“Ko te Atua Ta Matou e Akarongo e Tikaʼi Auraka te Tangata”

‘Kare Matou e Tika kia Kore e Tuatua ia Iesu’

KO TE mataiti e 33 T.N., e te ngai ko te are akavaanga ngateitei o te akavaanga enua o te ngati Iuda i Ierusalema. I roto i teia akanooanga, te aere ra te Sunederi ka rave i te kimianga no te au pipi 12 a Iesu Karaiti. No teaa ra? No tei tutu aere ratou ia Iesu. Ko te rua taime teia ia Petero raua ko Ioane i te tu anga ki mua i te akavaanga. Kareka terao mai au apotetoro ko to ratou kimianga mua rai teia.

Kua tuatua atu te taunga maata ki te 12 apotetoro no runga i te akauenga tei tukuia atu e te akavaanga i muao ana. I taua taime ra, i te akaue angaia kia akamutu i te apii no runga ia Iesu, kua pau maira te nga apotetoro a Petero raua ko Ioane: “E mea tika i te Atua kia akarongo atu ia kotou auraka te Atua, ka akamaara io ïa kotou. Kare oki matou e tika kia kore e tuatua i ta matou i akara akenei, e ta matou i akarongo akenei.” Muri ake i te pure anga kia rauka te tu mataku kore, kua akakite atu rai te au pipi a Iesu i te tuatua meitaki.​—Angaanga 4:18-31.

Kua kite oki e kare i puapingaia tana au tamatakuanga mua, i te rua o te kimianga kua akakite te taunga teitei: “Kare aina matou i akaue tika atu kia kotou, auraka kotou e apii ma teianei ingoa? e i na, kua ki rava Ierusalema ia kotou i ta kotou tuatua, e te inangaro na kotou kia io mai te toto o teianei tangata ki runga ia matou nei.”​—Angaanga 5:28.

Ikianga Ngaueue Kore

I te pau anga atu ma te mataku kore, kua karanga atura Petero e te au apotetoro: “Ko te Atua ta matou e akarongo e tikaʼi auraka te tangata.” (Angaanga 5:29) Tika rava, e auraka e akarongo i ta te tangata ua nei, e akarongo ra tatou ia Iehova me patoi te au manonoanga a te tangata i tana au akauenga. *

E tau tikai te au mema o te Sunederi kia irinaki i te au tuatua akapapu a te au apotetoro i to ratou tu kauraro ki te Atua. Me uiia no runga i te akarongo i te Atua, ka tau teia au arataki o te taiate ngati Iuda kia pau ma te rotai e: ‘Ko te Atua te akarongo.’ E oti akera, kare ainei ratou e irinaki ana e ko te Atua te Atu Ngateitei o te ao e pini ua ake?

Inara i te tuatua anga no te au apotetoro katoatoa, kua akakite a Petero no runga i ta ratou angaanga orometua e, ko te Atua ta ratou e akarongo auraka te tangata. I na, kua akapuapinga koreia atura eia te tapepeanga e kua akarongo kore te au apotetoro. Kua kite ua te Sunederi mei to ratou uaorai tuatua enua, i tetai au atianga tei taka meitaki ua e kia akarongo i te Atua auraka te tangata. E rua vaine akaanau i Aiphiti tei mataku i te Atua, kare ra ia Pharao, na te vaoo anga kia ora te au tamaroa tei anauia mai e te au vaine Epera. (Exodo 1:15-17) Kua akarongo te Ariki ko Hezekia ia Iehova, kare i te Ariki ko Senakeriba, i te maro angaia kia tuku i te au. (2 Ariki 19:14-37) Te akaketaketa maira te au Tuatua Tapu Epera, tei matauia e te au mema o te Sunederi, e te tapapa maira a Iehova i tona iti tangata kia akarongo iaia.​—1 Samuela 15:22, 23.

Tutakiia te Akarongo

E tai ra mema o te akavaanga teitei tei tukia e te tuatua, “ko te Atua ta matou e akarongo e  tikaʼi auraka te tangata.” Ko Gamaliela, e akavanui akangateitei maataia i rotopu i te Sunederi, kua pati akatenga aia i te akavaanga kia akarongo i tana ako pakari tei orongaia ki rotopu ua ia ratou. I te taiku anga i tetai au akaraanga i topa, kua akakite a Gamaliela e kare i te mea meitaki kia tamanamanata i te angaanga a te au apotetoro. Kua taopenga aia na te tuatua anga e: “E akataka ke atu kotou i tenana au tangata, e vaio ua atu . . . ko te riro aea oki kotou ei aronga tamaki atu ki te Atua.”​—Angaanga 5:34-39.

Kua riro te au tuatua tau a Gamaliela ei akakeu i te akavaanga teitei kia tuku i te au apotetoro. Noatu kua papaia ratou, kare ra tei tupu i tamataku ana i te au apotetoro. Mari ra, te karanga ra te Pipiria e: “E kare e rā i tukua ia ratou, i te apii anga atu e te tuatua anga atu ia Iesu Mesia, ki roto i te iero ra, e i tera are e tera are.”​—Angaanga 5:42.

Kua akameitaki maataia te au apotetoro no tei akakite ma te ngaueue kore e no te Atua te mana teitei rava atu! Mei te reira rai te tu o te au Kerititiano mou i teia tuatau. Ka akara tamou atu rai te Au Kite o Iehova kia Iehova, ei Tutara Ngateitei Rava no ratou. Me akaueia kia patoi i te au aratakianga a te Atua, ka pau ratou mei ta te au apotetoro e: “Ko te Atua ta matou e akarongo e tikaʼi auraka te tangata.”

[Tataanga Rikiriki i Raro]

[Pia/Au Tutu i te kapi 9]

KARE AINEI KOE I UMERE ANA?

Akapeea i rauka ai i te tata Pipiria ia Luka te akakiteanga no runga i te au tuatua a Gamaliela i roto i te uipaanga a te Sunederi? Penei e mea akauruia e te Atua te au tuatua a Gamaliela kia Luka. Me kare penei, na Paulo (tetai o te aronga apiipii a Gamaliela) i akakite kia Luka eaa te au mea ta Gamaliela i tuatua ai. Me kore penei na Luka rai i ui ki tetai mema o te akavaanga teitei tei turu ia ratou.