Ka Rauka Ainei Tetai Akava kia Akatanoia?

KO SLADJANA, tetai Kite no Iehova i Koroatia, kua akanooia kia tu ki mua i tetai akavaanga no runga i te au mea no te moni. Kua tano meitaki tona ora i te tae atu anga ki mua i te akava. Inara, kare tetai pae i roto i te akavaanga i tae mai ake. Te inangaro ra a Sladjana i te oronga i tetai akakiteanga, e no reira, i te katoatoa e tiaki ua maira, kua rauka iaia i te tu mataku kore i te tuatua atu ki te akava.

“E te Ngateitei, kua kite ainei koe e kare e roa atu ana, kare e au akava e kare e au ngai akavaanga i runga nei i te enua?” i ui atu ei aia. Te tuatua ra oki aia, ki te au akava ta tatou e kite nei ia ratou i teia tuatau.

Ma te poitirere, kua akara ua mai te akava kiaia, kare i rauka ana i te tuatua i tetai tuatua. I taua taime tikai kua akamata atu te akavaanga. I te oti mai anga te reira e kua tu mai a Sladjana ki runga i te taina i tetai pepa, kua urunga atu te akava ki tona tua e kua ui maru ua atu: “Papu ia koe i taau i akakite ua mai nei kiaku, e kare e roa atu ana, kare e au akava e kare e au ngai akavaanga i runga nei i te enua?”

“Ae, e te Ngateitei. Papu tikai iaku!” i pau atu ei a Sladjana.

“Eaa taau akapapuanga no runga i te reira?” i ui atu ei te akava.

“Te kiteaia ra te reira i roto i te Pipiria,” i pau atu ei a Sladjana.

Kua karanga atu te akava e ka inangaro aia i te tatau i te reira akapapuanga, inara kare ana Pipiria. No reira kua karanga atu a Sladjana e ka rauka mai iaia tetai nana. Kua atoro atu te Au Kite i te akava, kua oronga atu i tetai Pipiria, e kua akamaroiroi atu iaia kia rave aia i tetai apii Pipiria i te epetoma ravarai. Kua ariki te akava i te patianga e kare i roa ana kua riro mai aia ei Kite no Iehova.

Na roto i te totou, te karanga maira a Salamo 2:10: “E tenana, e te ui ariki ra, kia pakari kotou; e āriki i te [akatanotanoanga, NW], e te au akava o te enua nei.” Mei teaa atura te pumaana ki te ngakau me ariki akaaka taua aronga ra i ta Iehova aratakianga takinga meitaki!

[Tutu i te kapi 32]

Sladjana raua ko te akava