E Apii Tei Riro Tona Au Karatuati ei Puapinga ki te Tangata i te Ao Katoa

I ROTO i te 98,000 e ara atu putuputuanga o te Au Kite o Iehova i roto i te 200 tuma au enua, te apii ra te Atua i te tangata mei te au tu oraanga ravarai. Ko te Pipiria te puka apii maata, e te akakoroanga o teia apiianga koia oki e tauturu i te tangata kia tupu i te pae vaerua na te apii anga kia kite i to te Atua anoano e te noo anga kia tau ki te reira. Ka puapinga maata roaia te aronga ka ariki i teia apiianga. Ta ratou i kite, ka akakite katoa ratou ki etai ke, kia tau ki te ikuikuanga a Iesu Karaiti e kia akariro i te tangata ei pipi.​—Mataio 28:19, 20.

Kapiti atu ki te porokaramu apiianga e raveia ana i roto i to ratou au putuputuanga, kua akanoo te Au Kite o Iehova i tetai au apii takake. Tetai o teia koia oki ko te Apii Terenianga Orometua. Kua akamanaia te reira i roto ia Okotopa 1987 i Pittsburgh, Pennsylvania, Marike. E 24 aronga apiipii e tuatua reo Papaa ana i roto i te pupu mua. Mei te reira taime mai e raveia ana te au apii i roto i te 21 reo, i roto i te 43 enua. Teianei, e manganui te aronga pakari kare i akaipoipo e te au tavini tauturu mei te 90 enua mai tei retitaia ki roto i te apii. Me oti te varu epetoma o te apii, ka tukuia te au karatuati kia tavini i te ngai e anoanoia ra, i to ratou uaorai enua me kore ki te ngai mamao. I te openga o te 2005, tere atu i te 22,000 orometua Kerititiano tei akaoti i te apii. Kua akameitaki maataia ta ratou au tautaanga akaaka kia akatotoa i te au anoano o te Patireia e kia puapingaia etai ke atu.​—Maseli 10:22; 1 Petero 5:5.

 Akapapa Anga kia Tae

Kia tae ki te Apii Terenianga Orometua, ka anoanoia te maataanga o te aronga apiipii kia pati i tetai taime orote mei ta ratou ngai angaanga. E riro ana teia ei manamanata i tetai au taime. I Vaii, kua pati e rua nga tangata Kerititiano tei patiia mai kia tae ki te apii, i tetai taime va mei ta raua ngai angaanga puapii. Ma te irinaki tikai kia Iehova, kua tuku raua i ta raua patianga, i te akamarama eaa raua i inangaro ei kia tae e eaa te puapinga ka rauka ia raua. Kua akatikaia mai tetai taime no raua roa ai kia aere.

I tetai au tu ra, kua akakiteia ki te Au Kite tei pati i tetai taime va e me oki mai ratou kare a ratou ngai angaanga. Kua iki ra ratou kia rauka te terenianga mei te akaaerenga a Iehova, noatu ka ngere ratou i ta ratou ngai angaanga. Tetai papaki i teia aronga nei kua tae mai te au patianga mei to ratou au pu i muri mai kia oki akaou ki te angaanga me oti te apii. Ka tau kia akataka poto ua i taua tu ikianga papu ra na teia mataara: Tuku i taau patianga, pure kia tauturu mai a Iehova, e oti akaruke ki roto i tona rima.​—Salamo 37:5.

“Apiiia e Iehova”

Te apiianga e raveia ana i roto i te varu epetoma, e au apiianga oonu tikai no roto i te Pipiria. Ka apiiia te aronga apiipii i te mataara e akaaereia ana to Iehova iti tangata kia rave i te anoano o te Atua, e akapeea ratou uaorai i te taangaanga meitaki atu anga i te Pipiria i roto i ta ratou angaanga orometua, i ko i te au uipaanga putuputuanga, e i ko i te au akaputuputuanga.

Kua tata tetai karatuati tei mareka tikai i teia ki tetai tangata apiipii kare i tae ake ki te apii: “E tika rava, e ko teia te tu apiianga meitaki rava atu te ka rauka ia koe. Teianei, e aiteanga puapinga maata atu to te irava tei karanga e ‘e apiiia e Iehova.’ Kua riro teia tupuanga ei akatanotano, i te ngakau e te tu o te tangata kia aru piri vaitata tikai i te akaraanga a Iesu Karaiti. Me tae mai koe ka kite tikai koe i te tupuanga puapinga roa atu o toou oraanga.”​—Isaia 54:13.

Aronga Tutu Evangeria, Au Tiaki, e te Au Puapii

E 117 enua e tavini nei te au karatuati o te Apii Terenianga Orometua i teianei. Te kapiti maira teia i te au enua i te Ataranatika, te Karapieni, e te au tuanga o te Patipika e pera katoa te maataanga o te au enua e opati manga to te Au Kite o Iehova i reira. Kua ripoti mai te au manga e te kiteaia ra te terenianga meitaki i rauka i te aronga apiipii i roto i ta ratou angaanga tutu evangeria, tiakianga, e te au angaanga apii. Kua riro te terenianga i rauka ia ratou ei tauturu ia ratou kia taangaanga meitaki atu i te Pipiria i roto i te angaanga orometua. (2 Timoteo 2:15) Me paupau i te au uianga a te aronga ngutuare, e taangaanga putuputu ana ratou i te puka Reasoning From the Scriptures * e te tereni i te au papuritia ke atu o te Patireia kia akapera rai. Kua eva ua te tu maroiroi o te au karatuati, e kua riro ta ratou au angaanga ei akaketaketa i te au putuputuanga.

E turanga akaperepereia tikai to te aronga pakari o te putuputuanga kia ‘tiaki i te anana,’ i te tauturu i te akono i te au anoano pae vaerua o etai ke. (1 Petero 5:2, 3) Kua tuatua tetai tangata pakari no runga i taua akanoonooanga e: “Rekareka tikai matou e te tuku maira te opati manga i te au taeake kua tereni meitakiia kia tauturu ia matou i te akono i te apainga o te tiaki anga i te anana a te Atua.” Kua akapera rai tetai manga i te Itinga Mamao: “E tu aroa tikai to te au karatuati. E aronga angaanga pakari tikai ratou e kua rauka te akangateiteianga oonu a te putuputuanga. Kua kite pu uaia e kua ariki rekarekaia to ratou tu akaaka, tu pumaana, e te aruaru. E akaatinga puareinga ua ana ratou ia ratou uaorai e ka rekareka ua i te neke ki te au putuputuanga e anoano maata ia ra te au tiaki.” (Philipi 2:4) Kua riro taua au tangata ra ei akaketaketa i to ratou au oa irinaki e kua tau tikai kia akameitakiia.​—1 Korinetia 16:18.

Kapiti atu i taua au mea ra, kua tauturu te au puapii o te Apii Terenianga Orometua i te aronga apiipii kia akameitaki atu i to ratou kite  ei au vaa tuatua i te ngai tangata. Na te taangaanga anga i te au manako e te au akoanga i rauka ia ratou, kare i roaia e maata te au karatuati ka rauka kia taangaangaia i roto i te au porokaramu a te akaputuputuanga kotinga e te uruoaanga tapere. Kua akakite tetai akaaere kotinga e “e meitaki tikai te au akoanga e te akamarama anga i te manako i roto i te uriurianga,” e oronga ana te au karatuati​—1 Timoteo 4:13.

Kua meitaki maata roa atu te tu o te apiianga i ko i te au uipaanga putuputuanga i tetai enua i Aperika i te tukuia atu anga te au karatuati ki roto i te koro i muri ake i te Apii Terenianga Orometua. Te aronga pakari tei tukuia atu mei te apii e tauturu ana ratou i te apii evangeria, i te tiaki, e te apii, te akamatutu anga i te au putuputuanga i te pae vaerua.​—Ephesia 4:8, 11, 12.

Meitaki Atu te Akaaereanga Putuputuanga

E maata te au ngai, e anoanoia ra tetai aronga pakari e te au tavini tauturu. Kare takiri o tetai au putuputuanga aronga pakari naringa kare e karatuati no te Apii Terenianga Orometua i tukuia atu kia ratou. No reira i tukuia ai te au karatuati e manganui kia tavini i taua au ngai e anoanoia ra.

E maata te au manga i ripoti mai e ko teia au tangata kua “kite meitaki tikai ratou i te au akanoonooanga a te akaaerenga,” te “akono meitaki i ta ratou au apainga,” te “tauturu i etai ke kia marama e kia akangateitei i to Iehova akaaerenga,” e te “tauturu ra i te akatupu i te tu pumaana e te turanga pae vaerua o to ratou au putuputuanga.” Te tumu, no te mea te aru ra te au karatuati o te apii i tei tataia i roto i te Tuatua a te Atua e kare e irinaki ana ki to ratou uaorai kite e te pakari. (Maseli 3:5-7) E riro ana taua au tangata ra ei akameitakianga ki te au putuputuanga i tukuia atu ratou.

Tavini Anga i te Au Ngai Mamao

Tetai au karatuati tei ikiia ei au painia takake e tauturu ana ratou i te au pupu mamao kia riro mai ei au putuputuanga. I te akaari anga i te akameitakianga no ta ratou tauturu, kua tuatua tetai tangata pakari i roto i tetai ngai mamao i Kuatemara: “E 20 mataiti toku manamanata ua anga e ka akapeea ra me akono i teia aka ngai maata. E pure putuputu ua ana au no runga i teia mea. Kua tereni meitakiia te au taeake no te Apii Terenianga Orometua i te tuatua, pera katoa i roto i te au mea no te akaaerenga, e te rekareka nei au e te akono meitakiia nei teia ngai.”

Kua apiiia te au karatuati kia puapinga meitakiia i roto i te au ngai ka anoanoia ratou kia aere mamao na runga i te au ngai maunga e tae atu ei ki te au oire rikiriki e totoa aere ua ra. Ka akanoo vave ua ratou e ka akaaere i te au pupu mamao i reira, noatu kare i rauka ana i etai ke i te rave. Ei akatauanga, kua pati tetai tangata pakari i Naitia i te tauturu a te au karatuati no te mea kua irinaki aia e e angaanga meitaki tikai te ka rauka ia ratou i te rave i te ngai e noo ra aia. I roto tikai i te au ngai mamao, penei e ngoie atu no te au tane kare i akaipoipo kia tavini ei au painia takake e ei au akaaere kotinga. Mei te apotetoro ko Paulo, ka aro atu ratou i te ‘mate i te vai e te anana keia, te mate i te medebara,’ e te au tu ngata uaorai e pera katoa i te manako apiapi no te au putuputuanga e tavini ra ratou.​—2 Korinetia 11:26-28.

Puapingaia Nei te Au Mapu

Te raurau maira te au Tuatua Tapu i te au mapu kia akamaara i Tei Anga mai ia ratou. (Koheleta 12:1) E au akaraanga meitaki tikai te au karatuati maroiroi o te Apii Terenianga Orometua no te au mapu Kerititiano. Muri ake i te tae anga atu e rua nga karatuati ki tetai putuputuanga i Marike, kua tataki rua atu te maata o te ora katoatoa i pou i te au taeake ki roto i te angaanga orometua. Tetai katoa, kua kake atu te numero o te au painia tamou, me kore o te aronga akakitekite tamou i te Patireia, mei te 2 ki te 11. E mea matauia teia i roto i te au putuputuanga e manganui.

E akamaroiroi katoa ana te au karatuati i te au mapu tane kia akamanako no runga i te aere ki te Apii Terenianga Orometua. Kua riro teia ei akamaroiroi i tetai aronga kare i riro ake ei au tavini tauturu, kia aruaru i taua tikaanga ra. E kapiki ana te manga i Netarani i te au karatuati  o te Apii Terenianga Orometua e e “au akaraanga tikai no te au mapu tane e manakonako ra e ka akapeea ratou i to ratou oraanga.”

Tavini Anga i Roto i te Au Putuputuanga Reo Ke

I te au enua e manganui, te maata ua atura te au tautaanga kia tutu i te tuatua meitaki ki te tangata i roto i to ratou uaorai reo tupuna. E apii putuputu ana te au karatuati o te Apii Terenianga Orometua i te au reo ke e e tavini ana i roto i te au ngai e maata te au tu tangata tuitarere. Ei akaraanga, i Peretiumu, te anoano maataia ra te aronga tutu Patireia i roto i te au koro o Arapania, o Peretia, e Rutia.

Kua puapinga maata takere te au putuputuanga e te au pupu reo ke i Peritane, Tiamani, Itaria, Meiko, Marike, mei te au akaaere tutaka, aronga pakari, e te au tavini tauturu e au karatuati ratou no te Apii Terenianga Orometua. Kua ripoti mai te manga i Korea e “e 200 e ara atu au karatuati e tuanga puapinga ta ratou i roto i te tauturu anga i te au putuputuanga e te au pupu reo ke.”

Tavini Akaaka Anga i Roto i Tetai Au Turanga Ke

Kapiti atu ki te tavini anga i roto i te au pupu e te au putuputuanga reo ke, te tavini ra te aronga tei karatuati mai mei te Apii Terenianga Orometua ei aronga pakari, au tavini tauturu, e te au akaaere tutaka. Kua ariki tetai pae i te au tukuanga angaanga i tetai au enua ke atu, penei i te akono i tetai au anoano rapurapuia i roto i te Tipatimani Tavini Anga i ko i te manga. Te aronga tei rauka te kite akatu are penei ka piri atu ki roto i te porokaramu akatu Are Uipaanga Patireia.

I te mea te kake ua atura te numero o te au putuputuanga e te au kotinga i te ao katoa nei tera te aiteanga ka anoano uaia rai kia maata atu te au akaaere tutaka. Ei akatupu i teia anoano, kua orongaia e taingauru epetoma no te au karatuati o te Apii Terenianga Orometua kia tereniia i roto i te angaanga tutaka e oti kia tavini ei akaaere kotinga tauturu me kore ei akaaere kotinga tamou. Mei te 1,300 karatuati e tavini nei ei au akaaere tutaka i roto i te 97 enua. I tetai enua Aperika, e 55 patene au akaaere tutaka tei karatuati mai mei te Apii Terenianga Orometua. I tetai enua Aperika ke mai, e 70 patene te numero.

I Autireria, Kanata, Europa, te Itinga Mamao, e Marike, e anere ua atu au karatuati o te apii tei tukuia atu ei akatupu i taua au anoano ra i tetai au enua ke atu. Kua akatotoa roaia atu te au puapinga o te apii ki te ao katoa nei, na roto i teia mataara.

Na roto i tana Tamaiti, ia Iesu Karaiti, kua akatupu mai a Iehova i tetai aronga tutu evangeria, au tiaki, au puapii, e etai ke atu tei turuturu i te au anoano o te Patireia i teia au tuatau openga. E manakonakoanga ainei tetai no te akamaata atu i te numero o to te Atua iti tangata? E mea papu rava! No reira te maata ua atura te anoano no te au tane akatapuia kia akamaata atu i ta ratou apainga. (Isaia 60:22; 1 Timoteo 3:1, 13) Te oronga maira te Apii Terenianga Orometua i te au tuatau no te aronga pakari e te au tavini tauturu kia rauka i te akamaata atu i ta ratou angaanga orometua, te ka akapuapinga maata atu ia ratou uaorai e etai ke atu i roto i te koro i te ao katoa nei.

[Tataanga Rikiriki i Raro]

[Au Tutu i te kapi 10]

Te akamaata atura te Apii Terenianga Orometua i te au anoano o te Patireia i te ao katoa nei

[Au Tutu i te kapi 13]

Te manako ra ainei koe i te tomo ki roto i te Apii Terenianga Orometua e te akapuapinga atu i etai ke?