Akatu Anga Taokotaiia no te Akapaapaa i te Atua

KUA kite akera te au tangata i runga i tetai enua o Toromona Airani i tetai Are Uipaanga Patireia o te Au Kite o Iehova. Kua karanga tetai vaine e: “I roto i ta matou akonoanga, e maata ta matou au ravenga koi moni. E pati ana matou ki to matou au mema kia oronga mai i te moni, inara kare e rava ana ta matou moni ei akatu i tetai are pure ou. Akapeea i rauka mai ei ia kotou e te Au Kite ta kotou moni?” Kua pau atu te Kite tana e tuatua ra e: “E akamori ana matou ia Iehova ei pamiri i te ao katoa. Kua oronga to matou putuputuanga e to matou au taeake takapini i te ao tei anoanoia no te Are Uipaanga Patireia ou. Na Iehova i apii mai ia matou kia taokotai i roto i te au mea katoa.”

Ka kite koe i te tu taokotai i rotopu i te Au Kite o Iehova i roto i ta ratou au angaanga, kapiti mai te akatu anga i te au Are Uipaanga Patireia e tauatini ua atu. Ko taua tu taokotai anga i te rave anga i teia au angaanga nei kare i te mea ou. Kua tupu ana te reira i rotopu i te au tangata o te Atua e tauatini ua atu mataiti. Akapeea ra?

Akatu Anga i te Tapenakara e te Iero

No runga i te iti tangata Iseraela, e 3,500 mataiti i topa kua akakite a Iehova kia Mose e: “E anga oki ratou i tetai ngai-tapu noku.” (Exodo 25:8) No runga i te parani o teia angaanga patuanga, kua tuatua katoa a Iehova e: “Mei te tu o te puakapa, e te tu o tona katoa ra au mea, taku i akakite kia koe [taiku ra kia Mose], e akapera kotou [taiku ra ki te iti tangata katoa] i te anga.” (Exodo 25:9) Kua akakite mai a Iehova i te au parani akatakaia no te are o te ngai tapu, te au apinga, e te au apinga akamanea. (Exodo 25:10–​27:19) Ka riro mai teia “puakapa,” me kore te tapenakara, ei ngai no te akamorianga mou no Iseraela katoatoa.

Kare tatou i kite e eia tangata tei rave ana i te akatu anga, inara kua pati katoatoaia te ngati Iseraela kia turu mai i te reira. Kua akakite a Mose kia ratou e: “E rave kotou i te atinga na Iehova no roto ia kotou uaorai nei: ko te tangata ngakau oronga, e apai mai aia i te reira, koia te atinga na Iehova.” (Exodo 35:4-9) Akapeea te au Iseraela i te ariu anga atu? Te akakite maira a Exodo 36:3 e: “Kua tiki maira ratou mei mua i te aroaro o Mose i taua atinga katoa ra, ta te tamariki a Iseraela i apai mai no taua angaanga ra, no te ngai-tapu kia rave ra. E kua apai ua maira ratou i te apinga i tera popongi, i tera popongi.”

Kare i roa ana e aka putunga apinga tei orongaia mai, e e maata atu te apinga ta te au tangata i apai mai. Kua akakite iora te au tangata karape tei rave i te angaanga kia Mose e: “E apinga maata rava atura ta te au tangata i apai mai nei, no te angaanga ta Iehova i akaue maira e rave, e toe ïa.” No reira kua tuatua atu a Mose: “Otira ua te au tane e te au vaine katoa i te rave i te atinga no te ngai tapu ra.” Eaa tei tupu mai? “E apinga maata oki tei rauka, e ope roa te au angaanga katoa i te oti, e e toe rai.”​—Exodo 36:4-7.

 No te tu aroa o te ngati Iseraela, kua oti mai te tapenakara i mua ake i te openga o te mataiti. (Exodo 19:1; 40:1, 2) Na te turu anga i te akamorianga mou, kua akangateitei te au tangata o te Atua ia Iehova. (Maseli 3:9) I muri mai, e angaanga akatu anga maata atu ta ratou ka rave. E tei tupu akaou mai, ka rauka i te aronga pouroa te inangaro ra i te tauturu mai i te angaanga, me e tu karape to ratou i te patu anga me kare.

Vaitata rai e e rima anere mataiti i muri ake te akatu anga i te tapenakara, kua akamata te Iseraela i te patu i te iero i Ierusalema. (1 Ariki 6:1) E are manea tikai e te tinamou teia tei maaniia ki te toka e te rakau. (1 Ariki 5:17, 18) Kua oronga a Iehova i te au parani no te iero kia Davida ‘no ko mai i te vaerua ra.’ (1 Paraleipomeno 28:11-19) Inara kua iki aia i te tamaiti a Davida ia Solomona kia arataki i te angaanga akatu anga. (1 Paraleipomeno 22:6-10) Kua oronga a Davida i tana turuanga ngakau katoa ki te angaanga. Kua rauka mai iaia te au toka, te rakau, e tetai au apinga ke atu e e maata tana uaorai auro e te ario i oronga mai. Kua akamaroiroi katoa aia i tona au taeake Iseraela kia oronga ua, i te ui anga kia ratou e: “Koai te tangata e tika iaia kia aere ma te rima i ki kia Iehova ra i teianei râ?” Akapeea te au tangata i te ariu anga mai?​—1 Paraleipomeno 29:1-5.

Te tae anga ki te tuatau ka akamata ai a Solomona i te akatu i te iero, e tauatini ua atu au tane o te auro e te ario tei rauka mai iaia. E maata tikai te veo e te auri kare e ravenga e rauka ai i te pau i taua au apinga. (1 Paraleipomeno 22:14-16) Na roto i te tauturu anga e te turu anga a Iehova i te Iseraela katoatoa, kua oti mai te angaanga i te itu e te apa mataiti.​—1 Ariki 6:1, 37, 38.

“Te Are o te Atua”

Kua tapaia te tapenakara e te iero e ko “te are o te Atua.” (Te Au Akava 18:31; 2 Paraleipomeno 24:7) Kare rava a Iehova e anoano ana i tetai are. (Isaia 66:1) Kua tuku aia kia akatuia taua au are ei puapinga anga no te tangata. E tika rai, i te akatapuia anga te iero, kua ui a Solomona e: “Ka noo tika mairai ainei te Atua ki runga i te enua nei? i na, te rangi nei, e te rangi o te au rangi ra, kare rai koe e o; ka tangaʼi oki i teianei are i akatuia e au nei?”​—1 Ariki 8:27.

Kua tuatua a Iehova na roto i tana peroveta ko Isaia: “E tapaia oki toku are, I te are pure anga no te tangata ravarai.” (Isaia 56:7) Te au atinga e te au pure tei orongaia i roto i te iero, pera katoa te  au oroa tei raveia i reira e te au tangata te akangateitei ra i te Atua​—te ngati Iuda e te au tangata kare i te ngati Iuda​—kua tukunaia kia akavaitata atu ratou ki te Atua mou. Kua rauka mai ia ratou te pirianga oa e te paruru anga a Iehova na te akamorianga i roto i tona are. Te pure ta Solomona i oronga i te akatapuanga i te iero te akakite pakari maira i teia tuatua mou. Ka rauka ia koe i te tatau i tana au tuatua akakeu anga ki te Atua i roto ia 1 Ariki 8:22-53 e e 2 Paraleipomeno 6:12-42.

Kua takoreia taua are taito o te Atua mou, inara te tou maira te Tuatua a te Atua ki tetai tuatau me akaputuputuia mai te au tangata no te au pa enua ravarai kia akamori ia Iehova i roto i tetai iero maata roa atu i te pae vaerua. (Isaia 2:2) Te atinga apa kore o te Tamaiti anau tai a te Atua, tei akatutuia mai e te au atinga manu tei orongaia i te iero ra, ka riro mai ko te ravenga ia kia akavaitata atu kia Iehova. (Ioane 14:6; Ebera 7:27; 9:12) Te akamori nei te Au Kite o Iehova i te Atua i roto i tetai tu teitei rava, e te tauturu nei ratou i te manganui kia akapera rai.

Te Angaanga Akatu Anga o Teia Tuatau

Takapini i te ao katoa, te tavini ra te Au Kite o Iehova i te Atua mou. Kua riro mai ratou “ei enua maroiroi,” te tupu maata ua atura tona au tangata. (Isaia 60:22) Te ngai puapinga maata no te uipaanga a te Au Kite o Iehova koia oki ko te Are Uipaanga Patireia. * E tauatini ua atu o teia au are te taangaangaia ra, e e tauatini ua atu te inangaroia ra.

Te “oronga puareinga ua” ra te Au Kite o Iehova i te akatu i te au Are Uipaanga Patireia te anoanoia ra. (Salamo 110:3, NW) Inara, e maata te taime kare te Au Kite o taua ngai ra e kite ana i te akatu are, e i tetai au ngai e maata te turanga putaua e kiteaia maira. I te mataiti 1999 kua akamata te Pupu Akaaere o te Au Kite o Iehova i tetai porokaramu no te patu anga i te Are Uipaanga Patireia kia tauturu kia akakoreia taua au arairai anga. Na roto i teia porokaramu, ka aere atu te Au Kite tei kite i te angaanga patu anga ki te au ngai mamao kia tereni i to ratou au taeake e te au tuaine kia akatu i te au Are Uipaanga Patireia. Na taua aronga tei tereniia e rave ua atu i te angaanga akatu anga i taua ngai ra. Eaa tei tupu no teia tauta anga takake?

Te tae anga kia Peperuare i te mataiti 2006, kua tere atu ki te 13,000 Are Uipaanga Patireia ou tei patuia ta te Au Kite o Iehova i kite mai i roto i te au enua kare e rava ana te moni. E tatau i te au tuatua a tetai papaki tei taangaanga i te au Are Uipaanga Patireia ou.

“Te avereti o te aronga tei aere mai ki te putuputuanga e 160. I ko i te uipaanga mua i muri ake i te akatuia anga te Are Uipaanga Patireia ou, kua kake mai te numero o te aronga tei aere mai ki te 200. I teianei, e ono marama i muri mai, e 230 o ratou aronga tei aere mai. Te kiteaia nei ta Iehova akameitakianga no runga i te patu anga i teia au are manea inara ma te tau.”​—Na tetai akaaere kotinga i Ekuatoa.

“No tetai au mataiti e ui mai ana te au tangata kia matou, ‘Aea e rauka mai ei ia kotou tetai Are Uipaanga Patireia mei ta matou i kite ana i roto i ta kotou au puka?’ Kia akameitakiia a Iehova, e ngai tau to matou i teianei no te akamorianga. I rave ana matou i te au uipaanga i roto i te are toa o tetai taeake, te avereti o te aronga tei aere mai e 30. I te uipaanga mua i roto i te Are Uipaanga Patireia ou, e 110 tangata tei aere mai.”​—Putuputuanga i Ukanata.

“E rua nga tuaine painia tamou tei ripoti mai e e mea mataora tikai i te angaanga anga i te ngai tutu aere i te akatuia anga te Are Uipaanga Patireia. E akarongo puareinga mai ana te au tangata i roto i te angaanga orometua mei tera  ngutupa ki tera ngutupa pera katoa i roto i te au akanoonoo anga ua. Te rave nei teia nga tuaine e 17 apii Pipiria, e te aere mai nei teia aronga apiipii Pipiria e manganui ki te au uipaanga.”​—Opati manga i Toromona Airani.

“Kua karanga mai tetai orometua te noo ra i te pae mai e te akatupu maira te Are Uipaanga Patireia ou i te tu tau ki te ngai katoatoa e no teianei te parau ra te au tangata i teia ngai. E manganui te aere maira na te pae e tuatua mai ana no runga i te manea o te are uipaanga. Te oronga ra teia i te au atianga memeitaki ki te au taeake kia tuatua akakite aere. E maata ua atu te au tangata te inangaro ra i te kite i to tatou taokotai anga taeake i te ao katoa. Ki te manganui kare e aere mai ana ki te au uipaanga i te au mataiti kua akakeuia kia akaputuputu taokotai akaou mai.”​—Opati manga i Maianama.

“Kua pati atu tetai tuaine i tetai tangata tei ariki mai ki te ngai patu anga i te ngai e noo ra aia. Kua karanga mai taua tangata ra i muri mai: ‘Manako tikai au e kare te aronga angaanga e akatika mai kia aere atu au. Poitirere ra au, kua aravei mai te Au Kite iaku ma te aroa. Te angaanga pakari ra te au tane e te au vaine, kare e kaimoumou taime ana. Te tupu ra te rotai e te tu mataora.’ Kua ariki taua tangata i tetai apii Pipiria e kua akamata i te aere mai ki te au uipaanga. Kua karanga mai aia i muri mai: ‘Kua taui toku manako. I teianei kare au e akaruke i te Atua e kua kitea e au aia.’”​—Opati manga i Koromopia.

E Puapinga ta Tatou Turu Anga

E tuanga puapinga maata te akatu anga i te au Are Uipaanga Patireia no ta tatou angaanga  tapu. Kia akameitakiia tikai te Au Kite o Iehova i te ao katoa no te turu anga i taua angaanga​—i te pae moni e tetai atu tu ke. Inara, kia maara ia tatou e e puapinga maata katoa tetai au tu no te angaanga tapu. Mei tetai taime ki tetai taime, e tupu ana ki te au Kerititiano te au tumatetenga natura e te anoanoia ra ta tatou tauturu anga. Kua riro te neneianga i te au puka Pipiria ei tuanga maata i te turu anga i te angaanga tapu. Te maata anga ia tatou kua kite ana i te mana o te makatini me kare i te puka tei akatumuia ki runga i te Pipiria tei orongaia ki tetai tangata akono tau. Kapiti atu, e puapinga maata tikai i te turu anga i te au mitinari e tetai ke i roto i te angaanga tamou takake. E tuanga maata ta taua au Kerititiano akaatinga anga uaorai i te akatotoa anga i te angaanga tutu anga i teia tuatau openga.

E maata te rekareka o te aronga tei oronga atu ki te akatu anga i te iero. (1 Paraleipomeno 29:9) E i teia tuatau, te oronga anga i te turu anga ki te akamorianga mou ma ta tatou au akaputuanga te apai katoa maira i te mataora kia tatou. (Angaanga 20:35) Ka kite tatou i taua mataora me tuku tatou i ta tatou au akaputuanga moni ki roto i te pia tei akanooia no te Moni Tauturu no te Are Uipaanga Patireia e me oronga atu tatou no te angaanga i te ao katoa, i te turu anga i reira i tetai au angaanga te kapiti maira i te tutu aere anga i te tuatua meitaki o te Patireia. Na roto i tetai tu umere, te taokotai nei te au Kite o Iehova i teia tuatau i roto i te akamorianga mou. Kia akaki pouroaia tatou e te mataora te aere maira no te turu anga i taua akamorianga!

[Tataanga Rikiriki i Raro]

[Pia/​Tutu i te kapi 20, 21]

AU RAVENGA TA ETAI E IKI RA NO TE ORONGA

AKAPUTUANGA NO TE ANGAANGA I TEIANEI AO

E manganui te akapae ra, me kore te akapapa ra, i tetai moni no te tuku ki roto i te au pia akaputu anga tei akairoia: “Akaputuanga no te Angaanga i Teianei Ao​—Mataio 24:14.”

Te au marama katoatoa, e tuku ana te au putuputuanga i teia au moni ki te opati manga o te Au Kite o Iehova te akono ra i to te reira au enua tataki tai. Kia tuku tika katoaia te au moni tauturu tei oronga uaia ki te Treasurer’s Office, Watchtower Bible and Tract Society of New Zealand, PO Box 75142, Manurewa, Manukau 2243. Ka tau te au apinga akamanea me kore tetai atu au apinga puapinga kia oronga katoaia. Kia aru mai tetai reta poto ua i te akakite anga mai e e au apinga aroa tikai taua au apinga ra no teia au akaputu anga.

AKANOOANGA I TE TURANGA NO TE TAUTURU

Penei ka orongaia te moni na roto i tetai akanooanga takake e, me ka pati mai te tangata oronga ra i te reira, ka akaokiia atu te moni oronga ua kiaia. No tetai akakite anga maata atu, e tata ki te Treasurer’s Office i te atereti i akakiteia i runga akenei ine.

PARANIANGA ORONGA UA

I te pae i te au moni oronga aroa ua e te au moni oronga tauturu ua, te vai ra tetai atu au ravenga orongaanga no te akapuapinga i te angaanga Patireia i teianei ao. Te kapiti maira teia i te:

Initurini: Penei kia tukuia te ingoa o te Watchtower Society e ko tei puapingaia mei tetai koreromotu initurini no te oraanga me kore tetai akapapaanga akaangaroi anga/moni pakari.

Apinga Akaputuia e te Au Poni: Penei ka orongaia te au apinga akaputuia e te au poni ki te Watchtower Society ei apinga aroa.

Are e te Enua: Penei ka orongaia te au enua e te au are ka rauka i te oko ki te Watchtower Society ei apinga aroa me kore, na te akono anga i tetai koreromotu no te au apinga o te oraanga ki tei orongaia mai i te reira, te ka rauka iaia i te noo ki roto i te tuatau e ora ra aia. Kia araveiia atu te opati manga i toou enua i mua ake ka akamanaia ai tetai ua atu enua e te are.

Au Koreromotu e te Au Taokotaianga: Penei ka oronga tikaia te apinga me kore te moni ki te Watchtower Society na roto i tetai koreromotu tikaia e te ture, me kore kia tukuia te ingoa o te Watchtower Society te ka puapingaia no tetai koreromotu no te taokotaianga.

Kia rauka mai te tauturu i te akapapa anga i etai tu parani anga kia puapingaia te angaanga i te ao katoa a te Au Kite o Iehova, e aravei etu i te Treasurer’s Office, ine, na te tataanga me kare na te terepaoni anga, ki te ngai nooanga tei papaia i raro ake.

Treasurer’s Office

Watchtower Bible and Tract Society of New Zealand

PO Box 75142

Manurewa, Manukau 2243

Telephone: (09) 267-2227

[Tutu i te kapi 18]

Ta tatou au tauta anga taokotaiia ka rauka i te patu i te au Are Uipaanga Patireia i te ao katoa

[Tutu i te kapi 18]

Are Uipaanga Patireia ou i Kaana