“No Tetai Tamaiti e Iva Mataiti”

ME AERE ua mai ana te Au Kite o Iehova ki tona ngutupa, e akameitaki ua ana a Wiesława, tei noo ana i te apatonga o Porani, ia ratou e oti kua karanga atu aia e kare aia e inangaro ana i te pukapuka. I tetai ra, kua aere mai a Samuel e iva ona mataiti raua ko tona metua vaine ki tona ngutupa. I teia taime kua manako mai a Wiesława i te akarongo atu ki te karere e kua ariki aia i tetai makatini no runga i tetai parataito i te enua nei.

No te mea te vaitata maira te Akamaaraanga o to Iesu Karaiti matenga, kua inangaro a Samuel i te pati atu ia Wiesława kia aere mai ki teia atianga takake. E no reira, kua atoro akaou atu teia tamaiti iaia, ma tona metua vaine, i teia taime ma tetai patianga neneiia. I te kiteanga e kua mako tikai teia tamaiti i te kakau mai anga, kua pati atu a Wiesława kia raua kia tiaki marie ua mai, e kua oki atu aia ki roto i te akamanea meitaki mai iaia. I tona oki mai anga, kua akarongo atu aia kia Samuel, e kua ariki i te patianga, e kua ui atu: “Ko au anake ua te ka aere mai me ka aru mai rai taku tane iaku?” E oti kua karanga katoa aia: “Noatu me kare taku tane e aru mai, ka aere atu au. Te rave nei au i teia noou, e Samuel.” Ki to Samuel rekareka, kua akono rai aia i tana i taputou.

I te tuatau o te ako no te Akamaaraanga, kua noo a Samuel i te pae mai ia Wiesława e kua akaari atu kiaia i te au irava te uriuriia ra. Kua umereia aia i teia. Kua mataora tikai aia i te Akamaaraanga e kua rekareka oki e kua akamaramaia mai te au manako puapinga maata i roto i te tu mama ua. Kua akakeu katoaia aia e te tu maoraora e te takinga meitaki tei akaariia mai e te putuputuanga. Mei reira mai, kua maata mai to Wiesława inangaro i roto i te au apinga pae vaerua e kua akamata i te piri putuputu mai ki te Au Kite. Koi karanga ua akenei aia: “E akama toku e i mua atu ana kare au i akarongo ana kia kotou me aere mai ana kotou ki toku ngutupa. E te akakite atu nei au e no tetai tamaiti anake ua e iva ona mataiti, ko Samuel, i akarongo atu ei au ki ta kotou karere.”

Mei ia Samuel rai i Porani, e manganui te Au Kite mapu o Iehova te akapaapaa ra i te Atua ma te akakitekiteanga e na roto i to ratou tu akonoanga meitaki e to ratou tu meitaki. Me e tangata mapu koe, penei ka rauka katoa ia koe i te tauturu i te au tangata ngakau tae kia ariki atu i te au tu puapinga i te pae vaerua.