“Te Maata Rava nei Toku Inangaro i Taau ra Ture!”

KO TE Salamo 119 e imene te reira no runga i te au manako ngakau o te tangata tata, i te karere me kore, i te tuatua akauruia a te Atua. Kua imene te tata taramo e: “Kua uuna au i taau tuatua ki roto i toku ngakau.” “Ka rekareka au i taau ra au akonoanga.” “Kua taravai toku vaerua i te inangaro anga i taau ra au tuatua-tau kare e rā e tukua.” “Ko taau au tuatua-akakite, ko taku ïa e mataora.” “Te anoano nei au i taau ra au ikuiku anga.” “Ka mataora rai au i taau ra au akauenga, tei inangaroia e au nei.” “Ka akamaara rai au i taau ra au akonoanga.” “Te maata rava nei toku inangaro i taau ra ture! ko toku ïa maaraara anga i te au rā katoa nei.”​—Salamo 119:11, 16, 20, 24, 40, 47, 48, 97.

E akameitakianga ngakau tae tikai ta te tata taramo no te au tuatua a te Atua i akakiteia mai! Te manako akapera ra ainei koe no runga i te karere a te Tuatua a te Atua, i te Pipiria? Ka inangaro ainei koe i te tatanu i taua tu mataora ra no te reira? Me koia ia, ka anoanoia koe kia akatupu na mua i te tu inangaro i te tatau putuputu i te Pipiria, i te au ra tataki tai me ka rauka. Kua akakite a Iesu Karaiti: “Kare o te kai anake ra te mea e oraʼi te tangata nei, ko te au mea katoa ra no roto mai i te vaa o te Atua ra.” (Mataio 4:4) Te rua, kia akamaaraara koe no runga i taau i tatau. Ka akamaata atu te akamanako anga i te tuatua mou no runga i te Atua, i tona au tu, tona anoano, e tona akakoroanga, i toou aka ariki rekareka i te Pipiria. (Salamo 143:5) E tei puapinga roa atu, e akono i ta te reira akoanga tau i te au ra ravarai o te oraanga.​—Luka 11:28; Ioane 13:17.

Akapeea ra te tatanu anga i te mataora no ta te Pipiria e akakite maira, i te akapuapinga anga ia koe? “E ao to tei akono i [ta te Atua] au tuatua-akakite,” e akakite ra te Salamo 119:2. Ka riro te au tuatua akakite i roto i te Pipiria i te tauturu ia koe kia puapingaia i te akono anga i te au manamanata o te oraanga. (Salamo1:1-3) Ka rauka ia koe te pakari, te kite maata, e te marama, te ka riro ei tauturu ia koe i te ‘tāpu i o puke vaevae i te au arataa kikino ravarai.’ (Salamo 119:98-101) Ka riro te kite i te tuatua mou no runga i te Atua e tona akakoroanga no te enua i te akapuapinga maata roa atu i toou oraanga e te akakaka atu i toou manakonakoanga no te tuatau ki mua.​—Isaia 45:18; Ioane 17:3; Apokalupo 21:3, 4.

Te inangaro maata tikai nei te Au Kite o Iehova i te tauturu i etai ke kia maata atu te kite i te Pipiria e kia akatupu i te inangaro no tana karere. Tei ia koe ta matou patianga ngakau tae kia ariki i te patianga tei aru mai.