Eaa ka Rave ei i te Mea Meitaki?

KUA akakite mai ana tetai tangata kite e: “Ko te anoano ra, te vaitata ua nei ïa kiaku; kareka te rave i te mea meitaki ra, kare ïa i kitea iaku. Ko te meitaki oki taku e anoano ra, kare ïa au e rave; kareka te kino anoano koreia e au ra, ko taku ïa e rave nei.” Eaa ra i ngata ei i teia tangata i te rave i te mea meitaki tana e anoano ra? Kua akamarama mai aia e: “Te kite nei au i tetai ture, e kia anoano au i te rave i te mea meitaki ra, te vaitata ua nei te kino iaku i reira. Te rekareka nei oki au i te ture a te Atua i te akonoanga i te tangata i roto ra; Te kite nei ra au i tetai ture i roto i toku kopapa nei, i te māro mai anga i te ture i roto i toku ngakau, e te akariro anga iaku ei tuikaa na te ture kino i roto i toku nei kopapa.”​—Roma 7:18, 19, 21-23.

Te akamarama maira teia tuatua a te apotetoro ko Paulo, tei tataia vaitata atu ki te 2,000 mataiti i topa akenei e, eaa ra i ngata ei i te au tangata apa i te rave i te mea meitaki. Na te aru anga i te au kaveinga meitaki, i raro ake tikai i te au turanga manamanata, te umuumuia ra te akamaroiroi anga no te tu akono tau. No reira e mea meitaki kia ui tatou e, Eaa te tumu puapinga maata roa atu no te rave anga i te mea meitaki?

E akamanako ana i ta te au Tuatua Tapu e karanga ra no runga i te tuatau ki mua no tetai tangata tiratiratu akono tau. I roto ia Salamo 37:37, 38, ka tatau tatou: “E akairo ana i te apa kore, ka akara oki i te tiratiratu; e au oki te openga o te reira tangata; Kareka te aronga tatipake ra, ka pou anake ïa; ko te openga o te aronga kino ra ko te tipu keia.” Te akakite maira a Maseli 2:21, 22 kia tatou e: “Na te aronga tiratiratu oki e noo i te enua, e te aronga apa kore te ka akatinamouia ki reira; Ka tipu keia ra te aronga kino i te enua nei, e te aronga rave ara ra, ka kiriti tumuia ïa.”

Noatu e te oronga maira teia au taputou e tetai atu tei kiteaia i roto i te Pipiria kia tatou i tetai akakoroanga kia aruaru i tetai aerenga te akamareka ra i te Atua, kare te reira e mono i te au tumu puapinga maata no te rave anga i te reira. Kua kapitiia mai taua tumu ki tetai maroanga te o maira te au mea ora kite katoatoa tataki tai. Ka uriuri te atikara te aru maira e eaa taua maroanga e akapeea te reira i te akakeu anga ia tatou.