Eaa ka Akataka ai e Koai te Akakore Karaiti?

“Ta kotou i akarongo ra e, te aere maira taua Akakakore Mesia ra,” i tata ai te apotetoro i taito tei akauruia. (1 Ioane 2:18.) E mea umere tikai taua au tuatua ra! No te au anere mataiti ua atu, te tangata i te umere ua anga no runga i to ratou aiteanga. Koai ra te Akakakore Mesia me kore te Akakore Karaiti? Aea aia e aere mai ei? Eaa tana ka rave me aere mai aia?

E ROROA te papaanga o te aronga tei akaapaia e e Akakore Karaiti. I mua ana, ko te aronga tei karangaia e e “Akakakore Mesia” kua kapiti mai i te ngati Iuda, te akatereanga a te Katorika, e te au emepera o Roma. Ei akaraanga, i te iki anga te Emepera Frederick II (1194-1250) auraka e piri ki roto i te Tamakianga a te akonoanga, kua karanga te Pope Gregory IX e e Akakore Karaiti aia e kua akaateaia mei roto i te akonoanga. Kua akaatea akaouia aia e te kauono o Gregory, ko Innocent IV. I te ariu anga atu, kua akakite a Frederick e ko Innocent te Akakore Karaiti.

Ko te apotetoro ua ko Ioane te tata Pipiria tei taangaanga i te nga kupu e “Akakakore Mesia.” I roto i nga reta e rua e apai ra i tona ingoa, ka kiteaia taua nga kupu ra e rima taime, i te taiku anga i te reira ei tangata okotai e ei pupu. Kua tataia te au irava ka kiteaia taua nga kupu ra, ki roto i te pia i te kapi ka aru mai. Ka kite tatou mei teia au irava e, e pikikaa te Akakore Karaiti e te akavare, e te umuumu ra kia takore i te pirianga o tetai tangata kia Karaiti e ki te Atua. Kua tau rai te apotetoro kia raurau i tona au oa Kerititiano e: “E aku au akaperepere e, auraka e akarongo atu i te au vaerua ravarai, e timata ra i taua au vaerua ra, kia kitea e, no ko mai aina i te Atua ra: no te mea e manganui te peroveta pikikaa i aere atu na na te ao nei.”​—1 Ioane 4:1.

Kua akamatakite katoa mai a Iesu no runga i te aronga akavare, me kore i te au peroveta pikikaa, i te karanga anga e: “Aere mai [ratou] ia kotou ma te kakau mamoe ra, kareka i roto, e luko taae ïa. Ka kite kotou ia ratou i to ratou ua [me kore, au angaanga].” (Mataio 7:15, 16) Te akamatakite katoa maira ainei a Iesu i tana au pipi no runga i te Akakore Karaiti akatutu ua? Ka akara ana tatou e akapeea tatou me akataka e koai teia taae akavare.