Tiaki ia Iehova ma te Manakonakoanga, e kia Maroiroi

“E tiaki ia Iehova ma te manakonakoanga; kia maroiroi e kia matutu toou ngakau. Ae, e tiaki ia Iehova ma te manakonakoanga.”​—SALAMO 27:14, NW.

1. Mei teaa te puapinga o te manakonakoanga, e akapeea te reira tuatua i te taangaangaia anga i roto i te au Tuatua Tapu?

MEI te marama kaka rai te manakonakoanga tika tikai. Te tauturu ra te reira ia tatou kia akara mamao atu i te au timata anga i teianei, e kia aro atu i te tuatau ki mua ma te mataku kore e te rekareka. Ko Iehova anake ua te ka oronga mai i tetai manakonakoanga papu kia tatou, tana e rave ra na roto i tana Tuatua akauruia. (2 Timoteo 3:16) Ko te tika, e maata te taime kua tataia te au tuatua “manakonako,” “manakonakoia,” e te “manakonakoanga” i roto i te Pipiria te taiku ra ki te inangaro e te tapapaanga papu i tetai apinga meitaki e ki tetai apinga no taua tapapaanga. * E teitei rava atu taua manakonakoanga i te mea anoano ua, kare e tumuanga me kore kare e rauka i te akatupu.

2. Eaa te tuanga maata ta te manakonakoanga i akatupu i roto i to Iesu oraanga?

² Me aro atu i te au timataanga e te au turanga ngata, kua akara mamao atu a Iesu ki mua e te tiaki ra aia ia Iehova ma te manakonakoanga. “No te rekareka tei tukuia ki mua iaia ra kua akakoromaki aia i te rakau tamamae anga, te akakoreanga i te akama, e kua noo ki raro i te tua katau o te terono o te Atua.” (Ebera 12:2, NW) No te mea te akara mou tikai ra aia ki runga i te manakonako anga no te akangateitei anga i to Iehova tu ngateitei e te akatapu anga i Tona ingoa, kare roa a Iesu i aere ke ana mei tona aerenga no te akarongo anga ki te Atua, noatu e eaa te ka tupu kiaia.

3. Eaa ta te manakonakoanga tuanga i roto i te oraanga o te au tavini o te Atua?

³ Te taiku maira te Ariki ko Davida i te pirianga i rotopu i te manakonakoanga e te mataku kore, i te karanga anga e: “E tiaki ia Iehova ma te manakonakoanga; kia maroiroi e kia matutu toou ngakau. Ae, e tiaki ia Iehova ma te manakonakoanga.” (Salamo 27:14, NW) Me inangaro tatou kia maroiroi to tatou ngakau, auraka rava tatou e tuku marama kore ua i to tatou manakonakoanga mari ra kia taka meitaki ua te reira i roto i te manako e i roto i te ngakau. Na te rave anga i te reira e tauturu ei ia tatou kia aru ia Iesu na te akaari anga i te mataku kore e te totomapu ia tatou e piri ra i roto i te angaanga tana i akaue mai kia rave tana au pipi. (Mataio  24:14; 28:19, 20) E tika rai, kua tukunaia te manakonakoanga ki te pae i te akarongo e te aroa ei tu puapinga maata tikai te akataka maira i te oraanga o te au tavini o te Atua.​—1 Korinetia 13:13.

‘Maata Ainei Toou Manakonakoanga’?

4. Eaa ta te au Kerititiano akatainuia e to ratou au oa te “mamoe ke atu” e akara tikai ra ki te tuatau ki mua?

⁴ E tuatau umere to te au tangata o te Atua i mua ia ratou. Te tapapa nei te au Kerititiano akatainuia ma te inangaro i te tavini ma Karaiti i te rangi, ko te manakonakoanga o te “mamoe ke atu” kia ‘akaora katoa i te tapeka o te mate, kia rauka te rangatira meitaki o te tamariki i te enua nei a te Atua.’ (Ioane 10:16; Roma 8:19-21; Philipi 3:20) Te kapiti maira taua “rangatira meitaki” i te akaoraia anga mai mei te ara e mei tona au turanga kino. E tika rai, e au mea meitaki anake ta Iehova​—Tei Oronga mai i “te au mea memeitaki i o maiia ra, e te au mea tika ravarai”​—ka tuku mai ki tona aronga tiratiratu.​—Iakobo 1:17; Isaia 25:8.

5. Akapeea e ‘maata ai to tatou manakonakoanga’?

⁵ Mei teaa ra te maata o te tuanga no te manakonakoanga Kerititiano i roto i to tatou oraanga? I roto ia Roma 15:13, ka tatau tatou: “Na te Atua tei oronga mai i te manakonakoanga e akaki ia kotou ma te rekareka e te au katoa no to kotou irinaki anga, kia maata to kotou manakonakoanga ma te mana o te vaerua tapu.” (NW) Ae, te akaaiteia ra te manakonakoanga kare ki tetai kanara i roto i te poiri, mari ra ki te au verovero o te ra i te popongi, i te akaki anga i to tetai oraanga ki te au, te mataora, te akakoroanga, e te mataku kore. E akara ana e e ‘maata to tatou manakonakoanga’ me irinaki tatou i te Tuatua a te Atua tei tataia e te rauka anga mai tona vaerua tapu. Te karanga ra a Roma 15:4: “I te au mea ravarai tei tataia i mua ana kua tataia ei ikuiku anga no tatou, na roto i to tatou tiaki marie anga e na roto i te akapumaana anga a te au Tuatua Tapu penei e manakonakoanga to tatou.” (NW) No reira e ui kia koe uaorai: ‘Te akaoraora ainei ra au i toku manakonakoanga na te riro anga ei tangata apii meitaki i te Pipiria, te tatau anga i te reira i te au ra ravarai? E pure putuputu ana ainei au i te vaerua o te Atua?’​—Luka 11:13.

6. Kia marama kaka ua rai to tatou manakonakoanga, eaa ta tatou ka matakite?

⁶ Kua akamaroiroiia a Iesu, to tatou Akaraanga, e te Tuatua a te Atua. Na te akamanako vaitata anga iaia, e kopae ei tatou ‘kia kore e akaroiroi e kia akaparuparu i to tatou au meta.’ (Ebera 12:3, NW) E mea tau i reira e me te aveave ra to tatou manakonakoanga tei orongaia mai e te Atua i roto i to ratou manako e to tatou ngakau me kore kua tamanamanataia mai tatou e tetai au mea​—penei ua ake ko te au apinga kopapa me kare te au akakoroanga o teianei ao—​ka tupu viviki mai kia tatou te tu roiroi i te pae vaerua, i te openga iora ka taki atu ki te ngere anga i te maroiroi e te mataku kore. Na roto i taua manako, penei ka kite katoa tatou e kua akakinoia to tatou akarongo mei te “akangaa pai” rai. (1 Timoteo 1:19) I tetai tua, te akaketaketa ra te manakonakoanga tika tikai i to tatou akarongo.

Manakonakoanga​—E Puapinga Tikai ki te Akarongo

7. Na roto i teea tu i puapinga ai te manakonakoanga ki te akarongo?

⁷ “Ko te akarongo e tatari anga papu ia i te au mea tei manakonakoia ra, te tumu akakite anga i te au mea tika tikai noatu e kare i akaraia,” i karanga ai te Pipiria. (Ebera 11:1, NW) No reira, kare te manakonakoanga ei mea kapiti uaia mai ki te akarongo; e tuanga puapinga tikai te reira no te akarongo. E akamanako ana ia Aberahama. Mei te akara anga a te tangata, kua topa te tuatau no raua ko tana vaine, ko Sara, i te anau tamariki i te taputou anga a Iehova kia raua i tetai tamaiti. (Genese 17:15-17) Akapeea a Aberahama te ariu anga? “Noatu e kare oki e manakonakoanga, inara kua akatumuia te manakonakoanga no tona akarongo, penei kia riro mai aia ei metua tane no te pa enua e manganui.” (Roma 4:18, NW) Ae, no to Aberahama manakonakoanga tei orongaia mai e te Atua i rauka ai iaia te akarongo e ka rauka iaia tetai uanga akatumu tinamouia. Tei tupu mai i reira, kua marama kaka e kua akaketaketa tona akarongo i tona manakonakoanga. Eaa ra, e tu mataku kore katoa to Aberahama raua ko Sara kia akaruke i to raua kainga e to raua kopu tangata e kia noo no te katoaanga o to raua oraanga i roto i te au puakapa i tetai enua ke!

8. Akapeea te tamou marie no te akarongo mou i te akaketaketa anga i te manakonakoanga?

⁸ Kua akaketaketa a Aberahama i tona manakonakoanga na te akorongo tikai anga kia Iehova, noatu e rauka ngata i te rave i te reira. (Genese 22:2, 12) Mei te reira katoa, na te akarongo anga e te tamou marie anga i roto i te angaanga a Iehova, papu ia tatou ta tatou tutaki anga. “Na te tamou  marie anga,” i na Paulo ei, i akatupu mai ei i “te tu marekaia,” ko ta te reira ka akatupu mai ko te manakonakoanga, “e kare te manakonakoanga e taki atu ki te mareka kore anga.” (Roma 5:4, 5, NW) No reira a Paulo i tata katoa ai e: “Te anoano nei matou ia kotou tataki tai kia akaari i te tu aiteite o te manako angaanga kia rauka te akapapu anga ki katoa o te manakonakoanga e tae ua atu ki te openga.” (Ebera 6:11, NW) Ka rauka i taua akara anga papu, tei akatumuia ki runga i tetai pirianga vaitata kia Iehova, i te tauturu ia tatou kia aro atu i tetai au turanga ngata ma te mataku kore e ma te rekareka katoa.

“E Rekareka i te Manakonakoanga”

9. Eaa ta tatou ka rave putuputu i te tauturu ia tatou kia “rekareka i te manakonakoanga”?

⁹ E teitei rava atu to tatou manakonakoanga tei orongaia mai e te Atua i tetai ua atu au apinga ta teianei ao ka oronga mai. Te karanga ra a Salamo 37:34 e: “E tiaki ia Iehova ma te manakonakoanga e e akono i tona arataa, e nana e akateitei ia koe kia riro ia koe te enua. Me tipu keia te aronga kino ra, ka kite koe i te reira.” (NW) Ae, e tumu anga meitaki no tatou kia “rekareka i te manakonakoanga.” (Roma 12:12, NW) Inara, e rauka ai i te rave i te reira, kia manakonako putuputu tatou no runga i te manakonakoanga. E akamanako putuputu ana ainei koe no runga i toou manakonakoanga tei orongaia mai e te Atua? Te kite ra ainei koe ia koe uaorai i roto i te Parataito, i roto i te tu kopapa oraora, kare e taitaia, te koropiniia ra e te au tangata taau e akaperepere ra, e te rave ra i te angaanga puapinga maata tikai? Te akamanako oonu ra ainei koe no runga i te au tutu o te Parataito tei akaariia mai i roto i ta tatou au puka? Penei ka akaaiteia taua akamanako anga putuputu ki te tama anga i tetai maramarama ka kite ua atu i te tu manea i vao mai. Me kare tatou e tama i te io, kare e roaia kare tatou e kite meitaki atu i te tu manea i vao mai. Penei na tetai au apinga ke e akaaere ke i to tatou manako. Auraka rava tatou e tuku i te reira kia tupu mai!

10. I to tatou akara anga ki te tutaki eaa ra ka akaata meitakiia mai ei ki runga i to tatou pirianga kia Iehova?

¹⁰ E tikai, te tumu maata i tavini ei tatou ia Iehova no to tatou inangaro iaia. (Mareko 12:30) Inara, kia akara tapapa atu tatou ki te tutaki anga. Ko te tika, te inangaro maira a Iehova kia rave tatou i te reira! Te karanga ra a Ebera 11:6 e: “Kare ra e akarongo ra kare rava aia e mareka: ko te akamori i te Atua ra, kia akarongo aia e, e Atua e tikaʼi, e koia tei tutaki mai i te aronga i kimi tikai iaia.” Eaa ra a Iehova i inangaro ei ia tatou kia akara kiaia ei Tutaki? No te mea me rave tatou i te reira, te akaari ra tatou e te kite meitaki ra tatou i to tatou Metua i te rangi. E meitaki aia e te aroa maira aia i tana tamariki. E akamanako ana i to tatou akara anga mataora kore e te manako kore me kare oki o tatou “tuatau ki mua e tetai manakonakoanga.”​—Ieremia 29:11, NW.

11. Akapeea tona manakonakoanga tei orongaia mai e te Atua i te tauturu anga ia Mose kia rave i te au ikianga tau?

¹¹ Ko tetai akaraanga meitaki roa atu o tetai tangata tei akara mou ki runga i tona manakonakoanga tei orongaia mai e te Atua ra, ko Mose. Ko “te tamaiti a te tamaine a Pharao ra,” tei ia Mose te mana, te tu teitei, e te apinganui o Aiphiti ei taangaanga  anga nana. Ka aruaru ainei aia i teia au mea, me kore ka tavini ainei aia ia Iehova? Kua iki maroiroi a Mose i te mea openga. No teaa ra? No te mea “te akono marie ra oki aia i te tutaki ra ei oko.” (Ebera 11:24-26) Ae, kare a Mose i akaari mai i te tu manako kore no runga i te manakonakoanga ta Iehova i tuku mai ki mua iaia.

12. Eaa te manakonakoanga Kerititiano i aite ei mei te pare rai?

¹² Kua akaaite te apotetoro ko Paulo i te manakonakoanga ki tetai pare. Te paruru ra to tatou pare akatutu i to tatou au manako, te tauturu anga ia tatou kia rave i te au ikianga pakari, te akanoo tau anga i te au mea puapinga maata, e te akono tamou anga i te tiratiratu. (1 Tesalonia 5:8) Te aao ra ainei koe i toou pare akatutuia mai i te au taime ravarai? Me koia ia, mei ia Mose raua ko Paulo, e tuku koe i toou manakonakoanga, ‘eiaa ki te apinga maata mou kore, ki te Atua ora ra, tei oronga mai i te au mea katoa nei ei rave anga na tatou.’ E tika, te umuumuia ra te mataku kore i te patoi atu i te au peu tei matauia na te kopae anga i te au aruaru anga noinoi, inara e puapinga maata tikai te tauta anga! Ko te tika, eaa ka ariki ua ai i tetai apinga meangiti atu i to “te ora mutu kore,” te tapapa ra te aronga e manakonakoanga to ratou e te inangaro ra ia Iehova?​—1 Timoteo 6:17, 19.

“Kare Rava Au e Akaruke Atu ia Koe”

13. Eaa te akapapu anga ta Iehova i oronga ki tona au tavini tiratiratu?

¹³ Ko te au tangata tei tuku i to ratou manakonakoanga ki roto i te akatereanga o te au mea nei e mea tau kia akamanako matakite ia apopo e tupu maata ua atura te kino “no te mate” ki teianei ao. (Mataio 24:8) Inara ko te aronga te manakonako ra ia Iehova kare e mataku ana. “Ka noo marie ua [ratou] ma te ora; e akaea ua aia ma te mataku kore i te kino.” (Maseli 1:33) No te mea kare to ratou manakonakoanga i roto i teianei akatereanga, kua akarongo ratou ma te rekareka ki ta Paulo ako anga e: “Ei noo anga noinoi kore i te apinga to kotou; kia mareka i ta kotou i rauka ra: ko te Atua oki tei tuatua mai e, ‘Kare rava au e akaruke atu ia koe, kare oki au e taka ke ia koe, kare, kare rava atu.’”​—Ebera 13:5.

14. Eaa ra te au Kerititiano kare e inangaroia kia apiapi tikai no runga i to ratou au anoano i te pae kopapa?

¹⁴ Te akaari maira teia taputou e ‘kare rava, e kare oki, kare rava atu’ te Atua e akaruke ia tatou no tona inangaro ia tatou. Kua akapapu katoa mai a Iesu kia tatou i to te Atua manako aroa, te karanga anga e: “E na mua ra kotou i te kimi i te basileia o te Atua, e te tuatua-tika nana ra; e kapiti katoaia mai taua au mea katoa ra [te au apinga kopapa o te oraanga] ia kotou. E teianei, auraka e apiapi i to apopo ra; na apopo e apiapi i tana uaorai.” (Mataio 6:33, 34) Kua kite a Iehova e e akaaoanga no tatou kia maroiroi no tona Patireia e i taua taime rai te ariki anga i te apainga katoa no te akono anga i to tatou au anoano i te pae kopapa. No reira kia tuku tatou i te irinaki anga tikai i roto i tona tu kite e te anoano i te akono anga i ta tatou e anoano ra.​—Mataio 6:25-32; 11:28-30.

15. Akapeea te au Kerititiano i te akono anga i te ‘mata meitaki’?

¹⁵ E akaari tatou i to tatou irinaki anga ki runga ia Iehova me akono tatou i te ‘mata meitaki.’ (Mataio 6:22, 23) Ko tetai mata meitaki koia oki e akakoroanga ngakau tae e e akakoroanga tau, e kare i te akakoroanga noinoi e te karapii. Inara, ko tetai mata meitaki, kare te aite anga e kia noo ua i roto i te turanga putaua me kare te akangaropoina anga i te akono anga i ta tatou au apainga Kerititiano. Kareka ra, te aite anga o te reira te akaari anga i te “ngakau akono meitaki” i te tuku anga tatou i te angaanga a Iehova ko te mea momua.​—2 Timoteo 1:7.

16. Eaa ra te akarongo e te mataku kore i anoanoia ai kia akono i te mata meitaki?

¹⁶ Te akono anga i tetai mata meitaki te umuumuia ra te akarongo e te mataku kore. Ei akaraanga, me ka maro mai tetai pu e kia angaanga putuputu tatou i te tuatau kua akapapaia te au uipaanga Kerititiano, ka aru maroiroi ainei koe ki taau au mea puapinga i te pae vaerua? Me te ekoko ra tetai tangata e ka akatupu a Iehova i Tana taputou no te akono anga i Tona au tavini, ka akamaata mai a Satani i tana taomi anga e penei ka akamutu taua tangata ra i te aere putuputu ki te au uipaanga katoatoa. Ae, me kare o tatou akarongo ra te akatika ra tatou ia Satani kia akatere ia tatou e nana, kare na Iehova, e akanoo ana i ta tatou au mea puapinga. E tumatetenga tikai te reira!​—2 Korinetia 13:5.

“E Tiaki ia Iehova ma te Manakonakoanga”

17. I teianei akapeea te aronga te irinaki ra kia Iehova i te akameitaki angaia?

¹⁷ Te akaari putuputu maira te au Tuatua Tapu e ko te aronga e manakonakoanga to ratou e te  irinaki ra ia Iehova kare rava e puapinga koreia. (Maseli 3:5, 6; Ieremia 17:7) E tika rai, penei i tetai au taime kia mareka ua ratou i te au mea meangiti ua i te pae kopapa, inara te manako ra ratou i teia ei atinga meangiti ua me akaaiteia atu ki te au akameitakianga te vai ra no ratou. Te akaari ra ratou e te “manakonako ra [ratou] ia Iehova” e te irinaki anga e ka oronga mai aia ki tona aronga tiratiratu i te au anoano tuatua tika pouroa o to ratou ngakau. (Salamo 37:4, 34, NW) No reira, te mataora tikai nei ratou i teianei. “Te tapapaanga a te aronga tuatua tika ra e rekareka anga ia, inara te manakonakoanga tikai o te aronga kino ra ka takoreia.”​—Maseli 10:28, NW.

18, 19. (a) Eaa te akapapu anga aroa ta Iehova i oronga mai kia tatou? (e) Akapeea tatou i te tuku anga ia Iehova ki to tatou “rima katau”?

¹⁸ Me te aaere ra tetai manga tamaiti raua ko tona metua tane na te mou anga i te rima, te manako tinamou ra aia. Mei tera katoa rai tatou ia tatou e aaere ra ma to tatou Metua i te rangi. “Auraka e mataku,” i na Iehova ei ki to Iseraela, “te vaitata katoao au ia koe . . . koia ïa, e tauturu au ia koe; . . . Ko au oki to Atua ra, ko Iehova, ko tei akamaroiroi i to rima katau ra; ko tei tuatua atua ia koe e, Auraka e mataku, naku koe e tauturu.”​—Isaia 41:10, 13.

¹⁹ Mei teaa ra te tutu pumaana ma te aroa ta te reira e akakite maira​—i te mou anga a Iehova i to tetai rima! “Kua tuku au ia Iehova ei mua ua rai iaku,” i tata mai ei a Davida. “Tei toku rima katau aia kare au e ngaueue.” (Salamo 16:8) Akapeea tatou i te tuku anga ia Iehova ki to tatou “rima katau”? E rua nga tuanga ka rave tatou i te reira. Te mea mua, e tuku tatou i tana Tuatua kia arataki ia tatou i roto i te au tu ravarai o te oraanga; e te rua, e akara tatou ki te tutaki kaka ta Iehova i akanoo mai i mua ia tatou. Kua imene te tata taramo ko Asapha e: “Ei ia koe rai au; na to rima katau i mou mai iaku. Ka riro rai koe i te arataki iaku i taau ra tuatua, e te openga iora ka apai ei koe iaku ki te ao.” (Salamo 73:23, 24) Ma taua akapapu anga, ka rauka ia tatou i te aro atu tikai i te tuatau ki mua irinaki anga.

“Te Vaitata Maira Oki to Kotou Ora”

20, 21. Eaa te tuatau ki mua ta te aronga e manakonakoanga to ratou ia Iehova e tapapa ra?

²⁰ I te au ra tataki tai tei topa ki muri, e mea rapurapu maata no tatou kia tuku tatou ia Iehova ki to tatou rima katau. Kare e roa atu, mei te akamata anga mai te takoreia anga te akonoanga pikikaa, ka kite ei to Satani ao i tetai tumatetenga kare rava i tupu ana mei muatangana mai. (Mataio 24:21) Ka koropiniia te au tangata akarongo kore e te mataku. Inara, i taua tuatau oripu ua, ka mataora te au tavini maroiroi o Iehova i roto i to ratou manakonakoanga! “E kua tupu anake teianei au mea,” i karanga ai a Iesu, “e nānā to kotou mata ki runga, e akateitei to kotou mimiti; te vaitata maira oki to kotou ora.”​—Luka 21:28.

²¹ No reira kia rekareka tatou i roto i to tatou manakonakoanga tei orongaia mai e te Atua e auraka e akavareia me kore e timataia e te au apinga akaapiapi anga kikite a Satani. I taua taime rai, kia angaanga pakari tatou i te tatanu i te akarongo, te aroa, e te mataku i te Atua. Na te rave anga i te reira, i raro ake i te au turanga ravarai tei ia tatou te mataku kore kia akarongo atu kia Iehova e kia patoi atu i te Tiaporo. (Iakobo 4:7, 8) Ae, “kia matutu, e nana e akamaroiroi mai i to kotou ngakau, ko kotou ravarai, e te aronga e [“tiaki,” NW] atu ia Iehova ra.”​—Salamo 31:24.

[Tataanga Rikiriki i Raro]

Ka Rauka Ainei ia Koe te Pau?

• Na roto i teea tu i tauturuia ai to Iesu manakonakoanga i tona mataku kore?

• Akapeea te akarongo e te manakonakoanga i te piri vaitata anga ki tetai e tetai?

• Akapeea te manakonakoanga e te akarongo i te oronga anga i te mataku kore ki tetai Kerititiano kia akanoo i te au mea puapinga tau i roto i te oraanga?

• Eaa ra te aronga tei “tiaki ia Iehova ma te manakonakoanga” ka akara ai ki te tuatau ki mua ma te irinaki anga?

[Au Uianga Apii]

[Tutu i te kapi 28]

Noatu e mapu ou me kore e ruaine, te kite ra ainei koe ia koe uaorai i roto i te Parataito?