua atura aia i te kino o taua tu kapitianga ra e kua patoi atu. Maata te taime i patiia mai ana aia, noatu kua akakite ana aia ki tona au oa apii i te apiianga i roto i te puka Questions Young People Ask​—Answers That Work. * Kua aviri mai teia au tamaine iaia, te karanga anga e e tu manako taito tona. Inara, kare i roa ana kua akapapuia mai te pakari o te aru i te au kaveinga Pipiria i te nui anga tetai tamaine e te titiri anga i tana pepe. Kua karanga a Tingmei e: “Na te rave anga i ta Iehova i akakite mai kua rauka iaku te akava ngakau ma. Tei tupu mai, kua rauka iaku te rekareka e te marekaanga oonu.”

Autu i te Au Araianga ki te Tupuanga

Ko Ruiwen tetai oa piri o Tingmei. I tona meangiti anga, kua manako a Ruiwen e e angaanga roiroi tikai te aere ki te au uipaanga Kerititiano e te piri ki te angaanga orometua. Inara, na te kite anga i te tuke i rotopu i te aroa tikai o te aronga i roto i tona putuputuanga e te pirianga oa tutu ua o tona au oa apii, i papu ei iaia e ka anoanoia aia kia rave i tetai au tauianga i roto i tona oraanga. I reira kua akamata a Ruiwen i te tutu aere ki tona au oa apii e kare i roa kua kite meitaki tikai aia e eaa tana ka rave. Kua akamata aia i te painia tauturu, te akapou anga e 50 tuma ora i te marama i roto i te angaanga orometua. E oti i reira kua akamata aia i te painia tamou, te akapou anga e 70 tuma ora i roto i te  angaanga tavini i te marama. Kua karanga a Ruiwen e: “E ngata tikai iaku i te akakite i toku rekareka kia Iehova. Kare rava aia i tuku ana i te au iaku. Noatu kua rave ana au i tetai au apinga tei akataitaia iaia, te inangaro maira rai aia iaku. Te akaari katoa maira toku mama e etai atu i roto i te putuputuanga i taua tu aroa ra. I na te rave nei au e rima au apiianga Pipiria, toku manako te piri nei au ki roto i tetai angaanga mareka roa atu.”

I roto i tetai apii teitei mamao ki vao, kua tukuia e rua nga tamariki Kite kia tu no te apii i roto i tetai tarereanga ura tuatau taito. Te kite anga raua i te tu o te tarereanga, kua manako te nga Kite e ka riro te piri anga ki roto, i te takino i to raua akava ngakau Kerititiano. Kia akamarama atu ra raua i to raua manako e te pati kia akaateaia mai raua, kua patoiia mai ta raua patianga. Inara, kua akakite te puapii kia raua e no te mea ko raua tei ikiia, e kia aere rai raua. No te kare rai e inangaro ana i te tuku ua atu, kua akara te nga Kite mapu ki roto i te Web site a te tipatimani o te apii, e kua tuku atu i tetai reta i te akamarama i to raua manamanata. Noatu kare a te nga mapu uaorai pauanga i tae mai ana, kare ra i roa kua tae mai te akakiteanga ki te apii e auraka e maro i tetai ua atu kia piri ki taua tu tarereanga ra. Kare e aiteia te mataora o teia nga mapu kia kite e kua riro te terenianga a te Pipiria ia raua i te akatano i to raua akava ngakau, e kua akaketaketa katoa ia raua i te apai anga i to raua turanga no te mea tika!

E rekareka maata katoa ana te aronga tu apikepike i te pae kopapa i te akakite i to ratou manakonakoanga o te Pipiria ki etai ke. Ko Minyu e ngoru aia mei te anauanga mai. Kare e rauka i te taangaanga i tona nga rima, e uriuri ana aia i te au kapi o te Pipiria ki tona arero e te kimi i te irava tana i inangaro i te tatau. I te taime o tana au akoanga i roto i te Apii Orometua Teokaratiki i ko i te Are Uipaanga Patireia, ka takoto ua aia ki runga i tetai roi akaaka, e ka noo ua tona tauturu ki runga i tetai nooanga akaaka ake mou ei i te pu. E pumaana tikai te kite ia Minyu e tauta ra i te akapapa i teia au akoanga!

I te inangaro anga a Minyu kia riro ei papuritia Patireia, kua apii tetai au tuaine i roto i te putuputuanga e ka akapeea me akakitekite na roto i te terepaoni kia rauka i te tauturu iaia. Ka taomi aia i te au pitopito ki tona arero e na te au tuaine e rekoti i tana au tuatua. Mataora tikai aia i teia angaanga e kua riro mai aia ei painia tauturu, i te tuatua anga na roto i te terepaoni ki etai ke no runga i te Patireia o te Atua e 50 ki te 60 ora i te au marama katoatoa. Tetai aronga tana i kite kua ariki i te au puka Pipiria e kua akatika kia ringi akaou atu aia. Teianei te rave nei aia e toru au apiianga Pipiria ki te au tangata tana i aravei na roto i teia mataara.

Ae, mei te au oraora o te popongi ra, te au mapu tane​—e te vaine​—i roto i te au putuputuanga e 78 o te Au Kite o Iehova i Taiuana, e apai puareinga ua ra e te maroiroi i te tuatua meitaki o te ora, ki te mirioni ua atu e oripu ua ra i runga i teia enua kononinoni ua. E tuanga meangiti ua teia no te akatupuanga o te totou Pipiria i te ao katoa: “E puareinga roa to toou ra au tangata, i te rā o toou ra mana, ma te kakā tapu ra; toou ra [“au mapu tane,” NW] mei te au ïa o te kopu o te popongi.” (Salamo 110:3) E tumuanga akamaroiroi tikai teia au mapu ki te aronga pakari i rotopu i to ratou au oa angaanga. Tei runga rava atu, e tumu tikai ratou no te rekareka ki to ratou Metua i te rangi, i te Atua ko Iehova!​—Maseli 27:11.

[Tataanga Rikiriki i Raro]

[Pia/Tutu i te kapi 10]

MAATA TE ARE UIPAANGA PATIREIA KA ANOANOIA

No te tupuanga i Taiuana, kua riro te anoano kia maata mai te au Are Uipaanga ei akaaoanga maata. No teaa ra? No te mea vaitata rai e kare e enua tau no te akatu Are Uipaanga Patireia, mari ua i te au ngai mamao ki vao mai i te oire. Tetai, e maata roa te oko o te enua, e e pakari tikai te ture no te akatuanga anga i te enua. I roto i te au oire mamaata atu, ko te ravenga ke ua rai koia oki kia oko i tetai au ngai no te opati e oti ka maani ei, ei au Are Uipaanga Patireia. Inara, te maataanga o te au opati e akaaka roa a runga i te auaro, e aka moni i te akono, e te ngata i te tomo ki roto, me kore no tetai au tumu ke atu i kore ei te reira e tau kia taangaangaia ei au Are Uipaanga Patireia.

Noatu ra, i te au mataiti ua akenei, kua rauka mai i te Au Kite o Iehova i Taiuana tetai au Are Uipaanga Patireia ou. Te aere ua atu nei te kimianga no tetai ngai ou, i te mea te inangaro puareinga ua nei te Au Kite i te akono i te apainga i te pae moni pera katoa kia akatupu i te kite karape tei anoanoia no te akatuanga.