E Tangata Tei Inangaro i te Oraanga e te Tangata

A DANIEL SYDLIK, tetai mema roa o te Pupu Akaaere o te Au Kite o Iehova, kua akamutu mai aia i tona oraanga i te enua nei i te Ruirua, Aperira 18, 2006. E 87 ona mataiti e kua tavini ana aia ei mema o te pamiri Betela i Brooklyn, New York, vaitata rai e 60 mataiti.

Te taeake ko Dan, ko te ingoa teia ta tetai aronga piri vaitata kiaia e kapiki ana iaia, kua aere mai ki te Betela i te 1946. I mua atu ana, kua tavini aia ei painia takake i California e no roto katoa ana aia i te are auri no tetai taime i te tuatau o te Tamaki II o te Ao no tona tu neutara Kerititiano. Tona au tupuanga i taua tuatau ra, kua akataka meitakiia mai i roto i tona tua oraanga, tei kiteaia i roto i The Watchtower o Tiunu 1, 1985, i raro i te tumu tuatua “How Priceless Your Friendship, O God!”

Kua kiteaia te Taeake ko Sydlik ei tangata tau ua, e te oaoa. Me akono mai aia i te akamorianga i te popongi no te pamiri Betela, e akaata putuputu mai ana tona tu papu meitaki e te tu inangaro i te oraanga i roto i tana au tuatua akamataanga: “E meitaki tikai e te ora nei tatou i te tavini atu anga i te Atua mou e te ora.” Ei vaa tuatua, e akamaroiroi ana aia i teia manako ki tetai ke, te oronga anga i te au ako ma te au tumu manako “Kia Mataora te Iti Tangata e ko Iehova to Ratou Atua,” “Akaari Anga i te Rekareka o Iehova,” “Kia Akaka ua te Ai o te Vaerua Tapu,” e “Te Aere Maira Tetai Mea Meitaki Rava Atu.”

I te 1970, kua akaipoipo te Taeake ko Sydlik ia Marina Hodson, mei Peritane mai, tana i akataka ei “ei tauturu tei tonokiaia mai e te Atua.” Kua tavini kapiti raua ia Iehova e 35 mataiti e tere atu.

I tona au mataiti i roto i te Betela, kua angaanga atu te Taeake ko Sydlik i roto i te au tipatimani tukeke, kapiti mai te ngai neneianga e te Tipatimani Tataanga. Kua angaanga katoa aia i te ngai o te ratio WBBR. E oti, i roto ia Noema 1974, kua ikiia aia e ko tetai o te Pupu Akaaere e i te openga iora kua angaanga kapiti atu aia ki te au kumiti no te Angaanga e te Tataanga.

E 30 mataiti e tere atu, te angaanga a te Taeake ko Sydlik ma te Kumiti no te Tangata, kua akatakaia mai i roto i tona tu inangaro maata i te au tangata. Kua akamaroiroi aia i te manganui ma tona reo pakari e te aruru maata, i te arataki ua anga i te manako o te tangata ki ta tatou tikaanga ngateitei i te tavinianga ia Iehova. Kua akakite putuputu mai aia e kare e tei runga te mataora mou tikai, i te au apinga ke o vao, mari ra tei runga i to tatou pirianga kia Iehova e to tatou tu manakoanga no te oraanga.

Noatu e te mii maata nei te pamiri Betela i te Taeake ko Sydlik, ka akakeu uaia rai ratou e tona akaraanga ei tangata inangaro tikai i te oraanga e te au tangata. Papu ia tatou e kua kapitiia atu aia ki te aronga tei tuatuaia ia Apokalupo 14:13: “E ao to te aronga e mate, ei roto i te Atu ratou ka mate ei, i teianei e a muri ua atu: koia ïa, te tuatua maira te Vaerua, kia akaea ratou i te rave i ta ratou angaanga, e e aru oki ta ratou angaanga ia ratou.”