E Apii i ta te Pipiria Tikai e Apii Maira
E Apii i ta te Pipiria Tikai e Apii Maira
“E akariro i to te pa enua katoa ei pipi; . . . Ma te apii atu ia ratou.”—MATAIO 28:19, 20.
1. Eaa tei tuatuaia no te rauka anga i te Pipiria?
TE TUATUA A IEHOVA, te Pipiria Tapu, ko tetai puka taito roa atu e te tua atea ravaia atu i roto i te ao nei. Tetai au tuanga o te reira kua uriia i roto i te 2,300 reo e tere atu. Kua tere atu i te 90 patene o te au tangata i te enua nei ka rauka ia ratou i te reira i roto i to ratou uaorai reo.
2, 3. (a) Eaa ra i tupu ei te kononinonianga no runga i te au apiianga Pipiria? (e) Eaa te au uianga ta tatou ka tamanako atu?
2 E mirioni ua atu tangata e tatau ana i tetai tuanga o te Pipiria i te au ra ravarai. Tetai pae kua maata to ratou taime i te tatauanga i te Pipiria katoa. E tauatini ua atu pupu akonoanga te karanga ra e kua akatumu ratou i ta ratou au apiianga ki runga i te Pipiria, inara kare ratou e rotai ana i ta te reira e apii maira. Kapiti katoa atu ki te kononinonianga ko te au taumaroanga kino pakari i rotopu i te au mema o taua au akonoanga rai. E ekoko ana tetai pae no runga i te Pipiria, to te reira kapuaanga, e to te reira puapinga. E manganui te manako ra i te reira ei puka tapu tei taangaanga uaia ana i te tuatau papau koreromotu me kore i te tia kia akakite i te tika i roto i te akavaanga.
3 Ko te tikaanga, te vai ra i roto i te Pipiria, te tuatua me kore te karere ririnui a te Atua no te au tangata ravarai. (Ebera 4:12) Ei Au Kite no Iehova, te inangaro ra tatou i reira i te au tangata kia kite mai i ta te Pipiria e apii maira. Te rekareka nei tatou i te akonoanga i te akaueanga ta Iesu Karaiti i oronga mai ki tana au pipi i tona tuatua anga e: “Ka aere . . . e akariro i to te pa enua katoa ei pipi, . . . Ma te apii atu ia ratou.” (Mataio 28:19, 20) I roto i ta tatou angaanga orometua, e kite mai ana tatou i te au tangata ngakau tika te taitaia ra i te tu kononinonianga o te akonoanga tei kitea ateaia i roto i te ao nei. Ka inangaro ratou i te kite i te tuatua mou no runga i Tei Anga mai ia tatou e te inangaro ra i te kite i ta te Pipiria e tuatua ra no runga i te akakoroanga no te oraanga. E akamanako ana tatou e toru uianga tei runga i te manako o te au tangata e manganui. I roto i teia tuanga tataki tai, ka akara tatou i te au tarevake ta te au arataki akonoanga e tuatua ra, e oti ka akarakara tatou i ta te Pipiria tikai e apii maira. Teia te au uianga: (1) Te manako maira ainei te Atua ia tatou? (2) Eaa te tumu i angaia ai tatou? (3) Eaa te ka tupu kia tatou me mate tatou?
Te Manako Maira Ainei te Atua?
4, 5. Eaa te tangata i manako mai ei e kare te Atua e manako mai ana ia tatou?
4 Ka akamata tatou ki teia uianga, Te manako maira ainei te Atua ia tatou? Ma te tangi, e manganui te tangata te manako ra i te pauanga e kare. Eaa ratou i manako akapera ei? Tetai tumu koia oki te noo nei ratou i roto i tetai ao tei ki i te riri, te tamaki, e te tamamaeanga. ‘Naringa te manako maira tikai te Atua,’ i na ratou ei, ‘papu e kare aia e akatika i teia au mea kino kia tupu.’
5 Tetai atu tumu i manako ei te tangata e kare te Atua e manako maira ia tatou koia oki kua akakeu te au arataki akonoanga ia ratou kia akamanako akapera. Eaa ta te au orometua e tuatua putuputu ana me tupu tetai tumatetenga? I te mate anga nga tamariki e rua a tetai vaine i roto i tetai u anga, kua karanga tona orometua e: “Kua anoano te Atua i teia. Kua inangaro te Atua e rua akaou angera.” Me tuatua ana te au orometua i te reira au tuatua, te akaapa tikai ra ratou i te Atua no te au apinga kino e tupu nei. Inara, kua tata te pipi ko Iakobo: “Eiaa rava e tangata pikikaaia e karanga e, Kua pikikaaia au e te Atua: kare rava te Atua e vavare i te kino, kare rava oki aia e pikikaa i te tangata.” (Iakobo 1:13) Kare roa te Atua ko Iehova e akatupu ana i te kino. Ko te tikaanga, “kia atea ke atu te tuatua kino i te Atua.”—Iobu 34:10.
6. Koai to muri i te kino e te tamamaeanga i roto i teianei ao?
6 Eaa, i reira, i maata ai te kino e te tamamaeanga? Tetai tumu koia oki kua patoi te maataanga o te au tangata i te Atua ei Tutara, kare ratou e inangaro ana i te kauraro atu ki tana au ture e tana au kaveinga tuatua tika. Kua kauraro manako kore ua te au tangata ki te Enemi o te Atua, ko Satani, no te mea “te vai ua nei rai to te ao ravarai i raro ake i taua vaerua kino ra.” (1 Ioane 5:19) Te kite anga i teia tikaanga, kua ngoie ua i te marama i te tumu e tupu nei te au turanga kino. E kino pakari tikai a Satani, e riri, e kikite e te kino maata. E no reira kua kite tatou e ka akatutu te ao i te tu o te reira tutara. No reira tikai i maata ai te kino!
7. Eaa tetai au tumu no te tamamaeanga ta tatou e kite nei?
7 Te tu apa ua o te tangata nei, tetai tumu akaou e kite maira tatou i te tamamaeanga. E aruaru ana te au tangata apa ua kia tutara ratou, e te akatupu putuputu maira te reira i te au tamaki, taomianga, e te tamamaeanga. Kua tano meitaki te tuatua a Koheleta 8:9 i te na ko anga e: “Te tutara ra tetai tangata ki rungao i tetai, ei mate nona uaorai.” Tetai tumu akaou no te tamamaeanga koia oki ko “te au tuatau e te tupu anga kite koreia.” (Koheleta 9:11, NW) E kite putuputu mai ana te au tangata i te tumatetenga no te mea kua tarevake ta ratou ngai i aere ei e kua tarevake te ora i aere ei ratou.
8, 9. Akapeea tatou i kite ei e te manako maira tikai a Iehova ia tatou?
8 E mea pumaana i te kite mai e kare a Iehova e akatupu ana i te tamamaeanga. Inara te manako maira tikai ainei te Atua i te au apinga te tupu ra i roto i to tatou oraanga? Te pauanga pumaana ki te ngakau e ae! Kua kite tatou e te manako maira a Iehova ia tatou no te mea te akakite maira tana Tuatua akauruia i te tumu i akatika ua ai aia i te au tangata kia aru i tetai oraanga kino. Te o maira e rua maroanga: tona turanga ngateitei e te tu tiratiratu o te au tangata. No te mea koia te mana katoatoa Tei Anga mai i te au apinga, kare a Iehova e anoanoia kia akakite mai kia tatou i te tumu i akatika ua ai aia i te tamamaeanga. Inara, kua akakite mai aia no te mea te manako maira aia ia tatou.
9 E akamanako ana i tetai akapapuanga akaou e te manako maira te Atua ia tatou. E “ongoongo rava akera tona ngakau” i te kite anga e kua ki te enua i te kino i te tuatau o Noa. (Genese 6:5, 6) Kua tuke ainei to te Atua manako i teia tuatau? Kare, no te mea kare aia e taui ana. (Malaki 3:6) E rikarika ana aia i te tika kore e e riri ana aia i te kite anga i te au tangata e mamae ua ra. Te apii maira te Pipiria e kare e roaia atu ana ka akakore te Atua i te kino katoatoa tei tupu mai mei te tutara anga a te tangata e mei te akakeuanga a te Tiaporo. Kare ainei te reira ei akapapuanga tikai e te manako maira te Atua ia tatou?
10. Eaa to Iehova manako no runga i te tamamaeanga o te tangata?
10 Te pikikaa ra te au arataki akonoanga i te Atua me karanga ratou e te au tumatetenga ta tatou e kite nei, kua anoano te Atua i te reira. Kare rava, te inangaro ra a Iehova i te akakore i te tamamaeanga o te tangata. ‘Koia oki te tiaki maira ia koe,’ i karanga ai a 1 Petero 5:7. Ko tera tikai ta te Pipiria e apii maira!
Eaa te Tumu i Angaia ai Tatou?
11. Eaa ta te au akonoanga o te ao nei e tuatua putuputu ra no runga i te oraanga tangata i runga nei i te enua?
11 E akamanako ana tatou i teia nei i te rua o te uianga tei runga i te manako o te tangata, Eaa te tumu i angaia ai tatou? E pau putuputu mai ana te au akonoanga a te ao nei e e tuatau poto ua to te tangata i runga nei i te enua. Te irinaki ra ratou i to tatou enua ei ngai akaangaroianga, me kore ei toka takainga, i te aere atu anga ki te oraanga i tetai ngai ke. Tetai pae orometua kua apii ratou e, a tetai tuatau ka takore te Atua i teia paraneta. Ei tupuanga no taua au apiianga ra, kua manako mai te manganui o te au tangata e e ngari ake ratou i te akono i tetai oraanga mataora tikai no te mea e mate ua rai te aru maira ia ratou. Eaa tikai ta te Pipiria e apii maira no runga i te tumu i angaia ai tatou?
12-14. Eaa ta te Pipiria e apii maira no ta te Atua akakoroanga no te enua e no te tangata?
12 E akakoroanga meitaki tikai to te Atua no te enua e no te au tangata. “Kare ra aia i anga [i te enua] ei mea puapinga kore ua,” mari ra “kua anga ra aia kia tangataia.” (Isaia 45:18) Tei runga ravao, na Iehova i “akamou i te tumu o te enua, kia kore roa e ngaueue e tuatau ua atu.” (Salamo 104:5) I te kiteanga i teia au apinga no runga i ta te Atua akakoroanga no te enua e no te tangata ravarai, ka tauturu ia tatou i te marama i te tumu i angaia ai tatou.
13 Te akaari maira a Genese pene 1 e te 2 e kua akamanako meitaki a Iehova i tona akapapaanga i te enua kia nooia e te tangata. I te openga o te tuatau i angaia ai te au apinga no to tatou enua nei, kua “meitaki roa” te au apinga ravarai. (Genese1:31) Kua tuku te Atua i te tane e te vaine mua ki roto i tetai aua manea o Edene e kua oronga maata i te au kai meitaki na raua. Kua karangaia ki te nga tokorua mua e: “Kia anau korua, e kia maata roa, e e akaki i te enua nei, e e akavi.” Ka anau mai raua i te au tamariki apa kore, ka akatotoa i te kena o to raua aua kainga takapini i te enua katoa, e ka mana raua ki rungao i te au animara.—Genese1:26-28.
14 Kua akakoro a Iehova kia noo te au pamiri apa kore i runga nei i te enua e mutu kore ua atu. Te karanga ra te Tuatua a te Atua e: “Ka riro te enua no te aronga tuatua-tika, ka noo tamou rai ratou i reira.” (Salamo 37:29) Ae, kua akakoroia te au tangata ravarai kia rekareka i tetai oraanga mutu kore i roto i tetai Parataito i te enua nei. Ko ta te Atua akakoroanga te reira, e ko te reira ta te Pipiria tikai e apii maira!
Eaa te ka Tupu kia Tatou i te Mate Anga?
15. Eaa ta te manganui o te akonoanga o teianei ao e apii ra no runga i te ka tupu kia tatou me mate tatou?
15 E uriuri tatou i teianei i te toru o te uianga tei runga i te manako o te au tangata: Eaa te ka tupu kia tatou me mate tatou? E apii ana te maataanga o te au akonoanga o te ao e, e apinga tetai i roto i te tangata te ka ora ua atu i muri ake i te mateanga te kopapa tangata. Te irinaki nei rai tetai au pupu akonoanga e e akautunga ana te Atua i te aronga kino na te tukuanga ia ratou ki tetai tamamaeanga mutu kore i roto i tetai ai era. Inara ko te tikaanga tikai ainei te reira? Eaa tikai ta te Pipiria e apii maira no runga i te mate?
16, 17. Kia tau ki ta te Pipiria, eaa te turanga o tei mate?
16 Te akakite maira te Tuatua a te Atua: “Kua kite oki te aronga e ora nei e ka mate ratou: kare ra a te aronga i mate ra e tuatua i kitea: kare oki a ratou tutaki toe i te enua nei.” I te mea e kare a ‘te aronga i mate ra e apinga i kite ra,’ kare ratou e akarongo ana, e kite ana, e tuatua ana, e manako ana me kore e tamanako ana. Kare ratou e koi moni akaou ana. Akapeea ra oki ratou? Kare e rauka ia ratou i te angaanga akaou! Tei runga ravao, “to ratou aroa, e to ratou riri, e to ratou vareae, kua kore anake ïa,” no te mea kare e rauka ia ratou i te akaari i te tu manako ngakau.—Koheleta 9:5, 6, 10.
17 Ta te Pipiria e tuatua maira no runga i teia tumu manako e ngoie ua e te taka meitaki—kare te mate e ora atu ana kia noo ki tetai ngai ke. Kare e apinga e akaruke ana i to tatou kopapa i te mateanga e ka ora ua atu kia rauka i te anau akaouia i roto i tetai kopapa ke, mei tei akakiteia e te aronga e irinaki ra i roto i te anau akaouanga. Penei ka rauka ia tatou i te akatutu i te reira manako na roto i teia tu: To tatou oraanga i teianei te aite ra ki te ai o tetai kanara. Me tamateia te ai, kare te reira e aere ki tetai ngai ke. Kua mate ua te reira.
18. Me kite te tangata apiipii Pipiria e kare a te tangata mate e apinga e kite, eaa tana ka taopenga mai?
18 E akamanako ana i te au aiteanga o te reira tuatua mou pakari okotai. Me kite mai ana tetai tangata apiipii Pipiria e kare a te tangata mate e apinga e kite, ka ngoie ua iaia i te taopenga e noatu te riri maata o tona au ai tupuna i to ratou taime, kare e rauka ia ratou i te tamanamanata mai iaia. Ka kite viviki ua mai aia e kare tona aronga akaperepere tei mate e akarongo, e kite, e tuatua, e manako, me kore e manako ngakau akaou. No reira, kare ratou e kite mai i tetai tu maromaroa ngata tikai i roto i tetai ao no te mate me kore i roto i tetai ngai tamamaeanga ai. Inara, te apii maira te Pipiria e te aronga mate i roto i to te Atua akamaaraanga, ka akatuakaouia mai ratou. E manakonakoanga meitaki tikai te reira!—Ioane 5:28, 29.
E Puka Ou kia Taangaanga Tatou
19, 20. Ei au Kerititiano, eaa ta tatou apainga, e eaa te puka tauturu no te apii Pipiria tei tata tikaiia kia taangaanga tatou i roto i ta tatou angaanga orometua?
19 E toru ua rai a tatou uianga i akamanako mai tei runga i te manako o te au tangata e manganui. I roto i te tuanga tataki tai, te takataka meitaki ua ra e te tika ua ra ta te Pipiria e apii maira. E aka rekareka tikai i te oronga i te reira au tuatua mou ki te aronga e inangaro ra i te kite i ta te Pipiria e apii maira! Inara te vai atura tetai atu au uianga puapinga maata ta te aronga ngakau tika e inangaro ra i te au pauanga meitaki tikai. Ei au Kerititiano, tei ia tatou te apainga kia tauturu ia ratou kia kite mai i te au pauanga ki te reira au uianga.
20 E akaaoanga tikai i te apii i te tuatua mou a te Tuatua Tapu i roto i tetai ravenga e taka meitaki ra e te akakeu ra i te ngakau. Kia tauturu ia tatou i te akono i te reira akaaoanga, kua akapapa “te tavini akono meitaki e te pakari” i tetai puka tei tata tikaiia kia taangaanga tatou i roto i ta tatou angaanga orometua Kerititiano. (Mataio 24:45-47) Teia puka e 224-kapi kua tapaia e Eaa Tikai ta te Pipiria e Apii Maira?
21, 22. Eaa tetai au tu puapinga o te puka Eaa Tikai ta te Pipiria e Apii Maira?
21 Tukunaia mai i te 2005/06 Au Uruoaanga Tapere “Te Akarongo Tu Atua” a te Au Kite o Iehova, e tukeke te au tu puapinga o teia puka. Ei akatauanga, e akamataanga tetai e rima kapi, tei riro ei tauturu tikai i te akamataanga i te au apii Pipiria i te kainga. Ka kite ngoie ua mai koe i te uriuri i te au tutu e te au irava tei kiteaia i te akamataanga. Ka rauka katoa ia koe i te taangaanga i te apii i roto i teia tuanga kia akaari ki te aronga apiipii e akapeea i te kimi anga i te au pene e te au irava o te Pipiria.
22 E ngoie ua e te marama meitaki te tu tataanga o teia puka. Kua tauta pakariia i te itae i te ngakau o te tangata apiipii na te kapiti mai anga iaia ki roto i te apii me ka rauka. I roto i te au pene tataki tai e maata te au uianga i te akamataanga e e pia tetai i te openga o te pene tei tapaia e “Ta te Pipiria e Apii Maira.” I roto i te pia, ka kiteaia te au pauanga Tuatua Tapu ki te au uianga i te akamataanga. Ka tauturu katoa te au tutu e te au tataanga meitaki e pera katoa te au akatutuanga i roto i teia puka i te tangata apiipii kia marama i te au manako ou. Noatu e e mama ua te tuanga maata o te tataanga o teia puka, e apenetiki tetai te akatika ra ia koe kia akamanako maata atu e 14 tumu manako puapinga maata me te umuumu ra te tangata apiipii i tetai atu akakitekiteanga.
23. Eaa te au tamanakoanga e orongaia maira no te taangaanga anga i te puka ta te Pipiria e Apii Maira i runga i te au apii Pipiria?
23 Kua tataia te puka ta te Pipiria e Apii Maira kia tauturu ia tatou i te apii i te au tangata ma te au turanga apiianga tukeke e mei te au tupuanga akonoanga tukeke. Me kare o te tangata apiipii kite no runga i te Pipiria, penei kare e rava ua kia kapi e tai pene i roto i te apiianga okotai. Auraka e rapurapu i te apii, inara e tauta i te itae i te ngakau o te tangata apiipii. Me kare aia e marama ana i tetai akatutuanga tikai tei taangaangaia i roto i te puka, e akamarama atu koe i te reira me kore e taangaanga koe i tetai atu akatutuanga. Akateateamamao meitaki, e tauta pakari koe i te taangaanga meitaki i te puka, e e pure i te tauturu a te Atua kia rauka ia koe i te ‘akono meitaki i te tuatua mou ra.’—2 Timoteo 2:15, NW.
E Rekareka i Toou Au Tikaanga Ngateitei
24, 25. Eaa te tikaanga ngateitei ta Iehova i oronga ki tona iti tangata?
24 Kua oronga mai a Iehova ki tona au iti tangata i te au tikaanga ngateitei. Kua tauturu aia ia tatou kia kite mai i te tuatua mou no runga iaia. Auraka rava tatou e manako kore atu i te reira tikaanga! Ko te tikaanga, kua uuna te Atua i tana au akakoroanga mei te aronga ngakau parau e kua akakite aia i te reira ki te aronga akaaka. No runga i te reira, kua karanga a Iesu e: “E akameitaki au ia koe, e taku Metua, e te Atu no te rangi e te enua, i te mea ko koe i uuna ke atu i teianei au mea i te aronga pakari e te kite, e kua akakite mai ki te tamariki nei.” (Mataio 11:25) E akangateitei anga takake tikai kia tareia i roto i te aronga akaaka te tavini ra i tei Ngateitei i te Ao Katoa e Pini Ua Ake, ko Iehova.
25 Kua oronga katoa mai te Atua kia tatou i te tikaanga no te apiianga i tetai ke no runga iaia. E akamaara e kua pikikaaia aia e te aronga tei apii i te au pikikaa no runga iaia. Kua tarevake tikai i reira te manakoanga o te tangata e manganui no runga ia Iehova, i te akamanakoanga e kare aia e manako mai ana e kare aia e tangi mai ana. Te inangaro ra ainei koe, ae, ma te maroiroi katoa, i te tauturu i te akatikatika i te tarevake? Ka inangaro ainei koe i te au tangata ngakau tika i te au ngai ravarai kia kite mai i te tuatua mou no runga i te Atua? Kia akaari koe i reira, i toou akarongo no te Atua na te tutu maroiroi anga e te apiianga i tetai ke i ta te Pipiria e tuatua maira no runga i teia au tumu tuatua puapinga maata. Ka inangaroia te aronga kimi i te tuatua mou kia kite mai i ta te Pipiria tikai e apii maira.
Eaa Taau Au Pauanga?
• Akapeea tatou i kite ei e te manako maira te Atua ia tatou?
• Eaa ta tatou angaanga i runga nei i te enua?
• Eaa te ka tupu kia tatou me mate tatou?
• Eaa te au tu o te puka ta te Pipiria e Apii Maira taau e rekareka tikai ana?
[Au Uianga Apii]
[Au Tutu i te kapi 22]
Te apii maira te Pipiria e ka ope te tamamaeanga
[Au Akameitakianga]
Top right, girl: © Bruno Morandi/age fotostock; left, woman: AP Photo/Gemunu Amarasinghe; bottom right, refugees: © Sven Torfinn/Panos Pictures
[Tutu i te kapi 23]
Ka noo te aronga tuatua tika ki roto i te Parataito e tuatau ua atu