“Te Tuakaouanga Mua”​—Te Tupu Nei i Teianei!

“Te aronga tei mate ra ma te taokotai atura kia Karaiti ka tu mai ratou na mua.”​—1 TESALONIA 4:16, NW.

1, 2. (a) Eaa te manakonakoanga no te aronga tei mate? (e) I runga i teea tumu anga i irinaki ei koe i te tuakaouanga? (Akara i te tataanga i raro ake.)

“KUA kite oki te aronga e ora nei e ka mate ratou.” Mei to Adamu ara anga mai, kua tupu tikai tera. Na roto i te tuatua enua i aereia mai, kua kite te katoatoa tei anauia e i te openga ra ka mate ratou, e e manganui tei manakonako e: ‘Eaa te ka aru mai? Eaa te turanga o tei mate?’ Te pau ra te Pipiria e: “Kare ra a te aronga i mate ra e tuatua i kitea.”​—Koheleta 9:5.

² E manakonakoanga ainei tetai i reira no te aronga tei mate? Ae. Ko te tika, e manakonakoanga tetai e akatupuia ai to te Atua akakoroanga mua no te tangata ravarai. Kua tere atu te au anere mataiti, kua akono te au tavini tiratiratu o te Atua i te akarongo i roto i ta Iehova taputou no runga i tetai Uanga te ka takore atu ia Satani e ka  akakore i te kino tana i rave. (Genese 3:15) Te maata anga kua mate. Me ka inangaro ia ratou kia kite i te akatupuia anga taua taputou ra e tetai atu au taputou ta Iehova i papau mai, te anoanoia ra kia akatuia mai ratou mei te mate. (Ebera 11:13) Ka tupu ainei taua mea ra? Ae, ka tupu te reira. Te karanga ra te apotetoro ko Paulo e: “E tuakaouanga to tei mate, te aronga tuatua-tika e te aronga tuatua-tika kore.” (Angaanga 24:15) Kua akatu mai ana a Paulo i tetai mapu ko Eutiko te ingoa, tei topa ki raro mei tetai maramarama e toru taua te teitei ‘te rave angaia kua mate takiri rava.’ Ko teia te tuakaouanga openga o te iva i tataia i roto i te Pipiria.​—Angaanga 20:7-12. *

3. Eaa te pumaana anga tei rauka ia koe uaorai mei te au tuatua a Iesu tei tataia i roto ia Ioane 5:28, 29 (NW), e no teaa ra?

³ Te oronga maira taua au tuakaouanga e iva i tetai tumu anga no te akarongo i roto i ta Paulo tuatua. Te akaketaketa ra te reira i to tatou irinaki i ta Iesu akapapu anga e: “Te aere mai nei te ora ka rongo te aronga katoa i roto i te au menema akamaara anga i [to Iesu] reo e ka aere mai ki vao.” (Ioane 5:28, 29, NW) E au tuatua akapumaana anga tikai i te ngakau! E mei teaa ra te akapumaana anga no te au mirioni ua atu kua mate to ratou aronga akaperepereia!

4, 5. Eaa te au tuakaouanga tukeke ta te Pipiria i taiku mai, e ko teea tuakaouanga te ka uriuriia i roto i teia atikara?

⁴ Te maata anga o te aronga ka akatuakaouia mai ka oki mai ki tetai enua kua noo ponuiaau ua i raro ake i te Patireia o te Atua. (Salamo 37:10, 11, 29; Isaia 11:6-9; 35:5, 6; 65:21-23) Inara, ka raveia tetai au akatuakaouanga i mua ake ka tupu ei te reira. Te mea mua, ka akatuakaouia mai a Iesu Karaiti kia oronga i te puapinga o tona atinga ki te Atua no tatou. Kua mate a Iesu e kua akatuia mai i te mataiti 33 T.N.

⁵ Aru mai, ka o atu te au mema akatainuia o “te Iseraela o te Atua” ki te Atu ra ko Iesu Karaiti i roto i te kaka i te rangi, i reira ratou “e vai ua rai ma te Atu ra.” (Galatia 6:16; 1 Tesalonia 4:17, NW) Kua tapaia taua turanga ra e ko “te tuakaouanga momua” me kare “te tuakaouanga mua.” (Philipi 3:10, 11, NW; Apokalupo 20:6) Me oti taua tuakaouanga ra, kua tae mai  i reira te taime no te akatuakaouanga mai o te au tangata e mirioni ua atu ki runga i te enua ma te manakonako anga no te rauka anga mai te ora mutu kore i roto i te Parataito. No reira, me no te rangi me kare no te enua nei to tatou manakonakoanga, e manako inangaro to tatou i roto i “te tuakaouanga mua.” Eaa ra te tu o te reira tuakaouanga? Aea te reira e tupu ei?

“Eaa te Tu o to Ratou Kopapa?”

6, 7. (a) I mua ake ka aere atu ei te au Kerititiano akatainuia ki te rangi, eaa te ka tupu mai? (e) E tu kopapa aa to ratou me akatuakaouia mai ratou?

⁶ I roto i tana reta mua ki to Korinetia, kua ui a Paulo i tetai uianga no runga i te tuakaouanga mua: “E akapeea kia akatu i tei mate ra? e eaa te tu o to ratou kopapa kia tu mai?” Kua pau aia i te uianga: “Taau e ruru ra, kare ïa e ora, kia kore e mate. . . . Na te Atua ra i o mai i tona tu, tana i inangaro ra . . . e kakā ke ra to te au kopapa rangi, e kakā ke oki to te au kopapa enua nei.”​—1 Korinetia 15:35-40.

⁷ Te akaari maira ta Paulo au tuatua e ka mate te au Kerititiano tei akatainuia ki te vaerua tapu i mua ake ka rauka mai ei ta ratou tutaki anga i te rangi. I to ratou mate anga, ka oki atu to ratou kopapa tangata ki te one pueu. (Genese 3:19) I to te Atua tuatau tau, ka akatuakaouia mai ratou ma tetai kopapa tei tau te tu no te oraanga i te au rangi. (1 Ioane 3:2) Ka oronga katoa te Atua i te kopapa mate kore kia ratou. E apinga kare i rauka ana i to ratou anauia anga mai, mei te mea rai e kua pupuiia atu te ao tei kapikiia e e meta mate kore ki roto ia ratou. “E teianei kopapa mate ua, kia riro ei kopapa mate kore e tikaʼi,” i karanga ai a Paulo. E apinga aroa te kopapa mate kore no ko mai i te Atua, “kia riro” i te aronga tei o atu ki roto i te tuakaouanga mua.​—1 Korinetia 15:50, 53; Genese 2:7; 2 Korinetia 5:1, 2, 8.

8. Akapeea tatou i kite ei e kare te Atua i iki ana i te 144,000 mei roto mai i te au mema o te au akonoanga tukeke?

⁸ E 144,000 ua te ka o atu ki roto i te tuakaouanga mua. Kua akamata a Iehova i te iki ia ratou i te Penetekote 33 T.N., i muri poto ua ake i te akatuakaou anga aia ia Iesu. Pouroa ratou kua ‘tataia te ingoa o Iesu e te ingoa o tona Metua ki rungao i to ratou rae.’ (Apokalupo 14:1, 3) No reira, kare ratou i ikiia mei roto mai i te au akonoanga tukeke. E au Kerititiano pouroa, e te apai katoatoa ra ma te parau i te ingoa o te Metua​—ko Iehova. Me akatuakaouia mai ratou, ka orongaia kia ratou tetai tukuanga angaanga i te au rangi. E mea mataora tikai kia ratou te manakonako anga no te tavini anga i te Atua na roto i taua mataara tika tikai.

Te Tupu nei i Teianei?

9. Akapeea a Apokalupo 12:7 e te 17:14 i te tauturu anga ia tatou i te akataka anga i te tuatau i akamata mai ei te tuakaouanga mua?

⁹ Aea te tuakaouanga mua e tupu ei? E akapapu anga pakari tetai e te tupu nei te reira i teianei. Ei akaraanga, e akaaite i nga pene e rua o Apokalupo. Te mea mua, e akara ia Apokalupo pene 12. I roto i reira ka tatau tatou e te tamaki ra a Iesu Karaiti tei akataoonga ouia, e tana au angera, kia Satani e tana au temoni. (Apokalupo 12:7-9) Mei ta teia tianara i akaari putuputu mai ana, kua akamata taua tamaki anga i te mataiti 1914. * E akara ana ra e, kare tetai o ta Karaiti au pipi akatainuia i karangaia ana e tei te pae ia Iesu i roto i taua tamaki anga i te rangi. I teianei e akara i te pene 17 o Apokalupo. Ka tatau tatou i roto i reira e i muri ake i te akapouia anga a “Babulonia Maata,” ka upokotu ei te Punua Mamoe i te pa enua. E oti te akakite maira te reira e: “E te tangata katoa nona ra, e aronga kapikiia ïa, e te ikiia, e te tuatua-mou.” (Apokalupo 17:5, 14) Kua akatu takereia mai te “aronga kapikiia ïa, e te ikiia, e te tuatua-mou” me tei te pae ratou ia Iesu i te akapouanga openga i to Satani ao. E mea tau i reira, e kua akatuia mai te aronga akatainuia tei mate i mua ake ia Aramakito i tetai tuatau i rotopu i te mataiti 1914 e ia Aramakito.

10, 11. (a) Koai ma te aronga taito 24, e eaa ta tetai ia ratou i akakite kia Ioane? (e) Eaa ta tatou ka taopenga mei teia?

¹⁰ Ka rauka ainei ia tatou i te karanga e aea tikai te tuakaouanga mua e akamata ai? Ka kiteaia tetai pau anga tau i roto ia  Apokalupo 7:9-15, i akataka mai ei te apotetoro ko Ioane i tana orama no te “aronga maata rava, kare takiri e pou kia tatau.” Kua akaariia mai te akataka anga o taua aronga maata rava kia Ioane e tetai o te aronga taito 24, e te akatutu maira teia aronga taito i te 144,000 tei akatuangaia ma Karaiti i roto i to ratou turanga kaka i te rangi. * (Luka 22:28-30; Apokalupo 4:4) E manakonakoanga i te rangi to Ioane; inara i te mea e e tangata rai aia i runga i te enua nei i te tuatua anga te tangata taito kiaia ra, penei te akatutu maira a Ioane i roto i te orama i te aronga akatainuia i runga i te enua kare i rauka ake ta ratou tutaki anga i te rangi.

¹¹ Eaa i reira ta tatou ka taopenga mei te tika anga e ko tetai o te aronga taito 24 te akataka maira i te aronga maata rava kia Ioane? I te akara anga penei kua o atu ana te aronga tei akatuakaouia mai o te pupu o te aronga taito 24 i te akakite anga i te au tuatua mou a te Atua i teia tuatau. Eaa ra te reira i puapinga ai? No te mea kua akaariia mai te akatakaanga tikai o te aronga maata rava ki te au tavini akatainuia o te Atua i runga i te enua nei i te mataiti 1935. Me kua taangaangaia tetai o te aronga taito 24 kia akakite i taua tuatua mou puapinga maata ra, kua akatu keia ana aia ki te rangi i mua ua ake i te mataiti 1935. Te akakite maira te reira e kua akamata te tuakaouanga mua i tetai tuatau i rotopu i te mataiti 1914 e te mataiti 1935. Ka rauka ainei kia akapapu maata atu tatou i te reira?

12. E akataka mai e eaa ra te tuatau tupu anga rau o te 1918 i manakoia ai e ko te taime tikaiia i akamata ai te tuakaouanga mua.

¹² I teia taime, penei e meitaki i te akamanako i te ka tamanakoia ei akaaite anga Pipiria. Kua akatainuia a Iesu Karaiti ei Ariki no te tuatau ki mua o te Patireia o te Atua i te tuatau pururu anga rau o te 29 T.N. E toru e te apa mataiti i muri mai, i te tuatau tupu anga rau o te 33 T.N., kua akatuakaouia mai aia ei peretana vaerua ririnui. E mea tau ainei i reira, i te akamanako e mei te mea e kua akataoongaia a Iesu i te tuatau pururu anga rau i te 1914, kua akamata te tuakaouanga o tana au pipi akarongo mou akatainuia e toru e te apa mataiti i muri mai, i te tuatau tupu anga rau i te 1918? Ka tano paa tera. Noatu e kare i akapapu taka meitakiia mai teia i roto i te Pipiria, te rotai ra te reira ki tetai au irava te akakite maira e ka tupu te tuakaouanga mua i muri poto ua ake i te akamata anga to Karaiti parutia.

13. Na roto i teea tu te karanga ra a 1 Tesalonia 4:15-17 (NW), e kua akamata te tuakaouanga mua i te akamata anga o to Karaiti parutia?

¹³ Ei akaraanga, kua tata a Paulo: “Ko tatou te ora ra te ka ora atu i te parutia o te Atu ra [kare ra, ki te openga o tona parutia] kare e rokoia e te aronga tei moe ra i te mate; no te mea e ka eke mai te Atu uaorai mei te rangi mai ma tetai kapikianga akauenga, ma te reo o tetai angera maata rava atu e ma te pu a te Atua, e te aronga tei mate ra ma te taokotai atura kia Karaiti ka tu mai ratou na mua. I muri akera ko tatou te aronga ora tei ora ra, kapipiti ma ratou ra, ka opuia ki te au tiaorangi no te aravei i te Atu i roto i te mareva; i reira tatou e vai ua rai ma te Atu ra.” (1 Tesalonia 4:15-17, NW) No reira, kua akatuia mai te au Kerititiano akatainuia tei mate i mua ake i to Karaiti parutia ki te ora i te rangi i mua ake i te aronga te ora ra rai i te tuatau o to Karaiti parutia. Teia oki te aiteanga e kua akamata te tuakaouanga mua i te akamata anga to Karaiti parutia, e tae ua atu “kia mama mai aia ra.” (1 Korinetia 15:23) Kare te katoatoa i akatuia mai e okotai taime, kua tere atu i tetai tuatau i raveia ai te tuakaouanga mua.

“E Kakau Teatea Tei Orongaia Mai no Ratou”

14. (a) I naea i akatupuia ai te au orama tei tataia i roto ia Apokalupo pene 6? (e) Eaa tei akatutuia mai i roto ia Apokalupo 6:9?

¹⁴ E akamanako katoa ana, i te akapapu anga i roto ia Apokalupo pene 6. I roto i reira kua kiteaia a Iesu e aere atura ei Ariki upokotu. (Apokalupo 6:2) Kua o atu te pa enua ki roto i te tamaki anga maata rava. (Apokalupo 6:4) E maata te onge. (Apokalupo 6:5, 6) Te tamate nei te au maki mate i te tangata. (Apokalupo 6:8)  Tano meitaki teia au totou katoatoa ki te au turanga o te ao mei te mataiti 1914 mai. Inara kua tupu mai tetai apinga ke. Kua aratakiia atu to tatou manako ki tetai atarau no te atinga. I raro ake i te reira ko “te au vaerua o te aronga i taia no te tuatua a te Atua, e no te tuatua ta ratou i akakite ra.” (Apokalupo 6:9) Mei te mea e “tei te toto oki te ora e oraʼi te au mea katoa ra,” ko tei akatutu tikaiia mai i raro ake i te atarau ko te toto o te au tavini akarongo mou a Iesu tei tamateia no ta ratou akakitekiteanga mataku kore e te maroiroi.​—Levitiku 17:11.

15, 16. E akamarama mai e eaa ra te au tuatua o Apokalupo 6:10, 11 i taiku mai ei i te tuakaouanga mua.

¹⁵ Mei te toto rai o Abela tuatua tika ra, te kapiki maira te reo o te toto o teia au Kerititiano i tamateia i te tuatua tau. (Genese 4:10) “Kua kapiki atura ratou ma te reo maata, kua na ko atu, Mei te aa te roa, e te Atu tapu e te tuatua-mou, e kore ei koe e akava, e e tutaki mai i to matou toto, i te aronga i noo i te ao nei?” Eaa tei tupu i muri mai? “E e kakau teatea tei orongaia mai no ratou ravarai e pini rava ake; e kua tuatuaia mai ratou e, e tatari rai ratou e kia ope ake tetai manga tuatau, e kia ope i te mate to ratou au taeake tavini, to ratou au taeake, e kia pou i te taiaia mei ia ratou te tu.”​—Apokalupo 6:10, 11.

¹⁶ Kua tukunaia ainei teia au kakau teatea ki runga i te au toto te vai ra i raro ake i tetai atarau? Kare rava! Kua orongaia teia au kakau ki te au tangata tataki tai tei akamaringiia to ratou toto, ki runga i te atarau. Kua akaatinga ratou i to ratou oraanga i roto i te ingoa o Iesu e kua akatuakaouia mai i teianei ei vaerua. Akapeea tatou e kite ei i te reira? I mua atu ana i roto i te puka o Apokalupo, i tatau ana tatou e: “Ko te riro iaia te re ra, e akakakauia i te kakau pu teatea ra; e kare rava au e tapara i tona ingoa i roto i te buka ora.” Kia maara katoa, e ko te aronga taito 24 kua ‘kakau i te kakau teatea, e ma te korona auro ki runga i to ratou upoko.’ (Apokalupo 3:5; 4:4) No reira i muri ake i te akamata anga te tamaki, te onge, e te maki mate i te takinoia ai te enua, kua akatuia mai te au mema o te 144,000 tei mate, tei akatutuia mai e te toto i raro i te tumu o te atarau, ki te ora i te rangi e kua akakakauia ki te au kakau teatea akatutuia.

17. Na roto i teea tu te “tatari rai” ra taua aronga tei orongaia te au kakau teatea?

¹⁷ E mea tau kia “tatari rai” taua aronga akatuakaouia ra. E tiaki marie ratou i te ra tutaki anga o te Atua. Ko to ratou “au taeake tavini,” te au Kerititiano akatainuia tei runga nei rai i te enua, kare i akapapu mai ake i to ratou tiratiratu i raro ake i te timata anga. Me tae mai te taime no te akava anga a te Atua, e akamutu ei te ‘tatari anga.’ (Apokalupo 7:3) I taua taime rai, te aronga tei akatuakaouia mai ka piri atu ki te Atu ko Iesu Karaiti i te tuku mai anga i te akapouanga ki runga i te aronga kino, kapiti mai te  aronga tei akamaringi i te toto o te au Kerititiano apa kore.​—2 Tesalonia 1:7-10.

Te Aiteanga no Tatou

18, 19. (a) Eaa ra te au tumu i manako ei koe e te tupu nei i teianei te tuakaouanga mua? (e) Akapeea toou marama anga i te tuakaouanga mua i te akariro anga ia koe kia manako atu?

¹⁸ Kare te Tuatua a te Atua i akakite mai ana i te ra tikai no te tuakaouanga mua, inara te akakite maira te reira e te tupu ra no tetai tuatau, i te tuatau o to Karaiti parutia. Te aronga mua te ka akatuakaouia mai ko te au Kerititiano akatainuia tei mate i mua ake ka akamata ai to Karaiti parutia. E tere nei to Karaiti parutia ki mua, ka tauiia te au Kerititiano akatainuia tei akaoti akarongo mou i to ratou oraanga i te enua nei “mei te kamo anga mata” ki roto i tetai au mea ora vaerua ririnui. (1 Korinetia 15:52) Ka rauka ainei i te katoatoa o te aronga akatainuia ta ratou tutaki anga i te rangi i mua ake i te tamaki o Aramakito? Kare tatou i kite. Inara, kua kite tatou e i to te Atua tuatau tau, ka kiteia te katoatoa o te 144,000 te tu anga i runga i te Maunga Ziona i te rangi.

¹⁹ Te kite katoa nei tatou e te maataanga o te 144,000 kua taokotai takereia kia Karaiti. Tokoiti ua te ka toe mai i runga i te enua. E akakite anga ririnui tikai e te aere viviki mai nei te tuatau no te tuku anga mai i ta te Atua akava anga! Kare e roa atu, ka takoreia te katoa anga o ta Satani akatereanga o te ao. Ko Satani uaorai ra ka tapekaia. Ei reira oki, e akamataia ai te tuakaouanga o te katoatoa, e rauka ai i te au tangata akarongo mou, no runga i te tumu anga o to Iesu atinga oko, e akatuia mai ei ki taua tu apa kore tei ngaro ia Adamu. Te akatupu umereia nei ta Iehova totou tei tataia i roto ia Genese 3:15. E akangateitei anga maata te reira i te ora anga i teia au tuatau!

[Au Tataanga Rikiriki i Raro]

Ka Rauka Ainei ia Koe te Akataka?

Akapeea te au irava e aru mai nei i te tauturu anga ia tatou kia kite i te taime no “te tuakaouanga mua”?

• Apokalupo 12:7; 17:14

• Apokalupo 7:13, 14

• 1 Korinetia 15:23; 1 Tesalonia 4:15-17

• Apokalupo 6:2, 9-11

[Au Uianga Apii]

[Au Tutu i te kapi 26]

Eaa te au tuakaouanga te ka raveia i mua ake ka akatuia mai ei te maata anga o te au tangata mei te mate mai?

[Tutu i te kapi 29]

Na roto i teea tu i orongaia ai tetai kakau teatea ki teia aronga tei mate?