Akaari Anga i te Tu Ngateitei No ta Tatou Au Akaputuputu Anga Tapu

“Ko ratou rai oki taku e arataki ki toku maunga tapu ra, e akarekareka au ia ratou i roto i toku are pure anga.”​—ISAIA 56:7.

1. Eaa te au tumu anga Tuatua Tapu i rauka mai ia tatou no te akaari anga i te akangateitei anga tau no ta tatou au uipaanga?

KUA akaputuputu mai a Iehova i tona au tangata, te au Kerititiano akatainuia e to ratou au oa, kia akamori iaia ki tona “maunga tapu ra.” E e akarekareka ana aia ia ratou i roto i tona “are pure anga,” tona iero pae vaerua, koia oki “te are pure anga no te tangata ravarai.” (Isaia 56:7; Mareko 11:17) Te akakite maira teia au tupuanga e e mea tapu, e tu ma, e te teitei ta Iehova akamorianga. Na te akaari anga i te akangateitei anga tau no ta tatou au uipaanga no te apiianga e te akamorianga, te akapapu ra tatou e te akono ra tatou i to Iehova manako no te au mea tapu.

2. Eaa te akaari maira e te mou ra a Iehova i te ngai tana i iki no tana akamorianga ei mea tapu, e akapeea a Iesu i te akaari anga mai e te rave katoa ra aia i te reira?

² I Iseraela i taito, kua riro mai te ngai ta Iehova i iki no tana akamorianga ei mea tapu. Ka akatainuia e ka akatapuia te tapenakara e tona au apinga akamanea e te au mea katoa ‘kia tapu roa ïa te reira.’ (Exodo 30:26-29) Te nga paruru e rua o te ngai tapu ra kua karangaia e “te pae Are ïa” e “te ngai-tapu rava ra.” (Ebera 9:2, 3) Kua monoia te tapenakara i muri mai ki te iero i Ierusalema. Ei ngai akamorianga ia Iehova, kua karangaia a Ierusalema e ko “te oire tapu.” (Nehemia 11:1; Mataio 27:53) I roto i tana angaanga orometua i te enua nei, kua akaari mai a Iesu i te tu ngateitei no te iero. Kua riri tikai aia i te au tangata no te tu akangateitei kore i te taangaanga anga ratou i te ngai o te iero no te au akakoroanga okooko e ei ngai tikoti anga na te katoatoa.​—Mareko 11:15, 16.

3. Eaa te akatutu maira i te tu tapu o te au akaputuputuanga o Iseraela?

³ Kua akaputuputu mai te ngati Iseraela i te akamori ia Iehova e kua akarongo atu ki te tatau anga i tana Ture. Kua karangaia tetai au ra o ta ratou au oroa e ei au uruoaanga tapu me kare e au akaputuputuanga tapu, i te akakite anga mai i te tu tapu o teia au akaputuputu anga. (Levitiku 23:2, 3, 36, 37) I te akaputuputuanga na te katoatoa i te tuatau o Ezera raua ko Nehemia, te “akakite [ra te ngati Levi] ki te tangata i te ariteanga o taua ture.” No te mea “kua aue oki te tangata ravarai i te kite anga i te au tuatua a te ture ra,” “kua muteki iora te tangata katoa i te au ngati Levi, na ko atura, Auraka e tuatua, e rā tapu oki teia.” Kua akono iora te ngati Iseraela i te Oroa Patia Anga Puakapa e itu ra ma te ‘rekareka maata rava.’ Pera katoa, kua “tatau iora aia i taua buka ture a te Atua ra i tera rā i tera rā, mei te rā mua mai e tae ua atura ki te rā openga ra. Kua akono atura oki ratou i taua oroa ra e po itu akera; e tae akera ki te rā varu ra, ei uruoaanga tapu ïa, i tei tuatuaia maira.” (Nehemia 8:7-11, 17, 18) E au atianga tapu tikai teia te umuumuia ra te manako akangateitei anga i te tua o te aronga tei tae mai.

E Au Akaputuputu Anga Tapu ta Tatou Au Uipaanga

4, 5. Eaa te au tu o ta tatou au uipaanga te akapapu maira e e au akaputuputu anga tapu te reira?

⁴ E tika rai, i teia tuatau kare o Iehova oire tapu tika tikai i runga i te enua nei, ma tetai iero takake tei akatapuia no te akamorianga iaia. Noatu rai, auraka e ngaropoina ia tatou te tikaanga e e au akaputuputuanga tapu taua au  uipaanga no te akamorianga ia Iehova. E toru taime i te epetoma, e akaputu mai ana tatou i te tatau e te apiianga i te au Tuatua Tapu. Kua ‘tatau taka meitakiia’ ta Iehova Tuatua, e mei to Nehemia tuatau, “kua akakite i te ariteanga.” (Nehemia 8:8) Pouroa ta tatou au uipaanga e akamata ana e e taopenga ana ki te pure, e te maata anga, e imene ana tatou i te au imene akapaapaa anga kia Iehova. (Salamo 26:12) E tuanga tikai te au uipaanga putuputuanga no ta tatou akamorianga e te umuumuia ra tetai tu no te pure e te manako akangateitei anga na tatou.

⁵ Te akameitaki ra a Iehova i tona au tangata ia ratou e akaputu taokotai maira i te akamori iaia, i te apiianga i tana Tuatua, e te rekareka anga i te kapitianga Kerititiano. Me tae mai te taime no te aere atu ki tetai uipaanga, papu ia tatou e i taua uipaanga ra te “reirā Iehova te akaue anga i te meitaki.” (Salamo 133:1, 3) Ka rauka ia tatou taua akameitakianga me kua tae tatou ki reira e te akarongo anga ki te porokaramu pae vaerua. Tei runga atu, kua akakite a Iesu e: “I te ngai e putuputu ei e toko rua e toko toru i toku nei ingoa, tei rotopu katoa au ia ratou i reira.” I roto i te papaanga tuatua, te taangaangaia ra teia tuatua ki te aronga pakari Kerititiano e uipa ra kia akono i te au manamanata kino pakari i rotopu i te au tangata tataki tai, inara ko te kaveinga, te taangaanga katoaia ra ki ta tatou au uipaanga. (Mataio 18:20) Mei tei reira rai a Karaiti, na roto i te vaerua tapu, i te akaputuputu taokotai anga mai te au Kerititiano i roto i tona ingoa ra, kare ainei taua akaputuputu anga ra e akamanakoia ei mea tapu?

6. Eaa te karangaia ra no runga i te au ngai uipaanga no tatou, me e maata e me e rikiriki?

⁶ E tika rai e kare a Iehova e noo ana i roto i te au iero tei maaniia e te tangata. Noatu rai, e au ngai akamorianga mou no tatou te au Are Uipaanga Patireia. (Angaanga 7:48; 17:24) E akaputu mai ana tatou ki reira ei apii i te Tuatua a Iehova, kia pure kiaia, e kia imene i tana au imene akapaapaa anga. E tika katoa rai te reira no to tatou  au Are Akaputuputuanga. Kua riro te au ngai mamaata tei tutakiia no ta tatou au uruoaanga​—mei te au otitoriomi, te ngai akaariari anga, me kare te au ngai tarekareka anga ​—ei au ngai no te akamorianga e taangaangaia ra no ta tatou au akaputuputu anga tapu. E mea tau kia akangateitei tatou i teia au atianga no te akamorianga, me e maata e me e rikiriki, e kia akaataia mai te reira i roto i to tatou manako e te tu.

Au Mataara no te Akangateitei i ta Tatou Au Akaputuputu Anga

7. Na roto i teea tu kiteaia ka rauka ia tatou i te akangateitei i ta tatou au akaputuputu anga?

⁷ E au mataara kiteaia tetai te ka rauka ia tatou i te akangateitei i ta tatou au akaputuputu anga. Ko tetai mataara koia oki na te tae anga mai no te imene anga i te au imene Patireia. E manganui o teia au imene nei kua tataia ei au pure e no reira kia imene akangateiteiia. I te taiku anga ia Salamo 22, kua tata te apotetoro ko Paulo no Iesu e: “E akakite au i to ingoa i toku ra au taeake, e akapaapaa au ia koe i roto i te ekalesia ra.” (Ebera 2:12) No reira, e tauta tatou i te noo ki runga i to tatou au nooanga i mua ake ka akakite mai ei te tiamana i te imene e kia akamanako i te aiteanga o te au tuatua ta tatou e imene ra. Kia akaata mai ta tatou imene anga i te au manako oonu o te tata taramo tei tata e: “Ka akameitaki au ia Iehova ma te ngakau katoa, i roto i te kapitianga o te aronga tiratiratu, e te uipa anga ra.” (Salamo 111:1) Ae, te imene anga i te au akapaapaa kia Iehova ko tetai tumu meitaki tikaiia kia tae vave mai ki ta tatou au uipaanga e kia noo mai e tae ua atu ki te openga.

8. Eaa te akaraanga i roto i te Pipiria te akaari maira e e mea tau kia akamanako akangateiteiia taua au pure i ko i ta tatou au uipaanga?

⁸ Ko tetai tu te ka akamaata mai i te tu pae vaerua o ta tatou au uipaanga katoatoa ko te pure akatenga tei orongaia no te aronga katoatoa tei akaputuputu mai. I tetai atianga, kua akaputuputu mai te au Kerititiano o te anere mataiti mua ki Ierusalema e kua “akateitei anake atura to ratou reo i te Atua” i te pure akatenga anga. Tei tupu mai, “kua tuatua ua iora [ratou] i te tuatua a te Atua ma te mataku kore,” noatu te takinokino anga. (Angaanga 4:24-31) Ka rauka ainei ia tatou i te akamanako e kua tuku taua aronga tei tae mai kia aere ke atu to ratou manako i te tuatau no te pure? Kare, kua “akateitei anake ra” ratou i te pure anga. Te au pure e pureia ra i ko i ta tatou au uipaanga te akaata maira i te au manako ngakau o te katoatoa tei aere mai. Ko teia au pure nei e mea tau kia akamanako akangateiteiia e tatou.

9. Akapeea tatou i te akaari anga i to tatou tu ngateitei no te au akaputuputu anga tapu na roto i to tatou kakau e to tatou tu?

⁹ Pera katoa, e akaari tatou i ta tatou akangateitei anga oonu no te tu tapu o ta tatou au uipaanga na roto i te tu o to tatou kakau. Ka rauka maata i to tatou tu ma, te tu ngateitei o to tatou kakau e to tatou rauru i te tauturu i te tu tapunui no ta tatou au uipaanga. Kua ako mai te apotetoro ko Paulo e: “Ko toku ïa anoano i te au tane ra, kia pure i te au ngai katoa ra, ma te apai i te rima viivii kore ki runga, ma te riri kore, e te māro kore: E te au vaine ra oki, kia akamanea ia ratou uaorai i te kakau e tau ra, ma te akatietie kore, e te akono meitaki; auraka ma te rauru iri, e te auro, e te poe, e te kakau oko maata ra; Ma te tuatua meitaki ra, ko tei tau i te au vaine i mou i te akono i te Atua ra.” (1 Timoteo 2:8-10) Me aere tatou ki te au uruoaanga mamaata tei raveia i te ngai atea, kia tau to tatou kakau ki te au turanga o te reva e kia tapunui rai. Pera katoa, i to tatou akangateitei anga i te atianga ra ka tauturu ia tatou kia kore e kaikai me kare e kai kamu i te reira tuatau. Te akangateitei ra te kakau tau e te tu i ko i ta tatou au akaputuputu anga i te Atua ko Iehova, i tona akamorianga, e to tatou au taeake akamori.

E Tu te Tau ra no te Putuputuanga o te Atua

10. Akapeea te apotetoro ko Paulo i te akaari anga e te umuumuia ra te turanga teitei no te tu akono i ko i ta tatou au uipaanga Kerititiano?

¹⁰ I roto ia 1 Korinetia, pene 14, ka kite tatou i te ako anga pakari a te apotetoro ko Paulo e akapeea me raveia te au uipaanga Kerititiano. Kua taopenga aia na te tuatua anga e: “E rave ra te au mea ravarai ma te tika e te manea.” (1 Korinetia 14:40) E tuanga puapinga maata ta tatou au uipaanga no te angaanga a te putuputuanga  Kerititiano, e te umuumu maira te reira i te tu akono te tau ra ki te putuputuanga a Iehova.

11, 12. (a) Eaa te ka tukunaia ki roto i te au manako o te tamariki te aere maira ki ta tatou au uipaanga? (e) Na roto i teea tu tau ka rauka i te tamariki i te akakite i to ratou akarongo i ko i ta tatou au uipaanga?

¹¹ Ki te tamariki tikai, te anoanoia ra kia apiiia e eaa ta ratou ka rave i ko i ta tatou au uipaanga. E akamarama atu nga metua Kerititiano ki ta ratou tamariki e kare te Are Uipaanga Patireia e te ngai no te Apii Puka a te Putuputuanga e ngai kangakanga anga. E au ngai akamorianga ia Iehova te reira na tatou e te apiianga i tana Tuatua. Kua tata te ariki pakari ko Solomona e: “E matakite i to vaevae kia aere ki te are o te Atua ra; e kia rapurapu koe i te akarongo ra.” (Koheleta 5:1) Kua apii a Mose i te ngati Iseraela kia akaputuputu taokotai mai te aronga mamaata e te “au tamariki.” Kua tuatua aia: “E akaputuputu mai i te au tangata . . . kia akarongo ratou, e kia apii, e kia mataku i to kotou Atua ra ia Iehova, kia akamako, e kia rave oki i te au tuatua ravarai o teianei ture: Kia akarongo katoa ta ratou au tamariki, kare i kite ra, kia apii, e kia mataku i to kotou Atua ra ia Iehova.”​—Deuteronomi 31:12, 13.

¹² Pera katoa i teia tuatau, te tumu maata i aere mai ei ta tatou au tamariki ki te au uipaanga ma to ratou nga metua kia akarongo e kia apii. Me viviki ia ratou i te akarongo mai e kia marama i te au tuatua mou mama ua o te Pipiria, ka rauka katoa i te tamariki i te “aaki te tuatua” o to ratou akarongo e kia piri mai ki roto i te au tuatua tapoto ua. (Roma 10:10) Penei ka akamata tetai manga tamaiti na te tuatua anga i te au tuatua tokoiti ua i te pau anga i tetai uianga tana e marama ra. I te akamata anga, penei ka tatau mai aia i te pauanga, inara i muri ake, ka tauta aia i te paupau mai na roto i tana uaorai au tuatua. E puapinga e e mea reka tikai teia no te tamaiti, e te akarekareka ra taua au tuatua oronga uaia mai no te akarongo i te au ngakau o te aronga pakari ake tei aere mai. Tei matauia, na te nga metua e akanoo i te akaraanga na te paupau anga mai raua i te au pauanga. I te ngai ka rauka, e meitaki no te tamariki kia tu ratou i ta ratou uaorai Pipiria, te puka imene, e te kopi no te puka e apiiia ra. Kia apiiia ratou kia akangateitei tau i taua au puka. Na teia pouroa e tuku ki roto i te manako o te tamariki e e au akaputuputu anga tapu ta tatou au uipaanga.

13. Eaa ra to tatou manakonakoanga no runga i te aronga tei aere mai ki ta tatou au uipaanga ka tai nei taime?

¹³ E tika rai, kare tatou e inangaro i ta tatou au uipaanga kia aite atu ki te au pure raa a Kerititome. Penei e anu e e tu akatutu ua teia me kore e maniania mei te ngai imene tamataoraanga. Ka inangaro tatou i te au uipaanga i ko i to tatou au Are Uipaanga Patireia kia oaoa kia oraora inara kare e kia akaaiteia atu ki te karapu tamataoraanga. E akaputuputu mai ana tatou i te akamori ia Iehova, no reira kia tapunui ua rai ta tatou au uipaanga. Ko to tatou anoano koia oki i muri ake i te akarongo anga ki te au tumu manako tei orongaia mai e te akara anga i to tatou tu e ta tatou tamariki, e kia karanga mai te aronga tei aere mai ka tai nei taime e: “Tei rotopu tikai te Atua ia kotou.”​—1 Korinetia 14:25.

E Tu Tinamou no ta Tatou Akamorianga

14, 15. (a) Akapeea tatou i te kopae anga kia kore e “akaruke i te are o to tatou Atua”? (e) Akapeea a Isaia 66:23 i te akatupu takere angaia?

¹⁴ Mei tei akakiteia mairai i runga akenei, te akaputuputu maira a Iehova i tona au tangata e te akarekareka ra ia ratou i roto i tona “are pure anga,” tona iero vaerua. (Isaia 56:7) Kua akamaara atu te tangata akarongo mou ko Nehemia  ki tona au taeake ngati Iuda e e akaari ratou i te tu ngateitei tau no te iero tikai na te turu anga i te reira i te pae materia. Kua akakite aia e: “Kare oki matou e akaruke i te are o to tatou Atua.” (Nehemia 10:39) Pera katoa, auraka tatou e akaruke i ta Iehova patianga kia akamori iaia i roto i tona “are pure anga.”

¹⁵ I te akaari anga i te anoano kia akaputuputu taokotai mai no te akamorianga, kua totou a Isaia e: “Mei tetai marama ou oki e tae ua atu ki tetai marama ou, e mei tetai sabati e tae ua atu ki tetai sabati, ko te aere anga mai ïa o te tangata katoatoa, ka akamori ei ki mua i toku aroaro, te tuatua mairā Iehova.” (Isaia 66:23) Te tupu ra teia i teia tuatau. I te au epetoma ravarai no te au marama ravarai, e taokotai putuputu mai ana te au Kerititiano akatapuia i te akamori ia Iehova. Ka rave ratou i teia, kapiti atu ki tetai au mea ke, na te aere anga mai ki te au uipaanga Kerititiano e te o atu anga ki roto i te angaanga orometua. Ko koe ainei tetai o taua aronga tei ‘aere putuputu mai ki mua i te aroaro o Iehova’?

16. Eaa ra te aere putuputu anga ki te uipaanga ka riro mai ei ei tu tinamou no to tatou oraanga i teianei?

¹⁶ Ka taangaanga pu tikaiia e Isaia 66:23 te ora i roto i te ao ou tei taputouia mai e Iehova. I taua tuatau, i roto i tetai manako tika tikai, mei tetai epetoma ki tetai epetoma e tetai marama ki tetai marama, ka ‘aere mai te tangata katoatoa, ka akamori ei ki mua,’ ia Iehova e tuatau ua atu. I te mea e ka riro te akaputu taokotai i te akamori ia Iehova ei tu tinamou no to tatou oraanga pae vaerua i roto i te au akatereanga o te au mea ou, kare ainei tatou e aere putuputu atu ki ta tatou au akaputuputu anga tapu ei tu tinamou no to tatou oraanga i teianei?

17. Eaa ra tatou ka inangaro ei i ta tatou au uipaanga “no te mea te akara na [tatou] i taua rā ra i te vaitata anga mai”?

¹⁷ I te vaitata anga mai te openga, kia tauta maata ua atu rai tatou kia aere mai ki ta tatou au akaputuputu anga Kerititiano no te akamorianga. Ei akangateitei anga i te tu tapu o ta tatou au uipaanga, auraka tatou e tuku i te angaanga a teianei ao, te angaanga a te apii, me kare i te apii i te po kia akatau tatou i te aere putuputu anga ki te uipaanga ma to tatou au taeake irinaki. Te anoano ra tatou i te maroiroi te aere maira na roto i te kapitianga. Te oronga maira ta tatou au uipaanga no te putuputuanga i te au atianga kia tatou kia kite atu i tetai e tetai, kia oronga atu i te akamaroiroi anga, e kia akono marie tetai i tetai kia “aroa, e i te angaanga memeitaki ra.” Te anoano ra tatou i te rave i teia “no te mea te akara na [tatou] i taua rā ra i te vaitata anga mai.” (Ebera 10:24, 25) No reira, kia akaari ua rai tatou i te tu akangateitei anga tau no ta tatou au akaputuputu anga tapu na te aere putuputu anga mai, te kakau tau, e te tu akono meitaki. Na te rave anga i te reira, te akaari ra tatou e te akono ra tatou i to Iehova manako no te au mea tapu.

Na te Akamanako Akaou Anga

• Eaa te akaari maira e kia akono tapuia te au akaputuputu anga a te iti tangata o Iehova?

• Eaa te au tu o ta tatou au uipaanga te akapapu maira e e au akaputuputu anga tapu te reira?

• Akapeea te tamariki i te akaari anga e te akangateitei ra ratou i te tu tapu o ta tatou au uipaanga?

• Eaa ra tatou ka akariro ei i te aere putuputu mai anga ki te uipaanga ei tu tinamou no to tatou oraanga?

[Au Uianga Apii]

[Au Tutu i te kapi 28]

Noatu e teiea te ngai e raveia ra te reira e au akaputuputu anga tapu i te uipa mai i te akamori ia Iehova

[Tutu i te kapi 31]

Te aere maira ta tatou tamariki ki te au uipaanga kia akarongo e kia apiiia