E Pakari Roa Ainei te Pipiria?

“I TOKU tamariki anga, kare au i apiiia ana te au turanga no te Pipiria. Kare rava te Atua i tuatuaia ana,” i akakite mai ei tetai tangata mapu i Vinirani. Kare taua tu tupuanga ei mea matau koreia i teia tuatau. E manganui, te aronga mapu tikai, e manako ana i te Pipiria ei apinga taito rava, e e pakari roa ta te reira akoanga. E manako ana tetai pae i te aronga e inangaro ra i te aru i te Pipiria e e au tangata takinokinoia e kua akateiaaia to ratou au oraanga e te au arairaianga e te au akauenga. No reira, e manganui tei manako mai e e meitaki atu kia akarukeia te Pipiria ki runga i te pia paata e kia kimi ke atu i te aratakianga.

Kua tupu maata mai te reira manakoanga o te Pipiria, no te takinokinoanga a te au akonoanga o Kerititome no tetai tuatau roa. I te tuatau e kapiki ana tetai au tata tuatua e ko te Au Tuatau Poiri, ei akaraanga, vaitata rai e kua akatere te Akonoanga Katorika i te au tuanga ravarai o te oraanga o te au tangata. Te tangata ua tei tae i te patoi i te akonoanga te tuku ra i tona oraanga kia tamamaeia me kore kia tamateia. Te au akonoanga Porotetani, tei mama mai i muri akera, kua arai katoa i te rangatira o tetai uaorai. I teia tuatau, te au tuatua mei te “Calvinist” me kore te “Puritan” kare e te akamaara ua ra te reira ia tatou i te au pipi o tetai au akonoanga tikai mari katoa i te takinga kino anga pakari tei piri atura ki taua au pupu ra. Tei tupu mai, no te takinokinoanga a te au akonoanga, kua tarevake te au tangata i te manako anga e e takinokinoanga katoa te au apiianga a te Pipiria.

I te au anere mataiti ua akenei, i roto i tetai au enua aere, kare o te au akonoanga akakeuanga maata ki runga i te oraanga o te au tangata. I muri ake i te patoianga i te au peu irinakianga a te au akonoanga, e maata tei akatupu i te manakoanga e tei runga rai i te tangata uaorai i te tikaanga kia iki e eaa te mea tano e eaa te mea tarevake. Eaa te tupuanga? Kua akataka mai, a Ahti Laitinen, tetai poropeta no te apiianga no te au raveanga kino e te apiianga no te akavaanga tangata: “Kua meangiti mai te akangateitei no te mana tutara, e te maramaanga o te au tangata e eaa te tau ra e eaa te tau kore ra te aveave roa atura.” Te mea katakata, kua aru katoa rai te au arataki o te akonoanga i teia tu akamanakoanga. Kua karanga tetai epetikopo maata no te Luther e: “E kopae ana au i te manakoanga e te au uianga no te tu akono tau, e pauia ana te reira na te urianga ki te Pipiria me kore ki tetai mana akonoanga.”

Inangaroia te Tu Rangatira Kotinga Koreia?

Penei e tangi reka ake te manakoanga o tetai tu rangatira kotinga koreia, ki te aronga mapu tikai. Kare te manganui e rekareka ana me tuatua taakaakaia ratou me kore i te akono i to ratou oraanga ki tetai papaanga o te au apinga ka tau kia rave me kore kare e tau kia rave. Inara, ka tau ainei te katoatoa i te rave ua i ta ratou e inangaro ra? Kia pau i teia uianga, e akamanako ana i tetai akatutuanga. E akamanako ana i tetai oire maata e kare o te reira au ture akaoro. Kare e raitini no te akaoro e kare katoa tetai apiipiianga akaoro e umuumuia. Tei runga ua i te au tangata i te akaoro i te tu ua e inangaro ra ratou, noatu me kua kona i te kava, kare e manamanata ana i te au kotinga no te akaoro viviki, te au ngai tapuanga, te  au mori, te au mataara e tai ua tua i te aereanga, me kore te au ngai e tikoti ana te au tangata. E mea meitaki ainei taua tu “rangatira” ra? Kare rava! Ka tupu mai te marikoanga kore, te oripu ua anga, e te tumatetenga. Noatu e e tapu ana te au ture akaoro i te tu rangatira o te au tangata, te marama ra tatou e kua riro teia au ture ei paruruanga no te au tangata akaoro e te au tangata aaere katoa.

Mei te reira rai, te oronga maira a Iehova i te aratakianga e akapeea tatou i te nooanga. E puapinga teia kia tatou. Me kore te reira aratakianga, ka kite mai tatou i teia au apinga na roto i te tamataanga e te au tarevake, e i te rave anga i te reira, ka akatupu tatou i te kino kia tatou uaorai e ki tetai ke. Taua tu orureauanga no te tu akono tau, e mea inangaro koreia e te kino katoa mei te akaoroanga rai i roto i tetai oire maata ma te kore te au ture akaoro. Ko te tikaanga, ka inangaro tatou i te au ture e te au kaveinga​—tetai tikaanga tei ariki takereia e te maataanga o te au tangata.

“Te Māmā nei Taku Apainga”

Penei ka o mai i roto i taua au ture akaoro tetai papaanga ture akatakaia e te roangarere​—i roto i tetai au ngai te au ture no te paka ua anga e apinga tikai. Ei tuke anga, kare te Pipiria e akanoo mai ana i tetai papaanga ture roangarere. Mari ra, e akanoo ana te reira i te au kaveinga tumu, e kare teia ei apainga maata me kore ei takinokinoanga. Kua oronga a Iesu Karaiti i tetai patianga manea ki tona au taeake: “E aere mai kotou kiaku nei, ko te aronga katoa i roiroi, e te aronga teiaa i te apainga, naku e akaanga i to kotou roi. Te maru nei taku amo, e te māmā nei taku apainga.” (Mataio 11:28, 30) I roto i tetai reta ki te putuputuanga Kerititiano i Korinetia, kua tata te apotetoro ko Paulo: “E tei iaia te Vaerua o te Atu ra, tei reira te rangatira.”​—2 Korinetia 3:17.

Inara, e kotinga to te reira rangatira. Kua akataka meitaki mai a Iesu e i roto i te au umuumuanga a te Atua te o maira tetai au akauenga mama ua. Ei akaraanga, kua karanga a Iesu ki tana au pipi: “Teia taku akauenga, kia aroa kotou ia kotou uaorai, mei iaku i aroa ia kotou.” (Ioane 15:12) E akamanako ua ana te tu o te oraanga me akono te katoatoa i taua akauenga ra! E no reira, te rangatira tei rekarekaia e te au Kerititiano e au kotinga anga to te reira. Kua tata te apotetoro ko Petero: “Ei aronga rangatira kotou, auraka ra taua rangatira ra e akariroia ei tapoki tuatua kino, ei tavini ra kotou no te Atua.”​—1 Petero 2:16.

No reira, noatu e kare te au Kerititiano i raro i tetai papaanga ture akatakaia, kare ratou e rave ua i ta ratou uaorai au akamanakoanga i te mea tika e te mea tarevake. Te inangaro ra te au tangata i te aratakianga e ko te Atua anake ua te ka rauka i te oronga mai i te reira kia ratou. Te akakite ua maira te Pipiria: “Kare tei te tangata e aere nei, i te akono i tona uaorai takainga tapuae.” (Ieremia 10:23) Me akono tatou i te aratakianga a te Atua, ka puapinga maataia tatou.​—Salamo 19:11.

Ko tetai o te au puapinga koia oki ko te mataora. Ei akaraanga, te tangata mapu tei taikuia i te akamataanga, e tangata keikeia aia e te pikikaa. E tangata ori katoa aia. I te kite mai anga i te au turanga teitei a te Pipiria, kua taui aia i tona tu oraanga kia aru i te reira. “Noatu e kare i rauka ana iaku i te aru viviki i te au turanga katoatoa a te Pipiria,” i karanga ai aia, “Kua marama au i to te  reira puapinga. Kare toku tu oraanga i mua atu ana i akatupu mai ana i te mataora, te rekareka nei au i teianei. I te aruanga i te au turanga o te Pipiria te akamama maira i toou oraanga. Te kite ra koe e te aere ra koe kiea e eaa te mea tika e eaa te mea tarevake.”

E mirioni ua atu te au tangata tei kite katoa mai i taua tupuanga aiteite. Ko tetai o te au puapinga koia oki, kua tauturu te aratakianga kiteaia i roto i te Pipiria ia ratou kia meitaki atu to ratou au pirianga ki te au tangata, kia tatanu i tetai manako meitaki ua no te angaanga, kia kopae i te au angaanga kino matauia, e oti kia noo i tetai oraanga mataora atu. A Markus, * tetai tangata mapu tei akono kore ana i mua atu ana e te akono nei i teianei i te au turanga Pipiria, kua karanga aia i tona uaorai oraanga: “Na te aruanga i te Pipiria, kua rauka iaku i te akameitaki atu i toku uaorai tu akangateitei.” *

Eaa Taau Ikianga?

E no reira e pakari ainei te Pipiria? Te pauanga e ae​—ei puapinga no tatou katoatoa. Inara e pakari roa ainei te Pipiria? Te pauanga e kare. Te rangatira kotinga koreia e taki ua ana te reira ki te au manamanata. E tau meitaki te au turanga Pipiria, e te akamaroiroi ra te reira i to tatou tu oraanga meitaki e te mataora. Kua karanga mai a Markus: “Kua akapapu mai te pouanga o te tuatau i te kite pakari i te akonoanga i te Tuatua a te Atua i roto i te oraanga. Noatu e i roto i te au tu e manganui e tuke toku oraanga mei te au tangata ua nei, kare roa au e manako ana i tetai taime e kua ngere au i tetai apinga puapinga i roto i te oraanga.”

Me akamata ana koe i te kite mai i te au akameitakianga no te aruanga i te au turanga a te Pipiria, ka maata mai toou arikianga no te Tuatua a te Atua. Ka taki atu teia ki tetai akameitakianga maata roa atu​—ka kite mai koe i te inangaro i to te reira Tumuanga tu-Atua, ko te Atua ko Iehova. “Teia oki te inangaro i te Atua, ko te akono i tana au akauenga; kare oki tana au akauenga i te mea teiaa.”​—1 Ioane 5:3.

Ko Iehova tei Anga mai ia tatou e koia to tatou Metua i te rangi. Kua kite aia eaa te mea meitaki atu no tatou. Kare oki aia e tapupu ia tatou, te oronga maira aia kia tatou i te aratakianga aroa ei meitaki no tatou. I roto i tetai reo pee te aruaru maira a Iehova ia tatou: “Angairi koe i akarongo mai ki te au akauenga naku! kua riro ïa toou au mei te vai taʼe ra; e taau tuatua-tika mei te ngaru moana ra.”​—Isaia 48:18.

[Au Tataanga Rikiriki i Raro]

[Tutu i te kapi 9]

Kua karanga a Iesu e ka akaoraora te au umuumuanga a te Atua

[Tutu i te kapi 10]

E apai mai ana te akonoanga i te aratakianga a te Atua i te mataora e te tu akangateitei uaorai