Au Uianga a te Aronga Tatau

Eaa te apainga a te putuputuanga me u tetai Kerititiano e akaoro ra i tetai apinga akaoro, tei riro mai ei mate no tetai ke?

E mea tau kia akamanakoia e me kua apa rai te tangata akaoro i te akamaringi toto no te mea ka anoanoia te putuputuanga kia kopae i te apainga o te akamaringi toto i mua i te katoatoa. (Deuteronomi 21:1-9; 22:8) Tetai tangata akaoro tei akatupu i te mate i roto i tetai u anga ka apa aia i te akamaringi toto me kua mako kore aia me kore kua aati akakoro tikai i tetai ture akaoro a Kaisara. (Mareko 12:14) Inara e au tumu ke atu tetai ka akamanakoia.

Tetai ta tangata tei oro ki tetai o te au oire akapuanga o Iseraela ka akavaia aia. Me kare te taanga i te mea akakoro, ka akatikaia aia kia noo ki roto i te oire, ei akapuanga mei te tangata akamoupuku. (Numero 35:6-25) No reira me kua apa tetai Kerititiano no te mate o tetai tangata i roto i te u anga, kia kimikimi mari te aronga pakari kia akapapu e me kua apa rai i te akamaringi toto. Kare to te kavamani manako me kore ta te akavaanga ikianga e akanoo katoatoa mai i ta te putuputuanga ka rave.

Ei akaraanga, penei ka akakite te akavaanga e kua apa taua tangata ra i te aati i tetai ture akaoro, inara penei ka iki te aronga pakari e kimikimi ra e kare e akamaringianga toto i raveia no te mea kare tei te tangata akaoro te akaaere i te au turanga tei akatupu i te mate. Inara, me ka takore te akavaanga i te akaapaanga, penei ka taopenga te aronga pakari e kua apa rai aia i te akamaringi toto.

Kia akatumuia te ikianga a te aronga pakari e kimikimi ra i taua mea ra ki runga i te au Tuatua Tapu e te au tika tei akanoo meitaki tikaiia​—te akatikaanga a te tangata akaoro e te/me kore te akapapuanga a nga kite tokorua me kore toko toru, tei irinakiia. (Deuteronomi 17:6; Mataio 18:15, 16) Me akapapuia e kua apa rai i te akamaringi toto, ka akanooia tetai kumiti akavaanga. Me iki te kumiti e kua tataraara te tangata akamaringi toto, ka akoia aia mei roto mai i te au Tuatua Tapu e ka araiia aia mei te au angaanga i roto i te putuputuanga. Kare aia e tavini akaou ei tangata pakari me kore ei tavini tauturu. Ka tuku katoaia tetai au araianga ke atu. E koia rai te ka apa i mua i te Atua no tona mako kore, e te manako kore tei taopenga mai ki te u e te mate.​—Galatia 6:5, 7.

Ei akatutu anga: Me e kino te au turanga o te reva i te taime i tupu ei te u, tika anga ka matakite maata roa atu te tangata e akaoro ra. Me kua varevarea moe aia, tikaanga ka tapu aia ka akangaroi e kia kore roa tona varevarea moe, me kore e tuku aia na tetai tangata ke e akaoro.

Peea ra me te akaoro viviki ra te tangata akaoro. Me pati mai, i tetai ua atu Kerititiano te rimiti tei tikaia e te ture, e kore tikai teia e oronga ana i ta “Kaisara kia Kaisara.” Te akaari katoa maira te reira i te tu akangateitei kore no te tu tapu o te oraanga, te ka taki atu penei ki te au openga kino. (Mataio 22:21) No runga i teia, ka akamanako ana i tetai apinga ke atu. Eaa ra te akaraanga ta tetai tangata pakari ka akanoo no te anana mei te mea e mako kore aia i te aru i te au ture akaoro a Kaisara me kore kua akakoro rai aia kia kore e rave i te reira? ​—1 Petero 5:3.

Kare i te mea tau no te au Kerititiano kia umuumu atu i etai ke kia tae ki tetai ngai te ka ngata i te tae vave atu ma te kore e pati mai te rimiti tei tikaia e te ture. Inara, i te maataanga o te taime, e mea tau rai kia aere vave me kore kia tieni i taau papaanga kia rava te taime no te aerenga. Me raveia teia, kare te Kerititiano e timataia kia akaoro viviki, ka rauka ra iaia i te aru i te au ture akaoro a te “aronga mana taoonga” o te kavamani. (Roma 13:1, 5) Ka tauturu teia i te tangata akaoro kia matakite kia kore e u e kia kore e apa i te akamaringi toto. Ka tauturu katoa iaia i te akanoo i tetai akaraanga tau e i te akono marie i te akava ngakau meitaki.​—1 Petero 3:16.