E Aroa i te Atua Tei Aroa Mai ia Koe
E Aroa i te Atua Tei Aroa Mai ia Koe
“E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.”—MATAIO 22:37.
1, 2. Na teaa ra i akakeu kia uiia te uianga no runga i te akauenga maata roa atu?
I TE akaraanga kua riro mai te uianga e ko tetai taumaro anga pakari roa atu i rotopu i te au Pharisea i to Iesu tuatau. No te au ture tere atu i te 600 tei riro mai ko te Ture a Mose, ko teea te ture puapinga maata roa atu? Ko te ture ainei o te atinga? E tika, kua orongaia te au atinga ei akakore i te au ara e ei akameitaki i te Atua. Penei ko te ture puapinga maata roa atu ko te ture ainei no runga i te peritome? E puapinga katoa te reira, no te mea e akairo te peritome no te koreromotu ta Iehova i papau kia Aberahama.—Genese 17:9-13.
2 I tetai tua, i te akara anga kua uriuri manako te aronga tau ua e no te mea e e puapinga maata te au ture ravarai ta te Atua i oronga mai—noatu e e akara anga meangiti ua ake te puapinga o tetai au ture—e mea tarevake i te akateitei atu i tetai ua atu akauenga i runga ake i tetai. Kua iki te au Pharisea i te ui atu i te uianga taumaro kia Iesu. Penei ake ka tuatua mai aia no runga i tetai apinga te ka akakino i tona tu irinaki anga tau. Kua aravei atu tetai o ratou ia Iesu e kua ui atu: “Ko teea te akauenga i maata o te ture?”—Mataio 22:34-36.
3. Eaa ta Iesu i karanga mai e ko te akauenga maata roa atu?
3 E puapinga maata tikai te pauanga ta Iesu i oronga atu no tatou i teia tuatau. I roto i tana pauanga, kua akapotoia mai e ia tei vai ua ana e ka vai ua atu rai te tumu puapinga maata no te akamorianga mou. I te taiku anga ia Deuteronomi 6:5, kua tuatua a Iesu: “‘E anoano atu koe i to Atua ia Iehova ma to ngakau katoa, e ma to vaerua katoa, e ma to manako katoa.’ Ko te akauenga mua teia e tei maata.” Noatu e e tai ua akauenga ta te Pharisea i ui atu, kua oronga a Iesu i tetai atu akauenga kiaia. I te taiku anga ia Levitiku 19:18, kua tuatua aia: “E mei te reira katoa ra te rua, ‘E aroa atu koe i toou tangata tupu mei te aroa ia koe uaorai.’” Kua akakite i reira a Iesu e ko teia nga ture e rua te tumu puapinga maata no te akamorianga ma. I te arai anga i tetai ua atu timata anga kia akakite mai aia na roto i te akapapa anga i te puapinga o tetai au ture, kua taopenga aia: “Te ture katoa e te au peroveta ra, tei teianei puke ture e rua nei.” (Mataio 22:37-40) I roto i teia atikara, ka uriuri tatou i te akauenga maata roa atu o teia nga akauenga e rua. Eaa tatou ka aroa ai i te Atua? Akapeea tatou i te akaari anga e te rave ra tatou i te reira? E akapeea tatou i te akatupu anga i taua aroa ra? E puapinga maata tikai kia kite tatou i te au pauanga o teia au uianga, no te akamareka anga ia Iehova, kia aroa tatou iaia ma to tatou ngakau katoa, vaerua katoa, e te manako katoa.
Te Puapinga o te Aroa
4, 5. (a) Eaa ra te Pharisea kare i poitirere ana no runga i ta Iesu i tuatua? (e) Eaa te mea puapinga maata atu ki te Atua i te au atinga e te au atinga karakaratio?
4 I te akara anga ko te Pharisea tei ui maee ia Iesu ra kare i riri ana me kore kare i poitirere ana no runga i te pauanga tei orongaia atu kiaia. Kua kite aia e ko te aroa i te Atua te mea puapinga maata no te akamorianga mou, noatu e Deuteronomi 6:4-9, ta Iesu i taiku mai. Kia tau ki te papaanga aiteite i roto ia Mareko, kua karanga atu te Pharisea kia Iesu e: “E tuatua-tika tikai taau i tuatua mai nei, e te Orometua: okotai rava oki Atua; kare atu, koia anake rai: E te anoano atu iaia ma te ngakau katoa, e ma te kite katoa, e ma te vaerua katoa, e te ririnui katoa, e te aroa atu i te tangata tupu mei te aroa iaia uaorai, e maata ïa i te au atinga karakaratio katoa ra, e te au atinga kai oki.”—Mareko 12:32, 33.
kare te manganui e akaari mai ana i te reira. I roto i te au tunako, kua riro mai ei peu kia tatau maataia te Sema [e pure Epera], me kore te aaki anga i te akarongo, e kua kapitiia mai teia ki te irava tei kiteaia i roto ia5 E tika, te umuumuia ra e te Ture te au atinga karakaratio e te au atinga, ko te au mea ta te Atua e akaperepere maata ra koia oki te turanga ngakau aroa o tona au tavini. Te manu rikiriki tei orongaia ki te Atua na roto i te aroa e te akamorianga e puapinga maata atuia i te au toa mamoe e tauatini ua atu tei orongaia ma te akakoroanga tarevake. (Mika 6:6-8) E akamaara ana i te papaanga no te vaine takaua apinga kore ta Iesu i akara atu ana i roto i te iero i Ierusalema. Ko nga moni meangiti ua e rua tana i tuku atu ki roto i te pia apinga ra kare e rauka i te oko mai i te manu rikiriki okotai. Inara, e puapinga maata atu kiaia taua oronga anga ra, tei orongaia ma te aroa ngakau tae no Iehova, i tetai aka orongaanga ta te aronga apinganui i oronga mai no roto i te toenga o ta ratou apinga maata. (Mareko 12:41-44) Mei teaa atura te akamaroiroianga i te kite anga e te akaperepere maata ra a Iehova i ta tatou ka akakite pouroa atu noatu e eaa to tatou au turanga—to tatou aroa iaia!
6. Eaa ta Paulo i tata no runga i te puapinga o te aroa?
6 I te akakite anga i te puapinga o te aroa i roto i te akamorianga mou, kua tata te apotetoro ko Paulo: “Tuatua ua rai au i te au tuatua ravarai a te tangata nei, e ta te au angela katoa ra, e kare oku aroa, kua riro ïa au mei te veo tangi ra, e mei te sumebalo turituri ra. Tei iaku ua rai te totou, e te kite i te au tuatua ngaro katoa ra, e te au kite katoa; e tei iaku te au akarongo katoa, e tikaʼi iaku kia apai ke i te maunga, e kare oku aroa, kare ua aku e puapinga. E kia oronga au i taku au apinga ravarai ei angai i te putaua, e kia tuku ua au i taku kopapa kia taʼu naia ki te ai, e kare oku aroa, kare ua atu aku e puapinga.” (1 Korinetia 13:1-3) Te taka meitaki ra, e puapinga maata te aroa me ka akamareka ta tatou akamorianga i te Atua. Inara, akapeea tatou i te akaari anga i to tatou aroa kia Iehova?
E Akaari Tatou i te Aroa no Iehova
7, 8. Akapeea tatou i te akaari anga i to tatou aroa no Iehova?
7 E manganui te irinaki ra e e manako ngakau ua te aroa kare e rauka ia tatou i te akatere; e tuatua ana te au tangata i te akainangaro anga. Inara, te aroa tika tikai kare e ko tetai apinga ua ta tatou e manako ra. Kua akatakaia mai e kua akamaramaia mai te reira na roto i te angaanga, kare e na roto i te manako ua. Te akakite maira te Pipiria i te aroa e e “mataara meitaki rava” e e apinga na tatou kia “aruaru.” (1 Korinetia 12:31; 14:1) Kua akamaroiroiia te au Kerititiano kia aroa, auraka “i te aroa vaa ua, e te aroa arero; ei aroa rave ra, ei mea mou.”—1 Ioane 3:18.
8 Te aroa i te Atua te akakeu ra ia tatou kia rave i tei akamareka iaia e kia paruru e kia turu i tona tu ngateitei, na roto i te au tuatua e te au angaanga. Te akakeu ra te reira ia tatou kia kopae ke i te anoano atu i teianei ao e tona au tu akono kore i te Atua. (1 Ioane 2:15, 16) Te aronga te aroa ra i te Atua te makitakita ra i te kino. (Salamo 97:10) Te kapiti katoa maira te aroa i te Atua i te aroa i te tangata tupu, ta tatou ka uriuri i roto i te atikara ka aru mai. Pera katoa, te aroa i te Atua te umuumu maira i to tatou akarongo. Te karanga ra te Pipiria e: “Teia oki te inangaro i te Atua, ko te akono i tana au akauenga.”—1 Ioane 5:3.
9. Akapeea a Iesu i te akaari anga i tona aroa no te Atua?
9 Kua akaari apa kore mai a Iesu i te aiteanga kia aroa i te Atua. Na te aroa i akakeu iaia kia akaruke i tona kainga i te rangi e kia aere mai ki te enua nei ei tangata. Kua akakeu te reira iaia kia akakaka i tona Metua na roto i te au mea tana i rave e i apii ana. Na te aroa i akakeu iaia kia “akarongo ra e tae ua atu ki tona mate anga.” (Philipi 2:8, NW) Kua akatuera mai taua akarongo ra—ei akaari mai i tona aroa—i te mataara no te aronga akarongo mou kia akatupu i tetai turanga tuatua tika ki mua i te Atua. Kua tata a Paulo: “Mei te tangata katoa e manganui i akariroia ei tangata ara i te akono kore o te tangata okotai [ko Adamu] ra, manganui oki tei akariroia ei tangata tuatua-tika i te akono a te tangata okotai [ko Iesu Karaiti] ra.”—Roma 5:19.
10. I te aroa anga i te Atua eaa ra te akarongo i kapitiia mai ei?
10 Mei ia Iesu rai, e akaari tatou i to tatou aroa na te akarongo anga ki te Atua. “Teia oki taua aroa nei,” i tata ei te apotetoro akaperepere a Iesu ko Ioane, “kia akono tatou i tana au akauenga.” (2 Ioane 6) Te aronga te inangaro tikai ra ia Iehova te anoano ra i tana aratakianga. I te kite anga e kare e rauka ia ratou i te arataki meitaki i to ratou uaorai au takainga vaevae, kua irinaki ratou i te pakari o te Atua e kua kauraro atu ki tana aratakianga aroa. (Ieremia 10:23) Mei te aronga manako meitaki o Berea i taito rai ratou tei ariki i te karere a te Atua ma te “ngakau maora,” te anoano tikai ra i te rave i te anoano o te Atua. (Angaanga 17:11) Kua kimikimi meitaki ratou i te au Tuatua Tapu kia marama pu tikai i te anoano o te Atua, tei tauturu ia ratou kia akaari atu i te aroa i roto i te au angaanga no te akarongo.
11. Eaa te aiteanga kia aroa i te Atua ma to tatou ngakau, manako, meta, e te ririnui katoa?
11 Mei ta Iesu i karanga ana, te aroa anga i te Atua te kapitiia maira to tatou ngakau katoa, manako katoa, te meta katoa e te ririnui katoa. (Mareko 12:30; NW) No roto mai taua aroa ra i te ngakau, te o maira to tatou au manako, te au anoano, e te au manako mei roto roa atu, e te anoano ngakau tae ra tatou i te akarekareka ia Iehova. Te aroa katoa ra tatou ma to tatou manako. Kare ta tatou akamorianga i te mea poiri ua; kua kite tatou ia Iehova—i tona au tu, au turanga, e te au akakoroanga. E taangaanga tatou i to tatou meta, to tatou oraanga tangata katoa e te ora i rauka mai ia tatou, kia tavini e kia akapaapaa iaia. E taangaanga katoa tatou i to tatou maroiroi i te tavini e te akapaapaa iaia.
Te Tumu ka Aroa ai Tatou ia Iehova
12. Eaa ra te Atua i umuumu mai ei kia aroa tatou iaia?
12 Okotai tumu kia aroa tatou ia Iehova koia oki te umuumu maira aia kia akaata tatou i tona au tu. Ko te Atua te tumu e te akaraanga teitei rava no te aroa. “Ko te Atua oki te aroa,” i tata ei te apotetoro akauruia ko Ioane. (1 Ioane 4:8) Kua angaia te au tangata i roto i to te Atua tu, kua angaia tatou kia aroa. Ko te tika, kua akatumuia to Iehova tu ngateitei ki runga i te aroa. Te anoano ra aia ei au tangata nona ra i te aronga te tavini ra iaia no to ratou aroa e te inangaro ra i tana mataara tuatua tika no te tutara anga. E puapinga maata tikai te aroa no te au e te rotai no te au mea ravarai i angaia.
13. (a) Eaa ra i akakiteia ai ki to Iseraela e e: ‘Anoano i to Atua ia Iehova’? (e) Eaa ra i tau ei e te inangaro maira a Iehova kia aroa tatou iaia?
13 Ko tetai tumu ke no te aroa anga ia Iehova koia oki te ariki rekareka ra tatou i tana i rave ana no tatou. E akamaara ana i ta Iesu i tuatua ana ki te ngati Iuda: “E anoano atu koe i to Atua ia Iehova.” Kare ratou i inangaroia ana kia aroa i tetai atua kare e manako mai ana e kare ratou i kite. E aroa ratou i te Atua tei akaari mai i tona aroa kia ratou. To ratou Atua ko Iehova. Koia Tei apai mai ia ratou mei roto mai ia Aiphiti ki roto i te Enua Taputouia, ko Tei paruru, akaora, e te akaperepere ia ratou, Tei ako aroa atu ia ratou. E i teia tuatau, ko Iehova to tatou Atua, tei oronga mai i tana Tamaiti ei atinga kia rauka ia tatou te ora mutu kore. E mea tau tikai e te inangaro maira a Iehova ia tatou kia aroa rai iaia! E aroa oraora to tatou aroa; kua patiia mai tatou kia aroa i te Atua tei aroa mai ia tatou. E oronga tatou i to tatou aroa ki Tei “aroa mua mai ia tatou.”—1 Ioane 4:19, NW.
14. Na roto i teea tu i aite ei to Iehova aroa ki tetai metua aroa?
14 Kua aite to Iehova aroa no te au tangata ravarai ki tetai metua aroa no tana tamariki. Noatu e aronga apa, e angaanga pakari ana te au metua aroa i te au mataiti ravarai i te utuutu anga i ta ratou tamariki, ma te akaatinga maata i te pae materia e te vai atura. Te ikuiku ra, te akamaroiroi ra, te turu ra, e te ako ra te au metua i ta ratou tamariki no te mea te inangaro ra te au metua kia mataora e kia tupu ruperupe ta ratou tamariki. Eaa ta te au metua e inangaro ra? Te inangaro ra ratou i ta ratou tamariki kia aroa mai ia ratou e kia tamou ngakau i ta ratou i apii atu ki te tamariki ei meitaki rai no ratou. Kare ainei e tau ana e te inangaro maira to tatou Metua apa
kore i te rangi kia akaari tatou i te aroa maata no te au mea ravarai tana i rave ana no tatou?Tatanu Anga i te Aroa no te Atua
15. Eaa te takainga mua i te tatanu anga i te aroa no te Atua?
15 Kare tatou i kite ana i te Atua e kare katoa i rongo ana i tona reo. (Ioane 1:18) Inara, te pati maira aia ia tatou kia tomo atu ki roto i tetai pirianga aroa kiaia. (Iakobo 4:8) Akapeea tatou i te rave anga i te reira? Te takainga mua i te aroa anga i tetai tangata koia oki i te kite anga i taua tangata ra; e ngata i te akaari i te aroa oonu ki tetai tangata kare tatou i kite. Kua oronga mai a Iehova i tana Tuatua, te Pipiria, kia kite oki tatou iaia. No reira a Iehova, na roto i tana akaaerenga, i akamaroiroi mai ei ia tatou kia tatau putuputu i te Pipiria. Na te Pipiria e apii mai kia tatou no runga i te Atua, tona au tu, tona tu peretana, pera katoa tona akono anga i te au tangata e tauatini ua atu te mataiti. Ia tatou e akamanako ra i taua au papaanga ra, ka maata mai to tatou marama e te aroa nona.—Roma 15:4.
16. Akapeea i te akamanako anga no runga i te angaanga orometua a Iesu i te akamaata anga i to tatou aroa no te Atua?
Ioane 14:9) Kare ainei koe e akakeuia e te tangi aroa ta Iesu i akaari mai i te akaora anga i te tamaiti okotai a tetai vaine takaua ra? (Luka 7:11-15) Kare ainei e mea reka i te kite e koia—te Tamaiti a te Atua e te tangata maata rava atu tei ora ana—tei orei ma te akaaka i te vaevae o tana au pipi? (Ioane 13:3-5) Kare ainei e te akakeu ra ia koe i te kite anga e noatu e tangata maata atu e e tangata kite pakari atu i tetai ua atu tangata, kua tuku aia iaia uaorai kia akavaitata atu ki te katoatoa, kapiti mai te tamariki? (Mareko 10:13, 14) Ia tatou e akamanako ariki rekareka ra i teia au mea, ka riro mai tatou mei te au Kerititiano ta Petero i tata e: “Ko ta kotou i anoano na [ia Iesu], kore ua atu rai te kite iaia.” (1 Petero 1:8) E maata maira to tatou aroa no Iesu, ka maata katoa to tatou aroa no Iehova.
16 Ko tetai mataara maata e tupu mai ei tatou i roto i to tatou aroa no Iehova koia oki e akamaara i te oraanga e te angaanga orometua a Iesu. Ko te tika, kua akaata apa kore mai a Iesu i tona Metua i rauka ai iaia i te karanga e: “Ko te akara mai iaku nei, kua akara ïa i te Metua.” (17, 18. Na te akamanako oonu anga i teea au apinga aroa a Iehova e akatupu ei i to tatou aroa nona?
17 Ko tetai mataara e akamaata ai tatou i to tatou aroa no te Atua koia oki kia akamanako oonu no runga i te au apinga aroa maata tana i rave ana ei rekareka anga no tatou—te manea o te au mea i angaia, te tukeke tikai o te au mea reka ei kai, te au pirianga oa pumaana e te meitaki, pera katoa tetai atu au mea mataora e manganui te reka ra e te mareka ra tatou. (Angaanga 14:17) Te maata atu i te apiianga tatou no runga i te Atua, te maata atuia i te au tumu no tatou kia ariki rekareka i tona tu meitaki e te tu aroa maata. E akamanako ana no runga i te au mea ravarai ta Iehova i rave ana noou uaorai. Kare ainei koe e ariki ana e te tau ra iaia toou aroa?
18 I roto i te au apinga aroa e manganui no ko mai i te Atua ko te atianga no tatou kia akavaitata atu kiaia na roto i te pure i tetai ua atu taime, i te kite anga e te akarongo maira “Tei akarongo i te pure ra” ia tatou. (Salamo 65:2) Kua oronga a Iehova ki tana Tamaiti akaperepere i te mana akaaere kia tutara e kia akava. Inara, kare aia i oronga atu ana ki tetai ke, e tana Tamaiti, kia akarongo i te au pure. Koia anake ua te akarongo maira i ta tatou au pure. Te manako aroa ta Iehova e akaari maira te akapiri vaitata ra ia tatou kiaia.
19. Eaa te au taputou a Iehova te akavaitata ra ia tatou kiaia?
19 Kua akapiri vaitata katoa tatou kia Iehova me e akamanako ana tatou e eaa tana e akakoro ra no te au tangata ravarai i te tuatau ki mua. Kua taputou aia i te takore anga i te maki, te mii e te mate. (Apokalupo 21:3, 4) Me apaiia mai te au tangata ravarai ki te tu apa kore, kare tetai e rokoia e te taitaia, te maromaroa, me kore te tumatetenga. Kua kore rava te onge, te putaua, e te tamaki. (Salamo 46:9; 72:16) Ka tauiia te enua ki roto i tetai parataito. (Luka 23:43) Na Iehova e apai mai i teia au akameitakianga, kare e kua akaueia aia kia rave i te reira, mari ra no tona aroa ia tatou.
20. Eaa ta Mose i karanga no runga i te au akameitakianga no te aroa anga ia Iehova?
20 No reira, te vai ra te au tumu ririnui kia aroa tatou i te Atua e kia tuku i taua aroa ra kia tupu mai. Ka akaketaketa ua atu ainei koe i toou aroa no te Atua, i te akatika anga iaia kia arataki i toou au arataa? Tei ia koe te ikianga. Kua kite a Mose i te au akameitakianga no te tatanu anga e te akono tamou anga i te aroa no Iehova. Ki to Iseraela mei tupua roa mai, kua karanga a Mose e: “Ka rave i te ora, kia ora koe e toou katoa uanga: Kia inangaro oki koe i to Atua ra ia Iehova, e kia akarongo koe i tona reo, e kia piri atu koe kiaia; ko toou ïa ora aia, e ko te roa ïa o toou ra puke rā.”—Deuteronomi 30:19, 20.
Maara Ainei ia Koe?
• Eaa ra i tau ei kia aroa tatou ia Iehova?
• Akapeea tatou i te akaari anga i to tatou aroa no te Atua?
• Eaa te au tumu i aroa ai tatou ia Iehova?
• Akapeea tatou i te tatanu anga i te aroa no te Atua?
[Au Uianga Apii]
[Tutu i te kapi 20]
Te akaperepere tikai ra a Iehova i ta tatou pouroa ka rauka i te akakite—to tatou aroa iaia
[Au Tutu i te kapi 23]
“Ko te akara mai iaku nei, kua akara ïa i te Metua.”—Ioane 14:9