Au Uianga a te Aronga Tatau

Eaa te Bibilia Tapu Ra i karanga ai i roto ia Deuteronomi 31:2 e “kare atura e tika iaku [Mose] kia aere ki vao, e kia oki mai ki roto” ei arataki no Iseraela, i na te akakite ra tetai au urianga e kare e rauka akaou iaia i te rave i te reira?

Noatu e ka rauka taua tuatua Epera ra kia uriia na roto i nga mataara roa ai, te akakite maira te au tuatua i roto i tetai au urianga Papaa o te Pipiria e i te vaitata anga ki te openga o tona oraanga, kua makimaki ia a Mose, kare e rauka akaou i te rave i te au apainga a te arataki. Ei akaraanga, te taiku maira The New English Bible e te karanga ra a Mose e: “E okotai anere e rua ngauru oku mataiti i teianei, e kare e rauka akaou iaku kia aere me inangaro au.” Te karanga katoa ra, The New American Bible e: “Kare e rauka akaou iaku . . . kia aere ua rai.”

Inara, te akaari maira a Deuteronomi 34:7 e, noatu kua ruaine a Mose, kare ra aia i te makimaki. Te karanga ra te reira e: “Okotai akera anere e rua ngauru o Mose ra mataiti i mate ei aia: kare tona mata i avarevare, kare oki tona maroiroi i iti.” No reira, te rauka ra rai ia Mose i te pae kopapa, i te arataki i te iti tangata, inara kare i tika i to Iehova anoano kia rave atu rai aia i te reira. Te taka ua ra teia mei ta Mose i karanga e: “Kua tuatua mai oki a Iehova kiaku e, Kare koe e tae ki tetai pae i teianei Ioridana.” Te akaraanga, te akakite akaou ra a Iehova i tana i akaue i ko i te vai o Meriba.​—Numero 20:9-12.

Kua noo a Mose i tetai oraanga roa e te umere tikai, te ka rauka kia akatuangaia ki roto i e toru tuatau. Kua noo aia i Aiphiti e 40 mataiti, i reira kua “apiiia iorā Mose i te au tuatua pakari a to Aiphiti” e kua “mana atura aia i tana tuatua e tana ravenga.” (Angaanga 7:20-22) No tetai 40 akaou mai mataiti, kua noo aia ki Midiana. I reira kua akatupu aia i te au tu pae vaerua tei anoanoia no te arataki anga i te iti tangata o Iehova. I te openga iora, no te 40 mataiti kua arataki e kua akaaere a Mose i te ngati Iseraela. Kareka ra i teianei, kua iki a Iehova e ko Iosua, kare ko Mose, te ka arataki i te vaka tangata ki tetai pae mai i te Kauvai Ioridana ki roto i te Enua Taputouia.​—Deuteronomi 31:3.

No reira, kua rauka i te Bibilia Tapu Ra i te akataka meitaki mai i te aiteanga tikai o Deuteronomi 31:2. I kore ei i tika ia Mose kia arataki akaou ia Iseraela, kare e no te apikepike o te kopapa, mari ra no te mea kare a Iehova i akatika iaia kia rave i te reira.