“Ka Rekareka Tika rai Oki Koe”

“I te akono anga i te oroa a toou Atua ra a Iehova, . . . ka rekareka tika rai oki koe.”​—DEUTERONOMI 16:15.

1. (a) Eaa te au maroanga ta Satani i akatupu? (e) Eaa ta Iehova i akakite i muri ake i te meameaau anga a Adamu raua ko Eva?

I TE taki anga atu a Satani ia Adamu raua ko Eva i te akameameaau i Tei Anga mai ia raua, e rua ana nga maroanga puapinga maata i akatupu mai. Te mea mua, kua akaao aia i to Iehova tu tikaanga e te tuatua tika o tona tutara anga. Te rua, kua karanga a Satani e te tavini ua ra te au tangata i te Atua ma te inangaro-uaorai. Kua akakite taka meitakiia mai te rua o te maroanga i to Iobu tuatau. (Genese 3:1-6; Iobu 1:9, 10; 2:4, 5) Noatu rai, kua rave viviki a Iehova i te ravenga kia akono i taua turanga. Ia Adamu raua ko Eva e noo ra rai i roto i te kainga i Edene, kua akakite a Iehova e Nana e iki i te pau i te au maroanga. Kua akakite aia i te aerenga mai o tetai “uanga,” tei akaparuparuia tona pooavae, e i muri ake ka akaparuparu kinoia e ia to Satani mimiti.​—Genese 3:15.

2. Eaa te marama ta Iehova i oronga mai e i akapeea aia i te akatupuanga i te totou tei tataia i roto ia Genese 3:15?

² I te au tuatau e pati ra, kua oronga mai a Iehova i te marama maata no taua totou, i te akaari anga mai i te manako papu o te reira akatupuanga openga. Ei akaraanga, kua akakite te Atua kia Aberahama e ka mama mai te “uanga” na roto i tona uanga. (Genese 22:15-18) Kua riro mai ta Aberahama mokopuna ko Iakoba ei metua ki te kopu tangata 12 o Iseraela. I te mataiti 1513 M.T.N., te riro anga mai taua kopu tangata ra ei iti tangata, kua oronga a Iehova i tetai akatereanga no te au ture kia ratou i te kapiti anga mai i te au oroa tukeke o te mataiti. Kua karanga te apotetoro ko Paulo e kua riro mai taua au oroa ra “e ata anake ïa no te ka tupu a muri atu.” (Kolosa 2:16, 17; Ebera 10:1) Tei roto i reira te au akaraanga momua no te akatupuanga i ta Iehova akakoroanga no te Uanga. I te akonoanga i taua au oroa e rekareka maata tei tupu mai i roto ia Iseraela. Na te akamanako poto ua anga i te reira e akaketaketa i to tatou akarongo no te irinaki anga i ta Iehova au taputou.

Te Mama Anga Mai te Uanga

3. Koai te Uanga taputouia, e i akapeea tona pooavae i te akaparuparuia anga?

³ Kua tere atu e 4,000 mataiti i muri ake i ta Iehova totou mua, kua mama mai te Uanga taputouia. Ko Iesu te reira. (Galatia 3:16) Ei tangata apa kore, kua akono a Iesu i tona tiratiratu e mate ua atu e kua akapapu e e ko ta Satani au akaapa anga ra e pikikaa ua. Pera katoa, no te mea e tangata ara kore a Iesu, e atinga puapinga maata tikai tona mate. Na roto i te reira, kua oronga mai a Iesu i te akaoraanga mei te ara e te mate no te uanga akarongo mou a Adamu raua ko Eva. To Iesu mate i runga i te rakau tamamae anga e ‘akaparuparu angaia i te pooavae’ no te Uanga taputouia.​—Ebera 9:11-14.

4. Akapeea to Iesu atinga i te akatutuia anga mai?

⁴ Kua mate a Iesu ia Nisana 14, 33 T.N. * I roto ia Iseraela, e ra rekareka anga tikai a Nisana 14 i te akono anga i te Pasa. I te au mataiti ravarai i taua ra ra, e kaikai kapipiti ana te au ngutuare tangata i tetai punua mamoe kino kore. Na roto i teia tu, i maara ai ia ratou te tuanga ta te toto o tetai punua mamoe i rave i te akaora anga i te tama mua a te ngati Iseraela i te tamate anga te angera i te tama mua a to Aiphiti ia Nisana 14, 1513 M.T.N. (Exodo 12:1-14) Te akatutu maira te punua mamoe o te Pasa ia Iesu, koia ta te  apotetoro ko Paulo i karanga e: “Ko te Mesia oki ta tatou pasa i taia ïa na tatou.” (1 Korinetia 5:7) Mei te toto rai o te punua mamoe o te Pasa, te oronga maira to Iesu toto akamaringiia i te ora ki te manganui.​—Ioane 3:16, 36.

‘Ei Momua o Tei Mate’

5, 6. (a) I naea i akatuia ai a Iesu, e akapeea taua tupuanga i te akatutuia mai anga i roto i te Ture? (e) Akapeea te tuakaouanga o Iesu i rauka ai i te akatupuanga ia Genese 3:15?

⁵ I te ra toru, kua akatuia mai a Iesu kia oronga i te puapinga o tona atinga ki tona Metua. (Ebera 9:24) Kua akatutuia mai tona tuakaouanga e tetai atu tuatau oroa. Te ra i muri ake ia Nisana 14 ko te akamata angaia i te Oroa Areto Akaopue Koreia. I tera mai ra, ia Nisana 16, kua apai mai te ngati Iseraela i tetai ruru o te popo mua no te kokoti anga titona, te kokoti anga mua i Iseraela, kia ruru te taunga ki mua ia Iehova. (Levitiku 23:6-14) E mea tau tikai e i te mataiti 33 T.N., i taua ra tikai ra, i akaatea ai a Iehova i ta Satani au tauta anga kino pakari i te tamate takiri i tona “kite mou e te tuatua-mou”! Ia Nisana 16, 33 T.N., kua akatu mai a Iehova ia Iesu mei te mate ki te oraanga vaerua mate kore.​—Apokalupo 3:14; 1 Petero 3:18.

⁶ Kua riro mai a Iesu ko te “momua no te aronga i topa te moe ra.” (1 Korinetia 15:20) Kare mei te aronga tei akatuia mai i mua ana, kare a Iesu i mate akaou ana. Inara, kua kake atu aia ki te rangi ki te rima katau o Iehova, i tona tiaki anga i te akatainuia anga aia ei Ariki no te Patireia o Iehova i te rangi. (Salamo 110:1; Angaanga 2:32, 33; Ebera 10:12, 13) I te akatainuia anga aia ei Ariki, kua rauka ia Iesu i teianei i te akaparuparu i te enemi maata, ko Satani, i runga i te mimiti e te takore takiri anga i tona uanga.​—Apokalupo 11:15, 18; 20:1-3, 10.

Maata Atu te Au Mema o te Uanga o Aberahama

7. Eaa te Oroa Epetoma?

⁷ Ko Iesu te Uanga tei taputouia i Edene e na roto iaia e “akakore [ei a Iehova] i te angaanga a te diabolo ra.” (1 Ioane 3:8) Inara, te tuatua anga a Iehova kia Aberahama, kua akakite Aia e kare taua “uanga” a Aberahama i te tangata okotai ua. Ka riro mai te reira “mei te etu o te rangi ra, e mei te onetea i taatai ra.” (Genese 22:17) Te mama anga mai tetai au mema o te “uanga” kua akatutuia mai na roto i tetai oroa rekareka anga tikai. E 50 ra mei ia Nisana 16, kua akono a Iseraela i te Oroa Epetoma. No runga i teia te akakite maira te Ture e: “E tae ua atu ki te rā i muri ake i te sabati itu ra, kia rima ngauru anga te râ ta kotou e tatau; ka apai ei kotou i tetai atinga kai ou na Iehova. Ka apai mai kotou i nga areto ruru omera e rua no roto i to kotou au nooanga, ei areto faraoa pueu: e taonaia ma te akaopue katoa; ei popo na Iehova.” *​—Levitiku 23:16, 17, 20.

8. Eaa te tupuanga meitaki tei tupu mai i te Penetekote 33 T.N.?

⁸ Ia Iesu i te enua nei, kua kiteaia te Oroa Epetoma e ko te Penetekote (no roto mai i tetai tuatua Ereni te aiteanga e “rima ngauru”). Ia Penetekote 33 T.N., kua riringi mai te Taunga Maata teitei, ko Iesu Karaiti tei akatuia mai, i te vaerua tapu ki runga i tetai pupu meangiti o te  120 pipi tei akaputuputu mai ki Ierusalema. I riro mai ei taua au pipi ra ei tamariki akatainuia na te Atua e e au taeake no Iesu Karaiti. (Roma 8:15-17) Kua riro ratou ei iti tangata ou, “te Iseraela o te Atua.” (Galatia 6:16) Mei te akamata anga meangiti mai, te numero o taua iti tangata ra i te openga e 144,000.​—Apokalupo 7:1-4.

9, 10. Akapeea te putuputuanga o te au Kerititiano akatainuia i te akatutuia anga mai i te tuatau o te Penetekote?

⁹ Kua akatutuia mai te putuputuanga o te au Kerititiano akatainuia i te ruruia anga nga areto akaopue ki mua ia Iehova i te Penetekote tataki tai. Te akaari maira te areto akaopueia e te opue ra rai te au Kerititiano akatainuia no te ara akatuangaia. Noatu rai, ka rauka ia ratou i te pure kia Iehova no runga i te tumu anga o to Iesu atinga oko. (Roma 5:1, 2) Eaa ra e e rua areto? Penei te tou ra te reira ki te tikaanga e ka kiritiia mai te au tamariki akatainuia a te Atua no roto mai i nga pupu e rua​—te mea mua mei te ngati Iuda tika tikai e i muri mai mei te au Kenitara.​—Galatia 3:26-29; Ephesia 2:13-18.

¹⁰ Te nga areto e rua tei orongaia i te Penetekote no roto mai i te popo mua o te kokoti anga titona. Tei aiteite rai ki te reira, kua kapikiia taua au Kerititiano anauia i te vaerua e ko “te pipi mua o te au mea i angaia e ia ra.” (Iakobo 1:18) Ko ratou te aronga mua tei akakoreia mai ta ratou au ara no runga i te tumu anga o to Iesu toto, e i rauka ai ia ratou kia orongaia te ora mate kore i te au rangi, e tutara ai ratou ma Iesu i roto i tona Patireia. (1 Korinetia 15:53; Philipi 3:20, 21; Apokalupo 20:6) I runga i taua taoonga, kare e roa atu a tetai ra na ratou e “tutara i rungao [i te pa enua] ma te sepeta auri” e ka kite i te ‘akaparuparuia anga a Satani ki raro ake i to ratou pooavae.’ (Apokalupo 2:26, 27; Roma 16:20) Kua karanga te apotetoro ko Ioane e: “Ko te aronga teia i aru i te Punua-mamoe i tona au aerenga ravarai. I okoia ïa aronga no roto i te tangata nei, ei popo mua na te Atua e na te Punua-mamoe ra.”​—Apokalupo 14:4.

Te Akataka Anga i te Ra Akaora Anga

11, 12. (a) Eaa tei tupu i te Ra Tapokianga Ara? (e) Eaa te au puapinga i rauka mai ia Iseraela mei te au atinga o te puakatoro e te nga puakanio?

¹¹ I te ngauru o te ra o Etanima (kua tapaia i muri mai ko Titiri), * kua akono te Iseraela i tetai oroa te akatutu maira e ka akapeea e taangaangaia  ai te au puapinga o to Iesu atinga oko. I taua ra ra kua taokotai mai te iti tangata katoa no te Ra Tapokianga Ara kia orongaia te au atinga no ratou no te tapoki anga i ta ratou au ara.​—Levitiku 16:29, 30.

¹² I te Ra Tapokianga Ara, kua ta te kau taunga maata i tetai puakatoro ou, e i roto i te Ngai Tapu Rava, kua pipi aia i tetai o taua toto i mua i te tapoki o te Aruna e itu taime, no reira te akatutu maira i te oronga anga i te toto ki mua ia Iehova. Ko taua atinga ra no te au ara a te taunga maata e “tona ngutuare,” te kau taunga i raro mai e te ngati Levi. E oti ka rave mai te taunga maata e rua puakanio. Ka ta aia e tai ei atinga no te ara “no te au tangata.” Kua pipi aere katoaia te toto o te reira i mua i te tapoki o te Aruna i roto i te Ngai Tapu Rava. I muri mai, ka tuku te taunga maata i tona nga rima ki runga i te mimiti o te rua o te puakanio e ka aaki i te au ara a te au tamariki a Iseraela. E oti ka taki ke atu aia i te puakanio ki te metepara ei apai i te au ara a te iti tangata na roto i tetai tu akatutuanga.​—Levitiku 16:3-16, 21, 22.

13. Akapeea te au tupuanga i te Ra Tapokianga Ara i te akatutu anga mai i ta Iesu i rave?

¹³ Mei ta taua au angaanga e akatutu maira, kua taangaanga te Taunga Maata teitei, ko Iesu, i te puapinga o tona uaorai toto ei akakoreanga i te au ara. Te mea mua, kua taangaangaia te puapinga o tona toto ki te “are vaerua” o te au Kerititiano akatainuia e 144,000, i te tauturu anga i teia aronga kia akakiteia ei aronga tuatua tika e kia rekareka i tetai turanga ma i mua ia Iehova. (1 Petero 2:5; 1 Korinetia 6:11) Kua akatutuia mai teia e te atinga o te puakatoro. No reira kua tau ratou kia ariki i ta ratou tuanga i te rangi. Te rua, te taangaangaia ra te puapinga o to Iesu toto ki tetai aronga ke e mirioni ua atu te akono ra i te akarongo i roto ia Karaiti, mei tei akaariia mai e te atinga o te puakanio. Ka akameitakiia teia aronga ma te ora mutu kore i runga i te enua nei, te tuanga tei ngaro ia Adamu raua ko Eva. (Salamo 37:10, 11) No runga i te tumu anga o tona toto, na Iesu e apai i te au ara a te au tangata, mei te puakanio rai ra na roto i tetai akatutu anga i te apai anga i te au ara o Iseraela ki roto i te metepara.​—Isaia 53:4, 5.

Rekareka Anga i Mua ia Iehova

14, 15. Eaa tei tupu i te tuatau o te Oroa Patia Anga Puakapa, e eaa ta teia i akamaara ki te ngati Iseraela?

¹⁴ I muri ake i te Ra Tapokianga Ara, kua akono te ngati Iseraela i te Oroa Patia Anga Puakapa, te oroa rekareka anga rava atu i te mataiti ngati Iuda. (Levitiku 23:34-43) Kua raveia taua oroa ra mei te ra 15 ki te ra 21 o Etanima e kua  ope ki tetai akaputuputu anga tapu i te ra 22 o te marama. E akairo te reira i te openga o te akaputuputu anga mai i te mou e e tuatau no te akameitakianga no te takinga meitaki maata o te Atua. No taua tumu ra, kua akaue a Iehova i te aronga te akono ra i te reira e: “E akameitaki mai oki to Atua ra ko Iehova ia koe i taau katoa ra apinga tini, e te au angaanga katoa a to rima na, e ka rekareka tika rai oki koe.” (Deuteronomi 16:15) E tuatau mataora tikai te reira!

¹⁵ I te tuatau o taua oroa ra, kua noo te ngati Iseraela i roto i te au puakapa e itu ra. Kua akamaaraia atu kia ratou e i tetai taime akenei i noo ana ratou ki roto i te au puakapa i roto i te metepara. E atianga maata ta te oroa i oronga kia ratou kia akamanako i ta Iehova akono anga ei metua. (Deuteronomi 8:15, 16) E i te mea e kua noo ana ratou katoatoa, te aronga apinganui e te aronga putaua, i roto i te au puakapa, kua akamaaraia ki te ngati Iuda e i te kapiti anga ki te oroa ra, aiteite pouroa ratou.​—Nehemia 8:14-16.

16. Eaa tei akatutuia mai e te Oroa Patia Anga Puakapa?

¹⁶ Te Oroa Patia Anga Puakapa e oroa kokoti angaia, e ravenga rekareka anga no te akaputuputu anga, e te akatutu maira te reira i te akaputuputu anga rekareka anga no te aronga tei akono i te akarongo i roto ia Iesu Karaiti. Kua akamata te akaputuputu anga i te Penetekote 33 T.N., te riro anga mai te 120 pipi akatainuia a Iesu ei tuanga no te “kau taunga tapu.” I te noo anga te ngati Iseraela i roto i te au puakapa no tetai nga ra tokoiti ua, kua kite te aronga akatainuia e e “tuitarere” ua ratou i roto i teia ao akono kore i te Atua. E manakonakoanga i te rangi to ratou. (1 Petero 2:5, 11) Kua tae taua akaputuputu anga o te au Kerititiano akatainuia ki tona openga i teia “tuatau openga” nei, me akaputuputuia mai te aronga openga o te 144,000.​—2 Timoteo 3:1.

17, 18. (a) Eaa te akakiteia maira e ka puapingaia tetai ke atu i te pae mai i te au Kerititiano akatainuia mei to Iesu atinga? (e) Koai ma i teia tuatau te ka puapingaia i tei akatutuia mai e te Oroa Patia Anga Puakapa, e aea taua oroa rekareka anga ra e tae ei ki tona take?

¹⁷ E mea meitaki i te akara e i te tuatau i raveia  ai teia oroa i taito ra, e 70 puakatoro tei orongaia. (Numero 29:12-34) Te numero 70 te akatutu maira i te 7 akamaataia e te 10, e au numero te akatutuia maira i roto i te Pipiria e e apa kore i te rangi e i te enua. No reira, ka puapingaia te aronga akarongo mou e te atinga o Iesu mei te 70 ngutuare katoatoa o te tangata tei na roto mai ia Noa. (Genese 10:1-29) E rotai ei ki te reira, kua akatotoaia te akaputuputu anga i to tatou tuatau nei i te kapiti anga mai i te au tangata tataki tai mei te pa enua ravarai tei akono i te akarongo i roto ia Iesu e e manakonakoanga to ratou no te noo anga ki runga i tetai enua parataito.

¹⁸ Kua kite atura te apotetoro ko Ioane i teia akaputuputu anga o teia tuatau i roto i te orama. Te mea mua kua akarongo atu aia i te akakiteia anga te topiri anga o te aronga openga o te 144,000. E oti kua kite atu aia “e aronga maata rava, kare takiri e pou kia tatau,” i te tu anga ki mua ia Iehova e ia Iesu, ma te “kikau nu tamara i to ratou rima.” Ko te aronga teia “i aere mai mei roto i te mate maata” ki roto i te ao ou. E au tangata tuitarere katoa ratou i teianei i roto i te openga o teia akatereanga o te au mea nei, e te akara ra ratou ki mua ma te irinaki anga ki te tuatau me ‘angai e e arataki oki te Punua-mamoe ia ratou ki te pupui anga o te vai ora.’ I taua taime ra, “na te Atua e orei i to ratou roi-mata katoa i to ratou mata.” (Apokalupo 7:1-10, 14-17) Te Oroa Patia Anga Puakapa akatutuia mai ka tae ki tona take i muri ake i te Tutara Anga Tauatini Mataiti o Karaiti me orongaia kia ratou e te aronga akarongo mou tei akatuia mai te ora mutu kore.​—Apokalupo 20:5.

19. Akapeea tatou e puapinga ai i te akamanako anga i te au oroa tei raveia i Iseraela?

¹⁹ “Ka rekareka tika rai oki” tatou ia tatou e akamanako oonu ra no runga i te aiteanga o te au oroa ngati Iuda i taito. E mataora tikai i te akamanako anga e kua oronga mai a Iehova i te au akara anga momua e akapeea tana totou tei orongaia i Edene ra i te akatupuia anga, e e mea mataora tikai i te kite tikai anga i te akatupu marieia anga te reira. I teia tuatau, kua kite tatou e kua mama mai te Uanga e kua akaparuparuia ana tona pooavae. I teianei e Ariki aia i te rangi. Pera katoa, te maata anga o te 144,000 kua akapapuia mai to ratou tu akarongo mou e mate ua atu. Eaa te vai nei te ka raveia? Aea te totou e akatupu takiriia ai? Ka uriuriia teia i roto i te atikara e aru maira.

[Au Tataanga Rikiriki i Raro]

Ka Rauka Ainei ia Koe te Akataka?

• Eaa tei akatutuia mai e te punua mamoe Pasa?

• Eaa te akaputuputu anga tei akatutuia mai e te Oroa o Penetekote?

• Eaa te au tu o te Ra Tapokianga Ara te tou ra ki te tu i taangaangaia ai to Iesu atinga oko?

• Na roto i teea tu i akatutuia ai te akaputuputu anga i te au Kerititiano e te Oroa Patia Anga Puakapa?

[Au Uianga Apii]

[Tutu i te kapi 22, 23]

(No runga i teia, akara i te puka)

Pasa

Nisana 14

Tupuanga:

Taia te mamoe o te Pasa

Akatutuia:

Akaatingaia a Iesu

Oroa Areto Akaopue Koreia (Nisana 15-21)

Nisana 15

Tupuanga:

Tapati

Nisana 16

Tupuanga:

Kua orongaia te kerite

Akatutuia:

Akatuia mai a Iesu

50 ra

Oroa Epetoma (Penetekote)

Sivana 6

Tupuanga:

E rua areto i orongaia

Akatutuia:

Kua oronga a Iesu i tona au taeake akatainuia kia Iehova

Ra Tapokianga Ara

Titiri 10

Tupuanga:

Okotai puakatoro e rua puakanio i orongaia

Akatutuia:

Kua oronga a Iesu i te puapinga o tona toto no te au tangata ravarai

Oroa Patia Anga Puakapa (Akaputuputuanga, Au Tapenakara)

Titiri 15-21

Tupuanga:

Rekareka te ngati Iseraela i te noo i roto i te au puakapa e kua rekareka i te mou, e kua oronga e 70 puakatoro

Akatutuia:

Akaputuputu anga o te aronga akatainuia e te “aronga maata rava”

[Au Tutu i te kapi 21]

Mei te toto o te punua mamoe Pasa, te oronga maira to Iesu toto akamaringiia i te ora no te manganui

[Au Tutu i te kapi 22]

Te popo mua no te kokoti anga titona tei orongaia ia Nisana 16 e akatutu angaia i to Iesu tuakaouanga

[Au Tutu i te kapi 23]

Te nga areto tei orongaia i te Penetekote e akatutu angaia i te putuputuanga o te au Kerititiano akatainuia

[Au Tutu i te kapi 24]

Te Oroa Patia Anga Puakapa te akatutu maira i te akaputuputu anga rekareka anga no te aronga akatainuia e te “aronga maata rava” no te pa enua ravarai