Au Mataara Roma​—E Apinga Akamaara anga i te Angaanga Enitinia Taito

KO TEEA te apinga akamaara anga puapinga maata roa atu o Roma? Ka karanga ainei koe e ko te Colosseum, e au pueu ka kitea uaia i Roma? Me ka inangaro tatou i te akamanako i te au patuanga a Roma te vai ua nei rai no tetai tuatau roa me kare tei tauturu i te akataka mai i te tuatua enua, ka tau tatou kia akamanako no runga i te au mataara.

Kare e ko te au apinga e te au vaeau ua tei aere ana na runga i te au mataara mamaata o Roma. Te karanga ra a Romolo A. Staccioli e tauira no te tataanga taito e, kua riro mai te mataara ei ravenga no te “akatotoa i te au manako, te au akakeu anga ati, e te apii teitei e te apii akonoanga” kapitiia mai te Akonoanga Kerititiano.

I te tuatau taito, kua manakoia te au mataara o Roma e e apinga akamaara anga. I te au mataiti e manganui i topa, kua patu te au Roma i tetai aereanga mataara mako tei totoa atu e 50,000 maire te mamao i roto i tetai ngai te o maira e tere atu e 30 enua.

Te via publica mua e te puapinga maata, me kare ko te mataara maata e kapikiia ana i teia tuatau, ko te Via Appia, me kare ko te Appian Way. Kua kiteaia e ko te ara metua, tei pau atu ia Roma kia Brundisium (kua kapikiia i teianei ko Brindisi), ki te oire o te uapu te taki atura i te tangata ki te Itinga. No ko mai te ingoa o teia mataara nei ia Appius Claudius Caecus, e opita Roma tei akamata i te patu i te reira mei te mataiti 312 M.T.N. Te tikoti katoa maira te Via Salaria e te Via Flaminia na roto ia Roma, kua akatotoaia atu nga mataara ki te itinga ki te Tai Adria, i te akatuera anga atu i te ara ki te Balkan pera katoa ki te tapere i Rhine e te Danube. Na tokerau atu te Via Aurelia i te aere anga atu ki Gaul e te Penitura Iberia, e te Via Ostiensis ki Ostia, te uapu e reka ana te Roma i te teretere atu e te oki mai mei Aperika.

Ta Roma Patu Anga Maata Roa Atu

E puapinga maata te au mataara ki te Roma i mua ake ka akamata ai tona au tangata i te patu i te au mataara ou. Kua tupu mai te oire i te ngai ka tae atu ei te kauvai anake ra o te Kauvai Tiber ki te tuanga i raro. Kia tau ki te au tataanga taito, e akamako mai ei i te au mataara i kiteaia mai e ratou, kua aru te au Roma i te au tangata o Carthage. Inara ko te aronga tikai i mua ake i te au Roma tei kite i te patu anga i te mataara penei ko te Etruscan. Te kiteaia nei rai te totoenga o to ratou au mataara. Pera katoa, i mua ake i to Roma tuatau e manganui te au mataara te vai ra rai i taua ngai tei aere putuputuia. Penei i na runga ana te au manu i teia au mataara no tetai ngai mai ki tetai ngai ke atu. Inara, e ngata te aere anga na runga i te au mataara, no te mea e mataara pueu te reira i te tuatau maro e e varivari i te tuatau uaua. E putuputu ana te au Roma i te patu i to ratou mataara na runga ake i taua au ara.

Kua parani meitakiia te au mataara Roma e kua akatu ngaueue koreia, kia taangaangaia, e kia manea. Ko te tika, te pau atura te au mataara ki tetai ngai akamata anga ma te akakoroanga na roto i te ara poto roa atu e tae atu ei, no reira rai i roaroa ai e i titika ai te au mataara e manganui. Inara, e aru putuputu ana te au mataara i te tu o te enua. I te ngai ka taeria, i te tuaivi e i te au maunga ra, kua patu te au enitinia Roma i to ratou mataara i runga i te ngai paekeeke, i te tua o te maunga e veraia ana e te ra. Te aronga te na runga ra i te mataara, te akaiti maira teia turanga  nei i tetai ua atu manamanata te ka akatupuia e te au turanga kinokino o te reva.

Akapeea ra te au Roma i te patu anga i to ratou mataara? E maata te tuke anga, inara ko teia te tumu maata ta te aronga kimikimi apinga taito i akaari mai.

Kua paraniia na mua te aerenga o te mataara. Kua orongaia teia angaanga nei ki te aronga vaito i te enua o taua tuatau. E oti, kua akarukenaia te angaanga pakari tikai no te ko anga ki te pupu vaeau, te aronga angaanga, me kare ki te au tuikaa. E rua nga vaarua aiteite i ko ia. Te atea i rotopu i te reira mei te 8 tapuae, inara e 14 tapuae te atea tikai, e e atea atu te reira i te akamingi anga. Te aano o te mataara i oti mai ka taeria te katoaanga ki te 33 tapuae, kapitiia mai te mataara no te aronga aere vaevae i nga tua e rua. Kua akaateaia te one i roto i nga rua, i te maani anga i te vaarua. Me taeria te tumu tikai, ka akakiia te vaarua e toru me kore e a papaanga ki te au apinga tukeke. Te mea mua penei ko te au toka mamaata me kore ko te au toka rikiriki. Te ka aru mai ko te au kirikiri me kare ko te au toka paraa, penei na te timeni e mou tamou. Aru  mai i teia ko te kirikiri komiriia me kare te toka vavaiia te ka na runga ake.

E kirikiri matorutoru ua to runga ake i tetai au mataara Roma. Inara, ko tei akakeu i te marekaanga o te au tangata ra i taua tuatau ko te au mataara tei patuia. I runga tikai i taua au mataara kua maaniia ki te au potopotonga toka mamaata, no reira mai rai taua au toka. Kia tae ua mai te vai mei te ngai teitei mai o te mataara ki roto i te ara vai i nga tua o te mataara, e manga amingi anga tetai. Kua riro teia patuanga ei tumu anga no te tu ketaketa no teia apinga akamaara anga e te vai nei rai e tae ua mai ki to tatou tuatau.

Vaitata rai e e 900 mataiti i muri ake i te patuia anga te Appian Way, kua akataka mai te tangata tata tuatua enua Byzantine ko Procopius i te reira ei “mea umere.” No runga i te au potopotonga toka tei patuia na runga ake, kua tata aia: “Noatu e maata te au tuatau i topa e e manganui te au pereoo i aere ana na runga i te reira mei tera ra ki tera ra, te meitaki ua nei rai te turanga o te mataara, e kare katoa to te reira tu meitaki i ngaro ake.”

Akapeea teia au mataara te aere anga na runga ake i te au mea natura, mei te au kauvai rai? Ko tetai ravenga puapinga maata koia oki te au ana kauvai, te tu nei rai etai, i te oronga anga mai i te akapapu anga ki te kite karape tikai o te au Roma. Penei kare i kite meitakiia ana te au ana no runga i te au mataara meitaki o Roma, inara e ngata te patuia anga te reira, i te akamanako anga i te au ravenga karape tei taangaangaia i taua tuatau. Kua karanga tetai tataanga e: “Te angaanga enitinia Roma . . . kua rauka mai te au ravenga kare e rauka i te akaaiteia e anere ua atu mataiti.” Ko tetai akaraanga koia oki ko te ana i Furlo tei na roto atu ia Via Flaminia. I te mataiti 78 T.N., i muri ake i te parani meitaki anga a te au enitinia, kua ko ia i roto i tetai toka ketaketa tetai ana e 130-tapuae, e 16 tapuae te atea e e 16 tapuae te teitei. E angaanga umere tikai te reira, i te akamanako anga i te au apinga tei taangaangaia i taua tuatau. Te maani anga i taua mataara meitaki kua riro mai ko tetai angaanga maata rava na te tangata.

Te Aronga Teretere e te Akatotoa Anga i te Au Manako

I na runga ana pouroa te au vaeau e te aronga okooko, te aronga tutu evangeria e te au turoto, te aronga akatutu teata e te aronga tumutoa i teia au mataara. E tai ra ka kapiia e 15 ki te 20 maire e te aronga aereaere ua. Kua rauka mai i te aronga teretere te akakiteanga e mei teaa te mamao na te akara anga ki runga i te au poupou toka. Kua patuia teia au toka tukeke nei, tei matauia e e punupunu, e 4,854 tapuae te atea mei tetai ki tetai​—e maire Roma te roaanga. E au  ngai akangaroi anga katoa tetai, e e taui ana te aronga teretere i te au oroenua i reira, oko i tetai kai, me kare i tetai au turanga ka noo e tai po. No teia au ngai nei i akatuia ai te au taoni rikiriki.

I muri poto ua ake i te anauia anga mai a Karaiti, kua akamata a Kaisara Auguso i tetai porokaramu no te akono anga i te mataara. Kua iki aia i te au opita kia akono e tai me kore i te au mataara katoatoa. Kua akatu aia i te miliarium aureum, te poupou toka auro tei kiteaia, i roto i te Ngai Akava Anga Roma. Kua riro mai teia poupou ma te au reta tapiripiriia ki te veo ei ngai aravei anga no te au mataara katoatoa o Roma i roto ia Itaria. Ko te tumu anga teia o te tuatua e: “Te taki atura te au mataara katoatoa ki Roma.” E au mapu katoa ta Auguso i akaariari ana no te mataara meitaki o te patireia. I te akara anga kua riro mai te mataara ko te turanga meitaki roa atu no te au anoano e te au turanga o te au tangata i taua tuatau.

Kua taangaanga katoa tetai aronga teretere taito i te au puka tei tataia no te aerenga, kia parani i to ratou tere. Na teia au puka nei e akakite mai e eaa te mamao i rotopu i te au ngai tapu anga tukeke e te akataka anga mai i te au angaanga ka raveia i taua au ngai. Inara, e aka moni te puka e no reira kare te katoatoa e tu ana i te reira.

Noatu rai, kua parani e kua rave te aronga tutu evangeria Kerititiano i te au tere mamao e manganui. Kua iki te apotetoro ko Paulo, mei tona uki tangata rai, i te aere na te moana me aere aia ki te tua itinga, kia aru i te au aangi anga o te matangi. (Angaanga 14:25, 26; 20:3; 21:1-3) I te tua i te Metiterenia, i te au marama maanaana e pupui mai ana teia au matangi nei mei te opunga mai. Inara, me aere a Paulo na te tua opunga, e aere putuputu ana aia na uta, te aere anga na runga i te mataara meitaki o Roma. Na te aru anga i teia akaraanga nei, kua akapapa a Paulo i te rua e te toru o tona tere mitinari. (Angaanga 15:36-41; 16:6-8; 17:1, 10; 18:22, 23; 19:1) * Mei te mataiti 59 T.N., na runga ana a Paulo i te Appian Way ki Roma e kua aravei atu i te au taeake irinaki i ko i te Apio Foro, e 46 maire i te tonga itinga ia Roma. E iva maire tei vaitata atu ki Roma kua tiaki mai tetai papaki iaia i ko i te ngai akangaroi anga o te Are Tapae e Toru. (Angaanga 28:13-15) Mei te mataiti 60 T.N., kua rauka ia Paulo i te karanga e kua tutu aereia te tuatua meitaki “i te ao katoa nei” tei kiteaia i te reira tuatau. (Kolosa 1:6, 23) E tuanga ta te au mataara meitaki i taangaanga kia rauka mai te reira.

No reira kua riro mai te au mataara Roma ei apinga akamaara anga umere e te ope kore​—e na te reira i oronga mai i te akatotoa anga i te tuatua meitaki o te Patireia o te Atua.​—Mataio 24:14.

[Tataanga Rikiriki i Raro]

[Tutu i te kapi 14]

Tetai poupou toka Roma

[Tutu i te kapi 15]

Te “Via Appia” i vao mai ia Roma

[Tutu i te kapi 15]

Tetai mataara i Ostia taito, Itaria

[Tutu i te kapi 15]

Tetai tuanga o tetai mataara Roma ma te au poupou toka, Ioridana

[Tutu i te kapi 15]

Te au mataara akairoia e te au pereoo taito, Auteria

[Tutu i te kapi 16]

Ngai tanumanga akapueurikirikiia i runga ia “Via Appia” i vao ake ia Roma

[Tutu i te kapi 16]

Te Ana “Furlo” i runga ia “Via Flaminia,” i te pae ia “Marche”

[Tutu i te kapi 16, 17]

Te Ana Tiberio i runga ia “Via Emilia” i “Rimini,” Itaria

[Tutu i te kapi 17]

E aravei ana a Paulo i te au taeake irinaki i ko i te Apio Foro

[Au Akameitakianga no te Tutu i te kapi 15]

Far left, Ostia: ©danilo donadoni/Marka/age fotostock; far right, road with mileposts: Pictorial Archive (Near Eastern History) Est.