Te Maroanga te O Atura Koe

E OA me kare e mema ngutuare ainei toou te piri vaitata tikai ra koe? Akapeea me ka akaapaia mai koe e tetai tangata no te au tumu noinoi i akatupuia ai taua pirianga ra? Kare ainei e ka mamae toou ngakau, penei ka riri katoa koe? Ko tera tikai te akaapaanga ta te Tiaporo ko Satani i apai mai ki runga i te katoatoa tei akatupu i te pirianga vaitata ki te Atua ko Iehova.

E akamanako ana e eaa tei tupu i te autu anga a Satani i te aati anga nga tangata mua, ko Adamu raua ko Eva, i te ture a te Atua e te piri anga atu kiaia i roto i tana meameaau i te Atua. No tei tupu ana ko te aiteanga ainei tera e ka akarongo ua rai te au tangata kia Iehova anake me ka puapingaia ratou? (Genese 3:1-6) Mei etai 2,500 mataiti i muri ake i te meameaau anga a Adamu, kua akatupu akaou mai a Satani i taua maroanga tikai​—i teia taime te kapitiia maira te tangata ko Iobu te ingoa. No te mea e te akataka meitaki maira te akaapaanga ta te Tiaporo i rave ana i te maroanga i o maira, ka akara matatio tatou i taua papaanga Pipiria ra.

“Kare Rai Au e Pa i te Tu Tiratiratu Naku Ra”

Ko Iobu “e tangata apa kore e te [“tu tika,” NW], i te mataku anga i te Atua, e te akaruke anga i te kino.” Inara, kua akakino a Satani i to Iobu tu tika. “E mataku oko kore ua ainei a Iobu i te Atua?” i ui ei aia kia Iehova. Aru mai, kua akakino te Tiaporo i te Atua e ia Iobu na te akaapa anga e kua okoia mai to Iobu tu tapu mou e Iehova na te paruru anga e te akameitakianga iaia. “Ka akatika ua atura koe i to rima i tenana, ka rave atu ei i tana e kia ope rava, kare aia e kore i te akakino ia koe ki mua i to mata,” i akaao ei a Satani.​—Iobu 1:8-11.

Ei pau i teia au akaapa anga, kua akatika a Iehova ia Satani kia timata ia Iobu. I te tauta anga kia anga ke iaia i te tavini anga i te Atua, kua tuku mai te Tiaporo i tetai tumatetenga aruia mai e tetai tumatetenga ki runga i taua tangata akarongo mou ra. Kua keiaia e kua tamate pouroaia ta Iobu manu, kua taiaia tona au tavini, e kua tamateia tana au tamariki. (Iobu 1:12-19) Inara kua autu ainei a Satani? Kare roa! Noatu e kare aia i kite ana e na te Tiaporo i akatupu mai i tona au timataanga, kua karanga a Iobu e: “Na Iehova i oronga mai, e na Iehova i rave mai; kia akameitakiia te ingoa o Iehova.”​—Iobu 1:21.

I muri mai, kua aere atu a Satani ki mua i te aroaro o Iehova, i te karanga anga kiaia e: “Te tāpu ua nei rai [a Iobu] i [“tona tu tiratiratu,” NW], akakoko ua mai ei koe iaku kia rave ara kore ua atu au iaia kia mate.” (Iobu 2:1-3) Te maroanga puapinga maata koia oki ko to Iobu tu tiratiratu​—e tu te umuumuia ra te tu tapu mou ngaueue kore ki te Atua e te piri vaitata ra ki te tuatua tika. Kua autu a Iobu no runga i te maroanga no te tu tiratiratu. Inara, kare te Tiaporo i tuku ana i te au.

Aru mai, kua akakite a Satani i te tuatua te ka arapaki i te au tangata ravarai. “Ei kiri no te kiri,” tana i tuatua kia Iehova, “e riro oki ta te tangata katoa ra ei oko i tona ora. Kia akatika ua atura koe i to rima i tenana, ka rave atu ei i tona ivi e tona kiko, kare aia e kore i te akakino ia koe ki  mua i to mata.” (Iobu 2:4, 5) Na te taangaanga anga i te tuatua “te tangata” e kare i te ingoa o Iobu, te taumaro ra te Tiaporo i te tu tiratiratu o te au tangata ravarai. Ko te tika, te karanga ra aia e: ‘Ka rave te tangata i tetai ua atu apinga kia akaora mai i tona ora. E oronga mai kiaku i tetai tuatau, ka rauka iaku i te anga ke i tetai tangata mei te Atua.’ Ka vai tapu mou ainei te tangata ki te Atua i raro ake i te au turanga katoatoa e i te au taime ravarai?

Kua akatika a Iehova i te Tiaporo kia tamamae ia Iobu ki tetai maki kino. E maata tikai to Iobu mamae i pure ei aia kia mate aia. (Iobu 2:7; 14:13) Inara, kua akakite a Iobu: “E mate ua atu au, kare rai au e pa i te [“tu tiratiratu,” NW] naku ra.” (Iobu 27:5) Kua tuatua a Iobu i teia no tona aroa i te Atua, e kare e rauka i tetai ua atu apinga i te taui i te reira. Kua akapapu mai a Iobu iaia uaorai e e tangata tiratiratu. “Akameitaki roa akerā Iehova i to Iobu openga i to tona muatangana,” i akakite mai ei te Pipiria. (Iobu 42:10-17) E aronga ke atu ainei tetai mei ia Iobu rai? Eaa ta te tuatau i topa e akaari maira?

Kua Pauia te Akaaoanga

I roto i te pene 11 o te puka Pipiria o Ebera, kua akakite mai te apotetoro ko Paulo i te au ingoa o te au tangata e te au vaine akarongo mou i mua ake i te tuatau Kerititiano, kapiti mai ia Noa, Aberahama, Sara, e Mose. Kua akakite mai i reira te apotetoro e: “E roa ua oki kia tuatua au [no runga i tetai atu].” (Ebera 11:32) E maata tikai teia au tavini akarongo mou o te Atua i taiku mai ei a Paulo ia ratou e ei ‘urupu maata no te au kite,’ i te akaaite anga ia ratou ki tetai tumurangi maatamaata i te rangi. (Ebera 12:1) Ae, i te au anere mataiti i aereia mai, e manganui ua atu te au tangata kua taangaanga i to ratou tu rangatira e kua iki i te oronga i to ratou tu tapu mou ki te Atua ko Iehova.​—Iosua 24:15.

Te pau anga maata ki ta Satani akaapa anga e ka rauka iaia i te akaanga ke i te au tangata mei ia Iehova ra no ko mai ia i ta te Atua uaorai Tamaiti, ko Iesu Karaiti. Kare katoa i rauka ana i te mamae kino i runga i tetai rakau tamamae anga i te aati i tona tu tiratiratu ki te Atua. Ia Iesu e akaea ra i tona ao openga, kua kapiki aia e: “E taku Metua, te tuku atu nei au i toku vaerua ki to rima na.”​—Luka 23:46.

Kua akaari meitaki mai te tuatau i topa e kare i rauka ana i te Tiaporo i te anga ke i te katoatoa i te tavini anga i te Atua mou. E maata ua atu te au tangata kua rauka ia ratou i te kite ia Iehova e ‘kia aroa iaia ma to ratou ngakau katoa e ma to ratou meta katoa e ma to ratou manako katoa.’ (Mataio 22:37, NW) Kua akapapuia mai to ratou tu tapu mou ngaueue kore kia Iehova e kua tarevake a Satani no runga i te maroanga no te tu tiratiratu o te tangata. Ka rauka katoa ia koe i te akapapu e e tarevake te Tiaporo na te riro mai anga ei tangata me kare ei vaine tiratiratu.

Eaa Taau ka Rave?

Te anoano ra te Atua “i te tangata katoatoa kia ora, e kia rauka te kite i te tuatua-mou.” (1 Timoteo 2:4) Akapeea koe i te rave anga i te reira? E akapapa i te taime kia apii i te Pipiria e ‘kia kite i te Atua mou ra, e ia Iesu i te Mesia, tana i tono maira.’​—Ioane 17:3.

Kua akaao a Satani i te tu tiratiratu o te tangata na te akaekoko anga i te au akakoroanga o te tangata no te tavini anga i te Atua. Me na te kite e akakeu i toou au akakoroanga, e mea tau kia itae te reira i toou ngakau. E kia tupu mai teia, e maata atu taau ka rave i te kimi ua anga i te manako mei roto mai i te Pipiria. E tatanu i te ravenga no te akamanako oonu anga no runga i taau i kite. (Salamo 143:5) Me tatau i te Pipiria me kare i te au puka tei akatumuia ki runga i te Pipiria, kia papu e kia kimikimi marie i te akamanako anga i teia au uianga mei teia rai e: ‘Eaa ta teia e apii maira iaku no runga ia Iehova? Eaa taku e kite ra no runga i te au tu o te Atua e akakiteia maira i konei? I roto i teea au ngai o toku oraanga te anoanoia ra kia akapera rai au? Eaa ta te Atua e mareka ra e te mareka kore ra? Akapeea te reira i te akakeu anga i te tu e manako ra au no runga i te Atua?’ Na taua manakonako anga e akaki i toou ngakau ma te aroa e te ariki rekareka anga i Tei Anga ra.

Kare te tu tiratiratu ki te Atua i kotingaia ki te ngai no te irinaki anga akonoanga. (1 Ariki 9:4) Na te akono tamou anga i toou tu tiratiratu ki te Atua ko Iehova te umuumuia ra te manako meitaki i roto i te au ngai ravarai o te oraanga. Inara, na te akono tamou anga i te tu tiratiratu kare e akangere ia koe i roto i tetai ua atu tu. Ko Iehova  “te Atua mataora,” e te inangaro maira aia ia koe kia rekareka i te oraanga. (1 Timoteo 1:11, NW) I teianei e akamanako ana i tetai au ravenga te inangaroia ra kia kopae ke koe e rauka ai kia vai ma ua ma te tu akono tau, e i reira e rekareka ai i tetai oraanga mataora e to te Atua ra mareka anga.

Kopae i te Ravenga Akono Tau Kore no te Ainga

Na Iehova uaorai i akanoo mai i te turanga no te akaipoipo i roto i tana Tuatua, te Pipiria, te karanga ra e: “E akaruke ei te tangata i tona metua tane e tona metua vaine, ka piri atu ei ki tana vaine; e ka riro oki raua ei kopapa okotai.” (Genese 2:21-24) No te mea e kua riro mai nga tokorua akaipoipo ei “kopapa okotai,” te akangateitei ra raua i ta te Atua akanoonooanga no te akaipoipo me ka tamou ua raua i to raua pirianga ainga tetai ki tetai. Kua akakite mai te apotetoro ko Paulo e: “Kia vai te akaipoipoanga ei mea ngateitei i rotopu i te katoatoa, e te roi akaipoipoanga ma te kore e viivii, no te mea ka akava te Atua i te aronga poneia e te aronga akaturi.” (Ebera 13:4, NW) Te tuatua “roi akaipoipoanga” te akataka maira i te pirianga ainga i rotopu i te tane e te vaine tei akaipoipo tetai ki tetai. Me ka piri atu raua ki roto i te au pirianga ainga i vao ake i te akaipoipoanga kua raveia te akaturi e ka akava pakari te Atua i te reira.​—Malaki 3:5.

Akapeea te ainga i mua ake i te akaipoipo? Te patoi katoa ra te reira i te au turanga akono tau tei akanooia e Iehova. “Teia oki to te Atua inangaro . . . e kia kore kotou e [“rave i te poneia,” NW],” i karanga ai te Pipiria. (1 Tesalonia 4:3) E au ara katoa i te Atua te pirianga tane e te tane, te pirianga ainga kopu tangata, e te ainga ma te manu. (Levitiku 18:6, 23; Roma 1:26, 27) Ko tetai ua atu tangata te inangaro ra i te akamareka i te Atua e te rekareka ra i tetai oraanga mataora tikai e mea tau kia akaatea ke mai mei taua au angaanga tau kore ra.

Akapeea te pirianga akainangaro anga tau kore i mua ake ka akaipoipo ei? Kare teia angaanga e akamareka ana ia Iehova. (Galatia 5:19) E mea tau kia kopae katoa te tangata i te au manako tau kore. Kua tuatua a Iesu e: “Ko tei akara ua atu i te vaine ei akatupu i te inangaro, kua akaturi takere ïa aia i taua vaine ra i tona uaorai ngakau.” (Mataio 5:28) Te taangaanga katoaia ra taua au tuatua ki te akarakara anga i te au tutu tau kore i roto i te pepa, i runga i te teata, me kare i runga i te Internet; i te tatau anga i te au tua no te au angaanga ainga; e te akarongo anga ki te au imene tau kore. Te kopae anga i taua au mea te akamareka ra i te Atua e e akakeuanga akamaroiroi i to tetai oraanga.

Akapeea te akameamea? Kua akatakaia mai te akameamea e ei tu “akainangaro anga kangakanga ua me kare e akavare anga ainga.” Ko te tangata akaipoipo me kare te vaine akaipoipo te akaari ra i taua manako ki tetai tangata i vao ake i tona akaipoipoanga te patoi ra i te au kaveinga Pipiria e e akairo akangateitei koreia ia Iehova. (Ephesia 5:28-33) E mea tau kore tikai i te aronga takaua i te akaari atu i te au akairo akainangaro anga ki tetai e tetai no te tamataora ua anga! Akapeea me ka arikiia mai taua akameamea anga kare i akakoroia ana? E akamanako ana i te mamae ngakau ta te reira ka akatupu mai. Ko te tika anga katoa tikai, ka taki atu te akameamea anga ki te akaturi me kare ki te poneia. I tetai tua, na te akono viivii kore i te au mema o te tane e te vaine e akamaata i to tetai uaorai tu ngateitei.​—1 Timoteo 5:1, 2.

Akarekareka Anga i te Atua i Etai Au Ngai o te Oraanga

Ka rauka ua te au kava i te au enua e manganui. E tarevake ainei i te inu i te reira? Kare te inu anga i te uaina, te pia, me kare i tetai atu au kava ma te tu tau i tureia i roto i te au Tuatua Tapu. (Salamo 104:15; 1 Timoteo 5:23) Inara, ko te inu maata anga e te tu kona kava e mea tarevake i roto i nga mata o te Atua. (1 Korinetia 5:11-13) Papu tikai e kare koe e inangaro i te inu maata kia akakino atu i toou oraanga e te tamanamanata atu i te oraanga o toou ngutuare tangata.​—Maseli 23:20, 21, 29-35.

Ko Iehova “te Atua tuatua-mou.” (Salamo 31:5) “Ko tei kore e tika i te Atua kia pikikaa ra,” i akakite ei te Pipiria. (Ebera 6:18) Me ka inangaro koe i to te Atua mareka anga, ka kopae ke koe i te pikikaa. (Maseli 6:16-19; Kolosa 3:9, 10) “Ei tuatua-mou ta te tangata ravarai kia tuatua atu  ki tetai,” te ako maira te Pipiria i te au Kerititiano.​—Ephesia 4:25.

Te vai katoa ra te ravenga no te pere moni. Noatu e e mea reka na te manganui, e tu noinoi te pere moni, ko tetai tauta angaia kia rauka mai te moni na roto i te ruti anga tetai ke. Kare a Iehova e ariki ana i te aronga “morimori apinga.” (1 Timoteo 3:8) Me ka inangaro koe i te akarekareka ia Iehova, ka kopae koe i tetai ua atu tu o te pere moni, kapiti mai te au roteri, te pere pingiko, e te peti oroenua. Aru mai, penei ka kitea mai e koe e e maata taau moni i te akono anga i te au anoano o toou ngutuare tangata.

Ko te keia anga, koia oki te rave anga i tetai apinga kare e naau, tetai tu ia no te noinoi. “Auraka rava koe e keia,” i karanga ai te Pipiria. (Exodo 20:15) E mea tarevake i te oko mai i te apinga kua kite koe e e mea keiaia me kare i te rave mai i te au apinga kare i patiia atu ana. “Te tangata i keia na, auraka aia e keia akaou,” i karanga ai te Pipiria, “e rave ra i te angaanga, kia rauka iaia te mea meitaki i tona uaorai rima, kia puapingaia tana kia oronga atu na te tangata i ngere.” (Ephesia 4:28) Kare e keikeia ana i te taime o to ratou pu, ka rave te aronga te inangaro ra ia Iehova i te angaanga tika tikai. Te ‘inangaro nei ratou i te akono kia tika ta ratou uaorai au apinga katoa ra.’ (Ebera 13:18, NW) E te tauturu tikai ra te akava ngakau ma i to tetai tangata manako au.

Eaa ra to te Atua manako no tetai tangata riririri? Te akamatakite maira te Pipiria e: “Auraka e akataunga atu ki te tangata rotoriri; e auraka e piri katoa atu ki te aerenga o te tangata riri maata ra.” (Maseli 22:24) E taki putuputu ana te riri akatere koreia ki te au ravenga kino pakari. (Genese 4:5-8) No te akaoko anga, te akakite maira te Pipiria e: “Auraka te kino e tutakiia atu ki te kino i te tangata ravarai nei. Ka akonokono ana i te mea tika tikai ki mua i te aroaro o te tangata katoa nei. Peneiake ko te tika, ko ta kotou ïa e aruaru e, kia noo au ua kotou i roto i te tangata katoa nei. E taku au akaperepere e, auraka e akaoko, tuku ua atura i te riri; kua tataia oki e, ‘Te tuatua maira te Atu, ei iaku te akaoko, e naku e tutaki atu.’” (Roma 12:17-19) Me aru tatou i taua ako anga ra, ka maata atu te au i roto i to tatou oraanga​—e na te reira e akamaata atu i to tatou mataora.

Ka Autu Koe

Ka autu ainei koe i te akono tamou anga i toou tu tiratiratu ki te Atua noatu te au taomianga kia akapera katoa? Ae, ka autu koe. Kia kite e te inangaro maira te Atua ia koe kia autu i te akapapu anga e e tarevake a Satani no runga i te maroanga no te tu tiratiratu, no te mea te karanga ra Tana Tuatua e: “E taku tamaiti, kia pakari koe, kia rekareka toku ngakau, kia tika iaku kia patoi atu i tei akakino mai iaku nei.”​—Maseli 27:11.

Ka rauka ia koe i te pure kia Iehova kia akaketaketa ia koe kia rave i te mea meitaki i roto i tona nga mata. (Philipi 4:6, 7, 13) No reira e tauta pakari i te akamaata mai i toou kite no te Tuatua a te Atua, te Pipiria. Na te akamanako ariki rekareka anga i taau i kite mai mei te Pipiria e tauturu ia koe kia akaoonu i toou aroa no te Atua e ka akakeu ia koe kia akamareka iaia. “Teia oki te inangaro i te Atua,” i karanga ai a 1 Ioane 5:3, “ko te akono i tana au akauenga; kare oki tana au akauenga i te mea teiaa.” Ka mataora te Au Kite o Iehova i toou ngai i te tauturu atu ia koe i te apii anga i te Pipiria. Te patiia atu nei koe kia aravei atu ia ratou, me kare e tata atu koe ki te aronga nenei o teia makatini.

[Tutu i te kapi 4]

Kua vai akarongo mou a Iobu i raro ake i te timataanga

[Tutu i te kapi 7]

Na te akamaata anga i toou kite no te Tuatua a te Atua e akaketaketa i toou manako kia rave i te mea meitaki