Apii i ta Kotou Tamariki kia Paupau

NO MEIKO mai a Perla e kua maara iaia i tona meangiti anga, e tauturu ana tona mama iaia kia akapapa i tetai au tuatua poto ua no te Apii Punanga Tiaki. Teianei e tamaiti rima mataiti ta Perla. Akapeea ra aia me tauturu iaia? “Mea mua ka anoanoia au kia akapapa. Iaku e rave ra i te reira, ka akara au i te parakarapa ka marama taku tamaiti, te ka rauka iaia i te akamarama i tana i kite. I reira ka akamou maua ki runga i tana e karanga ana e ‘taku parakarapa.’ Ka pati au iaia kia akamarama mai i te reira na te taangaanga anga i te au akaraanga tana i kite i te au ra ua nei. I reira ka tamoumou maua i te pauanga me eia taime. E taangaanga ana maua i tetai apinga mei te pu rai te maata kia kite aia e akapeea me mou i te reira me paupau aia. Mataora tikai au e kare e uipaanga e kare aia e paupau me kore e taki i tona rima ki runga. Te maataanga i te taime, ka aere aia ki ko i te tangata akaaere i mua ake i te uipaanga e ka akakite kiaia e ko teea tana au parakarapa.”

Ko Jens, e tangata pakari e tavini ra i roto i tetai pupu tuatua reo Hindi, e rua ana nga tamaroa, e rua e te a mataiti te pakari. Me akapapa raua ko tana vaine e te tamariki no te uipaanga, e taangaanga ana ratou i tetai peu ta Jens i tamou mai mei tona nga metua. Kua karanga aia: “Ka iki maua e ko teea au tuanga o te apii ka marama te tamariki. I reira kua tauturu maua ia raua kia akara akaou i te tumu manako me kore i te manako maata o te atikara, i muri ake kua ui maua i tetai au uianga ka inangaro maua kia pau raua i ko i te uipaanga. E poitirere ua ana rai maua i to raua tu natura me oronga i te au pauanga. Te akaata maira tikai to raua manako i ta raua i marama. Tei tupu, kua riro ta raua au pauanga ei akapaapaaanga ia Iehova e ei akakiteanga no to raua uaorai akarongo.”