Akapapu i Toou Akarongo na te Tu o Toou Oraanga

“Te akarongo, kare e angaanga, e mea mate ïa, i te mea te vai okotai ua ra.”​—IAKOBO 2:17.

1. Eaa ra te au Kerititiano mua i oronga ai i te akamanakoanga ki te akarongo e te au angaanga katoa?

I TE maataanga, kua akapapu te au Kerititiano mua i to ratou akarongo na roto i te tu e noo tikai ra ratou. Kua raurau te pipi ko Iakobo i te au Kerititiano katoatoa: “Ei aronga rave oki kotou i te tuatua nei, auraka ei aronga akarongo ua.” Kua karanga katoa aia: “Mei te kopapa oki kia kore te vaerua, e mea mate ïa, koia katoa te akarongo kare e angaanga ra, e mea mate katoa ïa.” (Iakobo 1:22; 2:26) Mei tetai 35 mataiti i muri ake i tona tataanga i te reira, e manganui te au Kerititiano tei akapapu tamou i to ratou akarongo ma te au angaanga tau. Inara, ma te tangi, kare tetai pae i akapera ana. Kua akameitaki a Iesu i te putuputuanga i Semurina, i na, ki te manganui i roto i te putuputuanga o Saradi, kua karanga aia: “Kua kite au i taau angaanga, e e ingoa toou e te ora ra koe, kua mate ra.”​—Apokalupo 2:8-11; 3:1.

2. Eaa ta te au Kerititiano ka ui kia ratou uaorai no runga i to ratou akarongo?

² E no reira, kua akamaroiroi a Iesu i te aronga i Saradi​—e pera katoa ki te katoatoa te ka tatau i tana au tuatua a muri ake​—kia akapapu i to ratou aroa mua no te tuatua mou Kerititiano e kia vai araara ua i te pae vaerua. (Apokalupo 3:2, 3) Ka rauka ia tatou tataki tai i te ui kia tatou uaorai: ‘Akapeea taku au angaanga? Te akaari meitaki ra ainei taku au angaanga e te rave nei au ma toku maroiroi katoa i te akapapu i toku akarongo na roto i taku e rave pouroa nei, noatu i roto i te au ngai kare e piri tika atu ana ki te angaanga tutu aere me kore ki te au uipaanga putuputuanga?’ (Luka 16:10) E manganui te au tuanga o te oraanga te ka rauka i te akamanakoia, inara ka akamanako tatou e tai ua tuanga: te au akaputuputuanga tamataora, kapitiia atu ki tei aru putuputu mai i te au akaipoipoanga Kerititiano.

Au Akaputuputuanga Tamataora Rikiriki

3. Eaa te manako o te Pipiria no runga i te piri atu anga ki roto i te au akaputuputuanga?

³ Te maata anga ia tatou e rekareka ana e kua patiia atu ki tetai akaputuputuanga o te au Kerititiano mataora. E ‘Atua mataora’ a Iehova e te inangaro ra aia i tona au tavini kia mataora katoa. (1 Timoteo 1:11) Kua maani aia ia Solomona kia kapiti mai i teia tikaanga ki roto i te Pipiria: “Kua  akameitaki atura au i te rekareka; kare oki o te tangata nei meitaki i raro ake i te rā nei, mari ra kia kai, e kia inu, ka rekarekaʼi: ko tei vaooia mai ïa nana i tana ra rave anga angaanga, koi vai ake ona puke rā i te ora anga nei.” (Koheleta 3:1, 4, 13; 8:15) Penei e tupu ana taua rekarekaanga ra i tetai kaikaianga ei pamiri me kore i tetai atu akaputuputuanga tamataora meangiti ua o te aronga akamori mou.​—Iobu 1:4, 5, 18; Luka 10:38-42; 14:12-14.

4. Eaa te apinga ta tetai tangata e akanoo ra i tetai akaputuputuanga e inangaro ra i te kite?

⁴ Me te akanoo ra koe i tetai akaputuputuanga e tei ia koe te apainga no te reira, kia akamanako meitaki koe e eaa te paraniia ra, noatu me e iti ua taau aronga irinaki ka pati atu no tetai kaikaianga e tetai pukapukaanga mataora. (Roma 12:13) Ka inangaro koe i te akapapu e kia ‘raveia te au mea ravarai ma te tika e te manea,’ aratakiia e “te pakari no runga maira.” (1 Korinetia 14:40; Iakobo 3:17) Kua tata te apotetoro ko Paulo: “Te kai ra e te inu ra oki, e te au mea ravarai ta kotou e rave na, e rave anake ïa ma te akakakā i te Atua. Auraka kotou kia riro ei turorianga.” (1 Korinetia 10:31, 32) Eaa tetai au tuanga te inangaroia ra kia akamanako tikaiia? I te akamanakoanga i taua au apinga i mua atu ka tauturu i te akapapu e ko taau e taau au manuiri ka rave te akaari maira e te taangaanga ra kotou i ta kotou e irinaki ra.​—Roma 12:2.

Eaa te Tu o te Akaputuputuanga?

5. Eaa ra te tangata akaaere ka akamanako meitaki me ka akatika aia kia inuia te kava e kia akatangiia te imene?

⁵ E manganui te au akaaere e aro atu ana i te maroanga me ka akatikaia kia inuia te kava. Kare te reira e inangaroia ei akaoraora i tetai akaputuputuanga. E akamaara ana e kua oronga a Iesu i te kai no tetai aka pupu tangata tei aere mai kiaia​—kua akamaata aia i te varaoa e te ika. Kare te tataanga e akakite mai ana e kua oronga temeio mai aia i te uaina, noatu e kua kite tatou e ka rauka iaia i te rave i te reira. (Mataio 14:14-21) Me ka akatika koe kia inuia te kava i tetai akaputuputuanga, kia tau ua no runga i te maata te ka orongaia, e e akapapu e e au apinga ke atu tetai te ka reka i te inu no te aronga te inangaro ra i te reira. (1 Timoteo 3:2, 3, 8; 5:23; 1 Petero 4:3) Auraka rava e maro i tetai tangata kia inu i tetai apinga te ka kakati mei “to te ovi” ra. (Maseli 23:29-32) Akapeea te akatangianga imene me kore te imeneanga? Me ka kapitiia mai te akatangianga imene i roto i taau akaputuputuanga, papu ei ka iki meitaki koe i te au imene, ma te akamanako i te tangi anga e te au tuatua katoa o te imene. (Kolosa 3:8; Iakobo 1:21) E manganui te au Kerititiano tei kite mai e te akatangi anga i te Kingdom Melodies me kore te imene kapiti katoa anga i taua au imene te akamaroiroi ra i tetai turanga mataora. (Ephesia 5:19, 20) E, pera katoa, e akara putuputu i te akatangianga kia kore te imene e tapupu i tetai pukapukaanga rekareka me kore e tamanamanata atu i tetai o te au tangata tupu.​—Mataio 7:12.

6. Akapeea tetai akaaere i te akaari e e akarongo ora tona me tae mai ki te pukapukaanga me kore ki tetai au angaanga ke atu?

⁶ I tetai akaputuputuanga tamataora, penei ka rauka i te au Kerititiano i te pukapuka no runga i te au tumu tuatua tukeke, tatau i tetai apinga ki te katoatoa, me kore akakite atu i te au tupuanga umere. Me aere ke ua te pukapukaanga, ka rauka i te akaaere i te arataki tau akaou i te reira. Kia matakite  aia e auraka e e tai ua tangata e tuatua ra i roto i te pukapukaanga. Me te kite ra aia e te tupu maira te reira, ka tauru marie mai aia iaia ki roto e ka kapiti mai aia i tetai pae ki roto i te pukapukaanga, penei na te patianga i te au mapu kia akakite mai i to ratou au manako me kore na te tuatuaanga i tetai tumu tuatua te akakeu ra i te au paupauanga tukeke. Ka rekareka i reira te au mapu e te pakari katoa i teia tuanga o te akaputuputuanga. Me, ei tangata akaaere, ka arataki koe i te au apinga ma te pakari e te tau meitaki, ka ‘kitea meitakiia oki toou maru’ ki te aronga i reira. (Philipi 4:5) Ka kite mai ratou e e akarongo ora toou, tetai akarongo te akakeu ra i te au tuanga katoatoa o toou oraanga.

Au Akaipoipoanga e te Au Umukai Akaipoipo

7. Eaa ra te au paranianga no te au akaipoipoanga e te au akaputuputuanga te piri atura ki te reira ka tau ei kia akamanakoia?

⁷ Tetai atianga takake no te rekarekaanga koia oki ko te akaipoipoanga Kerititiano. Kua piri puareinga ua te au tavini taito o te Atua, kapiti mai a Iesu e tana au pipi, i roto i taua au tupuanga mataora, kapiti mai te kaikaianga tei piri atu ki te reira. (Genese 29:21, 22; Ioane 2:1, 2) Inara, i teia au tuatau nei, te akaari meitaki maira te au tupuanga e te paranianga i te au angaanga tamataora te piri atura ki te au akaipoipoanga, te umuumuia ra te tautaanga pakari me ka akaata te reira i te akavaanga meitaki e te tu Kerititiano tau. I na, e tuanga noa ua teia o te oraanga te oronga ra ki tetai Kerititiano te atianga kia akaari i tona akarongo.

8, 9. Akapeea te au akonoanga raveia i te au akaipoipoanga e manganui i te akataka meitaki anga mai i ta tatou e tatau ra ia 1 Ioane 2:16, 17?

⁸ Te au tangata e manganui tei kite kore e kare katoa e manako ana no runga i te au kaveinga akono i te Atua, e akamanako ana i tetai akaipoipoanga ei au atianga kia topa roa ki tetai tua me kore penei ei atianga e akakoromakiia ana te reira tu kino pakari. I roto i tetai makatini Europa, kua karanga tetai vaine akaipoipo ou no runga i tona akaipoipoanga “ariki”: ‘Na runga matou i tetai pereoo e a oroenua aru mai tetai au pereoo rikiriki kikaia e tetai au oroenua e 12 e tetai pereoo maatamaata ma tetai pupu tangata e akatangi imene ra. E oti e reka tikai ta matou kaikai e te mataora tikai te akatangi imene; e taurekareka tikai te reira. Mei taku rai i inangaro, ko au te ariki vaine o tera ra.’

⁹ Mei te mea e e tuke ana te au akonoanga mei tetai enua ki tetai enua, te akataka meitaki maira taua au manako i ta te apotetoro ko Ioane i tata ei: “Ko te au mea ravarai oki o teianei ao, ko te anoano tika kore o te kopapa nei, e te anoano tika kore o te mata nei, e te akatietie o te ora anga nei, kare ïa i to ko mai i te Metua ra, no teianei ao anake ïa.” Ka rauka ainei ia koe i te akamanako i tetai tokorua Kerititiano pakari te inangaro ra i tetai akaipoipoanga “ariki” ma tetai kaikaianga mekameka? Mari ra, kia akamanako raua i roto i ta raua akaraanga e “ko tei akono ra i to te Atua ra anoano, e tika ïa i te ora anga e tuatau ua atu.”​—1 Ioane 2:16, 17.

10. (a) Kia tau meitaki tetai akaipoipoanga, eaa i umuumuia ai te paranianga? (e) Akapeea te au ikianga i te akonoanga ia no runga i te aronga tei patiia atu?

¹⁰ Ka inangaro te au tokorua Kerititiano kia akamanako meitaki e te tau katoa, e ka rauka i te Pipiria te tauturu ia ratou. Noatu e e atianga puapinga te ra akaipoipoanga, kua kite raua e ko te akamataanga ua te reira o tetai oraanga akaipoipo o nga Kerititiano e manakonakoanga no te oraanga mutu kore to mua ia raua. Kare raua e umuumuia kia akono i tetai aka oroa akaipoipoanga. Me iki raua kia raveia tetai akaputuputuanga, ka inangaro raua i te tare i te moni ka pou no te akaputuputuanga e kia akamanako i te tu o te reira. (Luka 14:28) I roto i to raua oraanga Kerititiano ei tokorua, ko te tane akaipoipo te upoko tei tau ki te Tuatua Tapu. (1 Korinetia 11:3; Ephesia 5:22, 23) E no reira tei runga i te tane akaipoipo te apainga maata no te umukai akaipoipo. E tika, ka uriuri takinga meitaki aia ki tana vaine ka akaipoipo no runga i te au apinga e koai ta raua ka inangaro i te pati atu me kore ka rauka i te aere mai ki te oroa akaipoipoanga. Kare paa e rauka me kore e tau kia pati i to raua au taeake e to raua au kopu tangata katoatoa; e no reira, penei ka inangaroia kia akonoia te au ikianga ma te tu tau. Ka irinaki te tokorua e me kare e rauka ia raua i te pati atu i tetai au taeake Kerititiano, ka marama ua ratou e kare e riri mai.​—Koheleta 7:9.

“Tutara o te Oroa”

11. Eaa te tuanga angaanga ta tetai “tutara o te oroa” e akono ra i tetai akaipoipoanga?

¹¹ Me iki tetai tokorua i te akaaere i tetai akaputuputuanga i te akamaara i tetai akaipoipoanga,  akapeea raua i te akapapu anga e ka vai ngateitei ua te reira atianga? No te au mataiti e manganui, kua kite mai te Au Kite o Iehova i te pakari i te kapiti mai anga tetai tuanga taikuia te piri atura ki te akaipoipoanga ta Iesu i aere atu i Kana. E “tutara o te oroa,” tetai e e taeake irinaki mako tikai. (Ioane 2:9, 10) Mei te reira katoa, ka iki tetai tane akaipoipo pakari i tetai taeake Kerititiano pakari i te pae vaerua no teia tuanga angaanga puapinga maata. I te kite mai anga i te au inangaro e te au apinga ta te tane akaipoipo e reka ana, ka rauka te tutara o te oroa i te akono i teia au angaanga i mua ake e i te tuatau o te akaputuputuanga.

12. Eaa ta te tane akaipoipo ka akamanako no runga i te inuanga kava?

¹² Kia tau ki tei uriuriia i roto i te parakarapa 5, e iki ana tetai tokorua kia akapaeia te inu kava mei te oroa akaipoipoanga e ua ake ka takino te akono tau kore o te reira i te mataora e te puapinga o te atianga. (Roma 13:13; 1 Korinetia 5:11) I na, me ka kapiti mai raua i te inu anga i te kava, kia akapapu te tane akaipoipo kia orongaia me kore kia vai ua te reira ma te tu tau. E uaina tetai i te akaipoipoanga ta Iesu i aere atu i Kana, e kua oronga aia i te uaina meitaki tikai. Ma te umere, kua karanga te tutara o te oroa: “Ko te wina meitaki ta te tangata katoa e tuku mai i mua; e kia inu maata te tangata, e muringao te mea kino ake: kua vaio ra koe i te wina meitaki, e i teianei i apai na mai ei.” (Ioane 2:10) E mea papu e kare a Iesu i akamaroiroi ana i te tu kona kava, no te mea e mea rikarika te reira kiaia. (Luka 12:45, 46) I te akakiteanga i tona poitirere i te tu o te uaina, kua akataka meitaki mai te tutara e kua kite ana aia i tetai au taime e kua kona tetai au manuiri tei aere mai ki te akaipoipo i te kava. (Angaanga 2:15; 1 Tesalonia 5:7) No reira, kia akapapu te tane akaipoipo e te Kerititiano irinaki pu tikai tana i akanoo ei tutara no te oroa e kia aru te katoatoa tei tae mai i teia akauenga taka meitaki: “E auraka e kona i te wina, e tupu ei te kanga maata.”​—Ephesia 5:18; Maseli 20:1; Hosea 4:11.

13. Eaa ta tetai tokorua ka akamanako me akanoo raua kia akatangiia te imene i tetai oroa akaipoipoanga, e no teaa ra?

¹³ Mei tei tika o tetai atu au akaputuputuanga, me ka raveia te akatangi anga imene, kia akamanako katoaia te akatangianga kia mama ua i te au tangata i te pukapuka. Kua karanga tetai tangata pakari Kerititiano: “I te roa anga o te po, me oraora mai ana te pukapuka me kore kua akamata te ura, tetai taime e tamaataia ana te akatangianga o te imene. Tei akamataia ei akatangi anga imene maru ua penei ka akatangi maataia e ka tapu i tetai pukapukaanga. Te oronga maira tetai umukai akaipoipo i tetai atianga no te akataeakeanga mataora. E tangi tikai me ka kanga te akatangi maata o te imene i teia atianga!” I konei, katoa, kia mako tikai te tangata akaipoipo e te tutara o te oroa i te akara, e auraka e tuku e na te aronga akatangi imene, noatu me kua tutakiia ratou kia aere mai me kare, i te akatere i te tu e te akatangianga o te imene. Kua tata a Paulo: “E te au mea katoa ta kotou e rave ra i te angaanga e te tuatua, ka rave anake ïa ma te ingoa o te Atu ra o Iesu.” (Kolosa 3:17) Me oki ana te au manuiri ki te kainga i muri ake i tetai oroa akaipoipoanga (me kore, e umukai), ka maara ainei ia ratou te imene e te akaata ra i tetai tokorua te tauta ra i te rave i te au apinga ravarai ma te ingoa o Iesu? Kia akapera te akamanakoanga.

14. Eaa ta te au Kerititiano ka akamaara meitaki no runga i tetai akaipoipoanga?

¹⁴ Ae, e akamaara meitakiia ana tetai akaipoipoanga akanoo meitakiia. Ko Adam raua ko Edyta, e 30 mataiti e tere atu i to raua akaipoipoanga, kua tuatua mai no runga i tetai akaipoipoanga: “Kite meitaki ua atu koe i te turanga Kerititiano. Te imeneia ra te au imene te akapaapaa ra ia Iehova e te vai katoa ra tetai atu tamataoraanga meitaki tikai. Kare te ura anga e te akatangi imene i te mea puapinga maata. E rekareka tikai te reira e te akamaroiroianga, e kua rotai te au apinga katoatoa ki te au kaveinga Pipiria.” Te taka meitaki ra, e e maata te au apinga ta te vaine e ta te tane akaipoipo ka rave i te akaari anga e te akapapu ra raua i to raua akarongo na roto i ta raua au angaanga.

Au Apinga Aroa Akaipoipo

15. Eaa te ako Pipiria ka tau kia akonoia no runga i te au apinga aroa no te akaipoipo?

¹⁵ I roto i te au enua e manganui e mea matauia  no te au taeake e te au kopu tangata kia oronga i tetai apinga aroa ki te aronga e akaipoipo ra. Me iki koe i te rave i te reira, eaa taau ka akamanako atu? I na, e akamaara ana i te tuatua a te apotetoro ko Ioane no runga i “te akatietie o te ora anga nei.” Kua akapiri atu aia i taua tu akatietie anga ra, kare ki te au Kerititiano tei akaari i to ratou akarongo na roto i te au angaanga, mari ra ki ‘teianei ao te ngaro ke nei.’ (1 Ioane 2:16, 17) I te akamanako anga i te akaraanga akauruia a Ioane, ka akakite ainei te nga tokorua akaipoipo ouia ki te katoatoa i te tangata tei oronga tataki tai i te apinga aroa? Kua oronga te au Kerititiano mei Makedonia e to Akaia i te au tauturu ki te au taeake i Ierusalema, inara kare rava e akakiteanga e kua akakitekiteia to ratou au ingoa. (Roma 15:26) E manganui te au Kerititiano tei oronga i tetai apinga aroa no te akaipoipo te inangaro ra kia vai muna ua kia kore ratou e akaraia mai. No runga i teia turanga, e akara akaou i te ako kiteaia ia Mataio 6:1-4.

16. Akapeea te tokorua akaipoipo ouia i te kopae anga i te tamamaeanga i te au manako o tetai ke no runga i te au apinga aroa no te akaipoipo?

¹⁶ Te akakiteanga i te au aronga tei oronga i te au apinga aroa ka taki atu ki te “akaongoongo anga tetai ki tetai” e naai te apinga aroa meitaki atu me kore oko maata atu. E no reira, ka kopae te nga tokorua Kerititiano pakari akaipoipo ouia i te akakite i te au ingoa o te aronga tei oronga i te apinga aroa. I te akakiteanga i te au ingoa o te au aronga oronga penei ka taakama i tetai aronga e kare i peke ana ia ratou i te oronga i tetai apinga aroa. (Galatia 5:26; 6:10) E tika, kare i te mea tarevake me inangaro te vaine e te tane akaipoipo i te kite e naai i oronga mai i tetai apinga aroa tikai. Ka rauka ia raua i te kite mai i te reira na tetai kati tau ua tei tukunaia ki runga i te apinga aroa inara kare te reira e tatauia ki te katoatoa. Me te okooko ra, te oronga ra, e te ariki ra i te au apinga aroa no te akaipoipo, tei ia tatou pouroa te atianga i te akapapu e noatu i roto i tetai apinga muna, te akakeu ra to tatou akarongo i ta tatou au angaanga. *

17. Eaa te akakoroanga a te au Kerititiano no runga i to ratou akarongo e te au angaanga?

¹⁷ I te akapapuanga i to tatou akarongo e maata atu te o maira i te noo ua anga ma te tu akono tau, te aere anga ki te au uipaanga Kerititiano, e te piri atu anga ki roto i te angaanga tutu aere. Kia rauka ia tatou tataki tai te akarongo ora te akakeu ra i te au apinga pouroa ta tatou ka rave. Ae, kia akaari tatou i to tatou akarongo na te au angaanga “meitaki rava anga,” kapiti mai te au tuanga o te oraanga tei uriuriia i runga akenei.​—Apokalupo 3:2.

18. Akapeea te au tuatua ia Ioane 13:17 e tika ai i te piri atu anga ki te au akaipoipoanga e te au akaputuputuanga Kerititiano?

¹⁸ I muri ake i te akanooanga a Iesu i tetai akaraanga meitaki no tana au apotetoro tiratiratu na te angaanga akaaka i te tama anga i to ratou vaevae, kua karanga aia: “E ao to kotou, te aronga i kite i teianei au tuatua, kia akono kotou i te reira.” (Ioane 13:4-17) I roto i te ngai e noo ana tatou i teia tuatau nei, kare i te mea umuumuia me kore e matauia kia orei i te vaevae o tetai tangata, mei tetai manuiri rai i roto i to tatou kainga. Inara, mei ta tatou rai i uriuri ana i roto i teia atikara, e au tuanga ke atu tetai i roto i te oraanga ka rauka ia tatou i te akaari i to tatou akarongo na te au angaanga aroa, e te akamanako meitaki, kapiti mai i tei piri atu ki te au akaputuputuanga e te au akaipoipoanga Kerititiano. Ka rauka te reira me ko tatou tetai te akaipoipo ra me kore ko tatou te au manuiri i tetai akaipoipoanga me kore i tetai ua atu akaputuputuanga mataora o te au Kerititiano te inangaro ra i te akaari i to ratou akarongo na roto i ta ratou au angaanga.

[Tataanga Rikiriki i Raro]

Akapeea Koe me Pau?

Akapeea koe i te akapapu anga i toou akarongo:

• me te akapapa ra i tetai akaputuputuanga?

• me te akapapa ra i tetai akaipoipoanga me kore tetai umukai?

• me te oronga ra me kore te ariki ra i te au apinga aroa no te akaipoipo?

[Au Uianga Apii]

[Tutu i te kapi 24]

Noatu me e iti ua te au tangata tei patiia atu, kia aratakiia e “te pakari no runga maira”