Kia Vai Ngaueue Kore Ua Me Meameaau Tetai Tamaiti

KUA tauta tetai vaine Kerititiano ta tatou ka kapiki e ko Joy, i te utuutu i tana tamaiti kia inangaro i te Atua ko Iehova. Inara kia tae aia ki tona mapuanga, kua meameaau te tamaiti e kua akaruke i te kainga. “Ko te mamae kino roa atu ia taku i kite,” i karanga ai a Joy. “Kite tikai au i te taitaia, te mamae ngakau, e te riri. Rokoia takiriia au e te au manako papu kore.”

Penei kua tauta katoa ana koe i te utuutu i taau tamariki kia inangaro e kia tavini i te Atua​—inara i muri mai kua ariu ke okotai me kore maata atu ia ratou, mei iaia. Akapeea ra e rauka ai ia koe i te akono i teia tumatetenga? Eaa te ka tauturu ia koe kia vai ngaueue kore ua i te tavini anga ia Iehova?

Te Meameaau Anga te Au Tamariki a Iehova

Tetai takainga mua koia oki kia ariki e kua kite a Iehova e mei teaa tikai toou tu manako. Ia Isaia 49:15, ka tatau tatou: “E tika ainei i te vaine kia akangaropoina i tana tamaiti kai u, e kare atura e tangi ki te tamaiti a tona uaorai kopu? a, e tika ia ratou kia akangaropoina, kare ra au e akangaropoina ia koe.” Ae, te kite ra a Iehova i te au tu manako tei matauia e te au metua tane e te au metua vaine. Ka akamanako ana i reira, i te rekareka tana i kite i te akapaapaa anga e i te tavini anga tana au tamariki angera pouroa iaia. I te pau anga atu i te pateriareka ia Iobu “na roto i te puaioio,” kua akamaara a Iehova i te au tuatau mataora e tona pamiri vaerua taokotai, te na ko anga e: “Iea koe iaku i akatumu i te enua nei? . . . Ka imene katoatoaʼi te au etu popongi, e kua maeva ua te au tamariki a te Atua i te rekareka?”​—Iobu 38:1, 4, 7.

Kia pou tetai tuatau, kua kite iora te Atua e kua akamata tetai tamaiti angera apa kore ana i te meameaau mai iaia e kua riro maira ko Satani, te aiteanga i roto i te reo Epera “Tei Patoi.” Kua kite katoa a Iehova i tana tamaiti tangata mua, ko Adamu, e tana vaine apa kore, ko Eva, i te piri anga atu ki roto te meameaau. (Genese 3:1-6; Apokalupo 12:9) I muri mai, kua pera katoa tetai papaki tamariki angera vaerua e kua “akaruke iora ra i to ratou nooanga tikai” e kua meameaau atura i te Atua.​—Iuda 6.

Kare te au Tuatua Tapu i akakite mai kia tatou e mei teaa to Iehova tu manako i te aru anga tetai papaki o tana au tamariki apa kore i te arataa o te meameaau. Inara, te akakite taka ua maira te Pipiria: “E kite akerā Iehova, e kino maata to te tangata i te enua nei, e kua kino anake te au manako katoa, e te akakoroanga  katoa o to ratou ngakau i te au rā katoa ra. Kua tataraara iorā Iehova, koia i anga i te tangata ki runga i te enua nei, e ongoongo rava akera tona ngakau.” (Genese 6:5, 6) Kua “akaongoongo” e kua “tamamae” (NW) katoa te meameaau a to Iehova iti tangata ikiia ko Iseraela, iaia.​—Salamo 78:40, 41.

Kare roa e ekoko e te tangi ra a Iehova i te au metua e kite ra i te mamae e te kinokino no te tu meameaau o te tamariki. I roto i tana Tuatua, i te Pipiria, kua oronga mai aia i te akoanga e te akamaroiroianga tau ei tauturu i taua au metua ra kia rauka i te akono atu i to ratou turanga. Te ako maira te Atua ia ratou kia uri i to ratou tumatetenga ki runga iaia, kia taakaaka ia ratou uaorai, e kia patoi atu ia Satani te Tiaporo. Ka akara ana tatou e akapeea te aru anga i teia ako i te tauturu anga ia koe kia vai ngaueue kore ua me meameaau taau tamaiti.

Uri i to Kotou Tumatetenga ki Runga ia Iehova

Kua kite a Iehova e e maata tikai te manamanata o te au metua me kite ratou e ka rokoia ta ratou tamariki e te kino i te takino ia ratou uaorai me kore ka takinoia mai e tetai ke. Te akataka maira te apotetoro ko Petero i te mataara okotai no te akono atu i teia e tetai atu au manamanata ke. Kua tata aia: “E uri i to kotou tumatetenga katoa ki runga [ia Iehova], koia oki te tiaki mai ia kotou.” (1 Petero 5:7) Eaa tikai teia patianga e te akapumaanaanga i puapinga maata ai ki te au metua o te au tamariki meameaau?

I te meangiti anga taau tamaiti, kua matakite tikai koe i te paruru anga iaia mei te au kino, e kare e kore kua ariu mai aia ki taau aratakianga akaperepere. Inara iaia e maata maira, penei kua iti mai toou mana akakeu ki runga iaia, kareka ra toou inangaro kia paruru iaia mei te kino kare te reira i meangiti mai. Te tikaanga, penei kua maata atu te reira.

Te openga i reira, i te meameaau anga to tamaiti e kua rokoia e te kino i te pae vaerua, i te pae manako ngakau, me kore i te pae kopapa, ka manako paa koe i reira e noou te apa. I akapera rai a Joy, tei taikuia atu i mua ake. Kua karanga aia e: “I te au ra ravarai, no te akataitaia ra e te manako puapinga kore ua, kua oki ua rai au i te akamanako i te au mea tei topa ki muri.” I taua au taime tikai ka inangaro a Iehova ia kotou kia “uri i to kotou tumatetenga katoa ki runga iaia.” Me akapera koe, ka tauturu mai aia ia koe. “E tuku koe i taau apainga kia Iehova ra,” i tuatua ai te tata taramo, “e nana koe e tauturu mai; kare rava aia e vaoo ua atu i te tangata  tuatua-tika kia akangaueueia ra.” (Salamo 55:22) Kua kite tikai a Joy i taua tu akapumaana ra. Kua akamarama mai aia e: “Kua akavaitata marie atura au kia Iehova i te tuatua anga no runga i te au mea i roto i toku ngakau. Kua maringiringi ua mai toku au manako ngakau, e ko teia tikai te akapumaanaanga maata roa atu.”

Ei metua apa ua, penei e maata taau au tarevake i rave i te utuutu anga mai i taau tamaiti. Inara eaa koe ka akamanako ua ai no runga i te reira? E mea papu e kare a Iehova e pera ana, no te mea te imene ra te tata taramo e: “Naringa koe, e Iehova, e akairo ana i te au ara nei, e te Atu, koai te ka mou?” (Salamo 130:3) Noatu kare koe i apa ana ei metua, penei ka meameaau rai taau tamaiti. No reira e akakite i toou manako ngakau kia Iehova na roto i te pure, e nana e tauturu mai ia koe kia akakoromaki. Inara, noou uaorai kia vai ngaueue kore ua i te tavini anga ia Iehova e kia kopae e auraka kia riro ia Satani, e maata atu te ka anoanoia koe kia rave.

Akamoraro ia Kotou Uaorai

“Ka akamoraro ia kotou uaorai i raro ake i te rima mana o te Atua,” i tata aia a Petero, “kia akangateitei aia ia kotou i te tuatau tikai.” (1 Petero 5:6) Eaa i anoanoia ai te tu akaaka me meameaau taau tamaiti? Kapiti atu ki te akatupu anga i te au manako akava ngakau kino e te mamae, ka akatupu tetai tamaiti meameaau i te akama kia koe. Penei ka manamanata koe e kua takino taau tamaiti i te ingoa meitaki o toou pamiri, mei te mea tikai e kua akaateaia aia mei roto i te putuputuanga Kerititiano. Me kapitiia te akama e te manako akaapa ia koe uaorai, penei ka riro te reira ei akaparuparu ia koe kia kore e aere ki te au uipaanga Kerititiano.

I te akono anga i taua tu turanga ra, ka anoanoia koe kia taangaanga i te tu pakari tau. Te akamatakite maira a Maseli 18:1 e: “Ko tei tau kore i tetai ke, kua ketaketa ra i tona uaorai manako; kua patoi atu aia ki te au tuatua pakari katoa ra.” Na te aere putuputu anga ki te au uipaanga noatu toou tumatetenga, ka rauka mai ia koe tetai tumu puapinga roa atu no te ikuikuanga e te akamaroiroianga. “I te akamataanga, kare au i inangaro ana kia kite atu i tetai tangata,” i akakite ei a Joy. “Inara kua akamaara au kiaku uaorai i te puapinga o taku angaanga pae vaerua. Tetai, naringa au i noo ki te kainga, ka varenga ua au i te akamanako atu i toku au manamanata. Kua tauturu te au uipaanga iaku kia akamou i toku manako ki runga i te au mea akamaroiroi i te pae vaerua. Rekareka maata tikai au e kare au i akatakake mai iaku, e oti ngere atura i te turuturuanga akaperepere a toku au taeake e te au teina tuakana.”​—Ebera 10:24, 25.

E akamaara katoa, te au mema tataki tai o te pamiri e, “ei runga iaia uaorai ta te tangata ravarai apainga” ei Kerititiano. (Galatia 6:5) Te tapapa maira a Iehova i te au metua kia aroa e kia ako i ta ratou tamariki. Te tapapa katoa maira aia i te tamariki kia akarongo e kia akangateitei i to ratou metua. Me rave meitaki te au metua i te katoatoa anga i ta ratou ka rauka i te utuutu i ta ratou tamariki i roto i te “pakari ma te ako a te Atua,” ka rauka i te au metua uaorai tetai ingoa meitaki i mua i te Atua. (Ephesia 6:1-4) Me meameaau tetai tamaiti i te ako akaperepere a te metua, no te tamaiti uaorai te ingoa ka takinoia. “E kitea te tu o te tamaiti i tana au ravenga; i te meitaki anga e te tiratiratu,” e karanga ra a Maseli 20:11. E tika rava e kare te meameaau a Satani i takino ana i te ingoa o Iehova i rotopu i te aronga tei kite meitaki i te tikaanga.

E Patoi Atu Kotou i te Tiaporo

“E akono meitaki, e matakite,” e akamatakite maira a Petero. “Te aaere nei oki to kotou enemi ko te diabolo, mei te liona ngunguru ra, i te kimi anga i te tangata e pou iaia.” (1 Petero 5:8)  Mei te riona rai, e takete putuputu ana te Tiaporo i te aronga ou e te aronga kare i kite. I te au tuatau taito, e ori aere ua ana te riona i Iseraela e kua riro ei akatupu i te kino ki te au manu kainga. Me aere ke tetai punua mamoe mei te anana, ka riro aia ei takete mama ua. Penei ma te kore e akamanako, ka akatupu te tinana mamoe i te kino ki tona uaorai oraanga i te paruru i tana punua mamoe. Inara, kare e mamoe e autu ki runga ake i tetai riona noatu tona maatamaata. No reira, i anoanoia ai te au tiaki mataku kore ei paruru i te anana.​—1 Samuela 17:34, 35.

Ei paruru i tana mamoe akatutu ua mei te “liona ngunguru,” kua akataka a Iehova i tetai au tiaki pae vaerua kia akono i te anana i raro ake i “te Tiaki maata,” ia Iesu Karaiti. (1 Petero 5:4) Kua oronga a Petero ki taua au tangata ikiia ra i teia akoanga: “Ka angai i te anana a te Atua i roto ia kotou na, ka rave i te taoonga tiaki auraka ra no te akaueue, no te anoano ra; auraka no te apinga tika kore ra kia rauka, no te tae tikai ra o te ngakau.” (1 Petero 5:1, 2) Ma ta kotou taokotaianga ei au metua, ka rauka i reira i teia au tiaki i te tauturu i tetai mapu kia akatano i tona arataa i te pae vaerua.

Me anoanoia kia ako te au tiaki i taau tamaiti meameaau, penei ka inangaro koe i te paruru iaia mei te ako. Inara, e tarevake maata tikai te aru i taua arataa ra. Kua akakite a Petero: “Patoi atu ïa [ i te Tiaporo] ma te akarongo turori kore”​—auraka i te au tiaki pae vaerua.​—1 Petero 5:9.

Me Pakari te Ako

Mei te mea kare taau tamaiti e tataraara e e Kerititiano papetitoia aia, ka orongaia te akoanga pakari roa atu nona​—koia oki ka akaateaia aia mei roto i te putuputuanga. Mei teaa te maata ka rauka ia koe kia aravei e kia tuatua atu kiaia mei tera taime mai e aere ua atu, tei runga te reira i tona mataiti e tetai atu au turanga ke.

Me kare te tamaiti i tangata mamaata tikai e te noo ra i te kainga, kia akono rai koe i tona au anoano i te pae kopapa. Ka anoano katoaia aia kia tereniia e kia akoia, e naau tera apainga i te oronga i teia au mea nei. (Maseli 1:8-18; 6:20-22; 29:17) Penei ka inangaro koe i te rave i tetai apii Pipiria kiaia, te ka piri tika mai aia ki roto. Ka rauka ia koe i te apii kiaia i te au irava ke ke e te au puka tei orongaia mai e “te tavini akono meitaki e te pakari.” (Mataio 24:45) Ka rauka katoa ia koe i te apai i te tamaiti ki te au uipaanga Kerititiano e kia maani iaia kia noo ki ko ia koe. Pouroa teia au mea ka rauka kia raveia i te irinaki anga e ka akarongo aia ki te akoanga Tuatua Tapu.

E tuke rai te turanga mei te mea e kare te tangata i akaateaia i te tamariki e kare e noo ana ki te kainga. Kua ako te apotetoro ko Paulo i te au Kerititiano i Korinetia i taito e: “Auraka kotou e kapiti atu i te tangata e karangaia e taeake kia riro ei tangata kanga, e te noinoi apinga, e te akamori idolo, e te akakino, e te kona kava, e te aru; auraka katoa e kai atu i te manga i reira.” (1 Korinetia 5:11) Noatu te umuumuia ra kia aravei e kia tuatua, i te akono anga i tetai au akakoroanga pamiri e anoanoia ra, e tauta pakari ra te au metua i te kopae i te kapiti puapinga kore ua atu.

Me akoia tetai tamaiti tei tarevake e te au tiaki Kerititiano, kare i te mea meitaki kia patoi koe me kore kia akapuapinga kore ua i ta ratou angaanga tei akatumuia ki runga i te Pipiria. Kare te piri anga atu ki taau tamaiti meameaau e oronga mai i tetai paruruanga tika tikai mei te Tiaporo. Ko te tika, te takino ra koe i toou uaorai turanga pae vaerua. I tetai tua, na te turuturu anga i te au tautaanga a te au tiaki, ka vai rai koe ma te “akarongo turori kore” e ka rauka ia koe kia oronga i te tauturu meitaki roa atu no taau tamaiti.​—1 Petero 5:9.

Na Iehova Koe e Tauturu

Mei te mea e meameaau taau tamaiti, e akamaara e kare ko koe anake ua. Kua na roto ana rai tetai au metua i taua tu ra. Noatu eaa te au timataanga ta tatou ka kite, ka tauturu a Iehova ia tatou.​—Salamo 68:19.

E irinaki kia Iehova na roto i te pure. E taokotai putuputu atu ki te putuputuanga Kerititiano. Turuturu i te ako a te au tiaki tei ikiia. Na te pera anga, ka rauka ia koe kia vai ngaueue kore ua. E ka riro taau akaraanga meitaki ei tauturu i taau tamaiti kia ariu mai ki te patianga akaperepere a Iehova kia oki mai kiaia.​—Malaki 3:6, 7.

[Au Tutu i te kapi 18]

Kia rauka te maroiroi mei te pure e te putuputuanga Kerititiano