Au Uianga a te Aronga Tatau
Au Uianga a te Aronga Tatau
Kua akangateitei kore ainei me kore kua tuatua akakino ainei a Iesu i te tu i tona tuatuaanga ki tona metua vaine i tetai kaikaianga akaipoipo i Kana?—Ioane 2:4.
I muri poto ua ake i tona papetitoanga, kua patiia atu a Iesu e tana au pipi ki tetai kaikaianga akaipoipo i Kana. Te reira katoa tona metua vaine. I te pou anga i te uaina, kua karanga atu a Maria kia Iesu: “Kare a ratou wina.” I te pau atu anga, kua karanga atu a Iesu ki tona metua vaine: “Eaa taau iaku nei, e maine? kare i tae ki toku ora.”—Ioane 2:1-4.
I teia tuatau, me kapiki tetai tangata i tona metua vaine e “maine” e kua karanga atu kiaia “eaa taau iaku nei?” i te akaraanga ka manakoia te reira ei akangateitei kore, e ei akakinoanga katoa. Inara kia akaapa ia Iesu no runga i te reira te kopae ra i te aerenga manako o te reira tupuanga no te peu akonoanga e no te reo. Ka riro ei tauturu me rauka ia tatou i te maramaanga no te taangaangaia anga o teia au tuatua i te au tuatau Pipiria.
No runga i teia tuatua e “maine,” te karanga maira te Vine’s Expository Dictionary of Old and New Testament Words: “Me taangaangaia te tuatuaanga ki tetai vaine, kare te reira tuatua ei akoanga me kore ei tu pakari, mari ra ei akaperepereanga me kore ei akangateiteianga.” Te akatika maira tetai au puka ke no runga i te reira. Ei akaraanga, te karanga maira The Anchor Bible: “Kare teia ei akakinoanga, e kare katoa ei tuatua tau kore, e kare katoa ei akakiteanga e te ngere ra te aroa . . . Ko te tu matau, e te tau tikai te reira o Iesu i te tuatuaanga ki te au vaine.” Te akamarama maira The New International Dictionary of New Testament Theology no runga i te reira tuatua e “taangaangaia ana ei tuatua ma te kore ua atu e manakoanga no te tu akangateitei kore.” E te karanga maira te Theological Dictionary of the New Testament a Gerhard Kittel e, i te taangaanga anga i te reira tuatua “kare i te tu akangateitei kore me kore ei tu taakamaanga.” No reira, auraka tatou e taopenga e kua akateitei me kore kua kino a Iesu ki tona metua vaine i tona tuatuaanga kiaia na te tuatua e e “maine.”—Mataio 15:28; Luka 13:12; Ioane 4:21; 19:26; 20:13, 15.
Akapeea te tuatua “eaa taau iaku nei?” I te akaraanga e tuatua matauia teia na te ngati Iuda tei kitea maataia i roto i te Pipiria. Ei akaraanga, ia 2 Samuela 16:10, te kite maira tatou ia Davida e tapu ra ia Abisai mei te taanga ia Simei i te na ko anga: “Eaa atu au ia kotou, e te au tamariki a Zeruia? E vaoo ua kia akakino ua mai ana; peneiake kua tuatua mai a Iehova kiaia e, Ka akakino ia Davida.” Mei te reira katoa, ka tatau tatou ia 1 Ariki 17:18 e, i te kite mai anga te vaine takaua o Zarephata, e kua mate tana tamaiti, kua karanga aia kia Elia: “Eaa taku ia koe, e te tangata no te Atua na? i aere mai ainei koe kiaku nei, e akakite akaou mai i taku nei ara, e kia mate oki taku tamaiti?”
Mei teia au akaraanga Pipiria, kua kite mai tatou i te tuatua e “eaa taku ia koe?” e taangaanga putuputuia ana, kare kia akaari i te tu akatietie me kore te tu parau, mari ra kia patoi i te piri atu anga ki roto i tetai angaanga ka raveia me kore tei tamanakoia me kore kia akakite i tetai akaraanga manako me kore tuatuaanga tuke. Eaa, i reira, te ka tuatuaia no runga i ta Iesu tuatua kia Maria?
I to Maria akakiteanga kia Iesu, “Kare a ratou wina,” i te akaraanga kare e te akakite ua ra aia kia Iesu no runga i te reira tikaanga mari ra te inangaro ra aia kia rave a Iesu i tetai apinga no runga i te reira. Kua taangaanga a Iesu i taua tuatua matauia kia patoi atu i te tamanakoanga kikite a Maria, e tana au tuatua katoa, “Kare i tae ki toku ora,” te tauturu ra ia tatou i te kite mai i te tumu no tana rave anga i te reira.
Mei te taime o tona papetitoanga e te akatainuanga i te 29 T.N., kua kite meitaki tikai a Iesu e kua anoano a Iehova iaia, ei Mesia taputouia, kia aru i tetai aereanga tiratiratu te ka taopenga atu ki tona mateanga, akatuakaouanga, e te akakakaanga. “Kare oki te Tamaiti a te tangata i aere mai kia taviniia tona, ei tavini ra, e kia oronga i tona ora ei oko no te tangata e manganui,” i karanga ai aia. (Mataio 20:28) I te vaitataanga mai i te tuatau o tona mate anga, kua akataka meitaki atu a Iesu i teia i te na ko anga: “Kua tae ki te ora e akakakāiaʼi te Tamaiti a te tangata nei.” (Ioane 12:1, 23; 13:1) E no reira, i roto i tana pure i te po i mua ake i tona mate anga, kua karanga a Iesu: “E taku Metua, kua tae ki te ora; ka akakakā i taau Tamaiti, kia akakakā katoa oki taau Tamaiti ia koe.” (Ioane 17:1) E i te openga iora, i te tae anga mai te pupu i te opu iaia i Getesemane, kua akaaraara a Iesu i te au apotetoro mei te moe e kua karanga atu: “Kua tae ki te ora; i na, kua tukuia te Tamaiti a te tangata nei ki te rima o te aronga ara.”—Mareko 14:41.
Inara, i te akaipoipoanga i Kana, koi akamata ua akera a Iesu i tana angaanga orometua ei Mesia, e kare rai tona “ora” i tae mai ake. Tana akakoroanga maata koia oki kia rave i te anoano o tona Metua i te tu e i te tuatau i akatakaia mai e tona Metua, e kare e rauka i tetai tangata i te tamanamanata mai i tana angaanga akakoroia. I te akakiteanga i teia ki tona metua vaine, kua pakari a Iesu i tana tuatuaanga inara kare rava i akangateitei kore ana me kore i tuatua akakino ana. E kare rai a Maria, i akama ana me kore i manako e kua akakinoia mai aia e tana tamaiti. Ko te tika, i te marama mai anga i te aiteanga o ta Iesu pauanga, kua akakite atu aia ki te aronga e akono maira i te akaipoipoanga: “Ko tana e akaue mai kia kotou, ka akapera kotou.” Kare oki aia i kopae ua atu i tona metua vaine, kua rave a Iesu i tana temeio mua ei Mesia—i te tauianga i te vai ei uaina meitaki tikai—i te akaarianga i reira i tetai turanga meitaki tau ua i te rave anga i te anoano o tona Metua e te arikianga i te manamanata o tona metua vaine.—Ioane 2:5-11.
[Tutu i te kapi 31]
Kua takinga meitaki a Iesu inara kua pakari katoa i te tuatuaanga ki tona metua vaine