Akono ia Kotou Uaorai i Roto i te Aroa o te Atua!
Akono ia Kotou Uaorai i Roto i te Aroa o te Atua!
“E aku au akaperepere e, e akono ia kotou uaorai i roto i te aroa o te Atua ma te manako anga i te oraanga mutu kore.”—IUDA 20, 21, NW.
1, 2. Akapeea koe i te noo tamou anga i roto i te aroa o te Atua?
E AROA maata tikai to Iehova i te au tangata i te ao katoa e kua oronga mai aia i tana Tamaiti anau tai kia rauka i te aronga e akono ra i te akarongo i roto iaia te ora mutu kore. (Ioane 3:16) E mea umere tikai i te kite mai i taua aroa ra! Me e tavini koe no Iehova, papu e ka inangaro koe i te kite mai i taua aroa ra e tuatau ua atu.
2 Te akakite maira te pipi ko Iuda e akapeea koe i te noo tamou anga i roto i te aroa o te Atua. “I te patu anga ia kotou uaorai i to kotou akarongo tapu maata ra, i te pure anga ma te vaerua tapu,” i tata ei a Iuda, “e akono ia kotou uaorai i roto i te aroa o te Atua, ia kotou e tiaki ra i te aroa ua o to tatou Atu ko Iesu Karaiti ma te manako anga i te oraanga mutu kore.” (Iuda 20, 21, NW) Te apiianga i te Tuatua a te Atua e te tutu anga i te tuatua meitaki, te tauturu ra ia koe kia patu ua atu rai ki runga i te “akarongo tapu maata”—te au apiianga Kerititiano. Kia noo tamou ua i roto i te aroa o te Atua, ka tau koe kia pure “ma te vaerua tapu,” me kore i raro i ta te reira aratakianga. Kia rauka te akameitakianga no te oraanga mutu kore, ka tau koe kia taangaanga katoa i te akarongo i roto i te atinga oko o Iesu Karaiti.—1 Ioane 4:10.
3. No teaa ra tetai pae i kore ei ei Au Kite akaou no Iehova?
3 Tetai pae tei akaari i te akarongo i mua ana, kare i noo tamou ki roto i te aroa o te Atua. No te mea kua iki ratou i te aruaru i tetai aerenga kino, kare ratou i te Au Kite akaou no Iehova. Akapeea koe i te kopae anga i te reira tupu anga? Penei na te akamanako oonu anga i runga i te au manako te ka aru mai, ka tauturu te reira i te tapu ia koe mei te raveanga i te ara e i te akono ia koe uaorai i roto i te aroa o te Atua.
Akaari i Toou Aroa no te Atua
4. Eaa te puapinga i te akarongo ki te Atua?
4 E akaari i toou aroa no te Atua na te akarongo anga kiaia. (Mataio 22:37) ‘Teia oki te aroa i te Atua,’ i tata ei te apotetoro ko Ioane, “ko te akono i tana au akauenga; kare oki tana au akauenga i te mea teiaa.” (1 Ioane 5:3) Ka rauka tetai tu akaraanga no te akarongo ki te Atua i te akaketaketa ia koe i te patoi i te timataanga e ka akarekareka te reira ia koe. Kua karanga te tata taramo: “E ao to te tangata, kare e aaere i te ako a te akono kore i te Atua, kare e tu i te arataa o te aronga rave ara ra, . . . inara te rekareka ra aia i te ture a Iehova.”—Salamo 1:1, 2, NW.
5. Eaa ta te aroa no Iehova ka akakeu ia koe kia rave?
5 Toou aroa no Iehova ka akakeu ia koe i te kopae i te raveanga i tetai ara kino te ka akakino i tona ingoa. “Auraka e tukuia mai te putaua e te apinga nui iaku nei,” i pure ei a Agura. “E akaangai mai koe iaku ki te kai e tau iaku ra: Ko te ki ua aea oki au, e kua uuna iora au ia koe, ko te karanga aea oki au e, Koai a Iehova? e ko te putaua aea oki au, e kua keia iora au, e ko te akaiki puapinga kore ua aea au i te ingoa o taku Atua ra.” (Maseli 30:1, 8, 9) E tauta kia kore e ‘akaiki puapinga kore ua i te ingoa o te Atua’ na te apai anga mai i te akakinoanga ki runga iaia. Mari ra, e tauta ua atu rai i te rave i te au apinga tuatua tika te akakaka ra iaia.—Salamo 86:12.
6. Eaa te ka tupu me rave akakoro koe i te ara?
6 E pure putuputu ki toou Metua aroa i te rangi no te tauturu kia patoi atu i te timataanga kia piri atu i te rave i te ara. (Mataio 6:13; Roma 12:12) E aru ua rai i te ako a te Atua kia kore taau au pure e araiia. (1 Petero 3:7) Me ka rave akakoro koe i te ara, e kino te au tupuanga, no te mea te arai akatutu ra a Iehova i te pure a te aronga meameaau mei tetai tumu rangi rai kia kore ta ratou au pure e tae kiaia. (Te Aue o Ieremia 3:42-44) E no reira e akaari i te tu akaaka, e e pure kia kore koe e rave i tetai apinga te akakore ra ia koe i te pure anga ki te Atua.—2 Korinetia 13:7.
Akaari i te Aroa no te Tamaiti a te Atua
7, 8. Akapeea te aruanga i te ako a Iesu i te tauturu i tetai kia patoi atu i tetai aereanga kia rave i te ara?
7 E akaari i te aroa no Iesu Karaiti na te akono anga i tana au akauenga, no te mea ka tauturu teia ia koe i te patoi i tetai aerenga kia rave i te ara. “Akono kotou i taku au akauenga,” i karanga ei a Iesu, “e vai akaperepereia atu kotou e au; mei iaku i akono i te au akauenga a taku Metua ra, e e vai akaperepereia mai au e ia.” (Ioane 15:10) Akapeea te akonoanga i teia au tuatua a Iesu i te tauturuanga ia koe kia noo tamou ua ki roto i te aroa o te Atua?
8 Ka tauturu te akamanako meitakianga i te au tuatua a Iesu ia koe i te akono tamou i te au kaveinga no te tu akono tau. Te karanga ra te Ture a te Atua kia Iseraela e: “Auraka rava koe e akaturi.” (Exodo 20:14) Inara kua akataka mai a Iesu i tetai kaveinga i muri ake i te reira ture i te na ko anga e: “Ko tei akara ua atu i te vaine ei akatupu i te inangaro, kua akaturi takere ïa aia i taua vaine ra i tona uaorai ngakau.” (Mataio 5:27, 28) Te akakite maira te apotetoro ko Petero i tetai pae i roto i te putuputuanga o te anere mataiti mua e “kua ki to ratou mata i te akaturi” e kua ‘akataē i te aronga tinamou kore.’ (2 Petero 2:14) Inara, kia kore e aite mei ia ratou rai, ka rauka ia koe i te kopae i te au ara no te pirianga ainga me aroa e me akarongo koe ki te Atua e kia Karaiti e ka tauta pakari i te akono marie i toou pirianga kia raua.
E Tuku e na te Vaerua o te Atua e Arataki ia Koe
9. No runga i te vaerua tapu, eaa te ka tupu me maro ua atu rai tetai i roto i te ara?
9 E pure no te vaerua tapu o te Atua, e e tuku i te reira kia arataki ia koe. (Luka 11:13; Galatia 5:19-25) Me ka rave ua atu rai koe i te ara, penei ka akaatea te Atua i tona vaerua mei ia koe. I muri ake i to Davida araanga no runga ia Bate-seba, kua pati akatenga aia ki te Atua: ‘Auraka koe e tuaru iaku i mua i to aroaro nei, auraka oki e rave ke atu i to vaerua tapu iaku nei.’ (Salamo 51:11) No te mea kare aia i tataraara ana, kua ngere te Ariki ko Saula i te vaerua o te Atua. Kua ara a Saula na te oronga anga i tetai atinga karakaratio e te akapae ke anga i te au manu, te puakatoro, e te ariki o te ngati Amaleka. Kua akaatea a Iehova i muri akera i tona vaerua tapu mei ia Saula.—1 Samuela 13:1-14; 15:1-35; 16:14-23.
10. Eaa tatou ka kopae ei i te manakoanga tikai kia rave i te ara?
10 E kopae i te manakoanga tikai kia rave i te ara. “Kua rauka na ia tatou te kite i te tuatua-mou ka rave inangaro mou atu ei i te ara,” i tata ei te apotetoro ko Paulo, “kare ua atu e tarangaara toe.” (Ebera 10:26-31) Mei teaa tikai te tumatetenga me ka rave akakoro koe i te ara!
Akaari i te Aroa Mou no Etai Ke
11, 12. Na roto i teea au tu e tapu ana te aroa e te ngateitei i tetai mei te piri atu anga ki roto i te ainga tau kore?
11 Ka tapu te aroa no te au taeake ia koe i te piri atu ki roto i te ainga tau kore. (Mataio 22:39) Ka akakeu taua aroa ra ia koe i te paruru i toou ngakau kia kore te reira e akanauru ia koe i te kimi atu i te inangaro o te tokorua o tetai tangata akaipoipo. Te rave anga i te reira ka taki atu ki te ara no te akaturi. (Maseli 4:23; Ieremia 4:14; 17:9, 10) E aru ia Iobu tuatua tika, kare aia i akatika ana iaia uaorai kia akamanako atu i tetai vaine ke mari ra ko tana vaine ua rai.—Iobu 31:1.
12 Te akangateiteianga i te tu tapu no te akaipoipo ka tauturu ia koe i te kopae i te ara kino. Kua akakoro te Atua i te akaipoipoanga ngateitei e te au pirianga ainga e ko te ravenga ia no te anau tamariki. (Genese 1:26-28) E akamaara e e pirianga to te au mero no te ainga ki te oraanga, e e apinga tapu ia. Kare te aronga poneia e te aronga akaturi e akarongo ana ki te Atua, e akaviivii ana ratou i te angaanga no te pirianga ainga, e akangateitei kore ana i te tu tapu o te akaipoipoanga, e te takinga kino ra i to ratou uaorai kopapa. (1 Korinetia 6:18) Inara te aroa no te Atua e te tangata tupu kapiti atu i te akarongo tau ki te Atua, ka tauturu i tetai tangata mei te piri atu anga ki roto i tetai angaanga te ka arataki atu iaia kia akaateaia mei te putuputuanga Kerititiano.
13. Na roto i teea mataara te tangata akaturi e “kaimoumou ana i tana au apinga”?
13 Ka inangaroia tatou i te akakore atu i te au manako no te ara kia kore tatou e akatupu i te taitaia ki te aronga e akaperepere ana tatou. “Ko te tauoaoa ra i te vaine akaturi, kua kaimoumou aia i tona apinga,” i karanga ai a Maseli 29:3. Tetai tangata akaturi tataraara kore, te akakore ra i tona pirianga ki te Atua e kua takino i tona pirianga i roto i te pamiri. Ka rauka i tana vaine i te kopae iaia. (Mataio 19:9) Noatu me ko te tane me kore ko te vaine te tangata rave tarevake, e akatupu ana te akatakakeanga o te akaipoipo i te mamae maata ki te tokorua meitaki ua, te tamariki, e tetai atu. Kare ainei koe e akatika e te kite anga i te akapueu anga o te tu akono tau kore, ka akakeu te reira ia tatou i te patoi i te timataanga i te piri atu anga ki roto i te reira?
14. Eaa te apiianga no runga i te rave tarevake tei kiteaia mei ia Maseli 6:30-35?
14 Te tikaanga e kare atu e ravenga i te tupau atu i te akaturi, ka akakeu te reira i tetai tangata kia kopae i teia angaanga noinoi kino pakari. Te akaari maira a Maseli 6:30-35 e penei ka tangi te au tangata i tetai tangata keikeia tei keia no te mea e pongi tona, i na e rikarika ana ratou i tetai tangata akaturi no te mea e akakoroanga kino tona. Kua “ta [aia] i tona uaorai vaerua [me kore, oraanga].” I raro i te Ture a Mose, kua tamateia atu aia. (Levitiku 20:10) Tetai tangata tei akaturi, te akamamae ra i tetai atu kia rauka ua tona inangaro tau kore i te akatupuia, e kare tetai tangata akaturi tataraara kore e noo tamou ua ki roto i te aroa o te Atua mari ra ka akaateaia mei te putuputuanga Kerititiano ma.
Tamou Marie i Tetai Akava Ngakau Meitaki
15. Eaa te turanga o tetai akava ngakau akairoia “mei tei tungia ki te auri vera”?
15 Kia noo tamou ua ki roto i te aroa o te Atua, kare e rauka ia tatou i te akatika ua i to tatou akava ngakau kia aru ua ki ta te tu ara. I te akaraanga, auraka tatou e ariki atu i te au turanga viivii o te ao nei no te tu akono tau, e kia akamanako meitaki tatou i te au apinga mei ta tatou iki anga o te au taeake, te au apinga tatau, e te tamataoraanga. Te akamatakite maira a Paulo: “Kia tae ki te au tuatau a muri atu e akaruke ei tetai papaki i tei akarongoia nei, i te akono anga atu i te au vaerua pikikaa, e te tuatua o te au demoni ra; No te pikikaa ra; ko te aronga i tungia to ratou akavangakau ki te auri vera.” (1 Timoteo 4:1, 2) Tetai akava ngakau tungiaia “ki te auri vera” mei tetai kiko pakapaka tei natinati te uaua e kare e mamae me pakiaia. Kare taua akava ngakau ra e akamatakite akaou mai ia tatou kia akaatea ke mei te au apoteiti e mei te au turanga te ka akatupu ia tatou kia topa ke atu mei te akarongo.
16. Eaa i puapinga ai te akava ngakau meitaki?
16 Tei runga to tatou ora i to tatou rauka anga tetai akava ngakau meitaki. (1 Petero 3:21) Na roto i to tatou irinaki i roto i te toto akamaringiia o Iesu, kua tamaia to tatou akava ngakau mei te au angaanga mate, “kia akamori i te Atua ora ra!” (Ebera 9:13, 14) Me ka rave akakoro tatou i te ara, ka akaviiviiia to tatou akava ngakau e kare tatou ei au tangata ma akaou tei tau no te angaanga a te Atua. (Tito 1:15) Inara, ma ta Iehova tauturu, ka rauka ia tatou te akava ngakau meitaki.
Tetai Atu Mataara no te Kopae i te Tu Tarevake
17. Mei teaa te puapinga kia ‘aru totomapu ia Iehova’?
17 ‘E aru totomapu ia Iehova,’ mei ta Kaleba o Iseraela taito rai i rave. (Deuteronomi 1:34-36) E rave i ta te Atua e umuumu maira ia koe, e auraka rava e kai mei te “kaingakai a te au demoni.” (1 Korinetia 10:21) E patoi i te apoteiti. E ariki rekareka i te kai pae vaerua te vai anake ra i te kaingakai a Iehova, e kare koe e arataki ke ia e te au puapii pikikaa me kore te au mana vaerua kino. (Ephesia 6:12; Iuda 3, 4) E akamou ki runga i te au apinga pae vaerua, mei te apii i te Pipiria, aereanga ki te uipaanga, e te angaanga orometua. Papu e ka mataora koe me aru pu tikai koe ia Iehova e kia maata taau angaanga i roto i te angaanga a te Atu.—1 Korinetia 15:58.
18. Akapeea te mataku i te Atua i te akakeuanga i toou tu?
18 E tauta kia ‘akamori i te Atua ma te akaaka e te mataku.’ (Ebera 12:28) Ka akakeu te mataku ngateitei no Iehova ia koe kia patoi i tetai ua atu aerenga tarevake. Ka tauturu te reira ia koe i te akono ia koe uaorai i te rotaianga ki te ako a Petero ki te aronga akatainuia: “E te pure na kotou i te Metua, ko tei eumiumi i tei tau i ta te tangata katoa ra angaanga, ma te akara kore i te tu o te tangata, ka noo i to kotou tuitarere anga i ku nei ma te mataku.”—1 Petero 1:17.
19. Eaa koe ka tamou ua atu ei i te akono i te au apinga taau e kite maira mei te Tuatua a te Atua?
19 E akono putuputu i taau i kite mai mei te Tuatua a te Atua. Ka tauturu teia ia koe i te kopae i te ara kino no te mea ka riro mai koe “na te tangata pakari ïa, na te aronga no te mātau i kite ei to ratou ngakau i te meitaki e te kino.” (Ebera 5:14) E kia manako kore ua i taau e tuatua ra e e rave ra, kia maroiroi koe kia rauka ia koe i te aaere ei tangata pakari, ma te “taporoporo marie i te tuatau” i roto i teia au tuatau kino. “Kia kite ra kotou i to te Atu ra anoano,” e kia rave ua atu rai i te reira.—Ephesia 5:15-17; 2 Petero 3:17.
20. Eaa tatou ka kopae ei te morimori?
20 Auraka e akatika kia o mai te tu morimori—te inangaro noinoi i te au apinga a tetai ke. Te karanga maira tetai o te Ture Ngauru: “Auraka rava koe e morimori i te are o to tangata tupu, auraka katoa koe e morimori i te vaine a to tangata tupu, e tona tavini tane, e tona tavini vaine, e tana puakatoro e tana asini, auraka katoa i te au mea ravarai a to tangata tupu ra.” (Exodo 20:17) Te paruru nei teia ture i te are, te vaine, te au tavini, te au manu e te vai atura, a tetai tangata. Inara tei puapinga maata rava atu ko te tuatua a Iesu e, te akaviivii ra te morimori i tetai tangata.—Mareko 7:20-23.
21, 22. Eaa te au ravenga ta tetai Kerititiano ka rave kia kore e o atu ki roto i te ara?
21 E akono i te au ravenga kia kore te reira inangaro e taki atu ki te ara. Kua tata te pipi ko Iakobo e: “Kia akatatipakeia tetai, e kia riro ua atu i te kino, kua pikikaaia te reira tangata i tona uaorai anoano tika kore. E kua to ta te anoano tika kore ra, anau maira tana ko te ara; e kia rave akaopeia te ara ra, anau maira tana ko te mate.” (Iakobo 1:14, 15) Ei akaraanga, me e manamanata to tetai tangata i mua ana no runga i te inuinu, penei ka iki aia e kare e inangaro i tetai kava i roto i tona are. Kia kopae i te timataanga no runga i tetai tane me kore i tetai vaine, penei ka inangaroia tetai Kerititiano kia taui i tana ngai angaanga me kore tana ngai tikai e angaanga ana.—Maseli 6:23-28.
22 Auraka rava e akono atu i te takainga mua ki te ara. E akatupu ana te akameamea e te akamanakoanga i te au manako tau kore i te poneia me kore te akaturi. Te akakite anga i te au pikikaa meangiti ua e akaketaketa ana i tetai tangata kia akakite i te au pikikaa kino pakari e penei ka taki atu ki te rave matau anga i teia tu ara no te pikikaa. E akaparuparu ana te au keikeiaanga rikiriki i te akava ngakau o tetai tangata e aere rai e kua akamata aia i te keikeia maata. Ko tetai akamanako iti ua anga i tetai manako apoteiti, taopenga mai ka arataki te reira i tetai tangata ki te apoteiti tikai.—Maseli 11:9; Apokalupo 21:8.
Akapeea me kua Ara Koe?
23, 24. Eaa te pumaana ka rauka mai mei ia 2 Paraleipomeno 6:29, 30 e Maseli 28:13?
23 E apa ana te au tangata ravarai. (Koheleta 7:20) Inara me kua rave koe i tetai ara kino, ka rauka ia koe te pumaana mei te pure a te Ariki ko Solomona i te tomo anga o te iero o Iehova. Kua pure a Solomona ki te Atua: “Ko te au pure katoa e te au patianga e patiia e te au tangata katoa, e to au tangata katoa e Iseraela nei, i te tangata katoa i kite i tona uaorai mate, e tona uaorai kino, e kua oora tika mai i ona puke rima ki teianei are: Ei reira koe e akarongo mai ei i runga i te rangi i te ngai taau e noo ra, ka akakore ei i te ara, e akaaiteite mai koe i te tutaki ki te tangata katoa kia tau ki tona au aerenga, ko koe oki te kite i tona ngakau; ko koe anake rai oki te kite i te ngakau o te au tamariki a te tangata nei.”—2 Paraleipomeno 6:29, 30.
24 Ae, kua kite te Atua i te ngakau e e akakore ana aia i te ara. Te karanga maira a Maseli 28:13: “Ko tei tapoki i tana ara, kare ïa e manuia: ko tei aaki ra e kua akaruke, e aroaia ïa.” Na te aaki anga ma te tataraara e te akarukeanga i te ara, ka rauka i tetai tangata to te Atua aroa. I na, me tei roto koe i tetai turanga paruparu i te pae vaerua, eaa atu tetai te ka tauturu ia koe kia noo tamou ua ki roto i te aroa o te Atua?
Akapeea Koe me Pau?
• Akapeea tatou i te akono anga ia tatou uaorai i roto i te aroa o te Atua?
• Akapeea te aroa no te Atua e no Karaiti i te tauturuanga ia tatou i te patoi i tetai aerenga kia rave i te ara?
• Eaa ra te aroa tikai no tetai atu e akaariu ke ana ia tatou mei te piri atu anga ki roto i tetai angaanga ainga tau kore?
• Eaa tetai au mataara i te kopaeanga i te tu tarevake?
[Au Uianga Apii]
[Tutu i te kapi 21]
Te akaari maira a Iuda kia tatou e akapeea i te akono ia tatou uaorai i roto i te aroa o te Atua
[Tutu i te kapi 23]
E akatupu ana te akatakakeanga o te akaipoipo i te mamae maata ki te tokorua meitaki ua, e te tamariki
[Tutu i te kapi 24]
Mei ia Kaleba rai, ka tauta ainei koe i te ‘aru totomapu ia Iehova’?
[Tutu i te kapi 25]
E pure putuputu no te tauturu kia patoi i te timataanga