Me Akaruke Tetai tei Akaperepere ia Iehova
Me Akaruke Tetai tei Akaperepere ia Iehova
E NGA kite no Iehova a Mark raua ko Louise. * Ma te aroa e te akono meitaki, kua apii raua i te au Tuatua Tapu ki ta raua tamariki, mei ta te Pipiria e raurau maira i te au metua Kerititiano kia rave. (Maseli 22:6; 2 Timoteo 3:15) Ma te tangi, kare ta raua tamariki pouroa i tavini ua atu rai ia Iehova i to ratou pakarikari mai anga. “E mamae ana toku ngakau no te au tamariki tei aere ke,” i karanga ai a Louise. “Akapeea au i te manako pikikaa anga e kare teia e mamae tikai ana i te au ra ravarai? Me tuatua ana tetai ke no runga i ta ratou tamariki tamaroa, e piritia uaia ana toku karaponga e kua tapu ua au i taku aue.”
Ae, me iki tetai tangata i te akaruke ia Iehova e te tu oraanga akatakaia mai i roto i te au Tuatua Tapu, e mea matauia e ka kite mai rai te au mema pamiri i te mamae ngakau oonu. “E inangaro maata tikai toku i toku tuakana,” i karanga ai a Irene. “Ka rave au i tetai ua atu ravenga kia oki mai aia kia Iehova!” No runga ia Maria, e kua akaruke tona tungane ia Iehova i te aruaru i tetai tu oraanga akono tau kore, kua karanga aia: “E aka taitaia tikai teia noku i te akono no te mea i roto i tetai au tu ravarai, e tungane meitaki tikai aia kiaku. E mii tikai ana au iaia i te au akaputuputuanga pamiri maatamaata.”
Eaa i Aka Angaanga Ai?
Eaa ra te akatakakeanga i te pae vaerua o tetai tamaiti me kore tetai atu tangata akaperepere e akatupu ana i te taitaia oonu ki te au kopu tangata Kerititiano? No te mea kua kite oki ratou e te taputou maira te au Tuatua Tapu i tetai oraanga mutu kore ki runga i tetai enua parataito no te aronga tei vai tiratiratu kia Iehova. (Salamo 37:29; 2 Petero 3:13; Apokalupo 21:3-5) Te tapapa atura ratou i te piri atu anga ki to ratou au taeake, au tamariki, au metua, au ai taeake, e te au mokopuna i te kite mai anga i teia au akameitakianga. E mamaeanga tikai te reira kia ratou i te akamanakoanga e penei kare to ratou aronga akaperepere tei akamutu mai i te tavini ia Iehova e kapitiia mai ki roto i teia! No runga i to ratou oraanga i teianei, te marama ra te au Kerititiano e e puapinga rai te au ture e te au kaveinga a Iehova no ratou. No reira e ati ngakau ana te au Kerititiano i te kite anga i to ratou aronga akaperepere i te tatanuanga i tetai tu oraanga te akapapu ra i tetai kokotianga kino pakari tikai.—Isaia 48:17, 18; Galatia 6:7, 8.
Penei e mea ngata rai ki tetai tei kare i kite mai ana i teia tu akatakakeanga kia marama e mei teaa rai te mamae maata ta te reira e akatupu mai ana. Vaitata rai e akakeu ana te reira i te au tu ravarai o te oraanga. “E aka angaanga tikai i te nooanga ki te au uipaanga Kerititiano e i te kite atu i te au metua te katakata ra e te pukapuka ra ki ta ratou tamariki,” i karanga ai a Louise. “Tetai ua atu angaanga tamataora kua takinoia e te maromaroa no te aronga kare i kapitiia mai.” Kua maara tetai tangata pakari Kerititiano i te a mataiti e kua akakore tana tamaine angai i tona pirianga kia raua. Kua karanga aia: “Te maataanga i te taime, e ngata katoa te ‘au taime mataora.’ Me oake ana au i tetai apinga aroa ki taku vaine me kore kua apai au iaia i te openga epetoma ki tetai ngai manea, kua akamata aia i te aue, i te akamaaraanga e kare oki tana tamaine i piri mai ki roto i to maua mataoraanga.”
Kua kino pakari roa ainei teia tu o te au Kerititiano? Kare paa. Ko te tikaanga, penei i tetai tua te akaata ra ratou i te au tu o Iehova, e kua angaia ratou i tona tu. (Genese 1:26, 27) Eaa te aiteanga o te reira? I na, eaa to Iehova manako i te meameaau anga tona iti tangata a Iseraela iaia? Mei ia Salamo 78:38-41, kua kite mai tatou e kua mamae a Iehova e kua akaongoongoia. I na, kua akakoromaki ua aia i te akamatakite e te ako atu ia ratou, akakoreanga i ta ratou ara i te au taime ravarai i to ratou akaarianga i te tu tataraara. E tika, e pirianga vaitata to Iehova ki tana au mea ora, ‘te angaanga a tona rima ra,’ e kare aia e viviki i te akaruke ua ia ratou. (Iobu 14:15; Iona 4:10, 11) Kua tuku aia i roto i te au tangata ravarai i te tu kite kia rauka katoa ia ratou i teia au akapirianga tiratiratu, e ka pakari mai tikai te tatua i rotopu i te au mema pamiri. E no reira kare i te mea poitirere e ka mii te au tangata ravarai i te akatakakeanga i te pae vaerua o tetai kopu tangata akaperepere.
E tikai, te akatakakeanga i te pae vaerua o tetai tangata akaperepere, ko tetai ia o te au timataanga ngata rava roa atu te ka tupu ki te aronga akamori mou. (Angaanga 14:22) Kua karanga a Iesu e te arikianga i tana karere ka akatupu i te ke i rotopu i tetai au pamiri. (Mataio 10:34-38) Kare teia e no te mea e ko te karere tikai o te Pipiria te akatupu ana i te ke i roto i te pamiri. Mari ra, ko te au mema pamiri irinaki kore me kore tiratiratu kore tei akatupu ana i te ke, na te kopaeanga, te akarukeanga, me kore te patoi katoa anga i te tu oraanga Kerititiano. Inara, ka tau tatou kia rekareka, e kare a Iehova e akaruke i tona aronga tiratiratu ma te kore e tauturu i te akonoanga i te au timataanga tei tupu mai kia ratou. Me te mii nei koe i teianei i tetai tangata akaperepere tei takake atu i te pae vaerua, eaa te au kaveinga Pipiria te ka tauturu ia koe i te akakoromaki i te mii e kia kite mai i tetai tuanga no te tu rekareka e te mareka ua?
Autu Anga
“I te patu anga ia kotou uaorai,. . . tamou tikai kotou i to kotou uaorai inangaro i te Atua.” (Iuda 20, 21) Tei runga ua i toou au turanga tikai, penei ake kare rai e rauka ia koe i te rave i tetai apinga i teianei i te tauturu i tetai mema pamiri tei akamutu mai i te tavini ia Iehova. Noatu rai, ka rauka ia koe e e mea tau i te akamaroiroi ia koe uaorai e pera katoa i te toenga o te au mema pamiri te vai tiratiratu nei rai. Kua karanga mai a Veronica, tei kite e rua o tana tamariki tamaroa e toru i te akarukeanga i te tuatua mou: “Kua akamaaraia mai maua ko taku tane e me ka noo tamou ua rai maua i roto i tetai turanga maroiroi i te pae vaerua, tei roto maua i tetai turanga meitaki rava atu i te turou mai i ta maua nga tamaroa me oki akaou mai raua ki to raua tu manako tau. Ka akapeea ana te tamaiti kaimoumou naringa kare te metua tane i roto i tetai turanga meitaki i te ariki atu iaia?”
I te akonoanga ia koe uaorai kia maroiroi toou turanga, kia piri atu koe ki roto i te au angaanga pae vaerua. Ka kapitiia mai i roto i teia te akono tamou anga i tetai papaanga no tetai apiianga oonu o te Pipiria e te aere atu anga ki te au uipaanga Kerititiano. Maani koe ia koe kia va mai i te tauturu atu i tetai ke i roto i te putuputuanga i te ngai ka rauka maata toou au turanga ia koe i te rave. E tika, i te akamataanga penei ka kite mai koe i taua au angaanga ra ei mea ngata. Te maaraara ra ia Veronica: “Toku manako mua koia oki kia akatakake mai iaku uaorai mei tetai manu tei pakiaia. Inara kua maro mai taku tane e kia akono tamou maua i tetai raveanga meitaki i te pae vaerua. Kua maani rai aia e kia aere maua ki te au uipaanga. Me tae mai ana te taime e ka aere ki te uruoaanga, kua umuumu maata au i te tu mataku kore i te aere e i te aravei atu i te au tangata. I na, kua akapiri vaitata atu te porokaramu iaku kia Iehova. Kua akamaroiroi tikaiia ta maua tamaiti tei vai tiratiratu e taua uruoaanga.”
Ko Maria, tei taikuia i mua atu ana, e kite mai ana ei tauturu tikai kia angaanga maroiroi ua i roto i te angaanga orometua e te tauturu ra aia i teianei e a tangata i te apii i te Pipiria. Mei te reira katoa rai a Laura i te karanga anga: “Noatu e ka aue ua rai au i te au ra, e akameitaki ana au ia Iehova e noatu e kare au i autu ana mei tetai au metua aere i te utuutu mai anga i te tamariki, tei iaku te karere apa kore a te Pipiria, te tauturu ra i te au pamiri i roto i teia au tuatau openga.” Ia Ken raua ko Eleanor, e kua akaruke ta raua tamariki mamaata i te putuputuanga, kua akatanotano raua i to raua au turanga kia neke atu ki tetai ngai e te inangaro maataia ra te au papuritia no te
Patireia e kia aruaru i te angaanga orometua tamou. Kua tauturu teia ia raua i te akamanako meitaki i te au mea e kia kore raua e rokoia e te mii.Auraka e tuku i te au. E “manakonako [ana te aroa] i te au mea katoa.” (1 Korinetia 13:7) Ia Ken, tei taikuia i runga akenei, kua karanga aia: “I te akarukeanga ta maua tamariki i te arataa no te tuatua mou, kua manako mai au e mei te mea rai e kua mate ratou. Inara i muri mai i te mate anga toku tuaine, kua taui toku manako. Te rekareka nei au e kare taku au tamariki i mate tikai e te akatuera ra rai a Iehova i te mataara no ratou kia oki mai kiaia.” E tika, te akapapu maira te au tupuanga e te manganui tei akaruke i te tuatua mou, taopenga rai kua oki mai ratou.—Luka 15:11-24.
Kopae i te akaapaanga ia koe uaorai. Penei te nga metua tikai ka oki raua i te akamanako no runga i te tuatau i topa e kua tataraapa e kare raua i akono meitaki ana i tetai au turanga tikai. Inara, te manako maata tei akakiteia mai ia Ezekiela 18:20 koia oki e te akaapa ra a Iehova i te tangata apa, kare i tona nga metua, no tana ikianga tarevake. E mea umere, e mei te mea e te tuatua ra te puka a Maseli i te au manako e manganui no runga i te apainga a te nga metua kia utuutu i ta ratou tamariki i te mataara tau, kua tere atu te au ako i roto i te reira e a taime i te maata no te aronga mapu kia akarongo e kia aru i te au tuatua a to ratou au metua. Ae, e apainga ta te au tamariki kia ariu ki te terenianga a to ratou au metua apa ua tei akatumuia ki runga i te Pipiria. Penei ake i taua taime ra kua akono meitaki koe i te au apinga aere. I na, noatu e me kua manako mai koe e kua tarevake koe i tetai au ngai e ko koe tikai tei apa, kare te reira aiteanga e na taau au tarevake i akakeu i tetai tangata akaperepere oou kia akaruke i te tuatua mou. Noatu e eaa te tu, kare e puapinga i te akamanako ua i roto i te “au naringa ua ake.” E tamou i taau au tarevake, e tauta e auraka e rave akaou i te reira, e e pure kia Iehova kia akakore mai i taau ara. (Salamo 103:8-14; Isaia 55:7) E oti e akara ki te tuatau ki mua, auraka ki te tuatau i topa.
Kia akakoromaki i tetai ke. Penei e mea ngata no tetai pae kia kite mai e akapeea tikai i te akamaroiroi me kore i te akapumaana mai ia koe, koia tikai me kare ratou i kite mai ana i taua tu tupuanga aiteite. Pera katoa oki, e tuke ana te tangata i ta ratou akamanakoanga e eaa te akamaroiroianga e eaa te akapumaanaanga. No reira me e apinga ta tetai i akakite mai tei akariri ia koe, e akono i te akoanga a te apotetoro ko Paulo tei kiteaia ia Kolosa 3:13, NW: “E tamou rai i te akakoromaki anga tetai e tetai e te akakore ua anga i te ara tetai e tetai me e tumu ta tetai no te tapepeanga ki tetai.”
Akangateitei i ta Iehova akanoonooanga no te ako. Me kua akoia ana tetai kopu tangata oou mei te putuputuanga, e akamaara e e tuanga teia no ta Iehova akanoonooanga e e meitaki rai no te katoatoa, kapiti mai te tangata i rave i te tarevake. (Ebera 12:11) No reira, e kopae i tetai ua atu akakeuanga i te akaapa i te aronga pakari tei o atu ki roto i te akatikatikaanga me kare i te au tukuanga tika ta ratou i rave. E akamaara, e tupu mai ana te au tupuanga meitaki tikai mei te raveanga i te au apinga i ta Iehova arataa, inara te patoianga i ta Iehova au akanoonooanga e akatupu ua ana te reira i te taitaia maata.
I muri ake i to Iseraela akaoraia mai anga mei Aiphiti, kua tavini putuputu a Mose ei akava. (Exodo 18:13-16) Mei te mea e penei kua tukuia te akavaanga ki tetai tangata e kare oki ki tetai mai, kare e aka angaanga i te akamanako e kua reka kore tetai pae i te au tukuanga tika a Mose. Penei te kimianga i te akaapa i ta Mose au akavaanga kua arataki atu te reira ki tetai au tupuanga no te meameaau anga i tona aratakianga. Inara, te taangaanga ra a Iehova ia Mose kia arataki i Tona iti tangata, e kare ko Mose Tana i papa, mari ra ko te aronga meameaau e to ratou au pamiri tei turuturu atu ia ratou. (Numero 16:31-35) Ka kite mai tatou i tetai apiianga mei teia na te tautaanga i te akangateitei e i te taokotai atu ma te au tukuanga tika tei akonoia e te aronga ma te taoonga teokaratiki i teia tuatau.
No runga i teia, kua maara ia Delores e e ngata tikai kiaia i te akono tamou i tetai akaraanga meitaki i te akoia anga tana tamaine e te putuputuanga. “Te apinga tei tauturu iaku,” i karanga ai aia, “koia oki ko te tatau ua anga i te au atikara te akono ra i te tu tau o ta Iehova au akanoonooanga. E puka tata taku i maani no te au manako mei te au ako e te au atikara te ka tauturu mai iaku i te akakoromaki e kia aere ua atu ki mua.” Kua arataki atu teia ki tetai ravenga puapinga akaou mai no te akakoromakianga.
Akakite i toou au manako. Penei ka kite mai koe ei tauturuanga kia akakite atu koe i toou au manako ki e tai me kore e rua nga taeake tangi aroa taau e irinaki ana. I te raveanga i te reira, e iki i te au taeake te ka tauturu ia koe i te akono tamou i tetai tu papu tikai. E mea puapinga tikai kia “riringi i to kotou ngakau” na roto i te pure kia Iehova. * (Salamo 62:7, 8) No teaa ra? No te mea kua marama pu tikai aia i te oonu o toou manako. Ei akaraanga, penei ka manako mai koe e kare e tano ana e kua tupu teia mamae ngakau oonu kia koe. Me akamanako koe, kare ko koe tei akaruke ia Iehova. E akakite atu i toou au manako kia Iehova, e pati atu kiaia kia tauturu mai ia koe i te akamanako i te tupuanga i roto i tetai tu e kare e kino roa ana te mamae.—Salamo 37:5.
I te pouanga i te tuatau, ka kite mai koe i te akono meitaki i toou au manako. I teia taime nei, auraka e tuku i te au i roto i taau au tautaanga i te akamareka i toou Metua i te rangi, e auraka rava e akamanako e e puapinga kore ua teia au tautaanga. (Galatia 6:9) E akamaara, me ka akaruke tatou ia Iehova, ka kite mai rai tatou i te au manamanata. I tetai tua ra, na te tamou tiratiratu anga kiaia, tei ia tatou tona tauturu ma te au timataanga ta tatou e aro atura. No reira, kia akapapuia koe, e te marama ua maira a Iehova i te kino maata o toou turanga e ka tamou marie i te oronga atu kia koe i te tauturu tei inangaroia i te tuatau tau.—2 Korinetia 4:7; Philipi 4:13; Ebera 4:16.
[Au Tataanga Rikiriki i Raro]
^ para. 2 Kua tauiia tetai au ingoa.
^ para. 19 No runga i te pureanga no tetai kopu tangata tei akaateaia, e akara i Te Punanga Tiaki, o Titema 1, 2001, kapi 30-1.
[Pia i te kapi 19]
Akapeea i te Akono Anga
◆ “I te patu anga ia kotou uaorai, . . . tamou tikai kotou i to kotou uaorai inangaro i te Atua.”—Iuda 20, 21.
◆ Auraka e tuku i te au.—1 Korinetia 13:7.
◆ Kopae i te akaapaanga ia koe uaorai.—Ezekiela 18:20.
◆ Kia akakoromaki i tetai ke.—Kolosa 3:13, NW.
◆ Akangateitei i ta Iehova au akanoonooanga no te ako.—Ebera 12:11.
◆ Akakite i toou au manako.—Salamo 62:7, 8.
[Pia/Tutu i te kapi 21]
Kua Akaruke Ainei Koe ia Iehova?
Me kua akaruke koe, noatu eaa te tumu, ka takinoia toou pirianga kia Iehova e toou au manakonakoanga no te tuatau mutu kore. Penei te manako ra koe i te oki mai kia Iehova. Te aruaru maroiroi ra ainei koe i te reira i teianei? Me te tukutuku ua ra koe e kia tano roa “te tuatau tau”? E akamaara, e te aere viviki maira te au tumurangi uriia o Aramakito. Tei runga ravao, e poto ua te tuatau oraanga i roto i teia akatereanga o te au mea nei e te papu kore. Kare koe e kite e me ka ora mai rai koe apopo. (Salamo 102:3; Iakobo 4:13, 14) Kua karanga mai tetai tangata tei tuia e tetai maki e kare ona rapakau: “Kua tuia au e teia maki iaku e tavini tamou ra ia Iehova, e kare aku au angaanga akama i rave tei kitea koreia e te tangata. E e manako pumaana tikai teia kia rauka ia koe i teianei.” Inara, e akamanako ana, eaa tona manako me kua tuia aia i teia maki e te karanga ra e, “A tetai ra, ka oki mai au kia Iehova!” Me kua akaruke koe ia Iehova, ko te taime meitaki rava tikai teia kia oki mai koe.
[Au Tutu i te kapi 18]
Na te piri atu anga ki roto i te au angaanga pae vaerua ka tauturu te reira ia koe i te akara meitaki i te au apinga puapinga atu