E Ariki Ua Rai i te Ako a Iehova
E Ariki Ua Rai i te Ako a Iehova
“Auraka koe e akavaavaa, . . . i te ako a Iehova.”—MASELI 3:11.
1. Eaa tatou ka ariki ei i te akoanga tu-Atua?
TE ORONGA maira te ariki o Iseraela taito ko Solomona kia tatou tataki tai i tetai tumu meitaki kia ariki i te ako mei te Atua. “Auraka koe e akavaavaa, e taku tamaiti, i te ako a Iehova,” i karanga ai a Solomona, “auraka oki e noongata i tana pāpā anga mai. Ko tei akaperepereia e Iehova ra, ko tana ïa e pāpā mai; mei te metua i te tamaiti, tana i akaperepere ra.” (Maseli 3:11, 12) Ae, te ako maira toou Metua i te rangi ia koe no te mea te akaperepere ra aia ia koe.
2. Eaa te aiteanga o te “ako,” e akapeea tetai tangata i te akoia anga?
2 Te taikuia ra te “ako” ki te papaanga, akatikaanga, ikuikuanga, e te apiianga. “Kare rava oki e ako e riro ei mea rekareka i reira ra, e mea aue ra,” i tata ei te apotetoro ko Paulo, “kareka i muri ake, ko te meitaki ra ïa, koia rai te tuatua-tika te tupu i taua ako ra, i te aronga i akamātauia i te reira.” (Ebera 12:11) Te arikianga e te akonoanga i te ako tu-Atua ka tauturu ia koe i te aruaru i tetai oraanga tuatua tau e ka akavaitata atu te reira ia koe ki te Atua tapu, ko Iehova. (Salamo 99:5) Penei ka aere mai te akatikatikaanga na roto i te au taeake irinaki, na roto i te au apinga kiteaia mei te au uipaanga Kerititiano, e mei taau apii o te Tuatua a te Atua e te au puka a te “akaaere pikikaa kore.” (Luka 12:42-44) Mei teaa atura te rekarekaanga kia koe me kua akakiteia mai kia koe tetai apinga te inangaroia ra kia akatanotanoia! Inara eaa te ako ka umuumuia me kua raveia tetai ara kino?
Eaa Tetai Pae e Akaateaia Ai
3. Eaa te taime e akaateaia ana tetai?
3 E apii ana te au tavini o te Atua i te Pipiria e te au puka Kerititiano. E uriuriia ana te au turanga a Iehova i ta ratou au uipaanga, au akaputuputuanga, e te au uruoaanga. E no reira te akakiteia ra ki te au Kerititiano i ta Iehova e umuumu maira ia ratou. E akono uaia ana te akaateaanga me rave akakoro tetai mema i roto i te putuputuanga i tetai ara kino pakari.
4, 5. Eaa te akaraanga Tuatua Tapu no te akaateaanga te akaraia nei, e eaa ra te putuputuanga i raurauia ai kia akaoki akaou mai i tera tangata?
4 E akamanako ana i te akaraanga Tuatua Tapu no te akaateaanga. Kua akakoromaki ua atu te putuputuanga i Korinetia i te “kanga oki [tei] kare rava i kitea ki o te etene katoa ra, tei tetai tangata te vaine a tona uaorai metua tane.” Kua raurau a Paulo i te au Korinetia kia “tuku atu kia Satani taua tangata ra, i te ingoa o to tatou Atu ra o Iesu Mesia, kia mate te kopapa, kia ora te vaerua i te rā o te Atu ra o Iesu.” (1 Korinetia 5:1-5) Me akaateaia ana e kua tukunaia atu i reira kia Satani, kua riro te reira tangata ara ei tuanga akaou no te ao o te Tiaporo. (1 Ioane 5:19) Kua akakore tona akaateaanga i tetai akakeuanga kino i te pae kopapa mei te putuputuanga e kua akono tamouia te “vaerua” o te Atua, me kore te turanga meitaki.—2 Timoteo 4:22; 1 Korinetia 5:11-13.
5 Kare i roa ana i muri mai, kua raurau a Paulo i te au Kerititiano i Korinetia kia akaoki akaouia mai te tangata tei rave i te tarevake. Eaa te tumu? Kia kore ratou e “rauka mai aea ta Satani ngai,” i karanga ai te apotetoro. I te akaraanga kua tataraara te tangata ara e kua tama aia i tona oraanga. (2 Korinetia 2:8-11) Me kare te au Korinetia e akatika kia akaoki akaouia mai te tangata i tataraara, ka rokonaia ratou e Satani mei tera e ka marokiakia ratou e kare ratou e akakore i te ara mei ta te Tiaporo rai e inangaro ra ia ratou kia akapera. Papu e, kare i roa ana kua “akakore e [kua] akapumaana atu” ratou i te tangata i tataraara.—2 Korinetia 2:5-7.
6. Eaa ta te akaateaanga ka akatupu?
6 Eaa te akatupuia ra e te akaateaanga? Kare to Iehova ingoa tapu e akakinoia e te paruru ra te reira i te ingoa meitaki o tona au tangata. (1 Petero 1:14-16) Te akaateaanga o te tangata tataraara kore tei rave i te tarevake, te akangateitei ra i te au turanga a te Atua e te tamou marie ra i te turanga ma o te putuputuanga i te pae vaerua. Penei ka akakeu te reira i te tangata tataraara kore kia rako tangata mai.
E Tuanga Puapinga te Tataraara
7. Eaa tei tupu kia Davida no tei kore i aaki i tana au ara?
7 Te maataanga tei rave i te ara kino kua tataraara tikai e kare ratou i akaatea ke ia mei te putuputuanga. E tika oki, kare te tataraara anga tika tikai e tupu ngoie ua mai ana. E akamanako ana i te Ariki o Iseraela ko Davida, tei atu ia Salamo 32. Te akakite maira tera imene no tetai tuatau kare a Davida i aaki ana i tana au ara kino, no runga ia Bate-seba. Tei tupu mai, no tona taitaia anga i tana au ara i rave, kua akapou te reira i tona maroiroi, mei te maro o te tuatau paroro rai e ngote ra i te mauu o tetai tumu rakau. Kua rokoia a Davida e te maki i te pae kopapa e te pae manako, inara i tona ‘aaki anga i tona apa, kua akakore mai a Iehova i tana au ara.’ (Salamo 32:3-5) E oti kua imene a Davida: “E ao tona, to te akakoreia tana ara, to tei tapokiia tona kino!” (Salamo 32:1, 2) E rekareka tikai i te kite mai i to te Atua takinga meitaki!
8, 9. Akapeea te akaarianga te tataraara, e eaa to te reira puapinga me kapitiia atu ki te akaoki akaouia mai anga o tetai tangata tei akaateaia?
8 Te taka meitaki ua ra, i reira, ka anoanoia tetai tangata ara kia tataraara me ka inangaro aia kia takinga meitakiia. Inara, kare te akama me kore te mataku ko te kiteaia e e tataraara anga. “Kia tataraara” te aiteanga “kia taui tetai i tona manako” no runga i tetai angaanga kino, no te mii anga i tei raveia. Tetai tangata tataraara e “ngakau paruparu, e te aue,” tona e te inangaro ra kia ‘akatika i te tarevake’ me ka rauka te reira.—Salamo 51:17; 2 Korinetia 7:11.
9 E apinga puapinga maata tikai te tataraara no runga i te akaoki akaouia mai anga ki roto i te putuputuanga Kerititiano. Kare tetai tangata akaateaia e ariki viviki uaia ana ki roto i te putuputuanga i muri ake i tetai tuatau akatakaia. Inara i mua ake ka akaoki akaouia mai ei aia, ka inangaroia te turanga o tona ngakau kia taui maata. Kia kite mai aia i te tu kino maata o tana ara e te akakinoanga tana i apai mai ki runga ia Iehova e te putuputuanga. Kia tataraara te tangata ara, kia pure akatenga kia akakoreia mai tana ara, e kia aru i te au umuumuanga tuatua tau a te Atua. I te patianga kia akaoki akaouia mai, ka tau aia kia oronga i te akapapuanga e kua tataraara aia e te tatanu ra i te “akono i te tuatua e tau ei i te tataraara ra.”—Angaanga 26:20.
Eaa ka Aaki ei te Rave Tarevake?
10, 11. Eaa tatou ka kore ei e uuna ua i te ara?
10 Penei ka akamanako tetai pae tei ara: ‘Me akakite au i taku ara ki tetai tangata, penei ka inangaroia au i te pau i te au uianga akama e penei ka akaateaia atu au ki vao. Inara me noo marie ua au, ka kopaeia te reira e kare rava e tangata i roto i te putuputuanga e kite i te reira.’ Kare te reira tamanakoanga e akamanako atu ana i tetai au tumu puapinga maata. Eaa te reira?
11 Ko Iehova, “e Atua takinga-meitaki, e te aroa ua, e te akakoromaki maata, e te meitaki maata, e te tuatua-mou, E te vaoo marie i te aroa e tausani ua atu, e te akakore i te tuatua-tika kore, e te ara, e te kino.” I na e akatikatika ana aia i tona iti tangata “ma te tuatua tau.” (Exodo 34:6, 7; Ieremia 30:11) Me ka rave koe i tetai ara kino, akapeea e rauka ai ia koe to te Atua takinga meitaki me te tauta ra koe i te uuna i taau ara? Te kite ua maira a Iehova i te reira, e kare aia e akamanako kore ua atu i te reira angaanga tarevake.—Maseli 15:3; Habakuka 1:13.
12, 13. Eaa te ka tupu me uunaia tetai raveanga tarevake?
12 Me kua rave koe i tetai ara kino, ka tauturu te aakianga ia koe kia rauka akaou te akava ngakau meitaki. (1 Timoteo 1:18-20) Inara me kare koe e aaki i taau ara ka akatupu te reira i tetai akava ngakau kino te ka arataki atu ia koe kia rave maata atu i te ara. E akamaara e kare koe i ara ua ki tetai tangata me kore ki te putuputuanga. Te ara ra ra koe ki te Atua. Kua imene te tata taramo: “Ko Iehova, tei te rangi tona ra terono; te akara maira tona mata, e te [“akara matatio,” NW] maira tona topiri-mata i te tamariki a te tangata nei. Te [“akara matatio,” NW] mairā Iehova i te tangata tuatua-tika: pera katoa te tangata kino.”—Salamo 11:4, 5.
13 Kare a Iehova e akameitaki i tetai ua atu tangata e uuna ra i tetai ara kino pakari e te tauta ra i te noo ua ki roto i te putuputuanga Kerititiano ma. (Iakobo 4:6) E no reira me kua topa koe ki roto i tetai angaanga tarevake e te inangaro ra i te rave i te mea tika, auraka e emiemi i te akono i tetai aakianga tika. Te openga, ka kinokino toou akava ngakau, koia tikai me te tatau ra koe me kore te akarongo ra koe i tetai ako no runga i taua au angaanga aiteite rai. Akapeea me akaatea a Iehova i tona vaerua tapu mei ia koe, mei tana rai i rave ki te Ariki ko Saula? (1 Samuela 16:14) I te akaateaangaia te vaerua o te Atua, ka topa rava atu koe ki roto i te ara kino.
Irinaki i Toou Au Taeake Tiratiratu
14. Eaa ra te tangata rave tarevake ka aru ei i te ako a Iakobo 5:14, 15?
14 E no reira, eaa ta tetai tangata rave tarevake tei tataraara ka tau kia rave? “E tiki aia i te aronga pakari o te ekalesia ra; e na ratou e pure iaia ma te akatainu iaia i te manongi i te ingoa o te Atu ra: E e ora taua maki ra i te pure akarongo, e na te Atu aia e akatu ki runga.” (Iakobo 5:14, 15) Te aravei atu anga i te aronga pakari ko tetai mataara ia no tetai tangata kia “tuku mai na i te akonoanga e tau i te tataraara.” (Mataio 3:8) Teia au tane tiratiratu e te takinga meitaki ‘ka pure iaia e ka akatainu iaia i te manongi i to te Atua ingoa ra.’ Mei tetai manongi akamaru ra, ka riro ta ratou ako Pipiria ei akapumaana ki tetai ua atu te inangaro tikai ra i te tataraara.—Ieremia 8:22.
15, 16. Akapeea te aronga pakari Kerititiano i te aruanga i te akaraanga akanooia e te Atua, mei tei rekotiia ia Ezekiela 34:15, 16?
15 E akaraanga takinga meitaki tikai tei akanooia e to tatou Tiaki, ko Iehova, i tona akarangatira mai anga i te ngati Iuda mei te tuikaa i Babulonia i te 537 M.T.N. e i tona akaora mai anga i te Iseraela pae vaerua mei “Babulonia Maata” i te 1919 T.N.! (Apokalupo 17:3-5; Galatia 6:16) Kua akatupu aia i reira i tana taputou: “Naku e akaangai i taku anana, e naku rai e akamoe ia ratou ki raro . . . Naku e kimi i tei ngaro ra, e e akaoki mai i tei îia keia, e e tākaikai i tei aati ra, e e akamaroiroi i tei maki ra.”—Ezekiela 34:15, 16.
16 Kua angai a Iehova i tana mamoe akatutu, kua akamoe tinamou ia ratou ki raro e kua kimi i te aronga tei ngaro. Mei te reira katoa, ka akapapu te au tiaki Kerititiano e te angai meitakiia ra e te noo tinamou ua ra te anana a te Atua. E kimi ana te aronga pakari i te mamoe tei aere ke mei te putuputuanga. Mei te Atua rai i “tākaikai i tei aati ra,” e “tākaikai” ana te au akaaere i te mamoe tei akamamaeia e te au tuatua a tetai ke me kore tei akamamaeia e ta ratou uaorai au angaanga. Mei te Atua rai i ‘akamaroiroi i tei maki ra,’ e tauturu ana te aronga pakari i te aronga tei makimaki i te pae vaerua, penei no tetai angaanga tarevake ta ratou uaorai i rave.
Akapeea te Tauturu a te Au Tiaki
17. Eaa ra ka kore ei tatou e emiemi i te kimi atu i te tauturu pae vaerua a te aronga pakari?
17 E aru rekareka ana te aronga pakari i teia akoanga, “E takinga meitaki atu . . . , ma te mataku.” (Iuda 23, NW) Na te rave anga i te pirianga ainga tau kore, kua rave tetai au Kerititiano i te ara kino. Inara me kua tataraara tikai ratou, ka rauka ia ratou te akonoanga takinga meitaki e te aroa a te aronga pakari, te inangaro ua ra i te tauturu ia ratou i te pae vaerua. I te kapiti anga mai iaia ki roto, kua karanga a Paulo no runga i taua aronga ra: “Kare ra mei te mea e ko matou te atu o to kotou akarongo, ei tauturu ra matou i to kotou rekareka.” (2 Korinetia 1:24) No reira, auraka rava e emiemi i te kimi atu i ta ratou tauturu i te pae vaerua.
18. Akapeea te aronga pakari me akono i te au taeake akarongo tei ara?
18 Me kua rave koe i te ara kino, eaa koe ka irinaki papu ei ki roto i te aronga pakari? No te mea ko ratou te au tiaki tikai o te anana a te Atua. (1 Petero 5:1-4) Kare roa tetai tiaki takinga meitaki e papa ana i tetai mamoe rarata e te aueue no te mea kua o aia ki roto i tetai kino. No reira, me te akono ra te aronga pakari i tetai au taeake irinaki tei ara, ei tuatau akamanakoanga te reira, i te ara e te akaoraanga i te pae vaerua me te tau ra, auraka ei raveanga kino e te utunga. (Iakobo 5:13-20) Kia akava te aronga pakari ma te tuatua tau e kia “akaperepere i te anana.” (Angaanga 20:29, 30; Isaia 32:1, 2) Mei te au Kerititiano katoatoa, te aronga pakari kia “rave i te tuatua-tau, e kia inangaro i te aroa, e te aerenga akamako tikai i to Atua ra.” (Mika 6:8) E puapinga tikai te reira au tu me te akono ra i te au ikianga no runga i te oraanga e te angaanga tapu a “te mamoe [a to Iehova] ngangaere ra.”—Salamo 100:3.
19. Eaa te tu o te aronga pakari Kerititiano i te tautaanga i te akatikatika i tetai tangata?
19 E akataoongaia ana te au tiaki Kerititiano e te vaerua tapu e e tauta ana ratou kia aratakiia e te reira. Me “ka rave tetai tangata i te takainga tarevake i mua ake ka kite ei aia”—mei te mea kua rokoia poitirere uaia—ka tauta te au tane tau i te pae vaerua i te “akatikatika i taua tangata ra i te vaerua maru.” (Galatia 6:1, NW; Angaanga 20:28) Ma te tu maru e te pakari katoa no te au turanga tu-Atua, ka tauta te aronga pakari i te taui i tona manakoanga, mei tetai taote rai e akaoki meitaki ra i tetai ivi ati, kia kore e mamae ua atu rai, inara kia akonoia te manamanata. (Kolosa 3:12) I te mea e kua akatumuia te oronga anga i te takinga meitaki ki runga i te pure e te au Tuatua Tapu, kia akaata te ikianga a te aronga pakari i to te Atua manako no runga i te reira manamanata.—Mataio 18:18.
20. Eaa te tuatau e umuumuia ai kia akakiteia ki te putuputuanga e kua akavaia tetai tangata?
20 Me kua kite ateaia tetai ara me kore ka kitea papuia te reira, ka tau kia raveia tetai akakitekiteanga ki te putuputuanga kia paruru i to te reira ingoa meitaki. Ka rave katoaia tetai akakitekiteanga me te inangaroia ra te putuputuanga kia akakiteia. I te tuatau e akaora maira tetai tangata tei akava tauturuia i te pae vaerua, penei ka rauka i te akaaite atu iaia ki tetai tangata te meitaki maira mei tetai maki, tei takotingaia tana angaanga no tetai tuatau poto ua. No tetai tuatau, i te akaraanga e mea meitaki atu no tetai tangata tataraara kia akarongorongo ua i te au uipaanga auraka aia e paupau. Penei ka akanoo te aronga pakari i tetai tangata kia akono i tetai apii Pipiria kiaia kia akamaroiroi iaia i tona ngai paruparu “kia ora meitaki i te akarongo.” (Tito 2:2, NW) Kia rave pouroaia teia na roto i te aroa e kare i akakoroia kia papaia te tangata rave tarevake.
21. Akapeea te akono atu anga i tetai au tupuanga no te rave tarevake?
21 Ka rauka te aronga pakari i te oronga i te tauturu i te pae vaerua na roto i te au tu e manganui. Ei akatauanga, penei tetai tangata e manamanata tona i mua atu ana no te inuinu, kua inuinu maata aia e tai me kore e rua taime e koia anake ua i te kainga. Me kore penei tetai tangata tei akaruke ana i te kai avaava no tetai tuatau roa, kua puipui akaou i te avaava e tai me kore e rua taime i tetai tuatau apikepike. Noatu e kua pure ana aia e kua irinaki aia e kua akakore mai te Atua iaia, kia kimi aia i te tauturu a tetai tangata pakari kia kore aia e rave matau i te reira ara. Penei ka rauka e tai me kore e rua tangata pakari i te akono mai i te reira manamanata. Inara ka akakite te (nga) tangata pakari i te akaaere akatere, i te mea e penei e au manako ke atu tetai ka o mai.
E Ariki ua Atu rai i te Akoanga Tu-Atua
22, 23. Eaa ra ka anoanoia ai kia ariki ua atu rai i te akoanga tu-Atua?
22 Kia rekareka i ta te Atua akaperepereanga, ka tau te Kerititiano tataki tai kia akamanako meitaki i te ako a Iehova. (1 Timoteo 5:20) E no reira e akono meitaki i tetai ua atu akatikatikaanga tei rauka mai me apii koe i te au Tuatua Tapu e te au puka Kerititiano me kore me akarongo koe i te ako orongaia i te au uipaanga, au akaputuputuanga e te au uruoaanga a te au tangata o Iehova. Kia vai maroiroi ua rai koe i te raveanga i to Iehova anoano. I reira te ako tu-Atua e tauturu ei ia koe i te akono tamou i tetai paruru pae vaerua—tetai paruru ketaketa mei te patu rai i te patoianga i te ara.
23 Te akariro ra te arikianga i te ako tu-Atua ia koe kia noo tamou ua rai ki roto i te aroa o te Atua. E tika, kua akaateaia ana tetai pae mei te putuputuanga Kerititiano, inara kare rava teia e tupu kia koe me ‘paruru koe i toou ngakau’ e kia ‘aaere mei tetai tangata pakari ra.’ (Maseli 4:23; Ephesia 5:15) Inara, me kua akaateaia koe i teianei, kore koe e akono i te au takainga kia akaoki akaouia mai koe? Te inangaro ra te Atua i te katoatoa tei akatapu ia ratou kiaia kia akamori tiratiratu atu iaia ma te “rekareka o te ngakau.” (Deuteronomi 28:47) Ka rauka ia koe i te rave i te reira e tuatau ua atu me ariki ua rai koe i te ako a Iehova.—Salamo 100:2.
Akapeea Koe me Pau?
• Eaa ra tetai e akaateaia ai mei te putuputuanga Kerititiano?
• Eaa te o maira ki te tataraara tikai?
• Eaa ka aaki ei i te ara kino?
• Na roto i teea au mataara e tauturu ana te aronga pakari Kerititiano i te aronga rave kino tei tataraara?
[Au Uianga Apii]
[Tutu i te kapi 26]
Eaa te apotetoro ko Paulo i oronga atu ei i te au ikuikuanga ki te au Korinetia no runga i te akaateaanga?
[Tutu i te kapi 29]
Mei te au tiaki mamoe taito ra, te “tākaikai” ra te aronga pakari Kerititiano i te mamoe tamamaeia a te Atua