“E Akakite ua ra ki te Atua i to Kotou Anoano”

“E akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki.”​—PHILIPI 4:6.

1. Kua orongaia mai kia tatou te akangateitei anga kia komunikeiti atu kiaai, e no teaa ra i riro ei e e mea umere anga?

ME KUA pati ana koe kia aravei atu koe i te tutara o toou enua, eaa te pau anga ka orongaia mai kia koe? Penei ka tukunaia mai tetai pau anga akameitakianga kia koe no ko mai i tana aronga angaanga, papu tikai e kare koe e akatikaia kia tuatua atu ki te tutara. Inara, e tuke te turanga ki te Tutara maata roa atu no te katoatoa, te Atua ko Iehova, te Ngateitei i te ao katoa e pini ua ake. Ka rauka ia tatou i te iki i te tuatua kiaia i tetai ua atu ngai, e i tetai ua atu tuatau. Ka tae ua rai kiaia te au pure no te tu tau. (Maseli 15:29) E mea umere tikai tera! Kare ainei teia ariki anga rekareka e akakeu ana ia tatou kia pure putuputu ki Tei kapikiia e ko “tei akarongo i te pure”?​—Salamo 65:2.

2. Eaa te umuumuia ra kia arikiia mai te au pure e te Atua?

² Inara, penei ka ui tetai tangata e, ‘Eaa te au pure ka arikiia mai e te Atua?’ Te akamarama maira te Pipiria e e okotai apinga te anoanoia ra kia arikiia mai te au pure na te akakite anga i te reira e: “Kare ra e akarongo ra kare rava aia e mareka: ko te akamori i te Atua ra, kia akarongo aia e, e Atua e tikaʼi, e koia tei tutaki mai i te aronga i kimi tikai iaia.” (Ebera 11:6) Ae, mei tei akamaramaia mai i roto i te atikara i mua akenei, e ko te mataara puapinga maata i te pure ki te Atua ko te akarongo. Te ariki puareinga nei te Atua i te au pure a te aronga tei pure kiaia, inara e rave ratou i te reira ma te akarongo e ma te au angaanga meitaki pera katoa ma te tu ngakau tae e te tu ngakau tika.

3. (a) Mei tei akaariia mai e te au pure a te au tavini mou taito ra, eaa te au tu o te au tuatua ka kapitiia mai i roto i te au pure? (e) Eaa tetai atu au tu ka rave tatou no te pure?

³ Kua ako te apotetoro ko Paulo i te au Kerititiano i tona tuatau e: “Auraka rava kotou e apiapi i te au mea katoa nei; e akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki.” (Philipi 4:6, 7) Tei roto i te Pipiria te au akaraanga e manganui no runga i te aronga tei akakite i to ratou manamanata ki te Atua. Ko tetai o taua aronga ra ko Hana, Elia, Hezekia, e Daniela. (1 Samuela 2:1-10; 1 Ariki 18:36, 37; 2 Ariki 19:15-19; Daniela 9:3-21) E aru tatou i to ratou akaraanga. E akamanako katoa ana e te akaari maira te au tuatua a Paulo e e tukeke te tu o ta tatou au pure. Te taiku maira aia i te akameitaki, koia oki, te akakite ariki anga tatou i roto i te pure e eaa ta te Atua i rave ana no tatou. Penei ko te au akapaapaa anga te aru maira i teia. Te akakite maira te pati anga i te pure akaaka e te pati akatenga. E te akakite ra tatou i te anoano, me kare te pati ra tatou i tetai apinga taka tikai. (Luka 11:2, 3) Te mataora ra to tatou Metua i te rangi i te ariki mai i ta tatou pure kiaia na roto i teia au mataara.

4. Noatu e te kite maira a Iehova eaa to tatou au anoano, eaa ra tatou ka tuku ua atu ei i te au pati anga kiaia?

⁴ Penei ka ui tetai papaki e, ‘Kare ainei e kua kite takere ana a Iehova i to tatou au anoano?’ Ae, kua kite aia. (Mataio 6:8, 32) Eaa i reira aia i inangaro mai ei kia akavaitata atu tatou kiaia ma ta tatou au pati anga? E akamanako ana i teia akaraanga: Penei te inangaro ra tetai ona o te are toa i te oronga mai i tetai apinga aroa ki tana au aronga okooko. Inara, e rauka mai ei teia apinga aroa, e aere atu ratou ki te ona e e pati atu i te reira. Ko te aronga kare e inangaro ana i te tauta i te rave i te reira te akaari maira e kare ratou e inangaro ana i te apinga aroa. Mei te reira katoa, te tuku tuku anga i te rave i ta tatou au pati anga te akaari ra e kare tatou e ariki ana i ta Iehova i oronga mai. Kua tuatua a Iesu: “Ka pati, e rauka ïa ia kotou, kia ki tikai oki kotou i te rekareka.” (Ioane 16:24) I roto i  teia tu, te akaari ra tatou i to tatou irinaki anga ki te Atua.

Akapeea Tatou te Pure Anga ki te Atua?

5. Eaa tatou ka anoanoia ai kia pure na roto i te ingoa o Iesu?

⁵ Kare a Iehova i tuku pakari mai ana i te au ture e ka akapeea me pure. Noatu rai, te anoanoia ra tatou kia kite e akapeea me pure ma te tau ki te Atua, tei akatakaia mai i roto i te Pipiria. Ei akaraanga, kua apii a Iesu i tana au pipi: “Ta kotou e pati atu i te Metua ma toku ingoa, nana ïa e o mai kia kotou na.” (Ioane 16:23) No reira, te umuumuia ra tatou kia pure na roto i te ingoa o Iesu, te kite anga e ko Iesu anake ra te mataara e orongaia mai ei te au akameitakianga a te Atua ki te au tangata katoatoa.

6. Eaa te akanooanga o te kopapa me pure tatou?

⁶ Eaa te akanooanga o te kopapa me pure tatou? I roto i te Pipiria, kare i akakitenaia mai ana te akanooanga i te kopapa kia akarongoia mai ta tatou pure. (1 Ariki 8:22; Nehemia 8:6; Mareko 11:25; Luka 22:41) Ko te mea puapinga maata roa atu, koia oki, kia pure ki te Atua ma te ngakau tae e ma te ngakau tika.​—Ioela 2:12, 13.

7. (a) Eaa te aite anga o te tuatua “amene”? (e) Akapeea i te tuatua anga i te reira i roto i te au pure ma te tu tau?

⁷ Akapeea ra te tuatua anga i te tuatua “amene”? Te akaari maira te au Tuatua Tapu e e taopenga anga tau teia no ta tatou au pure, i te pure anga tikai tatou i te ngai tangata. (Salamo 72:19; 89:52) Te tuatua Epera ʼa·menʹ ko te aite anga tikai e “tika ïa.” Te akamarama maira te Cyclopedia a McClintock raua ko Strong e te aite anga tikai i te tuatua anga i te “Amene” i te openga o te pure koia oki “e akapapu anga i te au tuatua i mua ua ake, e te akamata anga i te akatupu anga i te reira.” No reira, na te taopenga anga ki te “Amene” ma te ngakau tae, te akaari ra te tangata i tona manako i te pure anga ma te ngakau tae no runga i tana i tuatua ua akenei. Me te arataki ra tetai Kerititiano i te putuputuanga i roto i te pure na te taopenga anga na roto i teia tuatua, penei ka kapiti katoa mai te aronga te akarongo maira ki te “Amene” kia tuatua muteki ua me kore kia tuatua maata mai ei akaari mai i ta ratou akatika anga ketaketa eaa tei tuatuaia.​—1 Korinetia 14:16.

8. Akapeea e aite ei ta tatou pure ki te au pure mei ta Iakoba rai raua ko Aberahama, eaa ta teia e akaari maira no runga ia tatou?

⁸ Te vai ra tetai au taime penei ka akatika mai te Atua ia tatou kia akaari tatou i to tatou manako oonu no runga i te au tumu manako ta tatou e pure ra. Penei te inangaroia ra tatou kia riro mai mei ia Iakoba rai, te kukumi anga raua ko tetai angera i te katoa anga o te po kia rauka mai iaia tetai akameitakianga. (Genese 32:24-26) Penei te umuumuia ra tetai au turanga kia riro mai tatou mei ia Aberahama rai, tei pati putuputu kia Iehova no runga ia Lota e tetai ua atu au tangata tuatua tika penei tei roto rai ia Sodoma. (Genese 18:22-33) Penei ka pati katoa tatou kia Iehova no runga i te au mea e akaperepereia ra e tatou, te pati anga kiaia no runga i te tumu anga o tana tuatua tau, te aroa takinga meitaki, e te akaaroa.

Eaa ta Tatou ka Pati?

9. Eaa te au manako puapinga maata ta tatou ka pure?

⁹ Kia akamaara i ta Paulo i tuatua ana: “E akakite ua ra ki te Atua i to kotou anoano i te au mea katoa ra.” (Philipi 4:6) No reira, penei ka kapitiia mai ta tetai uaorai au pure ki roto i te au tu ravarai o te oraanga. Inara, ko te manako mua i roto i ta tatou au pure ko te au mea ta Iehova e inangaro ra. Kua akaari mai a Daniela i tetai akaraanga meitaki no runga i teia. Te tae mai anga te utunga ki runga ia Iseraela no ta ratou au ara, kua pati a Daniela kia Iehova kia akaari mai aia i te akaaroa, na te tuatua anga e: “Auraka e tavarevare, noou uaorai, e taku Atua: no . . . toou uaorai ingoa.” (Daniela 9:15-19) I roto i ta tatou pure te akaari katoa ra ainei tatou e ko te akatapu anga i te ingoa o Iehova e te akatupu anga i tona anoano ra ko te manako puapinga maata atuia na tatou?

10. Akapeea tatou i kite ei e e mea tau kia pure no runga i ta tetai uaorai au mea e inangaro ra?

¹⁰ Noatu rai, e mea tau kia rave katoaia te au pati anga no runga i ta tetai uaorai e inangaro ra. Ei akaraanga, mei te tata taramo rai, penei ka pure tatou kia nakirokiro oonu i te pae vaerua. Kua pure aia e: “E apii mai koe iaku kia akono au i taau ture, ka akono rai au i te reira ma te ngakau katoa ra.” (Salamo 119:33, 34; Kolosa 1: 9, 10) ‘Kua tuku oki a Iesu i te pure, i te pati anga atu kiaia, i Tei tika kia akaora iaia mei te mate maira.’ (Ebera 5:7) I te raveanga i te reira, kua akaari mai aia i te tu tau i te kimi anga i te maroiroi me aro atu tetai i te kino me kore i te au timataanga. Te oronga anga i te pure akaraanga ki tana au pipi, kua kapiti mai a Iesu i te au mea e manamanata ra tetai, mei te akakore anga i te au ara e te tauta anga kia rauka mai te kai no te au ra katoa.

11. Akapeea te pure i te tauturu anga ia tatou kia kore e topa atu ki roto i te au timataanga?

¹¹ I roto i taua pure akaraanga, kua kapiti mai a Iesu i te pati anga e: “Auraka e akaruke ia matou kia timataia mai, e akaora ra ia matou i te kino.” (Mataio 6:9-13) I muri mai kua ako aia e: “E ara, e e pure oki kia kore kotou e rokoia e te timataanga.” (Mataio 26:41) E puapinga maata tikai te pure me aro atu tatou i te au timataanga. Penei ka timataia mai tatou i te angaanga me kare i te apii kia kopae tatou i te au kaveinga Pipiria. Penei ka pati mai te au tangata kare i te Au Kite kia piri atu tatou kia ratou i roto i tetai au angaanga tau kore. Penei ka patiia mai tatou kia rave i tetai apinga te aati ra i te au kaveinga tau. I taua taime ra, e meitaki ake kia aru tatou i ta Iesu akoanga kia pure tatou​—i mua ake e i te taime e aro tikai ra tatou i te timataanga​—na te pati anga ki te Atua e kia tauturu mai ia tatou kia kore tatou e timataia.

12. Eaa te au mea akaapiapi te akakeu ra kia pure tatou, e eaa ta tatou e inangaro ra no ko mai ia Iehova?

¹² E tukeke te au taomianga e te au mea akaapiapi e tupu maira i roto i te oraanga o te au tavini o te Atua i teia tuatau. Kua riro te maki e te taitaia i te pae manako ei tumuanga apiapi maata no te manganui. Kua riro te au turanga kino te takapini ra ia tatou ei akataitaia anga i te oraanga. Te au tu ngata i te pae moni te akangata ra i te au mea no te oraanga. E pumaana  tikai i te kite e te akarongo maira a Iehova i tona au tavini tei akakite atu i teia au tumu nei kiaia! Te akakite maira a Salamo 102:17 no runga ia Iehova e: “E akonoia e ia te pure a tei putaua, e kare e akavaavaa i ta ratou pure.”

13. (a) Eaa te au tumu manako te ka tau ei au mea no te pure? (e) E akakite mai i tetai akaraanga no taua pure ra.

¹³ Ko tetai ua atu tumu te ka tamanamanata mai i ta tatou akamori anga kia Iehova me kore to tatou pirianga kiaia ka riro mai ei tumu anga tau no te pure. (1 Ioane 5:14) Me e au ikianga taau no runga i te akaipoipo, no te angaanga, no runga i te akamaata atu anga i taau angaanga orometua, auraka e emiemi i te apai atu i teia ki te Atua, na te pati anga i tana aratakianga. Ei akaraanga, kua inangaro tetai vaine mapu i te Piripine kia o atu aia ki roto i te angaanga orometua tamou. Inara, kare ana angaanga moni ei tauturu iaia uaorai. Kua tuatua aia: “I tetai Maanakai, kua pure au kia Iehova no runga tikai i te angaanga painia. I taua ra rai, iaku e angaanga ra i roto i te angaanga tutu anga, kua oronga atu au i tetai puka ki tetai mapu. Ma te poitirere, kua tuatua mai te tamaine ra e: ‘E aere vave koe ki te apii i te popongi Monite.’ Kua ui atu au e, ‘No teaa ra?’ Kua akamarama mai aia e e angaanga tetai i reira te inangaro vivikiia ra kia akakiia. Kua aere atu au, e kua ikiia au i taua taime rai. Viviki te au mea te tupu mai anga.” Aiteite ua te au tupu anga ki te Au Kite e manganui takapini i teianei ao. No reira auraka e emiemi i te tuku atu i taau au pati anga ngakau tae na roto i te pure ki te Atua!

Akapeea me kua Ara Tatou?

14, 15. (a) Eaa ra tetai tangata kare e tapupu i te pure noatu rai e kua rave aia i te ara? (e) I te pae mai i te au pure, eaa ua atu te ka tauturu i tetai tangata kia akaoraia mai mei te ara?

¹⁴ Akapeea te pure i te tauturu anga me kua ara tetai tangata? No te akama, kua tapupu tetai aronga tei rave i te ara i te pure atu. Inara, kare tera i te tu meitaki kia aruia. Ei akatutu anga: Kua kite te paireti o te pairere e me ngaro ratou, ka rauka ia ratou i te komunikeiti ki te aronga akaaere i te ngai akarere anga pairere kia oronga mai i te tauturu. Akapeea me kua emiemi te paireti tei ngaro i te tuatua ki te aronga akaaere no te mea kua akama aia e kua ngaro aia? E tumatetenga te ka tupu mai! Mei te reira katoa, te tangata tei ara e te akama ra i te pure ki te Atua ka kino roa atu aia. Auraka e tuku i te akama no runga i te ara kia tapupu i tetai tangata i te tuatua atu kia Iehova. Ko te tika, te pati maira te Atua i te aronga tei rave i te au ara kino pakari kia pure kiaia. Kua tauta te peroveta ko Isaia i te akakeu i te aronga tei ara i tona tuatau kia kapiki ia Iehova, “te maata ra oki iaia te akakore i te ara.” (Isaia 55:6, 7) Ae, penei te inangaroia ra tetai kia ‘akamaru i to Iehova mata’ na te taakaaka anga na mua i tona uaorai ngakau, na te akamutu anga i te aru i te aerenga ara, e te tataraara anga ma te ngakau tae.​—Salamo 119:58, NW; Daniela 9:13.

¹⁵ Me tupu mai te ara, e puapinga maata tikai te pure no tetai ua atu au tumu ke. Te akakite maira te pipi ko Iakobo no runga i tetai tangata te anoano ra i te tauturu i te pae vaerua: “E kapiki aia i te aronga pakari o te putuputuanga kia aere atu kiaia, . . . e na Iehova e akatu iaia ki runga.” (Iakobo 5:14, 15, NW) Ae, e aaki te tangata i tana ara kia Iehova na roto i te pure, inara ka rauka katoa iaia i te pati ki te aronga pakari kia pure nona ra. Na te reira e tauturu kia akaora mai iaia i te pae vaerua.

Te Au Pauanga ki te Au Pure

16, 17. (a) Akapeea a Iehova i te pau anga i te au pure? (e) Eaa te au tupuanga te akatutu maira e e piri anga vaitata to te pure e te angaanga tutu anga?

¹⁶ Akapeea me pauia mai te au pure? Penei ka pau vivikiia mai e ka kite uaia tetai au pure. (2 Ariki 20:1-6) Ko tetai au pure ka pou rai te tuatau, e penei kare e taka meitaki roa ana te au  pauanga. Mei tei akaariia mai i roto i ta Iesu akatutuanga no runga i tetai vaine takaua tei oki putuputu ua ki te akava, penei te anoanoia ra te pure putuputu ki te Atua. (Luka 18:1-8) Inara, papu ia tatou e me pure tatou ma te rotai ki to te Atua anoano, kare roa a Iehova e akakite mai kia tatou e: “Auraka e akapekapeka mai iaku.”​—Luka 11:5-9.

¹⁷ E manganui te au tangata o Iehova tei kite e kua pauia mai ta ratou pure. Kua kite putuputuia teia i roto i ta tatou angaanga orometua i te ngai tangata. Ei akaraanga, te tua aere ra nga tuaine Kerititiano i Piripine i te au puka Pipiria i tetai ngai mamao i vao ake. Te oake atu anga raua i te aenga pepa ki tetai vaine, kua pururu tona roi mata. Kua tuatua aia: “Inapo kua pure au ki te Atua kia tono mai i tetai tangata kia apii mai i te Pipiria kiaku, i toku manako teia te pauanga ki taku pure.” I muri poto ua ake i te reira, kua akamata taua vaine i te aere ki te au uipaanga i te Are Uipaanga Patireia. I tetai tuanga ke mai i te Tonga Itinga o Asia, kua ru tetai taeake Kerititiano no runga i te tutu aere anga i roto i tetai apatimani tei paruru pakariia. Inara, kua pure aia kia Iehova, ma te tu mataku kore, kua tomo atu aia ki roto i te apatimani. Kua topapa atu aia ki runga i te ngutupa o tetai apatimani, kua aere mai tetai vaine mapu. Te akamarama atu anga te taeake te tumu i aere mai ei aia, kua akamata te tamaine i te aue. Kua akakite mai aia e i kimi ana aia i te Au Kite o Iehova e kua pure ana i te tauturu kia kitenaia mai ratou. Kua tauturu rekareka atu te taeake iaia kia aravei atu i te putuputuanga o te Au Kite o Iehova o te reira ngai.

18. (a) Me pauia mai ta tatou au pure, akapeea tatou i te ariu atu anga? (e) Eaa te akapapuia maira kia tatou me pure tatou i te au atianga ravarai?

¹⁸ E mea umere tikai te pure. Te papa ua ra a Iehova i te akarongo mai e te ariu mai ki ta tatou pure. (Isaia 30:18, 19) Inara, te inangaroia ra tatou kia akarakara e akapeea a Iehova i te pau mai anga i ta tatou pure. Penei kare te reira e pauia mai i ta tatou e inangaro ra. Noatu rai, te kite ra tatou i tana aratakianga, e auraka e ngaropoina ia tatou i te oronga atu i ta tatou akameitakianga e te akapaapaa anga kiaia. (1 Tesalonia 5:18) Tei maata atu, kia akamaara ua rai i te akoanga a te apotetoro ko Paulo e: “E akakite ua ra ki te Atua i to kotou anoano i te au mea katoa ra i te pure, e te pati anga atu ma te akameitaki.” Ae, e mou i te au atianga ravarai na te tuatua atu anga ki te Atua. Na roto i taua tu ra, ka kite ua atu koe i te tu tika anga e eaa ta Paulo i akakite mai no runga i te aronga tei pauia mai ta ratou pure: “E na te au o te Atua, ko tei maata ua atu i te kite tangata, e akamaroiroi mai i to kotou ngakau e to kotou manako.”​—Philipi 4:6, 7.

Ka Rauka Ainei ia Koe te Pau?

• Eaa tetai au tu o te pure ta tatou ka rave?

• Akapeea tatou me pure?

• Eaa te au mea te ka kapitiia mai i roto i ta tatou pure?

• Eaa te tuanga a te pure me kua rave tetai tangata i te ara?

[Au Uianga Apii]

[Au Tutu i te kapi 29]

Na te pure ngakau tae e tauturu ia tatou kia kore e topa atu ki roto i te au timataanga

[Au Tutu i te kapi 31]

Na roto i te pure, e akakite tatou i to tatou rekareka, te au manako manamanata e te au pati anga ki te Atua