Akaraanga no te Tu Tika

KARE i roa akenei, kua aro atu a Nelma, e pakoti rouru tana angaanga i Cruzeiro do Sul i Paratiri, i tetai timataanga ki tona tu Kerititiano ngaueue kore. I te rokoia anga tona ngai e noo ra e te vai puke, kua ariki a Nelma i tetai au kakau tei orongaia mai e tetai o tana aronga e pakoti ana i te rouru. Iaia e akarakara ra na roto i te au kakau, kua kitea mai iaia tetai moni tei aiteite te maata ki te $1,000 Marike i roto i te au pute piripou.

Te moni tei kitea mai e Nelma, ka taeria te itu marama o tana moni angaanga, e ka anoano maata tikai aia i te reira. Kua kino takiri tona are i te vai puke, e kua pakokoia te maataanga o te au apinga a tona papa e te au mema o tona pamiri. Ka oti iaia i te ripea i tona kainga ki tera moni, e ka toe mai rai tetai ei tauturu i tona kopu tangata. Inara, kare i tika i to Nelma akava ngakau i tereniia e te Pipiria kia tapu mai i te moni.​—Ebera 13:18.

Mea mua i tera mai ra, kua aere aia ki te angaanga i mua ake i te au ora matauia o te pitiniti e kua aravei atu i taua vaine pitiniti ra tei oronga mai i te kakau. Kua akameitaki atu a Nelma iaia no te kakau inara kua akakite atu aia e kare e rauka iaia i te apai i tetai apinga tana i kite mai i roto i te reira. Kua rekareka tikai taua vaine ra i te ariki mai anga i te moni. Kua akataka aia i te reira ei tutaki i tana aronga angaanga. “Kare te tu tika i tetai mea ka kite putuputu koe,” i tuatua ai taua vaine pitiniti ra.

E tika rava e, kare tetai aronga e manako ana e e puapinga tikai to te tu tika. Kareka ra, e mea akaperepere maata roa te tu tika na te aronga e tauta ra i te akarekareka i te Atua ko Iehova. (Ephesia 4:25, 28) “Kare roa au e varea e te moe i te po naringa au kare i akapera,” i tuatua ai a Nelma.