E Puapinga te Akakite i te Tika

I VAI ua ana te tu tika kore mei te tuatau mai i te kainga i Edene. Inara, e mea inangaroia te tu tika i roto i te maataanga o te au peu e te au taiate, kareka te pikipikikaa e te akavare, e manako ana ratou i te reira ei mea kino e te tau kore. E mea ngakau parau tikai kia manakoia mai e kua tau kia irinakiia. Inara, te riro ua atura ei mea matauia i te manako, e ka anoanoia te tu tika kore e rauka ai i te noo i roto i te taiate tangata o teia tuatau. Eaa ra toou manako no runga i te reira? E puapinga ainei kia tatanu i te tu tika? Eaa toou turanga i te iki anga e ko teea te tu tika e ko teea tei kore i tika?

Kia akarekareka i te Atua, ka anoanoia tatou kia akakite i te tika i roto i ta tatou tuatuaanga e te tu o to tatou oraanga. Kua ako te apotetoro ko Paulo i te au oa Kerititiano: “Ei tuatua-mou ta te tangata ravarai kia tuatua atu ki tetai.” (Ephesia 4:25) Kua tata katoa a Paulo e: “Ei akono meitaki ta matou i te au mea katoa nei.” (Ebera 13:18) Kare to tatou akakoroanga no te akakite i te tika e kia akapaapaaia mai e te tangata. Ka akakite tatou i te tika no to tatou akangateitei i Tei Anga mai ia tatou e no to tatou inangaro kia akamareka iaia.

Auraka e Uuna i Toou Tu Tikai

I te au enua e manganui, e pikikaa ana te tangata e koai tikai ratou kia puapingaia ratou i roto i te oraanga. Ka apai ratou i te au pepa puapinga pikikaa, te au tiporoma, e te au pepa akataka e koai ratou, kia aere ki tetai enua ma te kore i tikaia e te ture me kore kia rauka te ngai angaanga me kore ra tetai turanga tei kore ratou i tau no te reira. E pikikaa ana tetai au metua i te pepa ra anauanga o ta ratou tamariki kia roa atu te tuatau o te tamariki i te apii.

E mareka mai ei te Atua, kare tatou e akavare pikikaa atu. Te karanga ra te Pipiria e e “Atua tuatua-mou” a Iehova e te irinaki maira aia e kia tuatua mou katoa te aronga e pirianga vaitata to ratou kiaia. (Salamo 31:5) Me ka inangaro tatou i te tamou marie i tetai pirianga vaitata ma Iehova, kare tatou e aru i te “au tangata tarevakaua,” i te aronga i “pikikaa.”​—Salamo 26:4.

E mea matau na te tangata i te uuna i te tika me aro atu i tetai turanga te ka akautungaia ratou no te angaanga tarevake. I roto katoa i te putuputuanga Kerititiano, penei ka timataia tetai tangata kia akapera. I roto i tetai putuputuanga, ei akaraanga, kua akatika rai tetai mapu tane ki te aronga pakari e kua rave aia i tetai au ara. Inara, kare aia i akatika ana e kua keia aia, noatu te vai ra te akapapuanga e kua apa aia. I te openga kua akapapuia mai rai e kua keia aia e kua akaateaia atura mei roto i te putuputuanga. Kare ainei i meitaki atu kia akakite aia i te tikaanga tikai kia rauka te tauturu i te akaoki akaou mai i tona pirianga akaperepere ma Iehova? I  na, te karanga ra te Pipiria e: “Auraka koe e akavaavaa, e taku tamaiti, i te ako a Iehova, auraka oki e noongata i tana pāpā anga mai: Ko ta te Atu e akaperepere ra, ko tana ïa e ako mai.”​—Ebera 12:5, 6.

Tetai au taime, me te aruaru ra tetai taeake kia rauka tetai taoonga i roto i te putuputuanga, penei ka tauta aia i te uuna i tetai o tona uaorai au manamanata me kore au angaanga tau kore i topa. Ei akaraanga, i te akaki anga i tetai patianga no tetai angaanga tavini takake, penei kare aia e oronga katoatoa mai i te au pauanga no runga i tona oraanga kopapa e te tu akono, i te manako anga e kare aia e arikiia mai me akakite aia i te tika no runga i teia au mea nei. Penei ka manako aia e, ‘Kare au i pikikaa ana,’ inara te akakite tika ua maira ainei aia i te tika ki etai ke? E akamanako ana i te tuatua tei akakiteia mai i roto ia Maseli 3:32: “E mea viivii oki na Iehova te aronga māro ra, tei te aronga tuatua-tika ra tana muna.”

Te aiteanga o te akakite i te tika koia oki, te mea mua, kia akakite tatou uaorai i te tika. Maataanga i te taime e irinaki ana tatou i ta tatou uaorai e inangaro ra i te irinaki, kare ra no te mea e te tika ra e me kare i tika. E mea ngoie ua ia tatou i te akaapa atu i tetai! Ei akaraanga, kua tauta te Ariki ko Saula i te maani kotoeanga e kua tika rai aia kia akarongo kore na te akaapa atu anga i tetai ke. I te openga, kua akaruke a Iehova iaia, auraka kia riro akaou ei ariki. (1 Samuela 15:20-23) E aka tuke tikai ki te Ariki ko Davida, tei pure kia Iehova e: “Kua aaki atura au i taku ara  kia koe ra; e kare au i uuna i taku nei apa: i tuatua akera oki au e, E aaki au i taku ara kia Iehova ra; e kua akakore mai koe i te kino o taua ara naku ra.”​—Salamo 32:5.

Apai Mai te Tu Tika i te Au Akameitakianga

Ka riro te tu tika, me kore te ngere i te reira, ei akatuke i te manako o etai ke no runga ia koe. Me kite te tangata e kua akavare koe ia ratou noatu me e tai ua taime, kare ratou e irinaki akaou ia koe, e kare i te mea mama ua i te akaoki akaou mai i te reira. Mei te mea ra, i tetai tua e, e tangata tuatua mou koe e te tuatua tika, ka akatupu koe i tetai rongo meitaki noou ei tangata pikikaa kore, tei tau kia irinakiia. Kua rauka i te Au Kite o Iehova taua tu rongo meitaki ra. Ka akamanako ana i tetai au akaraanga.

Kua kitea mai e te akaaere o tetai kamupani e e maata tana aronga angaanga e keia ra i te kamupani, i reira kua pati atu aia i te tauturu a te akava. I te kite anga aia e kua o atu tetai tangata angaanga koia oki e Kite no Iehova ki roto i te aronga tei opuia, kua aravei atu aia i te akava kia tuku vivikiia mai taua Kite ra. No teaa ra? No te mea kua kite te akaaere e e tangata tika teia tangata angaanga e kua tiama aia. Kua noo rai te Kite ki tana ngai angaanga, kareka etai atu kua akarukeia. Kua rekareka tikai tona au oa Kite, i te kite atu e kua riro tona tu ei akangateitei i te ingoa o Iehova.

Te kiteaia maira te tu meitaki. I roto i tetai oire i Aperika, kua anoanoia te ripea i tetai ana tei na runga ake i tetai aka ngai akataeanga vai no te mea kua keiaia te au rakau o runga. Kua manako te au tangata i reira i te akaputu i tetai moni ei pau i te au rakau, inara koai te ka tau kia irinakiia, ei akatere i te moni? Kua akatika te katoatoa e ko tetai o te Au Kite o Iehova.

I te tupu anga te manamanata poritiki e te eteniki i roto i tetai enua i Aperika, kua tukuia atu tetai Kite e angaanga ra ei akaoniti no tetai kamupani pa enua, e tona akaaerenga ki tetai ngai ke mai, no te mea ka takinoia tona oraanga. Kua akanoo te kamupani kia angaanga aia i tetai enua ke no tetai au marama, na ratou e tutaki e kia au roa te manamanata. No teaa ra? No te mea i muao ana kua patoi aia i te piri atu ki te aronga e parani ra i te keia i te kamupani. Kua kite oki te kamupani i tona rongo meitaki no te tu tika ngaueue kore. Ka inangaro ainei ratou i te tauturu i teia tangata angaanga naringa ratou i kite e e tangata angaanga pikikaa aia?

“E aere rai te tangata tuatua-tika ma te pikikaa kore,” e akakite ra te Maseli 20:7. Te tangata tuatua tika ra e tangata pikikaa kore ia. Kare rava aia e pikipikikaa me kore e akavare i tona tangata tupu. Kare aina koe e inangaro ana kia akapera mai rai etai ke ia koe? E puapinga maata tikai te tu tika i roto i te akamorianga mou. E akakiteanga te reira i to tatou aroa no te Atua e no te tangata tupu. Na te akakite anga i te tika, te akaari ra tatou i to tatou inangaro kia aru i te kaveinga no runga i te tu ta Iesu i akakite mai: “E te au mea katoa ta kotou i anoano ia etai ke ra, na reira katoa kotou ia ratou.”​—Mataio 7:12; 22:36-39.

Penei ka tupu mai te au mea mareka kore i te akakite anga i te tika i te au taime katoatoa, inara e puapinga maata roa atu te akava ngakau ma ka rauka mai i tetai ua atu apinga. Me akara mamaoia atu, e maata roa atu te au puapinga ka rauka mai i te akakite i te tika. E tika rava e kare e rauka i te oko i tetai pirianga meitaki kia Iehova. Eaa i reira ka takino ei i te reira na te rave anga i tetai mea tika kore kia rauka te akangateiteianga a te tangata me kore kia rauka tetai au puapinga kare i tau i te ture? Noatu e eaa te akaaoanga ta tatou ka aro atu, ka rauka ia tatou i te irinaki i te tuatua a te tata taramo: “E ao to te tangata tei akariro ia Iehova ei irinaki anga nona, e kare i akono i te nengonengo, e tei tatipake ki te tuatua pikikaa.”​—Salamo 40:4.

[Au Tutu i te kapi 18]

Kare te au Kerititiano mou e oko me kore e taangaanga pikikaa ua i te au pepa puapinga