Tua Oraanga

Kua Tauturu a Iehova Iaku Kia Akono Meitaki i te Au Akaaoanga No te Oraanga

AKAKITEIA E DALE IRWIN

“KUA RAVA UA E VARU! ME E TOKO A KUA TAKI RUA TE MANAMANATA.” I tatau ei tetai tumu tuatua o tetai nuti pepa i to matou ngai te akakite ra i te au pepe e toko a tei kapitiia mai ki to matou pamiri e a tamariki tamaine. Ei tangata mapu, kare roa oku manako i te akaipoipo, e kare katoa oku manako e ka anau tamariki au. I na, teia oki au​—e papa e varu tamariki!

KUA anauia au i te 1934 i roto i tetai taoni ko Mareeba, Autireria. Ko au te openga o te toru tamariki. I muri mai kua neke atu to matou pamiri ki Brisbane, e kua apiipii toku mami i te apii Tapati a te akonoanga Methodist.

I te akamataanga i te 1938, kua ripoti te au nuti pepa i to matou ngai e ka araiia paa a Joseph F. Rutherford mei te opati maata o te Au Kite o Iehova mei te tomo mai anga ki Autireria. “Eaa ratou i rave ei i teia kiaia?” Kua ui atu a Mami i tetai Kite tei aere mai ki to matou ngutupa. Kua pau mai te Kite: “Kare ainei e kua karanga a Iesu e ka takino te au tangata i tana au pipi?” I reira a Mami i ariki ei i tetai puka rikiriki te Cure, tei akataka mai i te au tuke e manganui i rotopu i te akonoanga tika e te mea pikikaa. * Umereia e teia puka rikiriki, kua apai a Mami ia matou tamariki ki tetai uipaanga a te Au Kite o Iehova i tera mai Tapati. I te akamataanga, kua patoi pakari toku papa, inara i tetai taime e tata ana aia i te au uianga Pipiria kia oake a Mami ki tetai o te au taeake. E oti, kua tata taua taeake ra i te au pauanga Tuatua Tapu na Mami kia oake kia Tati.

I tetai Tapati kua aru mai toku papa ia matou ki te uipaanga, ma te akakoroanga i te akakite i tona mareka kore i te Au Kite. Inara, i muri ake i te  tuatuaanga ki te akaaere tutaka tei atoro mai i te putuputuanga i taua taime ra, kua taui a Tati i tona manako e kua akatika katoa aia kia taangaangaia to matou kainga ei ngai no te apii Pipiria i te au epetoma, tei aereia mai e te aronga inangaro i roto i to matou tapere.

I roto ia Tepetema 1938, kua papetitoia toku nga metua. Kua papetitoia matou tamariki i roto ia Titema 1941 i tetai uruoaanga pa enua tei raveia i Hargreave Park i Sydney, New South Wales. E itu oku mataiti i tera taime. I muri akera, kua piri putuputu au i roto i te angaanga orometua ma toku nga metua. I taua tuatau ra, e apai ana te Au Kite i te au ponikarapu amo aere ua mei tetai ngutupa ki tetai ngutupa e kua akatangi i te au ako Pipiria ki te au tangata ngutuare.

Tetai Kite aku e maara meitaki nei ko Bert Horton. E motoka akatangitangi apinga tona​—tetai motoka e e apinga akatangi maata ririnui to te reira e tetai pia akatangi maata i runga ake i te motoka. E mataora tikai te angaanga kapitianga kia Bert, no tetai tamaiti i toku mataiti tikai. Ei akaraanga, me te akatangitangi ra i tetai ako Pipiria mei runga mai i tetai maunga, e kite putuputu ana maua i tetai motoka akava te oro maira ki to maua tua. Kua tamate viviki a Bert i tana apinga akatangi, e kua akaoro aia ki tetai maunga mai e au kiro mita atu te mamao, e oti kua akatangi akaou i tetai rekotianga. Kua kite mai au i te irinaki maata i roto ia Iehova e te tu mataku kore mei ia Bert e tetai atu au taeake tiratiratu, mataku kore mei iaia rai.​—Mataio 10:16.

I toku 12 mataiti anga, kua putuputu au i te tutu aere ko au anake ua me tere mai ana te apii. I tetai atianga, kua aravei au i tetai pamiri ko Adshead to ratou ingoa. Aere rai, kua kite mai nga metua roa ai, ta raua tamariki e varu, e te au mokopuna e manganui i te tuatua mou. Kua akameitaki au ia Iehova no te akatikaanga iaku, tetai tamaiti ua nei, i te akakite atu i te tuatua mou Pipiria ki teia pamiri.​—Mataio 21:16.

Au Tuanga Angaanga e te Ou ua Ra

I te 18 mataiti, kua riro mai au ei orometua painia tamou e kua tukunaia atu au ki Maitland, New South Wales. I te 1956, kua patiia au kia tavini i te opati manga o Autireria i Sydney. O te 20 aronga angaanga, mei tetai tai toru ia ratou e aronga akatainuia, ma te manakonakoanga i te tutara kapitianga kia Karaiti i roto i tona Patireia i te rangi. Mei teaa tikai te ngateitei i te angaanga kapiti atu anga kia ratou!​—Luka 12:32; Apokalupo 1:6; 5:10.

Toku akakoroanga kia vai takaua, kua kore takiri i toku araveianga ia Judy Helberg, tetai tuaine painia manea tei patiia no tetai tuatau poto ua kia aere mai ki konei i te manga opati kia tauturu iaku i tetai angaanga maata. Kua akainangaro maua ko Judy ia maua, e kua akaipoipo maua e rua mataiti i muri mai. I muri akera, kua akamata atu maua i te angaanga kotinga, tei kapiti mai i te atoroanga e tai putuputuanga o te Au Kite o Iehova i te epetoma tataki tai kia akamaroiroi i te au taeake.

I te 1960, kua anau mai a Judy i ta maua tamaine mua, ko Kim. I teia tuatau, me anau mai ana tetai nga tokorua i tetai pepe, kua akaruke raua i te angaanga kotinga e kua noo tinamou ua raua. Inara ki to maua poitirere, kua patiia mai maua kia tamou marie i te atoro atu anga i te au putuputuanga. I muri ake i te pure maataanga, kua ariki maua i teia patianga, e i roto i te itu marama tei aru mai, kua aru mai a Kim ia maua e 13,000 kiro mita na runga i te bus, te pairere, e te rerue ia maua e tavini ra i te au putuputuanga totoa ateaia i Queensland e i te Tuanga Apatokerau. Kare o matou motoka i te reira taime.

Kua noo ua ana matou i roto i te au kainga o te au taeake e te au tuaine. No te reva toropika, e au arai ua to te au pia moe e kare oki e ngutupa, tetai  apinga tei akamaata atu i to maua taitaia me aue ana a Kim i te po. Taopenga mai kua maata roa te apainga i te akonoanga i tetai pepe e ta maua tuanga angaanga. E no reira kua noo tinamou maua i Brisbane, e kua akamata au i te angaanga peni tata, tetai tuanga angaanga ati i te pae okooko. E rua mataiti i muri mai i to Kim anau mai anga, kua anau akaou mai tetai tamaine na maua, ko Petina.

Akonoanga i te Tumatetenga

I te 1972, e 12 e te 10 mataiti o te nga tamariki tamaine, kua mate a Judy mei te maki Hodgkin’s, tetai maki o te lymphoma. Mei kore rai i rauka ia matou ei pamiri i te akakoromaki i teia takakeanga. Noatu rai, i te tuatau i maki ei a Judy e i muri ake i tona mate anga, kua akapumaana mai a Iehova ia matou na roto i tana Tuatua, tona vaerua tapu, e te taokotaianga taeake. Kua rauka katoa ia matou te maroiroi mei te makatini Punanga Tiaki tei tae mai kia matou i muri tika mai i te tumatetenga. E atikara tetai i roto i te reira te tuatua ra no runga i te akonoanga i te au timataanga uaorai, kapiti mai te tumatetenga, e kua akaari mai e akapeea te au timataanga e tauturu maira ia tatou i te akatupu i taua au tu o te Atua mei te akakoromaki, te akarongo, e te tiratiratu. *​—Iakobo 1:2-4.

I muri ake i to Judy mateanga, kua piri vaitata roa atu matou ko taku nga tamariki tamaine. Inara te akakite atu nei au, e ngata tikai i te akatupuanga i te tuanga angaanga a te papa e te mama katoa. Inara, no te meitaki tikai i taku nga tamariki tamaine, kua mama mai taku angaanga.

Akaipoipo Akaouanga e Tetai Pamiri Akamaataia

Aere rai, kua akaipoipo akaou au. Ko au e taku vaine ou, ko Mary, e maata te au tu aiteite ia maua. Kua takake katoa tona tokorua akaipoipo ki te maki Hodgkin’s. E rua katoa ana tamariki tamaine​—ko Colleen raua ko Jennifer. E toru o Colleen mataiti i raro ua mai ia Petina. I teianei i reira e a tamariki tamaine i roto i to maua pamiri e 14, e 12, e 9, e te 7.

Kua manako mai maua ko Mary e i te akamataanga na maua rai e ako i ta maua uaorai tamariki anau, kia matau roa mai te tamariki a tetai i te ariki i te aratakianga a te metua angai. I roto i to maua uaorai pirianga ei tane e vaine, e rua a maua ko Mary nga ture maata. Te mea mua, auraka rava maua e pekapeka i mua i te tamariki, e te rua, tei rotai ki te kaveinga Pipiria i roto ia Ephesia 4:26, ka uriuri maua e rauka ua atu ei i te akatikatika i te manamanata​—noatu me ka pou te au ora!

Ma te poitirere kua meitaki ua te katoatoa i te tauianga ki teia turanga ei pamiri angai, inara kare rava te akamaaraanga o to maua tokorua tei takake ana i ngaro viviki ana. Ei akaraanga, te po Monite e “po aue” te reira no Mary. I muri ake i ta matou apii pamiri, e kua aere te au tamariki tamaine ki te moe, putuputu te taime kua pururu ua mai te aue a Mary.

Kua inangaro a Mary kia anau tamariki maua. Ma te tangi, kua topa te pepe. I te nui akaou mai anga a Mary, kua poitirereia maua. Kua akaari mai te neneianga o te pepe e kua nui aia, kare e tai, mari ra e a pepe! Kua poitirere tikaiia au. Teia au, e 47 oku mataiti e kare e roaia ka riro mai au ei papa e varu tamariki! Kua anauia te au pepe e toko a na te vaiia anga ia Peperuare 14, 1982, e 32  epetoma. Ko te papaanga teia o to ratou anau mai anga, ko Clint, e 1.6 kiro; Cindy, 1.9 kiro; Jeremy, 1.4 kiro; e Danette, 1.7 kiro. Kare oko tai maanga e akaraanga aiteite ana.

I muri ua mai i te anau anga, kua aere mai te taote o Mary e kua noo mai i te pae iaku.

“Te manamanata ra koe e akapeea i te akonoanga i taau tamariki?” i ui mai ei aia.

“Aue,” i karanga ai au, “Kare rava au i na roto mai ana i teia turanga.”

Kua poitirere tikaiia au i tana au tuatua i muri mai e kua akamaroiroi te reira iaku.

“Kare toou putuputuanga e akaruke ia koe,” i karanga ai aia. “Me maretie ua ana koe, ka kite mai koe e tauatini ua atu orei te orongaia maira kia koe!”

Mari ake te tu kite karape o teia taote vai meitaki tikai no te anau tamariki e tona pupu vai, i roto i nga mea marama ua e rua kua meitaki ua te au pepe i te aere ki te kainga.

Te Akaaoanga i te Utuutuanga i te A Pepe

Kia akono tamou i tetai tu akaaereanga mako, kua tata maua ko Mary i tetai papaanga e 24-ora. E aka tauturu tikai te au tamariki tamaine e a i te akonoanga i te au pepe. E kua tika atu rai te au tuatua a te taote​—tetai “maretie” ua anga e kua oro mai te putuputuanga i te tauturu ia matou. I mua atu ana, kua akanoonoo tetai taeake oku mei mua mai ko John MacArthur i te Au Kite e aronga kite karape i te akatu are kia akatoro i to matou are. I te anau mai anga te au pepe, kua aere mai tetai pupu tuaine i te tauturu i te akono i te au pepe. Pouroa teia au angaanga takinga meitaki e akaariangaia o te aroa Kerititiano te taangaangaia ra.​—1 Ioane 3:18.

I roto i tetai tu, teia au pepe toko a kua riro ratou ei “au pepe na te putuputuanga.” Tae mai ki teia tuatau, e akamanako ana ratou i te au taeake e te au tuaine takinga meitaki e manganui tei tauturu mai ia matou, ei pamiri no ratou. E ko Mary, kua riro mai aia ei vaine e ei mama meitaki tikai tei akono karapii kore iaia uaorai no tana tamariki. Kua akono tikai aia i tana i kite mai mei te Tuatua a te Atua e te akaaerenga. Kare atu e akoanga meitaki!​—Salamo 1:2, 3; Mataio 24:45.

Kua riro te au uipaanga Kerititiano e te angaanga tutuanga ei tuanga maata i roto i ta matou angaanga matauia i roto i te epetoma, noatu e e aka angaanga rai i te akono meitaki i tetai oraanga e a pepe i te akonoanga. Tetai akameitakianga i taua taime ra ko te au apii Pipiria ta maua i akono ei ki nga tokorua akaipoipo e rua, tei aere mai ki to maua kainga i te apii. Noatu e kua mama mai te apainga kia maua, tetai taime no te aka roiroi tikai ia Mary e vareaia ana aia i te moe i te taime o te apii, ma tetai pepe e moe ra i roto i tona rima. Aere rai, kua riro mai teia nga tokorua ei nga taeake e ei nga tuaine pae vaerua no maua.

Terenianga Pae Vaerua e te Tamariki ra Rai

I mua ake rai i akamata ei te au pepe i te aaere, kua apai matou ko Mary e te nga tamariki tamaine pakari ake ia ratou ki runga i te angaanga orometua. I to ratou kite mai anga i te aaere, kua apai tataki tai maua ko Mary e rua, e kare ratou i te apainga maata. Ko te tikaanga, e putuputu te taime kua riro ratou ei pukapukaanga ma te au tangata ngutuare oaoa. I tetai ra kua aravei au i tetai tangata tei karanga mai e me anauia koe i raro i tetai etu e i tetai ra tikai, kua akanoo takereia toou tu. Kare au i taumaro ana kiaia, inara kua pati atu au me ka rauka iaku i te oki mai i taua popongi rai. Kua akatika aia, e no reira kua oki mai au ma te au tamariki e a. Iaia e akara poitirere ua maira, kua akanoonoo au ia ratou i te akapapaanga o to ratou anau mai anga. E oti kua pukapuka ua ai maua, kare e no runga ua i to ratou au akaraanga tuke i te pae kopapa mari katoa i te au tuke maata i roto i to ratou au tu, tei akapueurikiriki i tana tamanakoanga. “Akara koe iaku e akakitekite  nei i teia tamanakoanga kia koe,” i karanga ai aia. “Tutu rai ka aere au ka kimikimi akaou, kare ainei?”

Ei tamariki rikiriki ra, e reka kore ana ratou me akoia ei pupu me kanga ana ratou, e no reira kua ako tataki tai maua ia ratou. Noatu rai, kua kite mai ratou e aiteite ua te au ture kia ratou pouroa. Me aro atu ana ratou i te au maroanga i te apii no te akava ngakau, kua vai ngaueue kore ua ratou ki te au kaveinga Pipiria e kua turuturu atu i tetai e tetai, e kua riro mai a Cindy ei vaa tuatua no ratou. Kua viviki te au tangata i te kite mai e e akakeuanga ririnui me e a tamariki!

Kua aro atu maua ko Mary i te au akaaoanga matauia i te tauturuanga i te tamariki kia vai tiratiratu kia Iehova i to ratou au mataiti mapu anga. Ka rauka ua ia maua i te karanga e naringa kare te tauturu a tetai putuputuanga takinga meitaki e te kai maata i te pae vaerua tei rauka ia matou mei te tuanga kiteaia o ta Iehova akaaerenga, kua ngata rava atu ta maua angaanga. Kua tauta maua i te akono tamou i tetai apii Pipiria ei pamiri e kia akono marie e kia meitaki ua te pukapukaanga, noatu e kare teia i mama ua ana i te rave. I na, kua puapingaia te tautaanga no te mea kua iki pouroa ta maua tamariki e varu i te tavini ia Iehova.

Autu Anga i te Pakari Anga

I te au mataiti i aereia, kua rekareka au i te au tuanga angaanga pae vaerua e manganui: ei tangata pakari i roto i te putuputuanga, ei akaaere no te oire maata, ei akaaere kotinga tauturu. Kua tavini katoa ana au ei mema no te Kumiti Aravei Anga i te Are Maki, ta ratou angaanga koia oki kia tauturu i te au taote kia taokotai atu ki te aronga maki Kite me riro mai te pamu toto ei maroanga. E 34 mataiti, kua rauka katoa iaku i te akameitakianga ei tangata retitaia i te akono i te au akaipoipoanga. Kua akono au mei tetai 350 akonoanga akaipoipo, kapiti mai i taua ra o taku tamariki tamaine e ono.

E akameitaki ua ana au ia Iehova no te tauturuanga tiratiratu tei rauka iaku, te mea mua mei ia Judy e i teianei mei ia Mary. (Maseli 31:10, 30) Ia ratou e turuturu maira iaku i roto i taku angaanga ei tangata pakari no te putuputuanga, kua akanoo katoa ratou i tetai akaraanga meitaki i roto i te angaanga orometua e kua tauturu i te tatanu i te au tu pae vaerua i roto i te tamariki.

I te 1996, kua kiteaia mai e kua tuia au i tetai maki manako o te roro te akatupu ra i toku rima kia ru e kua marikonga kore te noo anga e te aere anga. No reira, kare e rauka akaou iaku i te angaanga i te peni tata. Inara, te kite nei rai au i te rekareka maata i roto i ta Iehova tavinianga, noatu e kua marie mai au i taku angaanga. I te tua akamaroiroi, kua maata mai toku tangi aroa no te aronga pakarikari.

Iaku e akamanako ra i toku oraanga, te akameitaki nei au ia Iehova no te mea tei reira ua aia papa ua i te tauturu mai iaku e toku pamiri kia akono i to matou au akaaoanga e manganui ma te rekareka. (Isaia 41:10) Te akameitaki katoa nei maua ko Mary e ta maua tamariki e varu no tetai pamiri turuturu, meitaki tikai o te au taeake e te au tuaine pae vaerua. Kua akaari mai ratou katoatoa i to ratou aroa i roto i te au tu ravarai e kare e rauka ia matou i te tare.​—Ioane 13:34, 35.

[Au Tataanga Rikiriki i Raro]

[Tutu i te kapi 12]

Maua ko Mami, toku tuakana ko Garth, e toku tuaine ko Dawn, papa ua i te aere ki te uruoaanga i te 1941 i Sydney

[Tutu i te kapi 13]

Matou ko Judy e te pepe ko Kim iaku i roto i te angaanga kotinga i Queensland

[Tutu i te kapi 15]

I muri ake i te anau mai anga te au pepe toko a, kua aere mai ta maua au tamariki tamaine pakari ake e a e te putuputuanga i te tauturu ia matou