Kia Maata te Rekareka e te Tu Ngateitei o Toou ra Akaipoipoanga

“TOKU ra akaipoipoanga tetai ra puapinga e te rekareka roa atu i toku oraanga,” i tuatua ai a Gordon, e 60 tuma mataiti i te akaipoipo anga. Eaa te akariro ra i te ra akaipoipoanga ei mea puapinga maata roa ki te au Kerititiano mou? Ko te ra te reira i papau ei ratou i tetai tia akatapuia ki tei akaperepere maataia e ratou​—to ratou oa e te Atua ko Iehova. (Mataio 22:37; Ephesia 5:22-29) Ae, ka inangaro te au tokorua e parani ra i te akaipoipo kia mataora to ratou ra akaipoipoanga, e ka inangaro katoa ratou kia akangateitei i Tei Akamata mai i te akaipoipoanga.​—Genese 2:18-24; Mataio 19:5, 6.

Akapeea ra te tane i te akamaata atu anga i te tu ngateitei o teia atianga mataora? Eaa ta te vaine ka rave i te akaari mai i te akangateiteianga no tana tane e no Iehova? Akapeea te aronga tei tae, i te akamaata atu anga i te rekareka o te ra akaipoipoanga? Na te akamanako anga i te au kaveinga Pipiria e tauturu i te pau i taua au uianga ra, e na te akono anga i taua au kaveinga ra e akaiti i te au manamanata te ka takino i taua atianga takake ra.

Naai te Apainga Maata?

I te au enua e manganui, kua tikaia te Au Kite o Iehova e te ture kia rave i tetai akaipoipoanga. I te au ngai katoa ka anoanoia na tetai kauono o te kavamani e rave i te akaipoipoanga, penei ka inangaro nga tokorua i tetai akoanga tei akatumuia ki roto i te Pipiria. No taua tu akoanga ra, ka patiia te tane kia akamanako no runga i te tuanga tei orongaia mai e te Atua na te upoko o te pamiri. (1 Korinetia 11:3) Kia tau ki te reira, na te tane te apainga maata no te ka raveia i ko i te akaipoipo. E tika, e ko te au akanoonooanga no te akaipoipoanga e no tetai ua atu putuputuanga te ka aru mai, ka raveia te reira i mua roa ake. No teaa ka riro ei teia ei mea ngata?

Tetai tumu penei ka tamata te kopu tangata o nga tua roa ai i te maro e na ratou e akaaere i te au parani o te akaipoipo. Ko Rodolfo, e maata tana au akaipoipoanga i rave ana, kua akakite aia: “I tetai au taime, e pakari tikai te au taomianga a te kopu tangata ki runga i te tane, mei te mea tikai e na ratou e tutaki i te kaikaianga no te akaipoipo. Penei e manako ke rai to ratou no te ka raveia i te taime o te akaipoipoanga e te kaikaianga. Ka riro teia ei takino i te tuanga akaaere a te tane tei tikaia e te Tuatua Tapu, no taua atianga ra.”

Ko Max, tei rave ana i te au angaanga akaipoipo no te 35 tuma mataiti, kua akakite aia e: “Kua kite ana au i tetai tu tei riro e na te vaine e iki e eaa te ka raveia i ko i te akaipoipoanga e i ko i te kaikaianga, e kare i maata ana te tuatau no te tane kia tuatua.” Ko David, e maata katoa tana au akaipoipoanga i rave ana, kua tuatua aia e: “Penei kare te au tane i matau i te arataki, e kua kite matau uaia e kare e piri ana ki roto i te au akapapaanga akaipoipo.” Akapeea e rauka ai i te tane kia rave meitaki i tana apainga?

Akamaata Atu te Komunikeitianga i te Rekareka

E rauka ai i te tane kia rave meitaki i tana apainga no te au akapapaanga akaipoipo, ka anoanoia aia kia komunikeiti meitaki. Te akakite tika maira te Pipiria: “Ka puapinga kore te au parani me kore e tuatua anga muna.” (Maseli 15:22, NW) Inara, ka kopaeia te au mea puapinga kore me uriuri te tane i te au akapapaanga no te akaipoipo ki te vaine, te au mema o te pamiri, e etai ke atu ka rauka i te oronga mai i te manako tau tei akatumuia ki roto i te Pipiria.

 Ae, e mea puapinga no nga tokorua kua akaauia kia uriuri i te au parani e te au mea ke atu. No teaa ra? Ei akatutu, ka akarongo ana ki te tuatua a Ivan raua ko tana vaine, ko Delwyn, mataora tikai to raua oraanga akaipoipo i te au mataiti e oti akera no roto mai raua i te au turanga e i te au peu tukeke. Te akamaara anga i ta raua au parani no te akaipoipo, kua karanga a Ivan: “Kua papu tikai iaku eaa taku ka inangaro no toku akaipoipoanga, kapiti mai te kaikaianga ma toku au oa katoatoa i tae mai, te keke akaipoipo, e taku vaine i roto i te pona akaipoipo teatea. Ko Delwyn, i tetai tua, e akaipoipoanga meangiti e te ngoie ua tana i inangaro, kare e keke akaipoipo. Kua manako katoa aia e aao i tetai pona ua nei.”

Akapeea teia nga tokorua i te rapakau anga i teia au tu tuke? Na roto i te komunikeiti anga ma te takinga meitaki, e te tika. (Maseli 12:18) Kua kapiti mai a Ivan e: “Kua tatau maua i te au atikara tei akatumuia ki roto i te Pipiria no runga i te au tumu manako o te akaipoipo, mei te au mea i neneiia i roto i The Watchtower o Aperira 15, 1984. * Kua tauturu teia atikara ia maua kia kite i to te Atua manako no runga i teia atianga. No te tukeke i to maua au turanga, e maata te au ngai tei anoanoia maua kia akatanotano i ta maua uaorai au ikianga. Kua akatikatika maua roa ai i to maua au tu.”

Kua aru a Aret raua ko Penny i taua mataara ra. No runga i to raua ra akaipoipoanga, kua karanga a Aret e: “Kua uriuri maua ko Penny i to maua au anoano tukeke no te akaipoipoanga, e kua rauka ia maua tetai tika rotai. Kua pure maua kia akameitaki mai a Iehova i taua ra ra. Kua pati katoa au i te manako o to maua au metua e to etai au tokorua akaipoipo pakari i roto i te putuputuanga. Kua tauturu maata tikai to ratou au manako. Tei tupu mai, kua riro to maua akaipoipoanga ei mea manea roa.”

Akono Marie i te Tu Ngateitei o te Kakau e te Akamanea

Kua marama uaia e ka inangaro te vaine e te tane i te akamanea meitaki no to raua ra akaipoipoanga. (Salamo 45:8-15) Penei e maata to raua taime, te tautaanga, e te moni ka akapou ki runga i tetai kakau tau tikai. Ko teea au kaveinga Pipiria te ka tauturu ia raua kia iki i te mea ngateitei e te manea?

Akamanako e eaa ta te vaine ka aao no te atianga. Noatu e tuketuke te inangaro o te tangata tataki tai e mei tera enua ki tera enua, ko te akoanga ra a te Pipiria ka tau te reira no te au ngai katoatoa. Ka anoanoia te au vaine “kia akamanea ia ratou uaorai i te kakau e tau ra, ma te akatietie kore, e te akono meitaki.” Kua tau teia no te au vaine Kerititiano i te au taime katoatoa, e te kapiti maira te reira i te ra akaipoipoanga. Tikaanga kare e anoanoia te “kakau oko maata” no te akaipoipoanga kia mataora. (1 Timoteo 2:9;  1 Petero 3:3, 4) E marekaanga maata tikai te ka rauka me taangaangaia teia ako!

Kua tuatua a David, tei taikuia i mua akenei e: “E tauta ana te maataanga o te au tokorua i te aru i te au kaveinga Pipiria, e kua tau kia akameitakiia ratou. Inara, te vai ra tetai au tu, e tau kore tikai te kakau o te vaine e te au apee, e akaaka roa a mua me kore e angiangi roa.” I te uipa anga aia ki te vaine e te tane i mua ake, kua tauturu tetai tangata pakari Kerititiano ia raua kia akamanako mari i te turanga pae vaerua. Akapeea? Na te ui anga kia raua e me e tau ainei te kakau ta raua e manako ra, kia aaoia ki te uipaanga Kerititiano. E tika, penei e tuke te vaito o te kakau mei te kakau e aaoia ana no te uipaanga, e penei ka akaata mai te kakau no te akaipoipo i te peu o te reira ngai, kareka te turanga o te tu tau, kia tano rai te reira ki te tu ngateitei o te au turanga Kerititiano. Noatu te manako ra to teia ao e e pakari roa te ture tu akono a te Pipiria, te mareka ua nei te au Kerititiano i te patoi i te au titauanga a teia ao kia maro ia ratou kia aru i to te reira tu.​—Roma 12:2; 1 Petero 4:4.

“Kare i tuku e ko te kakau me kore ko te kaikaianga te apinga puapinga roa atu,” i karanga ai a Penny, “kua akamou ra maua ko Aret ki runga i te akaipoipoanga, i te tuanga pae vaerua o te atianga. Ko te tuanga puapinga roa atu te reira i taua ra ra. Te apinga takake tei maara iaku koia oki, kare ko taku i aao ei me kore i kai ei, mari ra koai taku i piri ei i taua ra ra e te mataora taku i kite i te akaipoipo anga i te tane tei inangaroia e au.” E mea meitaki tikai no tetai nga tokorua kia akamaara i teia au manako ia raua e parani ra i to raua akaipoipoanga.

Are Uipaanga Patireia​—E Ngai Ngateitei

Manganui te au tokorua Kerititiano e inangaro ana kia raveia to ratou akaipoipoanga ki roto i te Are Uipaanga Patireia me ka va mai. No teaa ra ratou i iki ei i teia? Kua akamarama mai tetai tokorua i to raua manako: “Kua kite maua e e akanooanga akatapuia te akaipoipoanga na Iehova. Ka riro te akaipoipo anga ki roto i te Are Uipaanga Patireia, to tatou ngai akamorianga, ei tauturu i te akamou ki roto ia maua mei te akamataanga mai e ka anoanoia a Iehova kia riro ei tuanga no to maua akaipoipoanga. Tetai puapinga ke atu no te rave anga i te akaipoipoanga ki roto i te Are Uipaanga Patireia eiaa ki tetai ngai ke atu koia oki, ei akaari ki te kopu tangata irinaki kore tei tae mai e e mea puapinga maata roa te akamorianga a Iehova kia maua.”

Me akatika te aronga pakari e tiaki ra i te Are Uipaanga Patireia e kia raveia te akaipoipoanga ki reira, e akakite te tokorua kia ratou i mua ake ka raveia ai te au akapapaanga e manakoia ra. Tetai mataara ka rauka i te vaine e te tane kia akaari i te akangateiteianga no te aronga tei patiia koia oki, kia tae mai i te taime tikai i akatakaia no te akaipoipo. E ka inangaro raua kia papu e kua raveia te au mea ravarai na roto i te tu ngateitei. * (1 Korinetia 14:40) Ka rauka i reira ia raua i te kopae i te au tu tau kore e kiteaia ana i ko i te au akaipoipoanga e manganui o teia ao.​—1 Ioane 2:15, 16.

Kia akaari katoa te aronga tei tae ki te akaipoipoanga e te rotai ra to ratou manako no runga i te akaipoipoanga ki to Iehova. Ei akaraanga, kare ratou e tapapa mai e ka maata atu teia akaipoipoanga i tetai au akaipoipoanga Kerititiano ke atu, mei te tarere rai e noai te akaipoipoanga manea maata roa atu. Kua kite katoa te au Kerititiano pakari e ko te tae ki te Are Uipaanga Patireia no te akoanga akatumuia ki roto i te Pipiria tei puapinga e tei maata roa atu i te umukai no te akaipoipo me kore i tetai putuputuanga te ka aru mai. Me ka rauka te taime me kore te turanga no tetai Kerititiano kia tae ki reira no tetai ua o nga mea e rua, e ngari ake te aere ki te Are Uipaanga Patireia. Kua karanga tetai tangata pakari ko William te ingoa e: “Me kare e tumuanga tau no te au manuiri kia kore e tae ki te Are Uipaanga Patireia inara ka tae ki ko i te kaikaianga i muri mai, e kore tikai teia e akaari ana i te arikianga rekareka no te tu tapu o te atianga. Noatu kare tatou i patiia ki te kaikaianga,  ka akaari rai tatou i ta tatou turuanga no te vaine e te tane, e te oronga i tetai akakiteanga tau ki te kopu tangata irinaki kore i ko i te akaipoipo, na te tae anga ki te akaipoipoanga i ko i te Are Uipaanga Patireia.”

Rekareka te ka Vai a Muri Roa Atu i te Ra Akaipoipoanga

Kua akariroia e te ao okooko o teia ao te angaanga akaipoipoanga ei aka pitiniti maata. Kare i roa akenei kua akakite tetai ripoti, e ko tetai akaipoipo ua nei i Marike e “$22,000, me kore e apa i te moni angaanga a tetai ngutuare tangata i Marike i te [mataiti].” Akakeuia e te au ravenga okooko akavare, e manganui te aronga akaipoipo ou ua me kore to ratou au pamiri tei akauta i tetai kaiou teiaa tikai no taua ra okotai ua ra, ta ratou ka apai no te au mataiti. E arataa pakari ainei te reira no te akamata i to tetai akaipoipoanga? Te aronga tei kore i kite me kore kare e kea atu ana i te au kaveinga Pipiria penei ka iki ratou i taua tu kaimoumou ra, kareka ra e aka tuke tikai i rotopu i te au Kerititiano mou!

Na te akameangiti mai anga i to ratou akaipoipoanga ki tei tau e te ka peke, e na te tamou marie anga ki runga i te turanga pae vaerua o te atianga, e manganui te au Kerititiano tei rauka i te taangaanga i to ratou taime e te apinga kia tau ki ta ratou akatapuanga ki te Atua. (Mataio 6:33) Ka akamanako ana i te akaraanga o Lloyd raua ko Alexandra, tei painia tamou atu rai no te 17 mataiti mei te akaipoipo anga mai raua. Kua tuatua a Lloyd e: “Penei kua manako tetai aronga e e mama ua to maua akaipoipoanga, inara kua mataora tikai maua. Kua manako maua e e mea tau kia riro to maua ra akaipoipoanga, eiaa ei apainga teiaa i te pae moni mari ra, ei akamanakoanga i ta Iehova akanooanga kia rauka te mataora maata i nga tangata e rua.”

Kua kapiti mai a Alexandra e: “No roto au i te angaanga orometua painia i mua ake ka akaipoipo ei maua, e kare au inangaro ana i te akaruke i teia angaanga takake kia rauka te akaipoipoanga moni maata. E mea takake roa to maua ra akaipoipoanga. Inara, ko te ra mua ake rai teia no te toenga o to maua oraanga. Kua akono maua i te ako auraka kia akamou maata roa ki runga i te rave anga o te akaipoipo e kua kimi i te aratakianga a Iehova i roto i to maua oraanga ei nga tangata akaipoipoia. Kua apai mai tikai teia i ta Iehova akameitakianga.” *

Ae, e atianga takake roa toou ra akaipoipoanga. Ka riro te au tu e te au angaanga tei kiteia i taua ra ra ei akaraanga no toou oraanga akaipoipo i te au mataiti ka aereia. No reira, e irinaki kia Iehova no te aratakianga. (Maseli 3:5, 6) E akamanako meitaki tikai i te puapinga pae vaerua o taua ra ra. Turuturu i tetai e tetai i roto i ta korua nga tuanga i tukuia atu e te Atua. Ka rauka i reira ia korua i te tuku i tetai tango ngaueue kore no to korua akaipoipoanga, ma te akameitakianga a Iehova, ka rauka ia korua te rekareka te ka vai rai a muri atu i te ra akaipoipoanga.​—Maseli 18:22.

[Au Tataanga Rikiriki i Raro]

[Tutu i te kapi 29]

Mea tau no nga tokorua kia komunikeiti maoraora ua ma te akangateitei, i te parani anga i to raua ra akaipoipoanga

[Tutu i te kapi 31]

E akamanako meitaki i te puapinga pae vaerua o to korua ra akaipoipoanga