Au Uianga a te Aronga Tatau

Na roto i teea tu i kiteaia mai e te orometua ra ‘okotai tangata i roto i nga tangata okotai tausani’ inara kare e ‘vaine okotai ra i roto i te reira katoa ra’?​—Koheleta 7:28.

Kia marama meitaki i teia au tuatua akauruia, e ariki tatou na mua e eaa to te Atua manako no te au vaine. Te taiku ra te Pipiria ki te vaine takaua ko Ruta te unonga a Naomi ei “vaine akono meitaki.” (Ruta 3:11) Kia tau kia Maseli 31:10, ko tetai vaine meitaki “e puapinga maata atuia i te au poe ra.” (An American Translation) Eaa, i reira, ta te Ariki ko Solomona o Iseraela i taito e akakite maira i te karanga anga aia e: “Okotai aku tangata i kite ki roto i nga tangata katoa okotai tausani; kareka te vaine okotai roa ra, kare ïa i kitea”?

Te akaari maira te aerenga tuatua e penei te ariki uaia ra te au turanga akono tau kore i rotopu i te au vaine i to Solomona tuatau. (Koheleta 7:26) Penei te maata anga o teia kua tupu mai no te akakeu anga a te au vaine ke ke te akamori ra ia Baala. Kua topa katoa atu te Ariki ko Solomona ki te taomi anga mei tana au vaine ke ke e manganui. “E itu anere ana vaine, e ui ariki anake, e toru anere i te vaine tavini,” i karanga ai te Pipiria, e “anga ke atura tona ngakau i taua au vaine nana ra” kia akamori i te au atua pikikaa. (1 Ariki 11:1-4) Kare katoa e meitaki ana te au turanga akono tau o te au tane​—takitai ua ake tangata tuatua tika i roto i te tauatini, e meangiti ua tikai. “Teia anake ra tei kitea e au,” i taopenga ai a Solomona, “kua anga te Atua i te tangata ma te tiratiratu, kua kimi ra ratou i te au ravenga e manganui.” (Koheleta 7:29) Ko te manako taopenga anga teia no runga i te au tangata ravarai​—te tangata ei iti tangata, kare ko te tangata me akaaiteia atu ki te vaine. No reira, kia akara meitakiia te au tuatua tei kiteaia i roto ia Koheleta 7:28 ei tuatua no runga i te turanga akono tau ua o te au tangata i te tuatau o Solomona.

Inara, e aiteanga ke tetai ki teia irava. Penei e totou anga katoa te reira, no te mea kare tetai vaine i akarongo ana kia Iehova ma te apa kore. Inara okotai ua rai tangata​—ko Iesu Karaiti.​—Roma 5:15-17.

[Tutu i te kapi 31]

‘Okotai tangata i roto i nga tangata okotai tausani’