Eaa te “Tuatau Openga”?

E MANAKO ana koe e eaa te tu o te tuatau ki mua noou e no toou aronga akaperepereia? Te akarongo meitaki ra te au tangata e manganui ki te au nuti kia akara e akapeea te au tupu anga o teianei ao i te akakeu anga i to ratou oraanga. Inara, na te akarongo meitaki anga ki te Tuatua akauruia a te Atua, e orongaia mai ei te kite mou kia tatou. Kua tupu teia no te mea kua akakite mai te Pipiria mei mua mai e kare e no runga ua i te au mea i tupu ua akenei pera katoa te mea kare i tupu ake.

Ei akaraanga, i to Iesu Karaiti tuatau i te enua nei, e maata tana tuatua anga no runga i te Patireia o te Atua. (Luka 4:43) Kua inangaro te au tangata tei akarongo ana kiaia i te kite e aea taua Patireia umere e tae mai ei. E tika, e toru ra i mua ake ka tamate tarevakeia ai a Iesu, kua ui atu tana au pipi kiaia e: ‘Eaa te akairo o toou aerenga mai [ma te mana Patireia], e te openga o teianei ao?’ (Mataio 24:3; NW) Kua akakite a Iesu kia ratou e ko te Atua anake ko Iehova tei kite i te tuatau tikai e aea te Patireia e akatere pu tikai ei i te enua nei. (Mataio 24:36; Mareko 13:32) Inara, kua akakite mai ana a Iesu e tetai ke atu i tetai au tupuanga i runga i te enua te ka riro mai ei akapapu e te tutara ra a Karaiti ma te mana Patireia.

I mua ake ka akara matatio ei tatou i te akapapu anga kitea uaia e te noo nei tatou i te “tuatau openga” o te akatereanga o te au mea nei, kia akamanako poto ua ana tatou i tetai tupu anga puapinga maata tei tupu i te rangi. (2 Timoteo 3:1) Kua riro mai a Iesu Karaiti ei Ariki i te rangi i te mataiti 1914. * (Daniela 7:13, 14) I muri ua ake i te rauka anga mai te mana Patireia, kua rave a Iesu i tetai angaanga. Te akakite mai nei te Pipiria kia tatou e: “E e tamaki tei runga i te rangi: ko Mikaela e tana au angela, tamaki atura i te taae; e kua tamaki maira te taae e tana au angela.” (Apokalupo 12:7) Ko Iesu Karaiti “te angela maata ra ko Mikaela” i runga i tona taoonga i te rangi. * (Iuda 9; 1 Tesalonia 4:16) Ko te Tiaporo ko Satani te taae. Eaa tei tupu kia Satani e te au angera kino nana ra, tei karangaia e ko te au temoni, i roto i te tamaki? Kua ruti ratou i taua tamaki e kua ‘uriia mai ki vao,’ me kore kua tiria mai mei te rangi, ki te tuanga o te enua nei. (Apokalupo 12:9) E teianei kua rekareka te “au rangi e [te aronga] katoa oki ko tei noo i reira,” koia oki, te au tamariki vaerua akarongo mou a te Atua. Kare ra te au tangata i kite ana i taua rekareka anga ra. “E mate ra oki to te enua,” i totou ei te Pipiria, “tei raro atu na oki te diabolo ia kotou na, e riri maata oki tona, no te mea kua kite aia e e manga tuatau poto ua tona e toe nei.”​—Apokalupo 12:12.

No tona riri maata, kua tuku mai a Satani i te mate​—te mamae e te taitaia​—ki runga i te aronga e noo nei i runga i te enua. Inara, “e manga tuatau poto ua” to taua mate ra. Te akakite maira te Pipiria i teia tuatau e ko te “tuatau openga.” Kia rekareka tatou e kare e roa atu ana ka takore takiriia ta te Tiaporo akakeu anga i runga i te enua nei. Inara eaa ra te akapapu anga e te noo nei tatou i te tuatau openga?

[Au Tataanga Rikiriki i Raro]

 [Au Akameitakianga no te Tutu i te kapi 2]

COVER: Foreground: © Chris Stowers/​Panos Pictures; background: FAROOQ NAEEM/​AFP/​Getty Images