Akamorianga Meitaki Noou

“E MEA meitaki ra iaku kia akavaitata atu ki te Atua,” i akakite ei te tata taramo ko Asapha. Kua manako ana aia i te aru i te aronga akono kore i te Atua i te aruaru i tetai oraanga mareka ua. Inara kua oki a Asapha kua akamanako i te puapinga o te akavaitata atu ki te Atua e kua taopenga iora e e mea meitaki te reira nona. (Salamo 73:2, 3, 12, 28) E mea meitaki ainei te akamorianga mou noou i teia tuatau? Akapeea koe e puapingaia ai mei te reira?

Ka tauturu te akamori anga i te Atua mou ia koe, kia rauka tetai apinga puapinga maata atu, i to te manako ua ia koe uaorai. No te mea, i angaia mai tatou i te tu o “te Atua nona te aroa,” kare rava te aronga e aruaru ra i to ratou uaorai au anoano, e kite i te mataora. (2 Korinetia 13:11) Kua apii a Iesu i tetai tuatua mou puapinga roa no runga i te tu tangata i tona tuatua anga e: “E mea meitaki i te oronga atu i te rave mai.” (Angaanga 20:35) No reira tatou e rekareka ai i te rave i tetai au mea no to tatou au taeake e te pamiri. Kareka ko te mataora maata roa atu, ka rauka mai ia mei te rave anga i te angaanga na te Atua. Koia oki tei tau roa atu kia aroa tatou i tetai ua atu. Mirioni ua atu tangata mei te au turanga ke ke o te oraanga tei kite i te merengoanga oonu o te akamori anga i te Atua na te rave anga i tana e pati maira.​—1 Ioane 5:3.

Tetai Akakoroanga no te Oraanga

E meitaki katoa te akamorianga mou noou no te mea te oronga maira te reira i tetai akakoroanga noou i te oraanga. Te kite ra ainei koe e e putuputu te taime e akapiriia ra te mataora ki te manako e te rauka ra ia koe tetai apinga puapinga? Te maataanga o te tangata e akakoroanga to ratou i te oraanga, me no to ratou pamiri, au taeake, pitiniti, me kore no te tamataora. No te au tu papu kore o te oraanga, maata te taime kare e rauka ana i teia au mea nei i te apai mai i te mataora no ratou. (Koheleta 9:11) Inara, ka tauturu te akamorianga mou ia koe kia rauka tetai akakoroanga ngateitei atu, tetai te ka vai ua atu rai te merengoanga noatu me ka puapinga kore tetai au tuanga ke o te oraanga.

Te kapiti maira te akamorianga mou i te kite ia Iehova e te tavini anga iaia ma te tiratiratu. Te aronga e rave mou ra i te reira ka piri vaitata atu ia ki te Atua. (Koheleta 12:13; Ioane 4:23; Iakobo 4:8) Penei ka ngata ia koe i te akamanako e ka rauka ia koe kia kite meitaki tikai i te Atua e kia riro mai aia ei oa noou. Inara na te akamanako anga i te rekoti o tana au raveanga ki te tangata e na te akamanako anga i te au mea tana i anga, ka kite tikai koe i reira i tetai au tu, o tona tu peretana. (Roma 1:20) Tetai katoa, na te tatau anga i te Tuatua a te Atua, ka marama ia koe e eaa ta tatou angaanga i konei, eaa te Atua i akatika ua ai i te mamae, akapeea aia me takore i te mamae e, penei ko te mea umere roa atu koia oki, te tuanga puapinga taau ka rave i roto i to te Atua akakoroanga. (Isaia 43:10; 1 Korinetia 3:9) Ka riro taua marama ra i te oronga mai i tetai akakeuanga ou noou no te oraanga!

Riro Anga ei Tangata Meitaki Atu

E mea meitaki rava te akamorianga mou noou no te mea ka tauturu te reira ia koe kia riro mai ei tangata meitaki atu. Ia koe e akono ra i te akamorianga mou, te tatanu ra koe i tetai tu peretana te ka taki atu ki te au pirianga mataora atu ma etai ke. Ka kite i reira koe mei te Atua e mei tana Tamaiti no runga i te akono anga i te tu tika, te tuatua takinga meitaki, e te nooanga tau. (Ephesia 4:20–5:5) Me kite meitaki tikai koe i te Atua ka riro ia koe i te inangaro iaia, e ka akakeuia koe kia aru iaia. Te karanga ra te Pipiria: “E teianei ei aru kotou i te Atua, mei te tamariki akaperepere ra.”​—Ephesia 5:1, 2.

Kare ainei i te mea mareka kia koropiniia e te au tangata e aru ra i to te Atua aroa? Te mea mataora ra, kare te akamorianga i te Atua mou i te  angaanga ko koe anake rai te ka piri ki roto. Ka akapiri atu te reira ia koe ki etai ke tei inangaro i te mea tika e te mea meitaki. E tika, penei kare koe i papu tikai no runga i teia mea e akonoanga akaaereia. Inara, mei ta tatou i kite i roto i te atikara i mua ake, e kare te manamanata o te maataanga i te au akonoanga e no tei akaaereia ratou mari ra, no tei kore ratou i akaaereia na roto i te mataara tau e no te au tumuanga tau. Manganui te au akonoanga akaaereia e tavini nei no te au akakoroanga kare e tau i te Kerititiano. To te Atua iti tangata na Iehova uaorai e akaaere nei no tetai akakoroanga ngateitei. Te karanga ra te Pipiria e: “Kare oki te Atua i te tumu o te kononinoni pu ua, no te au ra.” (1 Korinetia 14:33) Mei te au mirioni ua atu, ka riro te taokotai anga ki tetai pupu Kerititiano akaaere meitakiia ei akakeuanga tau ki toou manakonakoanga.

Manakonakoanga no te Tuatau ki Mua

Te akaari maira te au Tuatua Tapu e te akaaere nei te Atua i te aronga akamori mou, kia ora ratou i te openga o teia akatereanga o te au mea nei, e kia noo i te enua ou i te “vai tika anga o te tuatua-tika.” (2 Petero 3:13; Apokalupo 7:9-17) No reira, ka oronga mai te akamorianga meitaki noou i te manakonakoanga tei anoanoia kia mataora. Tetai aronga te akanoo ra i ta ratou au tapapaanga no te tuatau ki mua, ki runga i te turanga ngaueue kore o te au kavamani, te au manakonakoanga no te pitiniti, me kore ki te irinakianga i roto i tetai oraanga meitaki e tetai ritaeaanga mareka ua. Kareka ra e iti ua rai teia au apinga nei, me e apinga oki tetai, e oronga mai ana i tetai tumuanga tau no te tapapa atu i tetai tuatau mataora ki mua. I tetai tua, kua tata te apotetoro ko Paulo: “Te irinaki nei tatou i te Atua ora.”​—1 Timoteo 4:10.

Me kimi matatio tikai koe, ka kitea e koe te aronga akamori mou. I roto i te ao mavete o teia tuatau, kua riro te aroa e te tu rotai i te akataka meitaki mai i te Au Kite o Iehova. Vaitata rai e no roto mai ratou i te au pa enua ravarai e te au tu oraanga ravarai; kareka ra, te riro nei te aroa no tetai e tetai e te aroa no Iehova i te tarotai ia ratou. (Ioane 13:35) Te pati atu nei ratou ia koe kia kite noou uaorai i ta ratou i kite. Kua tata a Asapha: “E mea meitaki ra iaku kia akavaitata atu ki te Atua.”​—Salamo 73:28.

[Tutu i te kapi 7]

Ka rauka ia koe kia riro ei oa no te Atua