Ka Rauka ia Koe i te Autu i te Tuatau Manamanata

I ROTO i teia au tuatau ngata, e manganui te akakoromaki ra i te au kino mei te uriia rai. Inara, no te au Kerititiano, kua tauturu te inangaro no te Atua e te tu tiratiratu ki tana au kaveinga ia ratou kia autu. Akapeea? Ka kiteaia te pauanga i roto i tetai akatutuanga tei akakiteia e Iesu Karaiti. Kua akaaite aia i tana au pipi akarongo ki “tetai tangata pakari, tei patu i tona are ki runga i te papa.” Kua karanga a Iesu: “Topa iora te ua, e taʼe iora te vai puke, e te matangi oki i te arara viviki anga mai i rungao i taua are ra, kare rava i keu, no te mea e papa te turanga.”​—Mataio 7:24, 25.

E akara ana e noatu e e tangata pakari te tangata i roto i teia akatutuanga, te kite maira rai aia i te kino​—tei akatutuia e te ua topa, vai puke, e te matangi kino. No reira, kare e te akakite maira a Iesu, e ka ora atu tana au pipi mei te au manamanata katoatoa e ka rekareka i tetai oraanga au ua e te ponuiaau. (Salamo 34:19; Iakobo 4:13-15) Inara kua karanga mai aia e ka rauka i te au tavini tiratiratu o te Atua i te akapapa e kia autu i te reira au kino e te au tumatetenga mei te uriia rai.

Kua akamata a Iesu i te tuatua akatutuanga i te na ko anga e: “Teianei, ko tei akarongo mai i taku nei tuatua, e akono atura, e arite au iaia i tetai tangata pakari, ko tei akatu i tona are ki runga i te papa.” E tika, kare e te tuatua ra a Iesu, no runga i te patu anga i te au are tikai, mari ra i te akatupuanga i te au angaanga Kerititiano. Te aronga tei akarongo ki te au tuatua a Karaiti, e taangaanga ana i te kite meitaki e e akaari ana i te akamanakoanga tau. Kua akatupu ratou i to ratou au akakoroanga e te au angaanga ki runga i te papa o te au apiianga a Karaiti na te taangaanga anga i ta ratou i apiiia mai. Ma te umere, kare teia papa akatutu ua e kiteaia ana i rungarunga ua. Te tangata i roto i teia akatutuanga kua umuumuia kia ko “ki raro roa” i te itae atu i te reira. (Luka 6:48) Mei te reira katoa, te angaanga tamou pakari ra te au pipi a Iesu i te tatanu i te au tu tamou marie te akapiri vaitata atura ia ratou ki te Atua.​—Mataio 5:5-7; 6:33.

Eaa te tupu ana me timata atu te au manamanata mei te uriia rai i te tu tiratiratu o te tango Kerititiano o te au pipi a Iesu? To ratou akarongo puareinga ua ki te au apiianga a Karaiti e to ratou au tu Kerititiano, kua riro ei au tumuanga no te akamaroiroianga i te tuatau o te reira au akaaoanga e, tei puapinga maata rava atu, i te tuatau uriia o Aramakito e aere mai nei. (Mataio 5:10-12; Apokalupo 16:15, 16) Ae, na te aruanga i te au apiianga a Karaiti, e manganui te autu meitaki nei i te au timataanga mei te uriia rai. Ka rauka katoa ia koe i te rave i te reira.​—1 Petero 2:21-23.